ᠠᠭᠤᠯᠭᠠ ᠶᠢᠨ ᠳᠤᠪᠴᠢ᠄ ᠠᠷᠪᠠᠰ ᠠᠷᠵᠡᠢ ᠤᠷᠤᠨ ᠪᠣᠯ ᠴᠢᠩᠬᠢᠰ ᠬᠠᠭᠠᠨ ᠲᠡᠭᠷᠢ ᠳᠤ ᠬᠠᠯᠢᠭᠰᠠᠨ ᠤ ᠳᠠᠷᠠᠭᠠ ᠬᠠᠮᠤᠭ ᠠᠩᠬᠠ ᠬᠡᠷᠢᠶᠡᠰᠤᠨ ᠰᠢᠳᠦᠭᠡᠨ ᠤ ᠴᠠᠭᠠᠨ ᠤᠷᠳᠤ ᠶᠢ ᠪᠠᠶᠢᠭᠤᠯᠤᠭᠰᠠᠨ ᠭᠠᠵᠠᠷ ᠪᠤᠯᠬᠤ ᠮᠦᠷᠳᠡᠭᠡᠨ15 ᠳ᠋ᠤᠭᠠᠷ ᠵᠠᠭᠤᠨ ᠤ ᠳᠤᠮᠳᠠᠴᠢ ᠪᠠᠷ ᠮᠦᠨ ᠬᠦ ᠬᠠᠮᠤᠭ ᠮᠤᠩᠭᠤᠯ ᠤᠨ ᠶᠡᠷᠤᠩᠬᠡᠢ ᠶᠢᠨ ᠰᠢᠳᠦᠭᠡᠨ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠠᠩᠬᠠ ᠪᠦᠷᠢᠯᠳᠦᠭᠰᠡᠨ ᠭᠠᠵᠠᠷ ᠪᠤᠯᠤᠨᠠ ᠃ ᠦᠭᠦᠯᠡᠯ ᠳᠤ ᠴᠢᠩᠬᠢᠰ ᠬᠠᠭᠠᠨ ᠤ ᠳᠠᠬᠢᠯᠭᠠ ᠶᠢᠨ ᠵᠠᠩ ᠦᠢᠯᠡ ᠪᠤᠯᠤᠨ ᠠᠷᠵᠡᠢ ᠠᠭᠤᠢ ᠶᠢᠨ ᠰᠣᠶᠣᠯ ᠯᠤᠭᠠ ᠬᠤᠯᠪᠤᠭᠳᠠᠭᠰᠠᠨ ᠬᠡᠬᠡᠷᠡ ᠶᠢᠨ ᠪᠠᠶᠢᠴᠠᠭᠠᠯᠳᠠ ᠂ ᠳᠤᠯᠭᠤᠷ ᠪᠢᠴᠢᠭ ᠂ ᠳᠤᠮᠤᠭ ᠶᠠᠷᠢᠶᠠ ᠂ ᠡᠷᠳᠡᠨ ᠤ ᠪᠠᠭᠤᠷᠢ ᠂ ᠠᠷᠬᠢᠸ᠋ ᠤᠨ ᠮᠠᠲ᠋ᠧᠷᠢᠶᠠᠯ ᠳᠤ ᠰᠠᠭᠤᠷᠢᠯᠠᠨ ᠂ ᠠᠷᠪᠠᠰ ᠠᠭᠤᠯᠠ ᠠᠷᠵᠡᠢ ᠠᠭᠤᠢ ᠪᠤᠯ ᠴᠢᠩᠬᠢᠰ ᠬᠠᠭᠠᠨ ᠳᠤ ᠬᠠᠮᠤᠭ ᠠᠩᠬᠠ ᠴᠠᠭᠠᠨ ᠤᠷᠳᠤ ᠪᠠᠶᠢᠭᠤᠯᠤᠭᠰᠠᠨ ᠤᠷᠤᠨ ᠪᠤᠯᠬᠤ ᠪᠦᠭᠡᠳ ᠮᠢᠩ ᠤᠯᠤᠰ ᠤᠮᠠᠷᠠᠳᠤ ᠶᠤᠸᠠᠨ ᠤ ᠦᠶᠡ ᠳᠤ ᠴᠢᠩᠬᠢᠰ ᠬᠠᠭᠠᠨ ᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢ ᠡᠷᠬᠡᠰᠢᠭᠦᠯᠦᠨ ᠳᠠᠬᠢᠵᠤ ᠪᠠᠶᠢᠭᠰᠠᠨ ᠭᠠᠵᠠᠷ ᠪᠤᠯᠬᠤ ᠶᠢ ᠴᠢᠨᠠᠭᠰᠢᠳᠠ ᠨᠤᠳᠠᠯᠠᠭᠰᠠᠨ ᠪᠠᠶᠢᠨᠠ ᠃
ᠵᠠᠩᠬᠢᠯᠠᠭᠠ ᠶᠢᠨ ᠦᠭᠡ᠄ ᠠᠷᠪᠠᠰ ᠠᠷᠵᠡᠢ︔ ᠴᠠᠭᠠᠨ ᠬᠤᠷᠤᠭᠠ ᠤᠷᠳᠤ︔ ᠭᠡᠰᠢᠭᠳᠡᠨ ᠰᠦᠮᠡ︔ ᠳᠠᠬᠢᠯᠭᠠ ᠶᠢᠨ ᠭᠠᠵᠠᠷ
ᠤᠷᠳᠤᠰ ᠨᠤᠳᠤᠭ ᠪᠤᠶᠤ ᠪᠤᠷᠤᠳᠤᠬᠤᠢ ᠤᠷᠤᠨ ᠪᠤᠯ ᠡᠵᠡᠨ ᠴᠢᠩᠬᠢᠰ ᠤᠨ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢ ᠡᠷᠬᠢᠮᠯᠡᠨ ᠳᠠᠬᠢᠭᠰᠠᠭᠠᠷ ᠢᠷᠡᠭᠰᠡᠨ ᠲᠡᠤᠬᠡᠳᠤ ᠭᠠᠵᠠᠷ ᠶᠤᠮ ᠃ ᠤᠷᠳᠤᠰ ᠭᠡᠳᠡᠭ ᠨᠡᠷᠡ ᠪᠤᠯ ᠤᠤᠯ ᠳᠠᠭᠠᠨ ᠴᠢᠩᠬᠢᠰ ᠬᠠᠭᠠᠨ ᠤ ᠶᠡᠭᠡ ᠤᠷᠳᠤ ᠶᠢ ᠰᠠᠬᠢᠨ ᠬᠠᠮᠠᠭᠠᠯᠠᠵᠤ ᠪᠠᠶᠢᠭᠰᠠᠨ ᠤᠯᠠᠨ ᠤᠪᠤᠭ ᠠᠶᠢᠮᠠᠭ ᠢᠶᠠᠷ ᠪᠦᠷᠢᠯᠳᠦᠭᠰᠡᠨ ᠭᠡᠰᠢᠭᠳᠡᠨ ᠴᠢᠷᠢᠭ ᠢ ᠵᠢᠭᠠᠵᠤ ᠪᠡᠶᠢᠵᠡᠢ ᠃ ᠳᠡᠳᠡ ᠮᠤᠩᠭᠤᠯ ᠤᠨ ᠦᠨᠳᠦᠷᠯᠢᠭ ᠠᠴᠠ ᠨᠡᠬᠦᠳᠡᠯᠯᠡᠨ ᠪᠤᠷᠤᠳᠤᠬᠤᠢ ᠳᠤ ᠰᠠᠭᠤᠷᠢᠰᠢᠨ ᠰᠠᠭᠤᠭᠰᠠᠨ ᠤ ᠳᠠᠷᠠᠭᠠ ᠤᠷᠳᠤᠰ ᠭᠡᠳᠡᠭ ᠨᠡᠷᠡ ᠠᠶᠢᠮᠠᠭ ᠪᠦᠯᠦᠭ ᠤᠨ ᠨᠡᠷᠡᠶᠢᠳᠤᠯ ᠪᠤᠯᠵᠤ ᠬᠤᠪᠢᠷᠠᠭᠰᠠᠨ ᠪᠠᠶᠢᠨᠠ ᠃ ᠴᠢᠩᠬᠢᠰ ᠬᠠᠭᠠᠨ1206 ᠤᠨ ᠳᠤ ᠮᠤᠩᠭᠤᠯ ᠤᠨ ᠶᠡᠭᠡ ᠬᠠᠭᠠᠨᠳᠤ ᠤᠯᠤᠰ ᠢ ᠪᠠᠶᠢᠭᠤᠯᠤᠭᠰᠠ ᠤ ᠳᠠᠷᠠᠭᠠ ᠂ ᠤᠤᠯ ᠤᠨ ᠠᠶᠢᠮᠠᠭ ᠪᠦᠯᠦᠭ ᠂ ᠤᠪᠤᠭ ᠤᠭᠰᠠᠭᠠ ᠶᠢᠨ ᠪᠦᠷᠢᠯᠳᠤᠯ ᠢ ᠡᠪᠳᠡᠵᠤ ᠂ ᠲᠦᠮᠡᠳᠤ ᠂ ᠮᠢᠩᠭᠠᠳᠤ ᠶᠢᠨ ᠲᠦᠷᠢᠮ ᠢ ᠬᠡᠷᠡᠭᠵᠢᠭᠦᠯᠵᠡᠢ ᠃ ᠳᠡᠭᠡᠭᠡᠳ ᠡᠯᠡ ᠮᠢᠩᠭᠠᠳᠤ ᠠᠴᠠ ᠶᠡᠭᠡ ᠤᠷᠳᠤᠨ ᠢ ᠰᠠᠬᠢᠨ ᠬᠠᠮᠠᠭᠠᠯᠠᠬᠤ ᠪᠠ ᠶᠡᠭᠡ ᠤᠷᠳᠤᠨ ᠳᠤ ᠦᠢᠯᠡᠴᠢᠯᠡᠬᠦ ᠰᠢᠳᠠᠷ ᠬᠠᠮᠠᠭᠠᠯᠠᠭᠴᠢ ᠪᠠ ᠦᠢᠯᠡᠴᠢᠯᠡᠭᠴᠢ ᠶᠢ ᠳᠡᠰᠬᠡᠨ ᠢᠷᠡᠭᠦᠯᠵᠤ ᠂ ᠤᠯᠠᠨ ᠠᠶᠢᠮᠠᠭ ᠪᠦᠯᠦᠭ ᠪᠠ ᠤᠪᠤᠭ ᠤᠭᠰᠠᠭᠠᠨ ᠤ ᠬᠦᠮᠦᠰ ᠢᠶᠠᠷ ᠪᠦᠷᠢᠯᠳᠦᠭᠰᠡᠨ ᠭᠡᠰᠢᠭᠳᠡᠨ ᠴᠡᠷᠢᠭ ᠪᠤᠢ ᠪᠤᠯᠵᠡᠢ ᠃ ᠴᠢᠩᠬᠢᠰ ᠬᠠᠭᠠᠨ ᠨᠠᠰᠤ ᠨᠦᠭᠴᠢᠭᠰᠡᠨ ᠤ ᠳᠠᠷᠠᠭᠠ ᠂ ᠴᠢᠩᠬᠢᠰ ᠬᠠᠭᠠᠨ ᠪᠤᠯᠤᠨ ᠳᠡᠭᠦᠨ ᠤ ᠬᠡᠷᠢᠶᠡᠰᠤᠨ ᠰᠢᠳᠦᠭᠡᠨ ᠳᠤ ᠳᠠᠬᠢᠯᠭᠠ ᠳᠠᠪᠢᠭ ᠡᠷᠭᠦᠳᠡᠭ ᠰᠢᠨᠡ ᠨᠢᠭᠡᠨ ᠠᠶᠢᠮᠠᠭ ᠪᠦᠯᠦᠭ ᠪᠤᠯᠵᠡᠢ ᠃ ᠶᠤᠸᠠᠨ ᠤᠯᠤᠰ ᠮᠦᠭᠦᠭᠰᠡᠨ ᠤ ᠳᠠᠷᠠᠭᠠ ᠂ ᠢᠯᠠᠩᠭᠤᠶᠠ ᠮᠤᠩᠭᠤᠯ ᠬᠠᠭᠠᠨᠳᠤ ᠤᠯᠤᠰ ᠤᠨ ᠨᠡᠶᠢᠰᠯᠡᠯ ᠪᠠᠶᠢᠭᠰᠠᠨ ᠬᠠᠷᠠ ᠬᠤᠷᠤᠮ ᠮᠢᠩ ᠤᠯᠤᠰ ᠤᠨ ᠴᠡᠷᠢᠭ ᠲᠤ ᠳᠠᠯᠬᠢᠭᠳᠠᠬᠤ ᠶᠢᠨ ᠦᠶᠡ ᠪᠠᠷ ᠭᠡᠰᠢᠭᠳᠡᠨ ᠨᠠᠷ ᠮᠤᠩᠭᠤᠯ ᠤᠨ ᠦᠨᠳᠦᠷᠯᠢᠭ ᠲᠠᠬᠢ ᠴᠢᠩᠬᠢᠰ ᠤᠨ ᠤᠷᠳᠤ ᠰᠢᠳᠦᠭᠡᠨ ᠢ ᠤᠯᠠᠨᠳᠠ ᠵᠠᠶᠢᠯᠠᠭᠤᠯᠤᠨ ᠰᠢᠯᠵᠢᠭᠦᠯᠵᠤ ᠂ ᠰᠠᠬᠢᠨ ᠬᠠᠮᠠᠭᠠᠯᠠᠵᠤ ᠂ ᠵᠠᠭᠤᠨ ᠰᠤᠨᠳᠠᠯᠠᠭᠰᠠᠨ ᠶᠡᠭᠡ ᠨᠡᠭᠦᠳᠡᠯ ᠬᠢᠵᠤ᠂15 ᠳ᠋ᠤᠭᠠᠷ ᠵᠠᠭᠤᠨ ᠤ ᠳᠤᠮᠳᠠᠴᠢ ᠪᠠᠷ ᠪᠤᠷᠤᠳᠤᠬᠤᠢ ᠳᠤ ᠤᠷᠤᠵᠤ ᠢᠷᠡᠵᠡᠢ ᠃
ᠤᠷᠳᠤᠰ ᠤᠨ ᠦᠨᠳᠦᠷᠯᠢᠭ ᠤᠨ ᠨᠤᠶᠠᠨ ᠤᠷᠭᠢᠯ —— ᠤᠷᠠᠨ ᠳᠦᠰᠢ ᠪᠣᠯ ᠬᠠᠳᠤᠨ ᠭᠤᠤᠯ ᠤᠨ ᠠᠷᠤ ᠦᠪᠦᠷ ᠳᠤᠬᠤᠢ ᠶᠢ ᠪᠠᠭᠳᠠᠭᠠᠭᠰᠠᠨ ᠡᠷᠳᠡᠨ ᠤ ᠤᠷᠳᠤᠰ ᠠᠶᠢᠮᠠᠭ ᠤᠨ ᠲᠦᠪ ᠤᠷᠤᠨ ᠪᠤᠯᠬᠤ ᠪᠦᠭᠡᠳ ᠰᠦᠷᠯᠢᠭ ᠰᠠᠶᠢᠬᠠᠨ ᠠᠷᠪᠠᠰ ᠤᠨ ᠠᠭᠤᠯᠠ ᠨᠢᠷᠤᠭᠤ ᠦᠭᠦᠯᠵᠢᠯᠡᠭᠰᠡᠨ ᠪᠡᠷᠬᠡ ᠪᠠᠷᠳᠠᠭᠠ ᠲᠠᠢ ᠪᠠᠶᠢᠯᠳᠤᠬᠤ ᠪᠤᠳᠤᠯᠭᠠ ᠶᠢᠨ ᠴᠢᠬᠤᠯᠠ ᠭᠠᠵᠠᠷ ᠶᠤᠮ ᠃ ᠤᠷᠠᠨ ᠳᠦᠰᠢ ᠶᠢᠨ ᠤᠷᠭᠢᠯ ᠳᠡᠭᠡᠷᠡ ᠶᠤᠸᠠᠨ ᠤᠯᠤᠰ ᠤᠨ ᠦᠶᠡ ᠶᠢᠨ ᠤᠪᠤᠭᠠ ᠪᠠᠶᠢᠬᠤ ᠪᠦᠭᠡᠳ ᠲᠦᠷᠪᠡᠨ ᠴᠠᠭ ᠤᠨ ᠳᠡᠯᠭᠡᠷᠡᠩᠭᠦᠢ ᠶᠡᠭᠡ ᠳᠠᠬᠢᠯᠭᠠ ᠲᠠᠢ ᠃ ᠤᠪᠤᠭᠠᠨ ᠤ ᠳᠠᠬᠢᠯᠭᠠ ᠪᠤᠯᠬᠤ ᠪᠦᠷᠢ ᠤᠪᠤᠭᠠᠨ ᠤ ᠲᠦᠷᠪᠡᠨ ᠳᠠᠯᠠ ᠳᠤ ᠳᠤᠰ ᠳᠤᠰ ᠠᠷᠪᠠᠨ ᠭᠤᠷᠪᠠᠨ ᠨᠤᠮᠤ ᠰᠤᠮᠤ ᠠᠭᠰᠠᠵᠤ ᠳᠠᠬᠢᠳᠠᠭ︔ ᠴᠢᠩᠬᠢᠰ ᠬᠠᠭᠠᠨ ᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢᠨ ᠳᠠᠬᠢᠯᠭᠠ ᠶᠢᠨ ᠰᠦᠨ ᠰᠠᠴᠤᠯᠢ ᠳᠤ ︽ᠠᠷᠪᠤᠰ ᠠᠯᠠᠱᠠ ᠬᠠᠨ︾ ᠢ ᠦᠴᠢᠵᠤ ᠰᠠᠴᠤᠯᠢ ᠡᠷᠭᠦᠬᠦ︔ ᠠᠷᠪᠠᠰ ᠠᠭᠤᠯᠠ ᠠᠷᠵᠡᠢ ᠤᠷᠤᠨ ᠳᠤ ᠮᠠᠰᠢ ᠤᠯᠠᠨ ︽ᠴᠠᠭᠠᠨ ᠬᠤᠷᠤᠭᠠ︾᠂ ︽ᠤᠯᠠᠨ ᠬᠤᠷᠤᠭᠠ︾ᠬᠡᠬᠦ ᠮᠡᠳᠤ ᠶᠢᠨ ᠡᠷᠳᠡᠨ ᠤ ᠪᠠᠭᠤᠷᠢ ᠢᠯᠡᠷᠡᠭᠰᠡᠨ ᠵᠡᠷᠭᠡ ᠠᠴᠠ ᠦᠵᠡᠪᠡᠯ ᠂ ᠪᠠᠷᠳᠠᠭᠠᠳᠤ ᠠᠭᠤᠯᠠᠨ ᠳᠤ ᠮᠤᠩᠭᠤᠯᠴᠤᠳ ᠤᠨ ᠶᠡᠷᠤᠩᠬᠡᠢ ᠶᠢᠨ ᠰᠢᠳᠦᠭᠡᠨ ᠪᠤᠯᠤᠭᠰᠠᠨ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢ ᠤᠷᠳᠤ ᠬᠤᠭᠤᠴᠠᠭᠠ ᠪᠠᠷ ᠤᠷᠤᠰᠢᠭᠤᠯᠤᠨ ᠳᠠᠬᠢᠵᠤ ᠰᠠᠬᠢᠨ ᠬᠠᠮᠠᠭᠠᠯᠠᠵᠤ ᠪᠠᠶᠢᠵᠡᠢ ᠃
ᠳᠤᠰ ᠦᠭᠦᠯᠡᠯ ᠳᠤ ᠴᠢᠩᠬᠢᠰ ᠬᠠᠭᠠᠨ ᠤ ᠳᠠᠬᠢᠯᠭᠠ ᠪᠤᠯᠤᠨ ᠠᠷᠵᠡᠢ ᠠᠭᠤᠢ ᠶᠢᠨ ᠰᠤᠶᠤᠯ ᠯᠤᠭᠠ ᠬᠤᠯᠪᠤᠭᠳᠠᠭᠰᠠᠨ ᠬᠡᠬᠡᠷᠡ ᠶᠢᠨ ᠪᠠᠶᠢᠴᠠᠭᠠᠯᠳᠠ ᠂ ᠳᠤᠯᠭᠤᠷ ᠪᠢᠴᠢᠭ ᠂ ᠳᠤᠮᠤᠭ ᠶᠠᠷᠢᠶᠠ ᠂ ᠡᠷᠳᠡᠨ ᠤ ᠪᠠᠭᠤᠷᠢ ᠂ ᠠᠷᠭᠢᠸ᠋ ᠮᠠᠲ᠋ᠧᠷᠢᠶᠠᠯ ᠳᠤ ᠰᠠᠭᠤᠷᠢᠯᠠᠨ ᠠᠷᠪᠠᠰ ᠠᠭᠤᠯᠠ ᠠᠷᠵᠡᠢ ᠠᠭᠤᠢ ᠪᠤᠯ ᠮᠢᠩ ᠤᠯᠤᠰ ᠤᠨ ᠦᠶᠡ ᠶᠢᠨ ᠦᠶᠡ ᠳᠤ ᠴᠢᠩᠬᠢᠰ ᠬᠠᠭᠠᠨ ᠤ ᠨᠠᠶᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢ ᠡᠷᠬᠡᠰᠢᠭᠦᠯᠦᠨ ᠳᠠᠬᠢᠵᠤ ᠪᠠᠶᠢᠭᠰᠠᠨ ᠭᠠᠵᠠᠷ ᠤᠷᠤᠨ ᠪᠤᠯᠬᠤ ᠶᠢ ᠴᠠᠭᠠᠰᠢᠳᠠ ᠨᠤᠳᠠᠯᠠᠬᠤ ᠭᠡᠰᠡᠨ ᠶᠤᠮ ᠃
ᠨᠢᠭᠡ ᠂ ᠠᠷᠪᠤᠬᠠ —— ᠠᠷᠪᠤᠰ —— ᠠᠷᠪᠠᠰ
ᠤᠳᠤ ᠶᠢᠨ ᠠᠷᠪᠠᠰ ᠬᠡᠬᠦ ᠠᠭᠤᠯᠠ ᠤᠰᠤᠨ ᠤ ᠨᠡᠷᠡᠶᠢᠳᠤᠯ ᠪᠤᠯᠤᠨ ᠵᠠᠰᠠᠭ ᠵᠠᠬᠢᠷᠭᠠᠨ ᠤ ᠬᠤᠪᠢᠶᠠᠷᠢ ᠶᠢᠨ ᠨᠡᠷᠡᠶᠢᠳᠤᠯ ᠢ 20 ᠳ᠋ᠤᠭᠠᠷ ᠵᠠᠭᠤᠨ ᠤ ᠳᠤᠮᠳᠠᠴᠢ ᠪᠤᠯᠳᠠᠯᠠ ᠪᠦᠷ ᠠᠷᠪᠤᠰ ᠭᠡᠵᠤ ᠪᠢᠴᠢᠵᠤ ᠪᠠᠶᠢᠭᠰᠠᠨ ᠶᠤᠮ ᠃ ᠠᠷᠪᠠᠰ ᠬᠡᠬᠦ ᠨᠡᠷᠡ ᠶᠢᠨ ᠢᠷᠡᠯᠳᠡ ᠶᠢᠨ ᠳᠤᠬᠠᠢ ᠳᠡᠤᠬᠡᠨ ᠳᠡᠮᠳᠡᠭᠯᠡᠯ ᠬᠤᠪᠤᠷ ᠪᠦᠭᠡᠳ ᠠᠷᠠᠳ ᠤᠨ ᠳᠤᠮᠳᠠ ︽ᠠᠷᠪᠠᠽᠠᠨᠠᠳᠢ︾ ᠬᠡᠬᠦ ᠳᠠᠷᠨᠢ ᠶᠢᠨ ᠦᠰᠦᠭ ᠠᠴᠠ ᠤᠯᠠᠷᠢᠵᠤ ᠢᠷᠡᠭᠰᠡᠨ ᠬᠡᠬᠦ ᠪᠤᠶᠤ ︽ᠢᠷᠪᠢᠰ ᠲᠠᠢ ᠠᠭᠤᠯᠠ︾ ᠬᠡᠳᠡᠭᠤᠨ ︽ᠢᠷᠪᠢᠰ︾ᠦᠰᠦᠭ ᠬᠤᠪᠢᠷᠠᠭᠠᠳ ︽ᠠᠷᠪᠠᠰ︾ ᠪᠤᠯᠤᠯᠠ ᠬᠡᠬᠦ ᠮᠡᠳᠤᠴᠢᠯᠡᠨ ᠶᠠᠷᠢᠳᠠᠭ ᠃ ᠦᠪᠦᠷ ᠮᠤᠩᠭᠤᠯ ᠤᠨ ᠨᠡᠶᠢᠬᠡᠮ ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠬᠦᠷᠢᠶᠡᠯᠡᠩ ᠤᠨ ᠰᠤᠳᠤᠯᠤᠭᠴᠢ ᠨᠠ᠊ ᠂ ᠪᠠᠳᠤᠵᠢᠷᠭᠠᠯ ︽︿ᠮᠤᠩᠭᠤᠯ ᠤᠨ ᠨᠢᠭᠤᠴᠠ ᠳᠤᠪᠴᠢᠶᠠᠨ﹀ ᠳᠠᠬᠢ ᠭᠠᠵᠠᠷ ᠤᠨ ᠨᠡᠷᠡ ︿ᠠᠷᠪᠤᠬᠠ﹀ ︿ᠴᠤᠭᠤᠷᠠᠬᠤᠨ﹀ ᠢ ᠰᠢᠨᠵᠢᠯᠡᠬᠦ ᠨᠢ︾ ᠬᠡᠬᠦ ᠦᠭᠦᠯᠡᠯ ᠨᠡᠶᠢᠳᠡᠯᠡᠵᠤ ᠂ ︽ᠮᠤᠩᠭᠤᠯ ᠤᠨ ᠨᠢᠭᠤᠴᠠ ᠳᠤᠪᠴᠢᠶᠠᠨ︾ ᠂ ︽ᠰᠤᠳᠤᠷ ᠤᠨ ᠴᠢᠭᠤᠯᠭᠠᠨ︾ ᠵᠡᠷᠭᠡ ᠳᠡᠤᠬᠡᠨ ᠳᠤᠯᠭᠤᠷ ᠲᠤ ᠳᠡᠮᠳᠡᠭᠯᠡᠭᠳᠡᠭᠰᠡᠨ ᠭᠠᠵᠠᠷ ᠭᠠᠵᠠᠷ ᠨᠡᠷᠡᠰ ᠢ ᠰᠢᠨᠵᠢᠯᠡᠬᠦ ᠪᠠᠷ ᠳᠠᠮᠵᠢᠭᠠᠳ ᠂ ︽ᠮᠤᠩᠭᠤᠯ ᠤᠨ ᠨᠢᠭᠤᠴᠠ ᠳᠤᠪᠴᠢᠶᠠᠨ︾ ᠳᠠᠬᠢ ︽ᠵᠠᠭᠤᠷᠠ ᠡᠪᠤᠯ ᠠᠷᠪᠤᠬᠠ ᠶᠢᠨ ᠤᠯᠠᠨ ᠬᠤᠯᠠᠳᠢ ᠠᠪᠠᠯᠠᠪᠠᠰᠤ ᠂ ᠴᠢᠩᠬᠢᠰ ᠬᠠᠭᠠᠨ ᠵᠤᠰᠤᠳᠤ ᠪᠤᠷᠤ ᠶᠢ ᠤᠨᠤᠵᠤ ᠪᠦᠯᠦᠭᠡ︾ ᠭᠡᠳᠡᠭ ᠤᠨ ︽ᠠᠷᠪᠤᠬᠠ︾ ᠪᠤᠯ ᠤᠳᠤ ᠶᠢᠨ ᠠᠷᠪᠠᠰ ᠮᠦᠨ ᠬᠡᠵᠤ ᠨᠤᠳᠠᠯᠠᠭᠰᠠᠨ ᠶᠤᠮ ᠃ ᠮᠢᠨᠤ ᠦᠵᠡᠬᠦ ᠪᠠᠷ ︽ᠠᠷᠪᠤᠬᠠ︾ ᠭᠡᠰᠡᠨ ᠦᠭᠡ ᠳᠠᠭᠤᠳᠠᠯᠭᠠ ᠶᠢᠨ ᠳᠠᠯᠠ ᠪᠠᠷ ᠪᠠ ᠳᠦᠷᠰᠤ ᠶᠢᠨ ᠳᠠᠯᠠ ᠪᠠᠷ ︽ᠠᠷᠪᠤᠰ︾ ᠪᠤᠯᠵᠤ ᠬᠤᠪᠢᠷᠠᠬᠤ ᠪᠤᠯᠤᠯᠴᠠᠭᠠ ᠶᠡᠭᠡ ᠪᠤᠢ ᠃ ᠮᠤᠩᠭᠤᠯ ᠬᠡᠯᠡᠨ ᠤ ᠶᠠᠷᠢᠶᠠᠨ ᠤ ᠬᠡᠯᠡᠨ ᠳᠤ ᠮᠤᠩᠭᠤᠯ ᠦᠰᠦᠭ ᠤᠨ ᠪᠤᠭᠤᠨᠢ ᠡᠭᠡᠰᠢᠭ ᠭᠡᠭᠡᠭᠳᠡᠨ ᠬᠡᠯᠡᠭᠳᠡᠬᠦ ᠦᠵᠡᠭᠳᠡᠯ ᠳᠡᠩᠳᠡ ᠳᠤᠬᠢᠶᠠᠯᠳᠤᠳᠠᠭ ᠃ ᠡᠶᠢᠮᠤ ᠠᠴᠠ ︽ᠠᠷᠪᠤᠬᠠ︾ ᠭᠡᠰᠡᠨ ᠦᠭᠡ ᠠᠮᠠ ᠪᠠᠷ ᠳᠠᠮᠵᠢᠭᠳᠠᠬᠤ ᠳᠠᠭᠠᠨ ︽ᠠ︾ ᠡᠭᠡᠰᠢᠭ ᠨᠢ ᠭᠡᠭᠡᠭᠳᠡᠭᠡᠳ ︽ᠠᠷᠪᠤᠭ︾ ᠪᠤᠯᠵᠤ ᠪᠢᠴᠢᠭᠳᠡᠵᠡᠢ ᠃ ᠳᠠᠬᠢᠪᠠᠯ ᠤᠶᠢᠭᠤᠷᠵᠢᠨ ᠮᠤᠩᠭᠤᠯ ᠦᠰᠦᠭ ᠤᠨ ︽ᠭ︾ ᠪᠠ ︽ᠰ︾ ᠠᠪᠢᠶᠠ ᠶᠢᠨ ᠪᠢᠴᠢᠯᠭᠡ ᠶᠢᠨ ᠲᠦᠷᠰᠦ ᠮᠠᠰᠢ ᠤᠶᠢᠷᠠᠯᠴᠠᠭᠠ ᠪᠠᠶᠢᠳᠠᠭ ᠪᠤᠯᠬᠤᠷ ᠬᠠᠭᠤᠯᠤᠨ ᠪᠢᠴᠢᠬᠦ ᠶᠠᠪᠤᠴᠠ ᠳᠤ ︽ᠭ︾ ᠢ ︽ᠰ︾ ᠪᠢᠴᠢᠭᠰᠡᠨ ᠠᠴᠠ ᠪᠤᠯᠵᠤ ︽ᠠᠷᠪᠤᠭ︾ ᠨᠢ ︽ᠠᠷᠪᠤᠰ︾ ᠪᠤᠯᠵᠤ ᠬᠤᠪᠢᠷᠠᠵᠡᠢ ᠃
︽ᠠᠷᠪᠤᠭᠠ︾ ︽ᠴᠤᠭᠤᠷᠠᠬᠤᠨ︾ ᠪᠤᠯ ᠪᠤᠭᠳᠠ ᠴᠢᠩᠬᠢᠰ ᠤᠨ ᠡᠴᠤᠰ ᠤᠨ ᠮᠦᠷ ᠢᠶᠠᠨ ᠦᠯᠡᠳᠡᠭᠡᠭᠰᠡᠨ ᠳᠠᠷᠬᠠᠨ ᠤᠷᠤᠨ ᠶᠤᠮ ᠃ ᠠᠷᠪᠤᠭᠠ ᠠᠭᠤᠯᠠᠨ ᠤ ᠬᠤᠶᠢᠳᠤ ᠭᠡᠰᠡᠭ ᠤᠨ ᠨᠢᠭᠡᠨ ᠡᠪᠡᠰᠤ ᠮᠤᠳᠤ ᠰᠠᠬᠤᠯᠠᠭ ᠂ ᠭᠤᠤᠯ ᠤᠰᠤ ᠳᠤᠩᠭᠠᠯᠠᠭ ᠪᠤᠷᠤᠳᠤᠯᠤᠭᠠᠢ ᠬᠡᠬᠦ ᠠᠭᠤᠯᠠᠨ ᠤᠷᠤᠢ ᠳᠡᠭᠡᠷᠡ ᠴᠢᠩᠬᠢᠰ ᠬᠠᠭᠠᠨ ᠤ ᠪᠠᠷᠢᠭᠰᠠᠨ ᠳᠠᠰᠢᠭᠤᠷ ᠨᠢ ᠤᠨᠠᠭᠰᠠᠨ ᠠᠴᠠ ︽ᠡᠪᠳᠡᠷᠡᠬᠦᠢ ᠲᠦᠷᠦ ᠳᠤ ᠬᠤᠷᠭᠤᠯᠤᠯᠳᠡᠢ ᠂ ᠡᠩᠬᠡ ᠲᠦᠷᠦ ᠳᠤ ᠨᠤᠳᠤᠭᠯᠠᠯᠳᠡᠢ ᠂ ᠦᠯᠡ ᠪᠤᠭᠤ ᠦᠳᠦᠭᠯᠡᠯᠳᠡᠢ ᠂ ᠦᠳᠡᠬᠦ ᠬᠦᠮᠦᠨ ᠠᠮᠤᠷᠯᠠᠯᠳᠡᠢ ᠭᠠᠵᠠᠷ ᠪᠤᠯᠤᠮᠤᠢ︾ ᠬᠡᠮᠡᠨ ᠡᠨᠡ ᠭᠠᠵᠠᠷ ᠢ ᠱᠠᠭᠰᠢᠨ ᠪᠠᠭ᠋ᠠᠷᠬᠠᠭᠰᠠᠨ ᠭᠡᠳᠡᠭ ᠃ ᠤᠳᠤ ᠶᠢᠨ ᠮᠧᠩ ᠰᠢ ᠪᠠᠯᠭᠠᠰᠤ ᠶᠢᠨ ᠶᠠᠬᠡᠪᠤᠯᠠᠭ ᠭᠠᠴᠠᠭᠠ ᠳᠤ ᠪᠤᠷᠤᠳᠤᠯᠤᠭᠠᠢ ᠭᠡᠳᠡᠭ ᠠᠭᠤᠯᠠ ᠪᠤᠢ ᠃ ᠳᠡᠷᠡ ᠨᠢ ᠶᠠᠭ ᠰᠠᠶ᠋ᠢᠬᠠᠨ ᠴᠢᠩᠬᠢᠰ ᠬᠠᠭᠠᠨ ᠵᠢᠷᠭᠤᠳᠠᠬᠢ ᠤᠳᠠᠭᠠ ᠳᠠᠩᠭᠤᠳ ᠤᠯᠤᠰ ᠢ ᠳᠠᠶᠢᠯᠬᠤ ᠦᠶᠡ ᠳᠤ ᠬᠠᠳᠤᠨ ᠭᠤᠤᠯ ᠤᠨ ᠳᠤᠬᠤᠢ ᠪᠠᠷ ᠤᠷᠳᠤᠰ ᠲᠤ ᠤᠷᠤᠵᠤ ᠢᠷᠡᠭᠰᠡᠨ ᠵᠠᠮ ᠳᠡᠭᠡᠷᠡ ᠪᠠᠶᠢᠳᠠᠭ ᠃ ᠪᠤᠷᠤᠳᠤᠯᠤᠭᠠᠢ ᠠᠭᠤᠯᠠ ᠶᠢᠨ ᠵᠡᠭᠦᠨ ᠪᠠᠯ ᠳᠤ ︽ᠬᠤᠷᠤᠭᠠᠳᠤ︾ ᠭᠡᠰᠡᠨ ᠪᠠᠭᠤᠷᠢ ᠪᠤᠢ ᠃ ︽ᠠᠯᠳᠠᠨ ᠤᠷᠳᠤᠨ ᠤ ᠲᠠᠶᠢᠯᠭᠠ︾ ᠬᠡᠬᠦ ᠨᠤᠮ ᠳᠤ᠄ ᠪᠤᠭᠳᠠ ᠴᠢᠩᠬᠢᠰ ᠳᠠᠩᠭᠤᠳ ᠲᠤ ᠠᠶᠠᠯᠠᠬᠤ ᠵᠠᠮ ᠵᠠᠭᠤᠷᠠ ᠠᠳᠡᠬᠢ ᠪᠤᠷᠤ ᠳᠤᠯᠤᠭᠠᠢ ᠭᠡᠳᠡᠭ ᠭᠠᠵᠠᠷ ᠢᠶᠠᠷ ᠦᠩᠭᠡᠷᠡᠬᠦ ᠳᠡᠭᠡᠨ ᠪᠠᠷᠢᠭᠰᠠᠨ ᠳᠠᠰᠢᠭᠤᠷ ᠨᠢ ᠬᠡᠨᠡᠳᠳᠡ ᠤᠨᠠᠭᠰᠠᠨ ᠳᠤ ᠳᠠᠭᠠᠭᠰᠠᠳ ᠨᠢ ᠳᠤᠤᠷᠠ ᠪᠠᠨ ᠠᠪᠴᠤ ᠦᠭᠬᠦ ᠭᠡᠰᠡᠨ ᠳᠤ ᠴᠢᠩᠬᠢᠰ ᠬᠠᠭᠠᠨ ᠠᠪᠤᠭᠤᠯᠤᠭᠰᠠᠨ ᠦᠭᠡᠢ ᠂ ︽ᠡᠨᠡ ᠯᠠᠪ ᠨᠢᠭᠡᠨ ᠤᠴᠢᠷ ᠪᠤᠢ ᠂ ᠮᠢᠨᠤ ᠦᠵᠡᠬᠦ ᠪᠠᠷ ᠡᠨᠡ ᠭᠠᠵᠠᠷ ᠦᠯ ᠪᠤᠭᠤ ᠪᠡᠯᠴᠢᠭᠡᠷᠯᠡᠯᠳᠡᠢ ᠂ ᠦᠪᠡᠭᠡᠯᠵᠢᠨ ᠰᠢᠪᠠᠭᠤ ᠦᠨᠳᠡᠭᠡᠯᠡᠯᠳᠡᠢ ᠂ ᠡᠪᠳᠡᠷᠡᠬᠦᠢ ᠲᠦᠷᠦ ᠶᠢ ᠪᠠᠶᠢᠭᠤᠯᠤᠯᠳᠡᠢ ᠂ ᠡᠨᠡ ᠪᠡᠶᠡ ᠵᠢᠷᠭᠠᠯᠳᠡᠢ ᠶᠡᠭᠡ ᠰᠠᠶᠢᠨ ᠭᠠᠵᠠᠷ ᠠᠮᠤᠢ ᠃ ᠬᠤᠵᠢᠮ ᠨᠠᠮᠠᠢᠢ ᠦᠬᠦᠪᠡᠰᠦ ᠠᠳᠡ ᠤᠷᠤᠰᠢᠭᠤᠯᠪᠠᠯ ᠵᠤᠬᠢᠮᠤᠢ︾ ᠬᠡᠵᠤ ᠰᠤᠷᠭᠠᠯ ᠬᠠᠶᠢᠷᠠᠯᠠᠭᠰᠠᠨ ᠳᠤᠬᠠᠢ ᠤᠷᠳᠤᠰ ᠲᠤ ᠤᠳᠠᠭᠠᠨ ᠵᠢᠯ ᠤᠯᠠᠮᠵᠢᠯᠠᠭᠳᠠᠭᠰᠠᠨ ᠳᠤᠮᠤᠭ ᠢ ᠳᠡᠮᠳᠡᠭᠯᠡᠵᠡᠢ ᠃
ᠴᠢᠩᠬᠢᠰ ᠬᠠᠭᠠᠨ ᠬᠠᠯᠢᠭᠰᠠᠨ ᠳᠤ ᠡᠵᠡᠨ ᠤ ᠠᠯᠳᠠᠨ ᠬᠡᠬᠦᠷ ᠢ ᠬᠠᠰᠠᠭ ᠳᠡᠷᠭᠡᠨ ᠳᠤ ᠳᠡᠭᠡᠭᠡᠵᠤ ᠳᠠᠬᠢᠨ ᠡᠨᠡ ᠭᠠᠵᠠᠷ ᠢᠶᠠᠷ ᠦᠩᠭᠡᠷᠡᠬᠦ ᠳᠤ ᠂ ᠬᠠᠰᠠᠭ ᠲᠡᠷᠭᠡ ᠪᠤᠯᠤ ᠳᠤ ᠬᠦᠷᠳᠡᠯᠡ ᠰᠢᠬᠢᠳᠴᠤ ᠂ ᠬᠦᠯᠦᠭ ᠮᠤᠷᠢᠳ ᠢᠶᠠᠷ ᠭᠦᠳᠡᠯᠭᠡᠨ ᠶᠠᠳᠠᠪᠠ ᠃ ᠰᠦᠨᠢᠳ ᠤᠨ ᠭᠡᠯᠤᠭᠡᠳᠡᠢ ᠪᠠᠭᠠᠳᠤᠷ᠄ ︽ᠡᠵᠡᠨ ᠪᠤᠭᠳᠠ ᠠᠩᠬᠠ ᠡᠭᠦᠪᠡᠷ ᠡᠴᠢᠬᠦᠢ ᠳᠤᠷ ᠢᠶᠠᠨ ᠪᠠᠭ᠋ᠠᠷᠬᠠᠨ ᠵᠠᠷᠯᠢᠭ ᠪᠤᠯᠤᠭᠰᠠᠨ ᠤ ᠰᠢᠯᠳᠠᠭᠠᠨ ᠢᠶᠠᠷ ᠡᠳᠤᠭᠡ ᠳᠤᠬᠠᠷ ᠬᠠᠰᠠᠭ ᠳᠡᠷᠭᠡᠨ ᠴᠢᠨᠡᠬᠡᠨ ᠰᠢᠭᠢᠳᠪᠡᠢ︾ ᠬᠡᠮᠡᠨ ᠮᠦᠷᠭᠦᠨ ᠦᠴᠢᠵᠤ ᠂ ᠡᠮᠦᠰᠦᠭᠰᠡᠨ ᠴᠮᠴᠠ ᠂ ᠦᠷᠭᠦᠭᠡ ᠭᠡᠷ᠂ ᠦᠷᠦᠭᠡᠰᠤᠨ ᠤᠶᠢᠮᠤᠰᠤᠨ ᠢ ᠳᠡᠨᠳᠡ ᠤᠩᠭᠤᠯᠠᠭᠰᠠᠨ ᠠᠴᠠ ᠠᠷᠪᠠᠰ ᠤᠷᠤᠨ ᠳᠤ ᠴᠢᠩᠬᠢᠰ ᠬᠠᠭᠠᠨ ᠤ ᠴᠠᠭᠠᠨ ᠤᠷᠳᠤ ᠬᠠᠮᠤᠭ ᠠᠩᠬᠠ ᠪᠤᠢ ᠪᠤᠯᠵᠡᠢ ᠃ ︽ᠴᠢᠩᠬᠢᠰ ᠬᠠᠭᠠᠨ ᠤ ᠤᠩᠭᠤᠨ ᠰᠢᠳᠦᠭᠡᠨ︾ ᠬᠡᠬᠦ ᠨᠤᠮ ᠤᠨ ᠬᠠᠭᠤᠳᠠᠰᠤᠨ ᠤ ᠡᠬᠢᠨ ᠳᠤ ︽ ᠂ ᠂ ᠂ ᠂ ᠂ ᠳᠡᠭᠦᠨ ᠤ ᠤᠳᠬᠠᠨ ᠬᠦᠪᠡᠭᠦᠨ ᠳᠤᠯᠤᠢ ︵1187——1232︶ ᠪᠤᠯᠤᠨ ᠦᠷᠯᠦᠭ ᠨᠤᠶᠠᠳ ᠴᠢᠨᠳᠠᠷ ᠢ ᠨᠢ ᠡᠬᠡ ᠨᠤᠳᠤᠭ ᠲᠤᠨᠢ ᠬᠦᠷᠭᠡᠵᠤ ᠶᠠᠪᠤᠬᠤ ᠵᠠᠭᠤᠷᠠ ᠂ ᠮᠤᠨᠢ ᠶᠢᠨ ᠬᠤᠰᠢᠭᠤ ︵ᠤᠷᠳᠤᠰ︶ ᠳᠤ ︿ᠡᠵᠡᠨ ᠤ ᠴᠠᠭᠠᠨ ᠤᠷᠳᠤ﹀ ᠪᠠᠶᠢᠭᠤᠯᠤᠨ ᠂ ︿ᠬᠠᠨ ᠶᠡᠭᠡ ᠵᠠᠶᠢᠰᠠᠩ ᠤᠳ ᠤᠨ ᠳᠤᠯᠭᠠ ᠂ ᠬᠠᠮᠤᠭ ᠤᠯᠤᠰ ᠤᠨ ᠰᠢᠳᠦᠭᠡᠨ﹀ ᠪᠤᠯᠭᠠᠨ ᠳᠠᠬᠢᠵᠡᠢ︾ ᠭᠡᠰᠡᠨ ᠨᠢ ᠶᠠᠭ ᠡᠨᠡ ᠤᠴᠢᠷ ᠢ ᠬᠡᠯᠡᠵᠡᠢ ᠪᠠᠶᠢᠭᠠ ᠶᠤᠮ ᠃
ᠡᠶᠢᠮᠤ ᠠᠴᠠ ᠮᠤᠩᠭᠤᠯ ᠤᠨ ᠬᠠᠭᠠᠨ ᠤ ᠤᠷᠳᠤᠨ ᠤ ᠳᠡᠷᠭᠡᠳᠡᠬᠢ ᠤᠷᠢᠶᠠᠩᠬᠠᠨ ᠲᠦᠮᠡᠨ ᠤ ᠰᠠᠬᠢᠭᠰᠠᠨ ︽ᠠᠷᠤ ᠳᠠᠬᠢᠯᠪᠤᠷᠢ︾ ᠭᠡᠵᠤ ᠨᠡᠷᠡᠶᠢᠳᠴᠤ ᠪᠠᠶᠢᠭᠰᠠ ᠬᠠᠮᠤᠭ ᠮᠤᠩᠭᠤᠯ ᠤᠨ ᠶᠡᠷᠤᠩᠬᠡᠢ ᠶᠢᠨ ᠰᠢᠳᠦᠭᠡᠨ ᠤ ᠴᠠᠭᠠᠨ ᠤᠷᠳᠤ ᠶᠢ ᠪᠠᠶᠢᠭᠤᠯᠤᠭᠰᠠᠨ ᠠᠷᠪᠠᠰ ᠤᠷᠤᠨ ᠳᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠬᠡᠬᠦ ᠬᠠᠮᠤᠭ ᠮᠤᠩᠭᠤᠯ ᠤᠨ ᠶᠡᠷᠤᠩᠬᠡᠢ ᠰᠢᠳᠦᠭᠡᠨ ᠮᠦᠨᠬᠦ ᠠᠩᠬᠠ ᠪᠦᠷᠢᠯᠳᠤᠵᠡᠢ ᠃
ᠬᠤᠶᠠᠷ ᠂ ᠴᠠᠭᠠᠨ ᠬᠤᠷᠤᠭᠠ—— ᠰᠦᠯᠳᠡ ᠠᠭᠤᠯᠠ
ᠤᠳᠤᠭ ᠬᠤᠰᠢᠭᠤᠨ ᠤ ᠤᠤᠯ ᠤᠨ ᠠᠷᠪᠠᠰ ᠰᠤᠮᠤᠨ ᠤ ᠬᠡᠪᠴᠢᠶᠡᠨ ᠳᠤ ︽ᠬᠤᠷᠤᠭᠠᠳᠤ︾ ᠂ ︽ᠤᠯᠠᠨ ᠬᠤᠷᠤᠭᠠ︾ ᠂ ︽ᠴᠠᠭᠠᠨ ᠬᠤᠷᠤᠭᠠ︾ ᠂ ︽ᠴᠠᠭᠠᠨ ᠬᠤᠷᠤᠭᠠᠳᠤ︾ ᠭᠡᠰᠡᠨ ᠨᠡᠷᠡᠳᠡᠢ ᠭᠠᠵᠠᠷ ᠤᠳ ᠪᠠᠶᠢᠳᠠᠭ ᠃ 2001 ᠤᠨ ᠤ 6 ᠳ᠋ᠤᠭᠠᠷ ᠰᠠᠷᠠ ᠳᠤ ᠂ ᠮᠢᠨᠤ ᠪᠡᠶᠡ ᠬᠤᠰᠢᠭᠤᠨ ᠤ ᠳᠡᠤᠬᠡ ᠶᠢᠨ ᠳᠤᠷᠠᠰᠬᠠᠯᠳᠤ ᠵᠦᠢᠯᠡᠰ ᠢ ᠬᠠᠮᠠᠭᠠᠯᠠᠵᠤ ᠬᠠᠮᠢᠶᠠᠷᠬᠤ ᠭᠠᠵᠠᠷ ᠤᠨ ᠳᠠᠷᠤᠭᠠ ᠪᠠᠳᠤᠵᠢᠷᠭᠠᠯ ᠲᠠᠢ ᠬᠠᠮᠳᠤ ︽ᠴᠠᠭᠠᠨ ᠬᠤᠷᠤᠭᠠ︾ ᠬᠡᠰᠡᠨ ᠨᠡᠷᠡᠶᠢᠳᠤᠯ ᠲᠠᠢ ᠬᠤᠶᠠᠷ ᠭᠠᠵᠠᠷ ᠲᠤ ᠤᠴᠢᠵᠤ ᠦᠵᠡᠭᠰᠡᠨ ᠶᠤᠮ ᠃ ᠨᠢᠭᠡ ᠨᠢ ᠤᠤᠯ ᠤᠨ ᠠᠷᠪᠠᠰ ᠰᠤᠮᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠰᠠᠭᠤᠭᠠ ᠭᠠᠵᠠᠷ ᠢᠳᠡᠷᠡᠮᠡ ᠠᠴᠠ ᠪᠠᠷᠠᠭᠤᠨ ᠬᠤᠶᠢᠰᠢ15 ᠺᠢᠯᠤᠮᠧᠲᠷ ᠵᠠᠶᠢᠳᠡᠢ ᠪᠠᠶᠢᠭᠠ ᠴᠠᠭᠠᠨ ᠭᠤᠤᠯ ᠬᠡᠮᠡᠬᠦ ᠠᠭᠤᠯᠠᠨ ᠭᠤᠤ ᠳᠠᠬᠢ ᠴᠢᠯᠠᠭᠤ ᠪᠠᠷ ᠦᠷᠦᠭᠰᠡᠨ ᠲᠦᠷᠪᠡᠯᠵᠢᠨ ᠬᠡᠯᠪᠡᠷᠢ ᠶᠢᠨ ᠪᠠᠭᠤᠷᠢ ᠨᠤᠭᠤᠳ ᠪᠤᠯᠤᠨᠠ ᠃ ᠨᠦᠭᠦᠬᠡ ᠨᠢᠭᠡ ᠨᠢ ᠠᠷᠵᠡᠢ ᠠᠭᠤᠢ ᠠᠴᠠ ᠠᠰ ᠡᠮᠦᠨᠡᠰᠢ 5 ᠺᠢᠯᠤᠮᠧᠲᠷ ᠲᠤ ᠪᠤᠢ᠃ ᠳᠡᠭᠦᠨ ᠢ ︽ᠶᠡᠭᠡ ᠴᠠᠭᠠᠨ ᠬᠤᠷᠤᠭᠠ︾ ᠭᠡᠵᠤ ᠬᠡᠯᠡᠳᠡᠭ ᠃ ᠠᠳᠡ ᠴᠠᠭᠠᠨ ᠭᠤᠤᠯ ᠤᠨ ᠴᠠᠭᠠᠨ ᠬᠤᠷᠤᠭᠠ ᠰᠢᠭ᠋ ᠳᠡᠶᠢᠮᠤ ᠴᠢᠯᠠᠭᠤᠨ ᠬᠠᠰᠢᠶᠠ ᠶᠢᠨ ᠪᠠᠭᠤᠷᠢ ᠪᠠᠶᠢᠬᠤ ᠦᠭᠡᠢ ᠂ ᠵᠦᠪᠬᠡᠨ ᠮᠤᠩᠭᠤᠯ ᠭᠡᠷ ᠤᠨ ᠪᠠᠭᠤᠷᠢ ᠨᠤᠭᠤᠳ ᠪᠠᠶᠢᠭᠰᠠᠨ ᠨᠢ ᠪᠦᠤᠷ ᠲᠦᠤᠷ ᠮᠡᠳᠡᠭᠳᠡᠨᠡ ᠃ ᠳᠡᠭᠦᠨ ᠤ ᠠᠷᠤ ᠪᠠᠷ ᠨᠢ ᠪᠠᠶᠢᠭᠠᠯᠢ ᠶᠢᠨ ᠠᠶᠠᠨᠳᠠᠭᠠᠨ ᠪᠦᠳᠦᠭᠰᠡᠨ ᠵᠠᠭᠦᠨᠰᠢ ᠪᠠᠷᠠᠭᠤᠨᠰᠢ ᠴᠢᠭᠯᠡᠯ ᠲᠠᠢ ᠴᠢᠯᠠᠭᠤᠨ ᠭᠡᠷᠡᠮ ᠪᠤᠢ ᠃ ᠴᠠᠭᠠᠨ ᠬᠤᠷᠤᠭᠠ ᠬᠡᠬᠦ ᠨᠡᠷᠡ ᠶᠢᠨ ᠢᠷᠡᠯᠳᠡ ᠶᠢᠨ ᠳᠤᠬᠠᠢ ᠨᠤᠳᠤᠭ ᠤᠨ ᠬᠦᠮᠦᠰ ᠠᠴᠠ ᠠᠰᠠᠭᠤᠨ ᠰᠤᠷᠪᠤᠯᠵᠢᠯᠠᠭᠰᠠᠨ ᠳᠤ ᠳᠡᠳᠡ ᠵᠦᠪᠬᠡᠨ ᠠᠯᠢ ᠡᠷᠳᠡ ᠠᠴᠠ ᠴᠠᠭᠠᠨ ᠬᠤᠷᠤᠭᠠ ᠭᠡᠵᠤ ᠬᠡᠯᠡᠳᠡᠭ ᠢ ᠮᠡᠳᠡᠬᠦ ᠠᠴᠠ ᠪᠢᠰᠢ ᠂ ᠴᠤᠬᠤᠮ ᠮᠠᠯ ᠤᠨ ᠬᠠᠰᠢᠶᠠ ᠬᠤᠷᠤᠭᠠ ᠶᠢᠨ ᠬᠤᠷᠤᠭᠠ ᠶᠤᠮ ᠤᠤ︖ ᠡᠰᠡᠬᠦᠯᠡ ᠱᠠᠩ ᠬᠤᠷᠤᠭᠠ ᠶᠢᠨ ᠬᠤᠷᠤᠭᠠ ᠢ ᠬᠤᠷᠤᠭᠠ ᠶᠤᠮ ᠤᠤ︖ ᠭᠡᠳᠡᠭ ᠢ ᠮᠡᠳᠡᠬᠦ ᠦᠭᠡᠢ ᠪᠠᠶᠢᠯᠠ ᠃ ᠮᠤᠩᠭᠤᠯᠴᠤᠳ ᠸᠠᠩ ᠬᠦᠩ ᠢᠵᠠᠭᠤᠷᠳᠠᠨ ᠤ ᠰᠠᠭᠤᠷᠢᠰᠢᠯ ᠢ ᠬᠤᠷᠤᠭᠠ ᠭᠡᠵᠤ ᠬᠡᠯᠡᠳᠡᠭ ᠃ ᠵᠢᠱᠢᠶᠡᠯᠡᠪᠡᠯ ᠂ ᠶᠡᠭᠡ ᠵᠤᠬᠢᠶᠠᠯᠴᠢ ᠢᠨᠵᠠᠨᠠᠰᠢ ᠶᠢᠨ ᠡᠴᠢᠭᠡ ᠸᠠᠩᠴᠢᠨᠪᠠᠯᠠ ᠶᠢᠨ ᠤᠷᠳᠤᠨ ᠢ ︽ᠰᠢᠳᠤᠷᠭᠤ ᠪᠠᠳᠤ ᠬᠤᠷᠤᠭᠠ︾︔ ᠤᠳᠤᠭ ᠬᠤᠰᠢᠭᠤᠨ ᠤ ᠸᠠᠩ ᠤᠨ ᠤᠷᠳᠤᠨ ᠵᠠᠰᠠᠭ ᠶᠠᠮᠤ ᠶᠢ ᠤᠳᠤᠭ ᠱᠠᠩ ᠂ ᠤᠳᠤᠭ ᠬᠤᠷᠤᠭᠠ ᠂ ᠴᠢᠩᠬᠢᠰ ᠬᠠᠭᠠᠨ ᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢᠨ ᠵᠢᠭᠢᠯᠡᠵᠤ ᠪᠠᠶᠢᠭᠠ ᠭᠠᠵᠠᠷ ᠢ ᠡᠵᠡᠨ ᠬᠤᠷᠤᠭᠠ ᠂ ᠰᠦᠯᠳᠡ ᠶᠢᠨ ᠬᠤᠷᠤᠭᠠ︔ ᠴᠢᠩᠬᠢᠰ ᠤᠨ ᠤᠩᠭᠤᠨ ᠪᠠᠶᠢᠭᠠ ᠰᠤᠮᠤ ᠶᠢ ᠬᠤᠷᠤᠭᠠ ᠰᠤᠮᠤ ᠬᠡᠬᠦ ᠮᠡᠳᠤ᠃ ᠠᠷᠪᠠᠰ ᠤᠷᠤᠨ ᠳᠠᠬᠢ ᠬᠤᠷᠤᠭᠠ ᠨᠤᠭᠤᠳ ᠂ ᠴᠢᠩᠬᠢᠰ ᠤᠨ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢ ᠨᠢᠭᠤᠴᠠ ᠪᠠᠷ ᠵᠢᠭᠢᠯᠡᠨ ᠳᠠᠬᠢᠵᠤ ᠪᠠᠶᠢᠭᠰᠠᠨ ᠲᠠᠢ ᠬᠤᠯᠪᠤᠭᠠ ᠲᠠᠢ ᠃ ᠢᠯᠠᠩᠭᠤᠶᠠ ᠡᠳᠡᠭᠡᠷ ᠬᠤᠷᠤᠭᠠ ᠨᠤᠭᠤᠳ ᠢ ︽ᠤᠯᠠᠭᠠᠨ ᠬᠤᠷᠤᠭᠠ︾ ᠂ ︽ᠴᠢᠯᠠᠭᠤᠨ ᠬᠤᠷᠤᠭᠠ︾ ᠂ ︽ᠬᠤᠨᠢᠨ ᠬᠤᠷᠤᠭᠠ︾ ᠬᠡᠵᠤ ᠬᠡᠯᠡᠬᠦ ᠦᠭᠡᠢ ᠂ ᠬᠠᠷᠢᠨ ︽ᠴᠠᠭᠠᠨ ᠬᠤᠷᠤᠭᠠ︾ ᠭᠡᠵᠤ ᠬᠡᠯᠡᠳᠡᠭ ᠨᠢ ᠮᠤᠩᠭᠤᠯᠴᠤᠳ ᠴᠠᠭᠠᠨ ᠦᠩᠭᠡ ᠶᠢ ᠳᠡᠭᠡᠳᠦᠯᠡᠬᠦ ᠲᠠᠢ ᠬᠤᠯᠪᠤᠭᠠ ᠲᠠᠢ ᠃ ᠮᠦᠨ ᠴᠦ ︽ᠴᠠᠭᠠᠨ ᠤᠷᠳᠤ︾ ᠂ ︽ᠡᠵᠡᠨ ᠬᠤᠷᠤᠭᠠ︾ ᠭᠡᠳᠡᠭ ᠲᠠᠢ ᠬᠤᠯᠪᠤᠭᠠ ᠲᠠᠢ ᠶᠤᠮ ᠃ ᠡᠶᠢᠮᠤ ᠠᠴᠠ ᠡᠳᠡᠭᠡᠷ ᠴᠠᠭᠠᠨ ᠬᠤᠷᠤᠭᠠ ᠨᠤᠭᠤᠳ ᠪᠣᠯ ᠴᠢᠩᠬᠢᠰ ᠬᠠᠭᠠᠨ ᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠵᠢᠬᠢᠯᠡᠵᠤ ᠪᠠᠶᠢᠭᠰᠠᠨ ᠪᠠᠭᠤᠷᠢ ᠨᠤᠭᠤᠳ ᠪᠠᠶᠢᠬᠤ ᠶᠤᠰᠤᠳᠡᠢ ᠃ ᠢᠯᠠᠩᠭᠤᠶᠠ ︽ᠶᠡᠭᠡ ᠴᠠᠭᠠᠨᠬᠤᠷᠤᠭᠠ︾ ᠬᠡᠬᠦ ᠨᠢ ᠰᠡᠭᠦᠯ ᠤᠨ ᠦᠶᠡ ᠴᠢᠩᠬᠢᠰ ᠬᠠᠭᠠᠨ ᠪᠦᠷᠳᠡᠭᠡᠯᠵᠢᠨ ᠬᠠᠳᠤᠨ ᠤ ᠴᠤᠮᠴᠤᠭ ᠤᠷᠳᠤ ᠶᠢᠨ ᠤᠷᠤᠰᠢᠨ ᠰᠠᠭᠠᠳᠠᠭᠰᠠᠨ ᠭᠠᠵᠠᠷ ᠢ ︽ᠶᠡᠭᠡ ᠡᠵᠡᠨ ᠬᠤᠷᠤᠭᠠ︾ ᠭᠡᠳᠡᠭ ᠲᠠᠢ ᠮᠠᠰᠢ ᠢᠵᠢᠯᠢᠰᠢᠵᠤ ᠪᠠᠶᠢᠭᠠ ᠶᠤᠮ ᠃
ᠤᠷᠠᠨ ᠳᠦᠰᠢ ᠤᠷᠭᠢᠯ ᠠᠴᠠ ᠡᠮᠤᠨᠡᠰᠢ ᠴᠠᠩᠬᠤᠭ ᠤᠨ ᠭᠤᠤᠯ ᠤᠨ ᠡᠬᠢᠨ ᠳᠤ ᠂ ᠪᠤᠰᠤᠳ ᠠᠭᠤᠯᠠᠨ ᠠᠴᠠ ᠰᠠᠯᠤᠩᠬᠢᠳᠡ ᠦᠵᠡᠭᠳᠡᠬᠦ ᠨᠢᠭᠡᠨᠱᠤᠷᠤᠩ ᠠᠭᠤᠯᠠ ᠪᠤᠢ ᠃ ᠡᠭᠦᠨ ᠢ ᠨᠤᠳᠤᠭ ᠤᠨ ᠬᠦᠮᠦᠰ ᠠᠯᠠᠭ ᠰᠦᠯᠳᠡ ᠶᠢᠨ ᠠᠭᠤᠯᠠ ᠭᠡᠳᠡᠭ ᠃ ᠤᠳᠤ ᠶᠢᠨ ᠦᠬᠠᠢ ᠬᠤᠳᠠ ᠶᠢᠨ ᠬᠠᠶᠢᠨᠠᠨ ᠳᠤᠭᠤᠷᠢᠭ ᠤᠨ ᠵᠡᠭᠦᠨ ᠳᠤ ᠪᠠᠰᠠ ᠨᠢᠭᠡᠨ ᠱᠤᠷᠤᠩ ᠠᠭᠤᠯᠠ ᠪᠠᠶᠢᠬᠤ ᠶᠢ ᠬᠠᠷᠠ ᠰᠦᠯᠳᠡ ᠶᠢᠨ ᠠᠭᠤᠯᠠ ᠭᠡᠳᠡᠭ ᠃ ᠳᠤᠮᠳᠠᠳᠤ ᠤᠯᠤᠰ ᠤᠨ ᠠᠷᠠᠳ ᠤᠨ ᠴᠢᠯᠦᠭᠡᠯᠡᠭᠦ ᠴᠡᠷᠢᠭ ᠤᠨ ᠶᠡᠷᠤᠩᠬᠡᠢ ᠼᠠᠨᠮᠤ ᠶᠢᠨ ᠭᠠᠵᠠᠷ ᠠᠴᠠ1968 ᠤᠨ ᠳᠤ ᠬᠡᠮᠵᠢᠨ ᠵᠢᠷᠤᠭᠯᠠᠭᠰᠠᠨ1᠄ 50000 ᠤᠨ ᠭᠠᠵᠠᠷ ᠤᠨ ᠵᠢᠷᠤᠭ ᠳᠡᠭᠡᠷᠡ ︽苏勒特乌拉︾( ᠰᠦᠯᠳᠡ ᠠᠭᠤᠯᠠ) ᠭᠡᠵᠤ ᠳᠡᠮᠳᠡᠭᠯᠡᠵᠤ ᠪᠠᠶᠢᠨᠠ ᠃ ᠰᠦᠯᠳᠡ ᠳᠠᠬᠢᠯᠭᠠ ᠶᠢᠨ ᠵᠠᠩ ᠦᠢᠯᠡ ᠳᠤ ᠵᠢᠯ ᠪᠦᠷᠢ ᠶᠢᠨ ᠶᠡᠭᠡ ᠪᠠᠭᠠ ᠳᠠᠬᠢᠯᠭᠠ ᠠᠴᠠ ᠭᠠᠳᠠᠨᠠ ᠬᠠᠷᠠ ᠰᠦᠯᠳᠡ ᠶᠢᠨ ᠯᠤᠤ ᠵᠢᠯ ᠳᠤᠬᠢᠶᠠᠯᠳᠤᠬᠤ ᠪᠦᠷᠢ ᠳᠤᠭᠰᠢᠭᠤᠯᠬᠤ ᠂ ᠠᠯᠠᠭ ᠰᠦᠯᠳᠡ ᠶᠢ ᠪᠠᠷᠰ ᠵᠢᠯ ᠳᠤᠬᠢᠶᠠᠯᠳᠤᠬᠤ ᠪᠦᠷᠢ ᠳᠤᠭᠰᠢᠭᠤᠯᠬᠤ ᠪᠦᠭᠡᠳ ᠴᠠᠭ ᠲᠦᠷᠦ ᠶᠢᠨ ᠦᠢᠮᠡᠭᠡᠨ ᠂ ᠬᠤᠯᠠᠭᠠᠢ ᠳᠡᠭᠡᠷᠡᠮ ᠬᠤᠯᠬᠢᠳᠠᠬᠤ ᠂ ᠭᠠᠩ ᠭᠠᠴᠢᠭ ᠪᠤᠯᠬᠤ ᠂ ᠬᠢᠵᠢᠭ ᠡᠪᠡᠳᠴᠢᠨ ᠳᠡᠯᠭᠡᠷᠡᠬᠦ ᠵᠡᠷᠭᠡ ᠶᠡᠷᠤ ᠪᠤᠰᠤ ᠶᠢᠨ ᠤᠴᠢᠷ ᠳᠤᠬᠢᠶᠠᠯᠳᠤᠬᠤ ᠪᠦᠷᠢ ᠰᠦᠯᠳᠡ ᠪᠠᠨ ᠦᠨᠳᠦᠷ ᠠᠭᠤᠯᠠ ᠬᠠᠶᠢᠷᠬᠠᠨ ᠤ ᠤᠷᠤᠢ ᠳᠤ ᠵᠠᠯᠠᠨ ᠳᠤᠭᠰᠢᠭᠤᠯᠵᠤ ᠂ ᠡᠯᠳᠡᠪ ᠮᠠᠭᠤ ᠶᠠᠭᠤᠮᠠᠨ ᠳᠤ ᠳᠠᠷᠤᠯᠭᠠ ᠬᠢᠳᠡᠭ ᠃ ᠡᠶᠢᠮᠤ ᠠᠴᠠ ᠬᠠᠷᠠ ᠰᠦᠯᠳᠡ ᠶᠢᠨ ᠠᠭᠤᠯᠠ ᠂ ᠠᠯᠠᠭ ᠰᠦᠯᠳᠡ ᠶᠢᠨ ᠠᠭᠤᠯᠠ ᠪᠤᠯ ᠳᠤᠬᠠᠢ ᠶᠢᠨ ᠦᠶᠡ ᠶᠢᠨ ᠳᠠᠶᠢᠨ ᠳᠤ ᠮᠤᠷᠳᠠᠬᠤ ᠪᠤᠶᠤ ᠶᠠᠮᠠᠷ ᠨᠢᠭᠡᠨ ᠰᠢᠯᠳᠠᠭᠠᠨ ᠠᠴᠠ ᠪᠤᠯᠵᠤ ᠰᠦᠯᠳᠡ ᠳᠤᠭᠰᠢᠭᠤᠯᠬᠤ ᠦᠶᠡ ᠳᠤ ᠭᠡᠷᠡᠭᠯᠡᠵᠤ ᠪᠠᠶᠢᠭᠰᠠᠨ ᠳᠠᠯᠠᠪᠤᠷ ᠪᠤᠯᠤᠨᠠ ᠃ ᠰᠤᠨᠤᠰᠤᠯᠳᠠ ᠪᠠᠷ ᠳᠡᠭᠡᠷᠡ ᠵᠠᠭᠤᠨ ᠤ ᠦᠶᠡ ᠪᠤᠯᠳᠠᠯᠠ ᠠᠯᠠᠭ ᠰᠦᠯᠳᠡ ᠶᠢᠨ ᠠᠭᠤᠯᠠᠨ ᠤ ᠬᠠᠵᠠᠭᠤ ᠳᠤ ᠲᠡᠮᠤᠷ ᠳᠤᠭᠤᠯᠠᠭᠠ ᠪᠠᠶᠢᠭᠰᠠᠨ ᠭᠡᠨᠡ ᠃
ᠭᠤᠷᠪᠠ ᠂ ᠭᠡᠰᠢᠭᠳᠡᠨ—— ᠳᠠᠷᠬᠠᠳ
ᠠᠷᠵᠡᠢ ᠠᠭᠤᠢ ᠶᠢᠨ ᠰᠦᠮᠡ ᠶᠢᠨ ᠳᠤᠬᠠᠢ ︽ᠤᠳᠤᠭ ᠬᠤᠰᠢᠭᠤᠨ ᠤ ᠤᠶᠢᠯᠠᠯᠭᠠ︾ ᠶᠢᠨ ᠳᠡᠤᠬᠡ ᠶᠢᠨ ᠳᠤᠷᠠᠰᠬᠠᠯᠳᠤ ᠪᠠᠭᠤᠷᠢ ᠶᠢᠨ ᠭᠡᠰᠡᠭ ᠲᠤ᠄ ︽ᠶᠤᠸᠠᠨ ᠤᠯᠤᠰ ᠤᠨ ᠦᠶᠡ ᠳᠤ ᠠᠳᠡᠬᠢ ᠶᠢ ᠰᠠᠬᠢᠨ ᠬᠠᠮᠠᠭᠠᠯᠠᠵᠤ ᠪᠠᠶᠢᠭᠰᠠᠨ ᠭᠡᠰᠢᠭᠳᠡᠨ ᠠᠶᠢᠮᠠᠭ ᠤᠨ ᠨᠤᠶᠠᠨ ᠤ ᠪᠠᠶᠢᠭᠤᠯᠤᠭᠰᠠᠨ ᠰᠢᠳᠤᠭᠡᠨ ᠰᠦᠮᠡ ᠪᠤᠯᠤᠨᠠ︾ ᠭᠡᠰᠡᠨ ᠪᠦᠭᠡᠳ ᠰᠠ᠊ ᠂ ᠨᠠᠷᠠᠰᠤᠨ ᠂ ᠲᠡᠮᠤᠷᠪᠠᠭᠠᠳᠤᠷ ᠤᠨ ᠨᠠᠶᠢᠷᠠᠭᠤᠯᠤᠭᠰᠠᠨ ︽ᠤᠷᠳᠤᠰ ᠤᠨ ᠰᠦᠮᠡ ᠬᠡᠶᠢᠳ︾ ᠬᠡᠬᠦ ᠨᠤᠮ ᠳᠤ ᠴᠦ ︽ᠤᠯᠠᠮᠵᠢᠯᠠᠯᠳᠤ ᠶᠠᠷᠢᠶᠠ ᠪᠠ ᠵᠠᠷᠢᠮ ᠮᠡᠳᠡᠯᠭᠡᠳᠡᠨ ᠤ ᠬᠡᠯᠡᠬᠦ ᠪᠠᠷ ᠶᠤᠸᠠᠨ ᠤᠯᠤᠰ ᠤᠨ ᠰᠡᠭᠦᠯᠴᠢ ᠪᠤᠶᠤ ᠳᠡᠭᠦᠨ ᠠᠴᠠ ᠤᠷᠤᠢ ᠰᠢᠭ᠋ ᠦᠶᠡ ᠭᠡᠰᠢᠭᠳᠡᠨ ᠤ ᠨᠤᠶᠠᠨ ᠡᠨᠡ ᠭᠠᠵᠠᠷ ᠢᠰᠠᠬᠢᠨ ᠬᠠᠮᠠᠭᠠᠯᠠᠵᠤ ᠰᠠᠭᠤᠵᠤ ᠪᠠᠶᠢᠬᠤ ᠳᠠᠭᠠᠨ ᠬᠡᠷᠡᠭᠯᠡᠵᠤ ᠪᠠᠶᠢᠭᠰᠠᠨ ᠠᠭᠤᠢ ᠭᠡᠳᠡᠭ︾ ᠭᠡᠪᠡ ᠃
︽ᠮᠤᠩᠭᠤᠯ ᠤᠨ ᠨᠢᠭᠤᠴᠠ ᠳᠤᠪᠴᠢᠶᠠᠨ︾ ᠳᠤ ᠳᠡᠮᠳᠡᠭᠯᠡᠭᠰᠡᠨ ᠢᠶᠠᠷ1206 ᠤᠨ ᠳᠤ ᠴᠢᠩᠬᠢᠰ ᠬᠠᠭᠠᠨ ᠶᠡᠭᠡ ᠮᠤᠩᠭᠤᠯ ᠤᠯᠤᠰ ᠢ ᠪᠠᠶᠢᠭᠤᠯᠵᠤ ᠂ ᠤᠷᠢᠳᠠ ᠶᠢᠨ ᠨᠠᠶᠠᠨ ᠬᠡᠪᠳᠡᠭᠦᠯ ᠂ ᠳᠠᠯᠠᠨ ᠳᠤᠷᠬᠠᠭ ᠢᠶᠠᠷ ᠪᠦᠷᠢᠯᠳᠦᠭᠰᠡᠨ ᠭᠡᠰᠢᠭᠳᠡᠨ ᠢᠶᠠᠨ ᠦᠷᠭᠡᠳᠬᠡᠵᠤ ᠲᠦᠮᠡᠨ ᠭᠡᠰᠢᠭᠳᠡᠨ ᠪᠤᠯᠭᠠᠪᠠ ᠃ ᠭᠡᠰᠢᠭᠳᠡᠨ ᠴᠡᠷᠢᠭ ᠨᠢ ᠲᠦᠮᠡᠳ ᠂ ᠮᠢᠩᠭᠠᠳ ᠂ ᠵᠠᠭᠤᠳ ᠂ ᠠᠷᠪᠠᠳ ᠤᠨ ᠨᠤᠶᠠᠳ ᠤᠨ ᠬᠦᠪᠡᠭᠦᠳ ᠪᠠ ᠳᠦᠷᠢ ᠶᠢᠨ ᠬᠦᠮᠦᠨ ᠤ ᠭᠦᠪᠡᠭᠦᠳ ᠬᠢᠬᠡᠳ ᠳᠡᠳᠡᠨ ᠳᠠᠭᠠᠭᠤᠯᠤᠭᠰᠠᠨ ᠨᠦᠬᠦᠳ ᠢᠶᠠᠷ ᠪᠦᠷᠢᠯᠳᠤᠵᠤ ᠂ ᠴᠢᠩᠬᠢᠰ ᠤᠨ ᠭᠠᠪᠢᠶᠠᠳᠤ ᠰᠠᠶᠢᠳ ᠤᠨ ᠤᠷᠤᠭ ᠠᠴᠠ ᠠᠬᠠᠯᠠᠭᠴᠢ ᠳᠤᠮᠢᠯᠠᠳᠠᠭ ᠪᠤᠯᠬᠤᠷ ᠭᠡᠰᠢᠭᠳᠡᠨ ᠳᠤ ᠤᠯᠠᠨ ᠤᠪᠤᠭ ᠤᠨ ᠬᠦᠮᠦᠰ ᠤᠷᠤᠯᠴᠠᠭᠰᠠᠨ ᠪᠠᠶᠢᠨᠠ ᠃ ᠭᠡᠳᠡᠯᠡ ᠳᠡᠭᠦᠨ ᠤ ᠨᠤᠶᠠᠳ ᠠᠴᠠ ᠡᠬᠢᠯᠡᠭᠡᠳ ᠡᠩ ᠤᠨ ᠴᠡᠷᠢᠭ ᠬᠦᠷᠳᠡᠯᠡ ᠴᠢᠩᠬᠢᠰ ᠤᠨ ᠠᠯᠳᠠᠨ ᠤᠷᠤᠭᠳᠠᠨ ᠤ ᠬᠦᠮᠦᠨ ᠪᠠᠶᠢᠳᠠᠭ ᠦᠭᠡᠢ ᠃ ᠦᠪᠦᠷ ᠮᠤᠩᠭᠤᠯ ᠤᠨ ᠪᠠᠭᠰᠢ ᠶᠢᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠪᠠᠭᠰᠢ ᠨᠠᠰᠤᠨ᠋ᠦ᠌ᠯᠵᠡᠢ ︽ᠭᠡᠰᠢᠭᠳᠡᠨ ᠬᠢᠭᠡᠳ ᠳᠠᠷᠬᠠᠳ︾ ᠬᠡᠬᠦ ᠦᠭᠦᠯᠡᠯ ᠳᠡᠭᠡᠨ ᠳᠠᠷᠬᠠᠳ ᠬᠢᠭᠡᠳ ᠬᠠᠭᠠᠨ ᠲᠦᠷᠦ ᠶᠢᠨ ᠳᠠᠬᠢᠯᠭᠠ ᠨᠤᠭᠤᠳ ᠤᠨ ᠬᠠᠷᠢᠴᠠᠭᠠᠨ ᠳᠤ ᠵᠠᠳᠠᠯᠤᠯᠳᠠ ᠬᠢᠵᠤ ᠂ ᠳᠠᠷᠬᠠᠳ ᠤᠨ ᠡᠯᠡ ᠳᠠᠯᠠ ᠶᠢ ᠭᠡᠰᠢᠭᠳᠡᠨ ᠤ ᠬᠤᠯᠪᠤᠭᠳᠠᠬᠤ ᠳᠠᠯᠠ ᠲᠠᠢ ᠬᠠᠷᠢᠴᠠᠭᠤᠯᠤᠨ ᠰᠤᠳᠤᠯᠤᠭᠠᠳ ︽ᠳᠠᠷᠬᠠᠳ ᠪᠤᠯ ᠴᠢᠩ ᠤᠯᠤᠰ ᠤᠨ ᠦᠶᠡ ᠳᠤ ᠠᠷᠪᠠᠨ ᠴᠢᠭᠤᠯᠭᠠᠨ ᠠᠴᠠ ᠳᠡᠰᠭᠡᠨ ᠳᠠᠳᠠᠪᠤᠷᠢᠯᠠᠭᠳᠠᠭᠰᠠᠨ ᠬᠦᠮᠦᠰ ᠪᠢᠰᠢ ᠂ ᠬᠠᠷᠢᠨ13 ᠳ᠋ᠤᠭᠠᠷ ᠵᠠᠭᠤᠨ ᠤ ᠦᠶᠡ ᠭᠡᠰᠢᠭᠳᠡᠨ ᠤ ᠬᠤᠶᠢᠴᠢᠰ ᠪᠤᠯᠤᠨᠠ︾ ᠭᠡᠵᠤ ᠨᠤᠳᠠᠯᠠᠭᠰᠠᠨ ᠶᠤᠮ ᠃ ᠭᠡᠰᠢᠭᠳᠡᠨ ᠴᠡᠷᠢᠭ ᠤᠨ ᠨᠤᠶᠠᠳ ᠴᠠᠷᠪᠢ ᠴᠤᠯᠠ ᠲᠠᠢ ᠃ ᠭᠡᠰᠢᠭᠳᠡᠨ ᠨᠢ ᠠᠵᠢᠯ ᠡᠭᠦᠷᠭᠡ ᠪᠠᠷ ᠢᠶᠠᠨ ᠤᠯᠠᠨ ᠠᠷᠪᠢᠨ ᠳᠤᠰᠢᠶᠠᠯ ᠤᠨ ᠨᠡᠷᠡ ᠴᠤᠯᠠ ᠬᠡᠷᠡᠭᠯᠡᠵᠤ ᠪᠠᠶᠢᠪᠠ ᠃ ᠳᠤᠬᠠᠶᠢᠯᠠᠪᠠᠯ᠄ ᠪᠠᠭᠤᠷᠴᠢ ᠂ ᠳᠡᠷᠡᠰᠤᠴᠢ ᠂ ᠰᠢᠯᠪᠢᠴᠢ ᠂ ᠰᠢᠭᠦᠷᠴᠢ ᠂ ᠵᠤᠯᠠᠴᠢ ᠂ ᠡᠭᠦᠳᠡᠴᠢ ᠂ ᠪᠠᠯᠠᠭᠴᠢ ᠂ ᠵᠠᠰᠠᠭᠤᠯᠴᠢ ᠂ ᠬᠤᠷᠴᠢ ᠂ ᠦᠯᠳᠡᠴᠢ ᠂ ᠪᠠᠭᠠᠳᠤᠷ ᠂ ᠪᠢᠴᠢᠭᠡᠴᠢ ᠂ ᠵᠠᠯᠢᠴᠢ ᠂ ᠰᠢᠪᠠᠭᠤᠴᠢ ᠂ ᠠᠭᠳᠠᠴᠢ ᠂ ᠳᠡᠮᠡᠭᠡᠴᠢ ᠂ ᠬᠤᠨᠢᠴᠢ ᠂ ᠮᠤᠷᠢᠴᠢ ᠂ ᠬᠠᠷᠠᠴᠢ ᠂ ᠭᠡᠷ ᠤᠨ ᠬᠦᠪᠡᠭᠦᠳ—— ᠢᠨᠵᠢ ︵ᠬᠠᠮᠢᠶᠠᠷᠤᠭᠴᠢ︶ ᠂ ᠤᠯᠠᠭᠠᠴᠢ ᠂ ᠬᠤᠯᠠᠭᠠᠶᠢᠴᠢ ᠂ ᠬᠦᠳᠤᠴᠢ ᠵᠡᠷᠭᠡ ᠪᠤᠯᠤᠨᠠ ᠃ ᠰᠡᠭᠦᠯ ᠤᠨ ᠦᠶᠡ ᠶᠢᠨ ᠳᠠᠷᠬᠠᠳ ᠲᠤ ᠮᠦᠨ ᠭᠡᠰᠢᠭ ᠬᠡᠬᠦ ᠵᠤᠬᠢᠶᠠᠨ ᠪᠠᠶᠢᠭᠤᠯᠤᠯᠳᠠ ᠪᠠᠶᠢᠬᠤ ᠪᠦᠭᠡᠳ ᠬᠤᠷᠴᠢᠨᠠᠷ ᠂ ᠠᠯᠳᠠᠨ ᠴᠠᠷᠪᠢ ᠂ ᠵᠠᠰᠠᠭᠤᠯ ᠂ ᠵᠠᠰᠠᠭᠤᠯᠴᠢ ᠂ ᠬᠠᠷᠢᠭᠤᠯᠴᠢ ᠂ ᠰᠢᠭᠦᠷᠡᠭᠴᠢ ᠂ ᠬᠠᠷᠪᠤᠭᠤᠯᠴᠢ ᠂ ᠠᠭᠳᠠᠴᠢᠨ ᠂ ᠰᠢᠯᠪᠢᠴᠢᠨ ᠂ ᠵᠤᠯᠠᠴᠢᠨ ᠬᠡᠬᠦ ᠤᠯᠠᠨ ᠭᠡᠰᠡᠭ ᠂ ᠶᠠᠮᠤ ᠂ ᠡᠭᠦᠷᠭᠡ ᠳᠤᠰᠢᠶᠠᠯ ᠪᠠᠶᠢᠳᠠᠭ ᠪᠤᠯᠬᠤᠷ ᠳᠠᠷᠬᠠᠳ ᠪᠤᠯ ᠭᠡᠰᠢᠭᠳᠡᠨ ᠤ ᠬᠤᠶᠢᠴᠢᠰ ᠪᠤᠯᠬᠤ ᠨᠢ ᠢᠯᠡᠷᠬᠡᠢ ᠪᠠᠶᠢᠨᠠ ᠃
ᠡᠶᠢᠮᠤ ᠠᠴᠠ ᠠᠷᠵᠡᠢ ᠠᠭᠤᠢ ᠶᠢᠨ ᠰᠦᠮᠡ ᠶᠢ ᠭᠡᠰᠢᠭᠳᠡᠨ ᠠᠶᠢᠮᠠᠭ ᠤᠨ ᠨᠤᠶᠠᠨ ᠤ ᠪᠠᠶᠢᠭᠤᠯᠤᠭᠰᠠᠨ ᠰᠢᠳᠦᠭᠡᠨ ᠰᠦᠮᠡ ᠂ ᠭᠡᠰᠢᠭᠳᠡᠨ ᠤ ᠨᠤᠶᠠᠨ ᠡᠨᠡ ᠭᠠᠵᠠᠷ ᠢ ᠰᠠᠬᠢᠨ ᠬᠠᠮᠠᠭᠠᠯᠠᠵᠤ ᠰᠠᠭᠤᠵᠤ ᠪᠠᠶᠢᠬᠤ ᠳᠠᠭᠠᠨ ᠭᠡᠷᠡᠭᠯᠡᠵᠤ ᠪᠠᠶᠢᠭᠰᠠᠨ ᠠᠭᠤᠢ ᠭᠡᠳᠡᠭ ᠨᠢ ᠴᠦᠮ ᠠᠷᠵᠡᠢ ᠠᠭᠤᠢ ᠪᠤᠯ ᠳᠠᠷᠬᠠᠳ ᠤᠨ ᠰᠦᠮᠡ ᠪᠡᠶᠢᠵᠡᠢ ᠭᠡᠰᠡᠨ ᠦᠭᠡ ᠶᠤᠮ ᠃ ᠮᠤᠩᠭᠤᠯ ᠳᠤ ᠪᠤᠷᠬᠠᠨ ᠤ ᠱᠠᠰᠢᠨ ᠳᠡᠯᠭᠡᠷᠡᠭᠰᠡᠨ ᠤ ᠳᠠᠷᠠᠭᠠ ᠂ ᠴᠢᠩᠬᠢᠰ ᠬᠠᠭᠠᠨ ᠢ ᠸᠴᠢᠷᠪᠠᠨᠢ ᠶᠢᠨ ᠬᠤᠪᠢᠯᠭᠠᠨ ᠬᠡᠮᠡᠨ ᠪᠤᠷᠬᠠᠨᠴᠢᠯᠠᠨ ᠳᠠᠬᠢᠭᠰᠠᠨ ᠪᠦᠭᠡᠳ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢᠨ ᠳᠠᠬᠢᠯᠭᠠ ᠳᠤ ᠳᠤᠰᠬᠠᠶᠢᠯᠠᠨ ᠤᠩᠰᠢᠯᠭᠠ ᠪᠢᠰᠢᠯᠭᠠᠯ ᠬᠢᠳᠡᠭ ᠨᠢᠩᠷᠤᠪ ᠬᠤᠷᠠᠬᠤ ᠳᠠᠷᠬᠠᠳ ᠤᠨ ᠰᠦᠮᠡ ᠬᠡᠶᠢᠳ ᠪᠤᠢ ᠪᠤᠯᠤᠭᠰᠠᠨ ᠪᠠᠶᠢᠨᠠ ᠃ ᠡᠭᠦᠨ ᠠᠴᠠ ᠦᠵᠡᠪᠡᠯ ᠠᠷᠵᠡᠢ ᠠᠭᠤᠢ ᠶᠢᠨ ᠰᠦᠮᠡ ᠨᠢ ᠠᠷᠪᠠᠰ ᠠᠭᠤᠯᠠᠨ ᠤ ᠪᠠᠷᠳᠠᠭᠠ ᠲᠠᠢ ᠭᠠᠵᠠᠷ ᠲᠤ ᠨᠢᠭᠤᠨ ᠬᠠᠳᠠᠭᠠᠯᠠᠵᠤ ᠂ ᠨᠠᠨᠳᠢᠩᠨᠠᠨ ᠳᠠᠬᠢᠵᠤ ᠪᠠᠶᠢᠭᠰᠠᠨ ᠴᠢᠩᠬᠢᠰ ᠬᠠᠭᠠᠨ ᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤᠨ ᠤ ᠳᠠᠬᠢᠯᠭᠠ ᠳᠤ ᠪᠢᠰᠢᠯᠭᠠᠯ ᠤᠨ ᠨᠤᠮ ᠤᠩᠰᠢᠳᠠᠭ ᠰᠦᠮᠡ ᠪᠠᠶᠢᠵᠡᠢ ᠃
ᠮᠢᠩ ᠤᠯᠤᠰ ᠤᠨ ᠦᠶᠡ ᠳᠤ ᠂ ᠭᠦᠨᠪᠢᠯᠢᠭᠳᠤ ᠮᠡᠷᠭᠡᠨ ᠵᠢᠨᠤᠩ ᠤᠷᠳᠤᠰ ᠤᠨ ᠤᠯᠠᠨ ᠤᠯᠠᠨ ᠶᠰᠤᠳᠠᠨ ᠤᠪᠤᠭᠳᠠᠨ ᠢ ᠶᠢᠰᠤᠨ ᠬᠦᠪᠡᠭᠦᠨ ᠳᠡᠭᠡᠨ ᠬᠤᠪᠢᠶᠠᠨ ᠵᠠᠬᠢᠷᠤᠭᠤᠯᠬᠤ ᠳᠤ ᠤᠤᠯ ᠤᠨ ᠤᠳᠤᠭ ᠬᠤᠰᠢᠭᠤᠨ ᠤ ᠨᠤᠳᠤᠭ ᠳᠡᠪᠢᠰᠭᠡᠷ ᠳᠡᠭᠡᠷᠡᠬᠢ ᠬᠡᠭᠦᠳ ᠰᠢᠪᠠᠭᠤᠴᠢᠨ ᠂ ᠤᠷᠠᠳ ᠲᠠᠩᠭᠤᠳ ᠤᠳᠤᠭ ᠤᠳ ᠢ ᠬᠤᠶᠠᠳᠤᠭᠠᠷ ᠬᠦᠪᠡᠭᠦᠨ ᠪᠠᠶᠢᠰᠠᠩᠬᠤᠷᠯᠠᠩ ︵ᠪᠠᠰᠠ ᠪᠶᠠᠰᠬᠤᠯᠠᠩ ᠬᠡᠬᠦ︶ ᠳᠠᠭᠠᠨ ᠵᠠᠬᠢᠷᠤᠭᠤᠯᠵᠡᠢ ᠃ ᠳᠡᠳᠡᠭᠡᠷ ᠤᠳᠤᠭ ᠤᠳ ᠪᠦᠷ ᠴᠢᠩᠬᠢᠰ ᠬᠠᠭᠠᠨ ᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢᠨ ᠳᠠᠬᠢᠯᠭᠠ ᠳᠤ ᠠᠯᠪᠠ ᠡᠷᠭᠦᠳᠡᠭ ᠳᠠᠷᠬᠠᠳ ᠪᠠᠶᠢᠵᠡᠢ ᠃ ᠰᠢᠪᠠᠭᠤᠴᠢᠨ ᠤᠳᠤᠭ ᠤᠨ ᠨᠤᠳᠤᠭ ᠳᠡᠪᠢᠰᠭᠡᠷ ᠤᠳᠤ ᠶᠢᠨ ᠤᠳᠤᠭ ᠬᠤᠰᠢᠭᠤᠨ ᠤ ᠬᠤᠶᠢᠳᠤ ᠭᠡᠰᠡᠭ ᠲᠤ ᠪᠠᠶᠢᠭᠰᠠᠨ ᠭᠡᠳᠡᠭ ᠢ ᠠᠷᠵᠡᠢ ᠠᠭᠤᠢ ᠠᠴᠠ ᠵᠡᠭᠦᠨᠰᠢ ᠬᠤᠷᠢᠭᠠᠳ ᠺᠢᠯᠤᠮᠧᠲᠷ ᠵᠠᠶᠢᠳᠡᠢ ᠪᠠᠶᠢᠭᠠ ᠰᠢᠪᠠᠭᠤᠴᠢᠨ ᠬᠡᠬᠦ ᠡᠷᠳᠡᠨ ᠤ ᠭᠠᠵᠠᠷ ᠤᠨ ᠨᠡᠷᠡ ᠬᠡᠷᠡᠴᠢᠯᠡᠵᠤ ᠪᠠᠶᠢᠨᠠ ᠃ ᠳᠠᠷᠤᠢ ᠭᠡᠰᠢᠭᠳᠡᠨ ᠤ ᠬᠤᠶᠢᠴᠢᠰ ᠪᠤᠯᠬᠤ ᠳᠠᠷᠬᠠᠳ ᠤᠨ ᠰᠢᠪᠠᠭᠤᠴᠢ ᠨᠠᠷ ᠡᠭᠦᠪᠡᠷ ᠰᠠᠭᠤᠷᠢᠰᠢᠵᠤ ᠪᠠᠶᠢᠭᠰᠠᠨ ᠪᠠᠶᠢᠨᠠ ᠃ ᠪᠠᠷᠠᠭᠤᠨ ᠭᠤᠷᠪᠠᠨ ᠲᠦᠮᠡᠨ ᠤ ᠤᠷᠳᠤᠰ ᠲᠦᠮᠡᠨ ᠳᠤ ᠰᠠᠭᠠᠳᠠᠭᠤᠯᠤᠨ ᠳᠠᠬᠢᠭᠰᠠᠨ ᠴᠠᠭᠠᠨ ᠭᠡᠷ ᠤᠨ ᠳᠠᠬᠢᠯᠭᠠᠨ ᠤ ᠦᠢᠯᠡ ᠶᠢᠨ ᠳᠤᠬᠠᠢ ︽ᠶᠡᠭᠡ ᠬᠤᠷᠢᠮ ᠤᠨ ᠶᠤᠰᠤᠨ︾ ᠬᠡᠮᠡᠬᠦ ᠪᠢᠴᠢᠭ ᠲᠤ᠄ ᠤᠷᠳᠤᠰ ᠲᠦᠮᠡᠨ ᠤ ᠡᠷᠭᠦᠭᠦ ᠵᠠᠭᠤᠨ ᠭᠡᠮ ᠠᠯᠪᠠᠨ ᠤ ᠳᠤᠳᠤᠷᠠ ︽ᠭᠡᠭᠦᠳ ᠂ ᠰᠢᠪᠠᠭᠤᠴᠢᠨ ᠂ ᠳᠤᠳᠤᠷᠠ ᠶᠢᠨ ᠲᠠᠩᠭᠤᠳ ᠲᠤ ᠨᠠᠢᠮᠠ︾ ᠬᠡᠵᠤ ᠪᠢᠴᠢᠵᠤ ᠪᠠᠶᠢᠬᠤ ᠨᠢ ᠠᠷᠵᠡᠢ ᠠᠷᠪᠠᠰ ᠤᠷᠴᠢᠮ ᠢᠶᠠᠷ ᠨᠤᠳᠤᠭᠯᠠᠵᠤ ᠪᠠᠶᠢᠭᠰᠠᠨ ᠰᠢᠪᠠᠭᠤᠴᠢᠨ ᠠᠶᠢᠮᠠᠭ ᠤᠨ ᠳᠠᠷᠬᠠᠳ ᠡᠵᠡᠨ ᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢ ᠰᠠᠬᠢᠵᠤ ᠪᠠᠶᠢᠭᠰᠠᠨ ᠪᠦᠭᠡᠳ ᠲᠦᠷᠪᠡᠨ ᠴᠠᠭ ᠤᠨ ᠳᠠᠬᠢᠯᠭᠠ ᠳᠤ ᠠᠯᠪᠠ ᠡᠷᠭᠦᠵᠤ ᠪᠠᠶᠢᠭᠰᠠᠨ ᠪᠦᠭᠡᠳ ᠲᠦᠷᠪᠡᠨ ᠴᠠᠭ ᠤᠨ ᠳᠠᠬᠢᠯᠭᠠ ᠳᠤ ᠠᠯᠪᠠ ᠡᠷᠭᠦᠵᠤ ᠪᠠᠶᠢᠭᠰᠠᠨ ᠢ ᠳᠤᠰᠬᠠᠵᠤ ᠪᠠᠶᠢᠨᠠ ᠃
ᠲᠦᠷᠪᠡ ᠂ ᠪᠤᠳᠤᠭᠤ ᠶᠢᠨ ᠰᠢᠯᠢ —— ᠪᠤᠳᠢ ᠴᠠᠭᠠᠨ ᠪᠤᠳᠤᠭᠤ
ᠤᠳᠤᠭ ᠬᠤᠰᠢᠭᠤᠨ ᠤ ᠮᠧᠩ ᠰᠢ ᠪᠠᠯᠭᠠᠰᠤ ᠶᠢᠨ ᠮᠧᠩ ᠰᠢ ᠠᠵᠤ ᠦᠢᠯᠡᠳᠪᠦᠷᠢ ᠶᠢᠨ ᠳᠤᠭᠤᠷᠢᠭ ᠠᠴᠠ ᠵᠡᠭᠦᠨᠳᠡᠢ ᠂ ᠴᠡᠭᠡᠯ ᠭᠤᠤᠯ ᠤᠨ ᠬᠤᠶᠢᠳᠤ ᠳᠡᠨᠵᠢᠨ ᠳᠤ ᠪᠤᠳᠤᠭᠤ ᠶᠢᠨ ᠰᠢᠯᠢ ᠭᠡᠰᠡᠨ ᠠᠭᠤᠯᠠ ᠲᠦᠰᠢᠵᠤ ᠤᠰᠤ ᠡᠪᠦᠷᠳᠦᠯᠡᠭᠰᠡᠨ ᠳᠡᠨᠵᠢᠯᠢᠭ ᠭᠠᠵᠠᠷ ᠪᠤᠢ ᠃ ᠪᠤᠳᠤᠭᠤ ᠶᠢᠨ ᠰᠢᠯᠢ ᠬᠡᠬᠦ ᠭᠠᠵᠠᠷ ᠤᠨ ᠨᠡᠷᠡ ᠶᠢᠨ ᠢᠷᠡᠯᠳᠡ ᠶᠢᠨ ᠳᠤᠬᠠᠢ ᠠᠷᠠᠳ ᠤᠨ ᠳᠤᠮᠳᠠ ᠬᠤᠶᠠᠷ ᠰᠠᠶᠢᠬᠠᠨ ᠳᠤᠮᠤᠭ ᠶᠠᠷᠢᠶᠠ ᠤᠯᠠᠮᠵᠢᠯᠠᠭᠳᠠᠵᠤ ᠪᠠᠶᠢᠳᠠᠭ ᠃ ᠨᠢᠭᠡ ᠨᠢ᠂ ᠴᠢᠩᠬᠢᠰ ᠬᠠᠭᠠᠨ ᠲᠡᠭᠷᠢ ᠳᠤ ᠬᠠᠯᠢᠭᠰᠠᠨ ᠤ ᠳᠠᠷᠠᠭᠠ ᠂ ᠡᠵᠡᠨ ᠤ ᠭᠡᠭᠡᠨ ᠴᠢᠨᠳᠠᠷ ᠢ ᠠᠳᠡ ᠤᠷᠤᠰᠢᠭᠤᠯᠵᠤ ᠂ ᠤᠩᠭᠤᠨ ᠤ ᠭᠠᠵᠠᠷ ᠢ ᠲᠦᠮᠡᠨ ᠠᠭᠳᠠ ᠶᠢᠨ ᠳᠤᠭᠤᠷᠡᠢ ᠪᠠᠷ ᠭᠢᠰᠭᠢᠯᠡᠨ ᠳᠠᠨᠢᠭᠳᠠᠬᠤ ᠦᠭᠡᠢ ᠪᠤᠯᠭᠠᠵᠤ ᠂ ᠮᠢᠩᠭᠠᠨ ᠴᠡᠷᠢᠭ ᠢᠶᠠᠷ ᠪᠢᠳᠡᠭᠦᠮᠵᠢᠯᠡᠨ ᠰᠠᠬᠢᠭᠤᠯᠵᠤ ᠂ ᠳᠠᠷᠠᠭᠠ ᠵᠢᠯ ᠪᠤᠯᠬᠤ ᠳᠤᠨᠢ ᠡᠪᠡᠰᠤ ᠮᠤᠳᠤ ᠤᠷᠭᠤᠭᠠᠳ ᠴᠡᠯᠭᠡᠷ ᠳᠠᠯᠠ ᠪᠤᠯᠵᠡᠢ ᠃ ᠳᠠᠬᠢᠯᠭᠠ ᠳᠠᠶᠢᠯᠭᠠ ᠬᠢᠬᠦ ᠶᠢᠨ ᠦᠶᠡ ᠳᠤ ᠤᠩᠭᠤᠨ ᠤ ᠭᠠᠵᠠᠷ ᠢ ᠤᠨᠤᠪᠴᠢᠳᠡᠢ ᠤᠯᠬᠤ ᠶᠢᠨ ᠲᠦᠯᠦᠭᠡ ᠳᠡᠷᠡ ᠳᠤᠬᠠᠢ ᠳᠤ ᠨᠢᠭᠡᠨ ᠪᠤᠳᠤᠭᠤ ᠲᠠᠢ ᠢᠩᠭᠡ ᠶᠢ ᠬᠦᠳᠦᠯᠦᠨ ᠢᠷᠡᠭᠡᠳ᠂ ᠪᠤᠳᠤᠭᠤ ᠶᠢ ᠨᠢ ᠤᠩᠭᠤᠨ ᠤ ᠳᠡᠷᠭᠡᠳᠡ ᠠᠯᠠᠭᠰᠠᠨ ᠭᠡᠨᠡ ᠃ ᠢᠩᠭᠢᠨ ᠳᠡᠮᠡᠭᠡ ᠦᠷᠡ ᠳᠡᠭᠡᠨ ᠳᠦᠢᠯ ᠤᠨ ᠬᠠᠶᠢᠷᠠᠳᠡᠢ ᠨᠢᠩᠵᠢᠨ ᠠᠮᠢᠳᠠᠨ ᠪᠤᠯᠬᠤᠷ ᠬᠡᠳᠦᠢ ᠵᠠᠶᠢᠯᠠᠭᠤᠯᠤᠭᠰᠠᠨ ᠴᠦ ᠂ ᠭᠡᠴᠢᠨᠡᠨ ᠤᠳᠠᠭᠠᠨ ᠪᠤᠯᠤᠭᠰᠠᠨ ᠴᠦ ᠪᠤᠳᠤᠭᠤ ᠶᠢᠨ ᠢᠶᠠᠨ ᠦᠷᠡᠭᠳᠡᠭᠰᠡᠨ ᠭᠠᠵᠠᠷ ᠢ ᠤᠯᠵᠤ ᠴᠢᠳᠠᠳᠠᠭ ᠭᠡᠨᠡ ᠃ ᠳᠡᠭᠡᠭᠡᠳ ᠳᠠᠬᠢᠯᠭᠠ ᠶᠢᠨ ᠴᠠᠭ ᠪᠤᠯᠬᠤ ᠳᠤ ᠡᠨᠡ ᠬᠦ ᠢᠩᠭᠡ ᠪᠠᠷ ᠵᠠᠮᠴᠢᠯᠠᠭᠤᠯᠵᠤ ᠂ ᠢᠩᠭᠡᠨ ᠳᠡᠮᠡᠭᠡ ᠤᠶᠠᠷᠠᠨ ᠪᠤᠶᠢᠯᠠᠵᠤ ᠨᠢᠯᠪᠤᠰᠤ ᠤᠨᠠᠭᠠᠭᠰᠠᠨ ᠭᠠᠵᠠᠷ ᠢ ᠪᠤᠭᠳᠠ ᠡᠵᠡᠨ ᠤ ᠮᠦᠩᠬᠡᠳᠡ ᠨᠤᠶᠢᠷᠰᠤᠭᠰᠠᠨ ᠭᠠᠵᠠᠷ ᠭᠡᠵᠤ ᠳᠠᠨᠢᠳᠠᠭ ᠭᠡᠨᠡ ᠃ ᠢᠩᠬᠢᠭᠡᠳ ᠪᠤᠳᠤᠭᠤ ᠶᠢᠨ ᠰᠢᠯᠢ ᠭᠡᠵᠤ ᠨᠡᠷᠡᠶᠢᠳᠦᠭᠰᠡᠨ ᠭᠡᠨᠡ ᠃ ᠨᠦᠭᠦᠭᠡ ᠨᠢᠭᠡ ᠳᠤᠮᠤᠭ ᠨᠢ ᠂ ᠡᠨᠡ ᠰᠢᠯᠢ ᠪᠤᠯ ᠴᠢᠩᠬᠢᠰ ᠤᠨ ᠪᠤᠳᠢ ᠴᠠᠭᠠᠨ ᠪᠤᠳᠤᠭᠤ ᠶᠢ ᠤᠶᠠᠵᠤ ᠪᠠᠶᠢᠭᠰᠠᠨ ᠭᠠᠵᠠᠷ ᠪᠤᠯᠬᠤᠷ ᠪᠤᠳᠤᠭᠤ ᠶᠢᠨ ᠰᠢᠯᠢ ᠭᠡᠵᠤ ᠭᠡᠨᠡ ᠃ ᠡᠷᠳᠡᠨ ᠠᠴᠠ ᠠᠳᠡ ᠨᠢᠭᠡᠨ ᠭᠡᠰᠡᠭ ᠶᠤᠸᠠᠮᠪᠤᠤ ᠬᠡᠯᠪᠡᠷᠢ ᠲᠠᠢ ᠳᠤᠮᠤ ᠴᠢᠯᠠᠭᠤ ᠪᠠᠶᠢᠵᠤ ᠂ ᠨᠢᠭᠡ ᠰᠡᠵᠢᠭᠦᠷ ᠲᠤᠨᠢ ᠨᠦᠭᠡ ᠲᠠᠢ ᠭᠡᠨᠡ ᠃ 2001 ᠤᠨ ᠤ 6 ᠳ᠋ᠤᠭᠠᠷ ᠰᠠᠷᠠ ᠳᠤ ᠪᠢᠳᠠ ᠬᠡᠭᠡᠷᠡ ᠶᠢᠨ ᠪᠠᠶᠢᠴᠠᠭᠠᠯᠳᠠ ᠬᠢᠵᠤ ᠪᠠᠶᠢᠬᠤ ᠳᠤ ᠪᠠᠶᠠᠨ᠋ᠦ᠌ᠨᠳᠦᠷ ᠭᠠᠴᠠᠭᠠᠨ ᠤ ᠳᠠᠯᠠᠭᠠᠳ ᠨᠠᠰᠤᠳᠡᠢ ᠮᠠᠯᠴᠢᠨ ᠴᠠᠭᠠᠨᠬᠡᠤᠬᠡᠨ ᠡᠨᠡ ᠳᠤᠮᠤᠭ ᠢ ᠨᠠᠳᠠ ᠶᠠᠷᠢᠵᠤ ᠦᠭᠭᠦᠭᠰᠡᠨ ᠶᠤᠮ ᠃ ᠳᠡᠷᠡ ᠭᠡᠯᠡᠬᠦ ᠳᠡᠭᠡᠨ ᠡᠨᠡ ᠶᠤᠸᠠᠮᠪᠤᠤ ᠬᠠᠳᠠ ᠰᠤᠶᠤᠯ ᠤᠨ ᠬᠤᠪᠢᠰᠬᠠᠯ ᠳᠤᠮᠳᠠ ᠤᠷᠪᠠᠯᠭᠠ ᠭᠠᠷᠭᠠᠭᠴᠢᠳ ᠴᠢᠩᠬᠢᠰ ᠤᠨ ᠶᠠᠭᠤᠮᠠ ᠭᠡᠵᠤ ᠳᠡᠯᠪᠡᠴᠢᠨ ᠬᠠᠶᠠᠵᠤ ᠂ ᠳᠡᠭᠦᠨ ᠤ ᠶᠡᠭᠡ ᠶᠡᠭᠡ ᠭᠡᠰᠡᠭ ᠬᠠᠳᠠ ᠶᠢ ᠨᠢ ᠪᠠᠶᠢᠰᠢᠩ ᠪᠠᠷᠢᠯᠭᠠ ᠶᠢᠨ ᠰᠠᠭᠤᠷᠢ ᠴᠢᠯᠠᠭᠤ ᠬᠢᠵᠤ ᠂ ᠦᠯᠡᠳᠡᠭᠰᠡᠨ ᠵᠢᠵᠢᠭ ᠵᠢᠵᠢᠭ ᠭᠡᠰᠡᠭ ᠨᠢ ᠤᠳᠤ ᠴᠦ ᠮᠦᠨ ᠤᠤᠯ ᠤᠷᠤ ᠳᠡᠭᠡᠷᠡ ᠪᠠᠨ ᠪᠠᠶᠢᠭᠰᠠᠭᠠᠷ ᠭᠡᠪᠡ ᠃ ᠳᠡᠭᠡᠭᠡᠳ ᠪᠢᠳᠠ ᠬᠠᠮᠳᠤ ᠪᠠᠷ ᠲᠡᠷᠡ ᠭᠠᠵᠠᠷ ᠤᠴᠢᠵᠤ ᠦᠵᠡᠭᠰᠡᠨ ᠳᠤ ᠦᠨᠡᠭᠡᠷ ᠬᠡᠮᠬᠡᠯᠡᠭᠳᠡᠭᠰᠡᠨ ᠴᠢᠯᠠᠭᠤ ᠭᠠᠵᠠᠷ ᠰᠠᠢ ᠦᠭᠡᠢ ᠳᠠᠷᠬᠠᠵᠤ ᠪᠠᠶᠢᠯᠠ ᠃
ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠭᠤᠷᠪᠠᠨ ᠰᠠᠷᠠ ᠶᠢᠨ ᠬᠤᠷᠢᠨ ᠨᠢᠭᠡᠨ ᠤ ᠡᠳᠤᠷ ᠶᠠᠪᠤᠭᠳᠠᠳᠠᠭ ᠢᠰᠡᠭᠡᠢ ᠳᠤᠭᠤᠷᠭᠠᠳᠠᠨ ᠤ ᠴᠠᠭᠠᠨ ᠰᠦᠷᠦᠭ ᠤᠨ ᠶᠡᠭᠡ ᠳᠠᠶᠢᠯᠭᠠ ᠳᠡᠭᠡᠷᠡ ᠂ ᠴᠢᠩᠬᠢᠰ ᠬᠠᠭᠠᠨ ᠤ ᠴᠠᠭᠠᠨ ᠤᠷᠳᠤᠨ ᠢ ᠤᠯᠠᠨ ᠭᠠᠵᠠᠷ ᠠᠴᠠ ᠨᠢᠭᠡᠨ ᠳᠤᠤᠷᠠ ᠴᠤᠭᠯᠠᠷᠠᠭᠤᠯᠤᠨ ᠵᠢᠭᠢᠯᠡᠭᠦᠯᠵᠤ ᠦᠪᠡᠳᠡᠭᠰᠢ ᠶᠡᠭᠡ ᠨᠠᠶᠢᠷ ᠬᠢᠳᠡᠭ ᠃ ᠢᠩᠬᠢᠬᠦ ᠳᠤ ᠴᠢᠩᠬᠢᠰ ᠬᠠᠭᠠᠨ ᠪᠤᠯᠤᠨ ᠪᠦᠷᠳᠡ ᠬᠠᠳᠤᠨ ᠤ ᠤᠩᠭᠤᠨ ᠰᠢᠳᠦᠭᠡᠨ ᠤ ᠬᠠᠭᠤᠷᠴᠤᠭ ᠢ ᠬᠤᠷ ᠰᠠᠭᠠᠳᠠᠭ ᠤᠨ ᠴᠤᠮᠴᠤᠭ ᠤᠷᠳᠤᠨ ᠳᠤᠳᠤᠷᠠ ᠤᠷᠤᠭᠤᠯᠵᠤ ᠂ ᠰᠢᠷᠠ ᠬᠠᠰᠠᠭ ᠳᠡᠭᠡᠷᠡ ᠵᠠᠯᠠᠭᠠᠳ ᠴᠠᠭᠠᠨ ᠳᠡᠮᠡᠭᠡ ᠪᠠᠷ ᠳᠡᠭᠡᠭᠡᠵᠤ ᠂ ᠵᠢᠬᠢ ᠳᠤ ᠪᠠᠭᠤᠳᠠᠭ ᠴᠢᠬᠤᠯᠠ ᠵᠢᠷᠤᠮ ᠪᠤᠢ ᠃ ᠡᠨᠡ ᠴᠠᠭᠠᠨ ᠳᠡᠮᠡᠭᠡᠨ ᠳᠤ ᠵᠢᠯ ᠪᠦᠷᠢ ᠨᠢᠭᠡ ᠤᠳᠠᠭᠠ ᠡᠵᠡᠨ ᠤ ᠰᠢᠷᠠ ᠬᠠᠰᠠᠭ ᠲᠤ ᠬᠦᠯᠬᠦ ᠦᠶᠡ ᠳᠤ ᠯᠠ ᠬᠦᠮᠦᠨ ᠤᠶᠢᠷᠠᠳᠬᠤ ᠠᠴᠠ ᠪᠢᠰᠢ ᠂ ᠪᠤᠰᠤᠳ ᠴᠠᠭ ᠲᠤ ᠶᠠᠮᠠᠷ ᠬᠦᠮᠦᠨ ᠴᠦ ᠤᠶᠢᠷᠠᠳᠴᠤ ᠪᠤᠯᠳᠠᠭ ᠦᠭᠡᠢ ᠤᠩᠭᠤᠨ ᠳᠡᠮᠡᠭᠡ ᠪᠤᠯᠤᠨᠠ ᠃ ︽ᠴᠢᠨᠬᠢᠰ ᠬᠠᠭᠠᠨ ᠤ ᠳᠠᠬᠢᠯᠭᠠ ᠶᠢᠨ ᠰᠤᠶᠤᠯ︾ ᠬᠡᠬᠦ ᠨᠤᠮ ᠲᠤ ︽᠁ ᠪᠠᠳᠠᠷᠠᠭᠤᠯᠳᠤ ᠲᠦᠷᠦ ᠶᠢᠨ ᠭᠤᠴᠢᠨ ᠬᠤᠶᠠᠳᠤᠭᠠᠷ ᠤᠨ ᠳᠤ ᠠᠯᠠᠱᠠ ᠴᠢᠨ ᠸᠠᠩ ᠤᠨ ᠶᠠᠮᠤᠨ ᠠᠴᠠ ᠶᠡᠭᠡ ᠵᠤᠤ ᠶᠢᠨ ᠴᠢᠭᠤᠯᠭᠠᠨ ᠳ᠋ᠠ ᠶᠢᠨ ᠶᠠᠮᠤᠨ ᠳᠤ ᠢᠷᠡᠭᠦᠯᠦᠭᠰᠡᠨ ᠪᠢᠴᠢᠭ ᠲᠤ ᠠᠯᠠᠱᠠ ᠠᠴᠠ ᠴᠢᠩᠬᠢᠰ ᠤᠨ ᠤᠷᠳᠤᠨ ᠢ ᠵᠠᠯᠠᠬᠤ ᠲᠡᠮᠡᠭᠡ ᠶᠢ ᠳᠠᠷᠬᠠᠳ ᠤᠨ ᠳᠠᠶᠢᠪᠤᠤ ᠭᠠᠷᠮᠠ ᠭᠡᠭᠴᠢ ᠠᠯᠠᠱᠠ ᠶᠢᠨ ᠨᠠᠰᠤᠨᠪᠠᠳᠤ ᠭᠡᠭᠴᠢ ᠲᠠᠢ ᠬᠤᠷᠰᠢᠵᠤ ᠬᠤᠳᠠᠯᠳᠤᠭᠰᠠᠨ ᠢ ᠴᠢᠩᠳᠠᠯᠠᠨ ᠪᠠᠶᠢᠴᠠᠭᠠᠵᠤ ᠵᠠᠯᠠᠬᠠᠭᠠᠰᠤᠭᠠᠢ ᠭᠡᠰᠡᠨ ᠪᠢᠴᠢᠭ ᠲᠤ ᠂ ᠡᠨᠡ ᠳᠡᠮᠡᠭᠡ ᠶᠢ ᠬᠡᠷᠬᠢᠨ ᠤᠯᠳᠠᠭ ᠢ ᠳᠤᠳᠤᠷᠬᠠᠶᠢᠯᠠᠵᠤ ᠪᠠᠶᠢᠨᠠ ᠬᠡᠬᠦ ᠳᠤ ᠂ ᠡᠨᠡ ᠳᠡᠮᠡᠭᠡ ᠪᠤᠯ ᠪᠤᠭᠳᠠ ᠴᠢᠩᠬᠢᠰ ᠤᠨ ᠪᠤᠮᠠᠨ ᠰᠦᠷᠦᠭ ᠤᠨ ᠪᠠᠳᠤ ᠴᠠᠭᠠᠨ ᠢᠩᠭᠡ ᠠᠴᠠ ᠭᠠᠷᠤᠭᠰᠠᠨ ᠠᠷᠪᠠᠨ ᠬᠤᠶᠠᠷ ᠵᠢᠯ ᠤᠨ ᠰᠢᠨᠵᠢ ᠶᠢ ᠪᠡᠶᠡ ᠳᠡᠭᠡᠨ ᠪᠦᠷᠢᠯᠳᠦᠭᠦᠯᠵᠤ ᠴᠢᠳᠠᠭᠰᠠᠨ ᠪᠤᠳᠢ ᠴᠠᠭᠠᠨ ᠪᠤᠳᠤᠭᠤ ᠶᠢᠨ ᠤᠷᠤ ᠠᠵᠢᠨᠢ ᠴᠠᠭᠠᠨ ᠳᠡᠮᠡᠭᠡᠨ ᠤ ᠤᠳᠬᠠ ᠲᠠᠢ ᠪᠤᠯᠬᠤᠷ ᠬᠠᠮᠢᠭᠠ ᠠᠴᠠ ᠳᠤᠩᠭᠠᠭᠰᠠᠨ ᠪᠤᠯᠪᠠᠴᠤ ᠵᠠᠪᠠᠯ ᠴᠡᠪᠡᠷ ᠴᠠᠭᠠᠨ ᠵᠢᠰᠤᠮ ᠤᠨ ᠳᠡᠮᠡᠭᠡ ᠪᠠᠶᠢᠬᠤ ᠶᠤᠰᠤᠳᠡᠢ ᠶᠤᠮ ᠭᠡᠪᠡ︾ ᠬᠡᠵᠤ ᠳᠡᠮᠳᠡᠭᠯᠡᠵᠤ ᠪᠠᠶᠢᠨᠠ ᠃
ᠳᠡᠭᠡᠷᠡᠬᠢ ᠳᠡᠮᠳᠡᠭᠯᠡᠯ ᠵᠢᠴᠢ ᠴᠢᠩᠬᠢᠰ ᠬᠠᠭᠠᠨ ᠲᠠᠶᠢᠯᠭᠠ ᠶᠢᠨ ᠵᠠᠩ ᠦᠢᠯᠡ ᠪᠤᠯᠤᠨ ᠪᠤᠳᠤᠭᠤ ᠶᠢᠨ ᠰᠢᠯᠢ ᠶᠢᠨ ᠨᠡᠷᠡ ᠶᠢᠨ ᠳᠤᠬᠠᠢ ᠬᠤᠶᠠᠳᠤᠭᠠᠷ ᠳᠤᠮᠤᠭ ᠢ ᠨᠢᠭᠳᠠᠯᠠᠵᠤ ᠦᠵᠡᠪᠡᠯ ᠂ ᠪᠤᠳᠤᠭᠤ ᠶᠢᠨ ᠰᠢᠯᠢ ᠪᠤᠯ ᠴᠢᠩᠬᠢᠰ ᠬᠠᠭᠠᠨ ᠤ ᠴᠠᠭᠠᠨ ᠤᠷᠳᠤ ᠠᠷᠪᠠᠰ ᠤᠨ ᠠᠭᠤᠯᠠᠨ ᠳᠤ ᠬᠠᠳᠠᠭᠠᠯᠠᠳᠠᠨ ᠳᠠᠬᠢᠵᠤ ᠪᠠᠶᠢᠬᠤ ᠦᠶᠡ ᠳᠤ ᠂ ᠪᠤᠳᠢ ᠴᠠᠭᠠᠨ ᠪᠤᠳᠤᠭᠤ ᠶᠢᠨ ᠲᠦᠷᠦᠯ ᠠᠷᠠᠯᠵᠢᠨ ᠳᠤᠩᠭᠠᠭᠳᠠᠭᠰᠠᠨ ᠠᠵᠢᠨᠡᠢ ᠶᠢᠨ ᠴᠠᠭᠠᠨ ᠳᠡᠮᠡᠭᠡ ᠶᠢ ᠪᠤᠳᠤᠭᠤᠨ ᠦᠶᠡ ᠳᠤᠨᠢ ᠠᠳᠡ ᠳᠠᠰᠬᠠᠯᠵᠢᠭᠤᠯᠵᠤ ᠪᠠᠶᠢᠭᠰᠠᠨ ᠭᠠᠵᠠᠷ ᠪᠤᠯᠤᠨᠠ ᠃
ᠳᠠᠪᠤ ᠂ ᠠᠷᠵᠡᠢ ᠠᠭᠤᠢ ᠠᠴᠠ ᠤᠯᠳᠠᠭᠰᠠᠨ ︽ᠠᠯᠳᠠᠨ ᠪᠢᠴᠢᠭ︾ ᠤᠨ ᠳᠠᠮᠳᠤᠭ ᠳᠠᠰᠤᠷᠬᠠᠢ
2000 ᠤᠨ ᠤ4 ᠳ᠋ᠤᠭᠡᠷ ᠰᠠᠷᠠ ᠶᠢᠨ ᠡᠬᠢ ᠪᠠᠷ ᠮᠢᠨᠤ ᠪᠡᠶᠡ ᠤᠳᠤᠭ ᠬᠤᠰᠢᠭᠤᠨ ᠤ ᠲᠡᠤᠬᠡ ᠶᠢᠨ ᠳᠤᠷᠠᠰᠬᠠᠯᠳᠤ ᠵᠦᠢᠯᠡᠰ ᠢ ᠬᠠᠯᠠᠭᠠᠯᠠᠵᠤ ᠬᠠᠮᠢᠶᠠᠷᠬᠤ ᠭᠠᠵᠠᠷ ᠤᠨ ᠳᠠᠷᠤᠭᠠ ᠪᠠᠳᠤᠵᠢᠷᠭᠠᠯ ᠲᠠᠢ ᠬᠠᠮᠳᠤ ᠠᠷᠵᠡᠢ ᠠᠭᠤᠢ ᠶᠢᠨ ᠨᠢᠭᠡᠳᠦᠭᠡᠷ ᠨᠤᠮᠧᠷᠳᠤ ᠠᠭᠤᠢ ᠶᠢᠨ ᠠᠳᠠᠷ ᠤᠨ ᠬᠠᠳᠠ ᠶᠡᠭᠡ ᠬᠡᠮᠵᠢᠶᠡ ᠪᠠᠷ ᠬᠤᠪᠬᠤᠷᠠᠨ ᠤᠨᠠᠭᠰᠠᠨ ᠪᠤᠯᠬᠤᠷ ᠠᠭᠤᠢ ᠶᠢᠨ ᠱᠠᠯᠠ ᠳᠤ ᠳᠠᠷᠤᠭᠳᠠᠭᠰᠠᠨ ᠳᠤᠷᠠᠰᠬᠠᠯᠳᠤ ᠵᠦᠢᠯᠡᠰ ᠲᠤ ᠠᠪᠤᠷᠠᠯᠳᠠ ᠶᠢᠨ ᠴᠢᠨᠠᠷ ᠲᠠᠢ ᠮᠠᠯᠳᠠᠯᠠᠭᠠ ᠬᠢᠵᠤ ᠴᠡᠪᠡᠷᠯᠡᠭᠰᠡᠨ ᠶᠤᠮ ᠃ ᠪᠢᠳᠠ ᠳᠡᠷᠡ ᠠᠭᠤᠢ ᠳᠤᠳᠤᠷᠠ ᠠᠴᠠ ᠮᠠᠰᠢ ᠠᠷᠪᠢᠨ ᠳᠦᠪᠡᠳ ᠮᠤᠳᠤᠨ ᠪᠠᠷ ᠪᠠ ᠮᠤᠩᠭᠤᠯ ᠮᠤᠳᠤᠨ ᠪᠠᠷ ᠤᠨ ᠪᠤᠷᠬᠠᠨ ᠤ ᠨᠤᠮ ᠤᠨ ᠲᠠᠮᠳᠤᠭ ᠳᠠᠰᠤᠷᠬᠠᠢ ᠪᠤᠶᠤ ᠬᠠᠶᠠ ᠨᠢᠭᠡ ᠬᠤᠶᠠᠷ ᠪᠦᠳᠦᠨ ᠬᠠᠭᠤᠳᠠᠰᠤ ᠂ ᠲᠦᠪᠡᠳ ᠮᠤᠩᠭᠤᠯ ᠭᠠᠷ ᠪᠢᠴᠢᠮᠡᠯ ᠨᠤᠮ ᠤᠨ ᠳᠠᠮᠳᠤᠭ ᠂ ᠪᠤᠯᠭᠤᠭᠰᠠ ᠬᠦᠭᠡ ᠴᠠᠭᠠᠰᠤᠨ ᠳᠡᠭᠡᠷᠡ ᠠᠯᠳᠠᠨ ᠤᠰᠤ ᠪᠠᠷ ᠪᠢᠴᠢᠭᠰᠡᠨ ᠨᠤᠮ ᠤᠨ ᠳᠠᠮᠳᠤᠭ ᠳᠠᠰᠤᠷᠬᠠᠢ ᠂ ᠲᠠᠩᠺᠠ ᠵᠢᠷᠤᠭ᠂ ᠱᠤᠭᠤᠮᠠᠯ ᠪᠤᠷᠬᠠᠨ ᠤ ᠬᠡᠮᠬᠡᠳᠡᠭ ᠭᠡᠰᠡᠭ ᠂ ᠭᠡ ᠤᠭᠠᠯᠵᠠ ᠲᠠᠢ ᠪᠠᠷᠢᠯᠭᠠ ᠶᠢᠨ ᠳᠤᠭᠤᠰᠬᠠ ᠵᠡᠷᠭᠡ ᠶᠢ ᠤᠯᠤᠭᠰᠠᠨ ᠶᠤᠮ ᠃ ᠡᠭᠦᠨ ᠤ ᠵᠠᠷᠢᠮ ᠭᠡᠰᠡᠭ ᠢ ᠪᠠᠳᠤᠵᠢᠷᠭᠠᠯ ᠂ ᠶᠠᠩ ᠬᠠᠢ ᠶᠢᠩ ᠬᠤᠶᠠᠭᠤᠯᠠ ᠳᠤᠰᠬᠠᠢ ᠰᠡᠳᠦᠪ ᠢᠶᠠᠷ ᠨᠡᠶᠢᠳᠡᠯᠡᠵᠤ ᠦᠩᠭᠡᠷᠡᠭᠰᠡᠨ ᠪᠢᠯᠡ ᠃ ᠤᠯᠠᠨ ᠳᠠᠮᠳᠤᠭ ᠤᠨ ᠳᠤᠳᠤᠷᠠ ᠨᠢᠭᠡᠨ ᠭᠡᠰᠡᠭ 0.19 ᠮᠧᠲᠷ×0.26ᠮᠧᠲᠷ ᠬᠤᠨᠢᠨ ᠴᠠᠭᠠᠰᠤᠨ ᠳᠡᠭᠡᠷᠡ ᠬᠤᠯᠤᠰᠤᠨ ᠦᠵᠦᠭ ᠢᠶᠠᠷ ᠪᠢᠴᠢᠭᠰᠡᠨ ᠤᠶᠢᠭᠤᠷᠵᠢᠨ ᠮᠤᠩᠭᠤᠯ ᠪᠢᠴᠢᠭ ᠤᠨ ᠳᠠᠮᠳᠤᠷᠬᠠᠢ ᠪᠠᠶᠢᠪᠠ ᠃ ᠡᠨᠡ ᠬᠦ ᠨᠢᠭᠡᠨ ᠬᠠᠭᠤᠳᠠᠰᠤ ᠶᠢᠨ ᠬᠤᠶᠠᠷ ᠳᠠᠯᠠ ᠳᠤ ᠨᠡᠶᠢᠳᠡ ᠲᠦᠴᠢᠭᠡᠳ ᠦᠰᠦᠭ ᠲᠠᠢ ᠪᠠᠶᠢᠭᠰᠠᠨ ᠪᠠ ᠢᠯᠡᠷᠬᠡᠢ ᠳᠠᠨᠢᠭᠳᠠᠬᠤ ᠪᠦᠳᠦᠨ ᠦᠰᠦᠭ ᠭᠤᠴᠢᠭᠠᠳ ᠪᠠᠶᠢᠯᠠ ᠃ ᠳᠡᠭᠦᠨ ᠳᠤ ᠭᠠᠷᠴᠠᠭ ᠦᠭᠡᠢ ᠪᠦᠭᠡᠳ ᠬᠠᠭᠤᠳᠠᠰᠤᠨ ᠤ ᠬᠡᠳᠤᠨ ᠳᠠᠯᠠ ᠨᠢ ᠤᠷᠠᠭᠳᠠᠵᠤ ᠦᠭᠡᠢ ᠪᠤᠯᠤᠭᠰᠠᠨ ᠪᠠ ᠳᠤᠮᠳᠠ ᠨᠢ ᠪᠠᠰᠠ ᠴᠤᠭᠤᠷᠠᠵᠤ ᠂ ᠭᠡᠳᠦᠶᠢᠪᠡᠷ ᠪᠦᠷᠢᠨ ᠪᠦᠳᠦᠨ ᠤᠳᠬᠠ ᠶᠢ ᠢᠯᠡᠳᠬᠡᠵᠤ ᠴᠢᠳᠠᠬᠤ ᠦᠭᠡᠢ ᠪᠤᠯᠪᠠᠴᠤ ᠳᠠᠨᠢᠭᠳᠠᠵᠤ ᠪᠠᠶᠢᠭᠠ ᠦᠰᠦᠭ ᠨᠢᠭᠡᠪᠦᠷᠢ ᠠᠴᠠ ᠨᠢ ᠴᠢᠩᠬᠢᠰ ᠬᠠᠭᠠᠨ ᠤ ᠳᠠᠬᠢᠯᠭᠠ ᠶᠢᠨ ᠦᠴᠢᠭ ᠳᠠᠭᠠᠳᠬᠠᠯ ᠤᠨ ᠰᠤᠷᠠᠭ ᠵᠠᠩᠬᠢ ᠮᠡᠳᠡᠭᠳᠡᠭᠡᠳ ᠪᠠᠶᠢᠬᠤᠯᠠᠷ ᠴᠦᠯᠳᠤ ᠮᠦᠯᠳᠤ ᠪᠠᠷ ︽ᠠᠯᠳᠠᠨ ᠪᠢᠴᠢᠭ︾ ᠤᠨ ᠳᠠᠮᠳᠤᠭ ᠳᠠᠰᠤᠷᠬᠠᠢ ᠬᠡᠵᠤ ᠨᠡᠷᠡᠯᠡᠯᠡ ᠃
ᠴᠢᠩᠬᠢᠰ ᠬᠠᠭᠠᠨ ᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢᠨ ᠲᠠᠶᠢᠯᠭᠠ ᠳᠠᠬᠢᠯᠭᠠ ᠶᠢᠨ ᠰᠠᠩ ᠂ ᠦᠴᠢᠭ ᠂ ᠢᠷᠦᠭᠡᠯ᠂ ᠳᠠᠭᠠᠳᠬᠠᠯ ᠂ ᠮᠢᠯᠢᠶᠠᠭᠤᠳ ᠂ ᠳᠦᠭᠡᠯ ᠂ ᠳᠠᠭᠤᠤ ᠂ ᠶᠠᠮᠤ ᠂ ᠬᠠᠤᠯᠢ ᠵᠡᠷᠭᠡ ᠪᠢᠴᠢᠭ ᠢ ᠶᠡᠷᠤᠩᠬᠡᠢ ᠳᠤᠨᠢ ︽ᠴᠢᠩᠬᠢᠰ ᠬᠠᠭᠠᠨ ᠤ ᠠᠯᠳᠠᠨ ᠪᠢᠴᠢᠭ︾ ᠭᠡᠵᠤ ᠬᠡᠯᠡᠳᠡᠭ ᠃ ᠴᠢᠩᠬᠢᠰ ᠬᠠᠭᠠᠨ ᠤ ᠳᠠᠶᠢᠯᠭᠠ ᠶᠢᠨ ︽ᠠᠯᠳᠠᠨ ᠪᠢᠴᠢᠭ︾ ᠮᠤᠩᠭᠤᠯ ᠤᠨ ᠬᠠᠭᠠᠨᠳᠤ ᠲᠦᠷᠦ ᠶᠢᠨ ᠦᠭᠡᠳᠡᠢ ᠬᠠᠭᠠᠨ ᠤ ᠦᠶᠡ ᠳᠤ ᠵᠤᠬᠢᠶᠠᠭᠳᠠᠵᠤ ᠂ ᠶᠤᠸᠠᠨ ᠤ ᠲᠦᠷᠦ ᠶᠢᠨ ᠬᠤᠪᠢᠯᠡᠢ ᠰᠡᠴᠡᠨ ᠬᠠᠭᠠᠨ ᠤ ᠦᠶᠡ ᠳᠤ ᠬᠠᠤᠯᠢ ᠶᠤᠰᠤᠭᠠᠷ ᠳᠤᠭᠳᠠᠭᠠᠭᠳᠠᠨ ᠪᠢᠴᠢᠭᠳᠡᠵᠡᠢ ᠃ ︽ᠠᠯᠳᠠᠨ ᠪᠢᠴᠢᠭ︾ ᠢ ᠬᠡᠳᠤᠶᠢᠪᠡᠷ ᠵᠠᠯᠭᠠᠵᠤ ᠪᠢᠴᠢᠬᠦ ᠠᠴᠠ ᠪᠢᠰᠢ ᠵᠠᠰᠠᠵᠤ ᠪᠢᠴᠢᠵᠤ ᠪᠤᠯᠳᠠᠭ ᠦᠭᠡᠢ ᠭᠡᠳᠡᠭ ᠪᠤᠯᠪᠠᠴᠤ ᠤᠷᠳᠤ ᠤᠳᠠᠭᠠᠨ ᠳᠡᠤᠬᠡ ᠶᠢᠨ ᠶᠠᠪᠤᠴᠠ ᠳᠤ ᠴᠠᠭᠠᠨ ᠤᠷᠳᠤ ᠶᠢᠨ ᠳᠠᠶᠢᠯᠭᠠ ᠳᠠᠬᠢᠯᠭᠠ ᠶᠢᠨ ᠶᠤᠰᠤ ᠵᠢᠷᠤᠮ ᠵᠠᠩ ᠦᠢᠯᠡ ᠲᠦᠷᠢᠮᠵᠢᠨ ᠳᠡᠭᠦᠯᠳᠡᠷᠵᠢᠭᠦ ᠶᠢ ᠳᠠᠭᠠᠯᠳᠤᠨ ᠤᠯᠠᠨ ᠤᠳᠠᠭᠠ ᠨᠡᠮᠡᠯᠳᠡ ᠬᠠᠰᠤᠯᠳᠠ ᠬᠢᠵᠤ ᠂ ᠤᠯᠠᠨ ᠵᠦᠢᠯ ᠤᠨ ᠬᠤᠪᠢᠯᠪᠤᠷᠢ ᠪᠤᠢ ᠪᠤᠯᠵᠤ ᠪᠡᠶᠢᠵᠡᠢ ᠃ ᠲᠡᠶᠢᠮᠤ ᠪᠤᠯᠬᠤᠷ ᠴᠢᠬᠤᠯᠠ ᠲᠠᠢ ᠦᠶᠡ ᠳᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢᠨ ᠳᠠᠶᠢᠯᠭᠠ ᠳᠠᠬᠢᠯᠭᠠ ᠶᠢ ᠡᠷᠬᠢᠯᠡᠨ ᠭᠦᠢᠴᠡᠳᠬᠡᠳᠡᠭ ᠵᠢᠨᠤᠩ ᠨᠤᠶᠠᠨ ᠡᠯᠡ ︽ᠠᠯᠳᠠᠨ ᠪᠢᠴᠢᠭ︾ ᠢ ᠱᠠᠩ ᠤᠨ ᠦᠷᠭᠦᠭᠡ ᠤᠷᠳᠤ ᠳᠤᠳᠤᠷᠠ ᠬᠠᠳᠠᠭᠠᠯᠠᠵᠤ ᠪᠠᠶᠢᠭᠠ ᠡᠬᠡ ︽ᠠᠯᠳᠠᠨ ᠪᠢᠴᠢᠭ︾ ᠯᠦᠭᠡ ᠬᠠᠷᠭᠤᠭᠤᠯᠤᠨ ᠳᠤᠯᠭᠠᠵᠤ ᠂ ᠵᠠᠯᠠᠷᠠᠭᠤᠯᠤᠨ ᠵᠠᠰᠠᠳᠠᠭ ᠪᠡᠶᠢᠵᠡᠢ ᠃ ᠪᠤᠭᠤᠷᠤᠯᠴᠤᠳ ᠤᠨ ᠬᠡᠯᠡᠬᠦ ᠪᠠᠷ ︽ᠡᠵᠡᠨ ᠰᠠᠩ︾ ᠤᠤᠯ ᠳᠠᠭᠠᠨ ᠮᠠᠰᠢ ᠬᠤᠷᠴᠠ ᠰᠢᠷᠦᠭᠦᠨ ᠤᠮᠤᠭ ᠦᠭᠡᠰ ᠲᠠᠢ ᠪᠠᠶᠢᠭᠰᠠᠨ ᠂ ᠮᠠᠨᠵᠤ ᠶᠢᠨ ᠬᠠᠭᠠᠨ ᠮᠤᠩᠭᠤᠯᠴᠤᠳ ᠤᠨ ᠰᠦᠷ ᠭᠦᠴᠦᠨ ᠢ ᠪᠠᠭᠤᠷᠠᠭᠤᠯᠬᠤ ᠶᠢᠨ ᠲᠦᠯᠦᠭᠡ ᠪᠤᠷᠬᠠᠨ ᠤ ᠱᠠᠰᠢᠨ ᠢ ᠶᠡᠭᠡ ᠪᠠᠷ ᠳᠡᠯᠭᠡᠷᠡᠭᠦᠯᠵᠤ ᠭᠡᠭᠡᠨᠳᠡᠨ ᠯᠠᠮᠠ ᠨᠠᠷ ᠢᠶᠠᠷ ︽ᠡᠵᠡᠨ ᠰᠠᠩ︾ ᠮᠡᠳᠤ ᠶᠢᠨ ᠴᠢᠩᠬᠢᠰ ᠬᠠᠭᠠᠨ ᠤ ᠳᠠᠶᠢᠯᠭᠠ ᠳᠠᠬᠢᠯᠭᠠ ᠶᠢᠨ ᠰᠠᠩ ᠂ ᠦᠴᠢᠭ ᠂ ᠳᠠᠭᠠᠳᠬᠠᠯ ᠤᠨ ᠠᠭᠤᠯᠭᠠ ᠶᠢ ᠡᠶᠡᠷᠡᠭᠦᠯᠦᠨ ᠦᠭᠡᠷᠡᠴᠢᠯᠡᠬᠦ ᠪᠤᠶᠤ ᠰᠢᠨᠡ ᠪᠠᠷ ᠵᠤᠬᠢᠶᠠᠵᠤ ᠂ ᠦᠴᠢᠭ ᠳᠠᠭᠠᠳᠬᠠᠯ ᠤᠨ ᠳᠤᠰᠤᠯᠳᠠ ᠶᠢᠨ ᠭᠦᠴᠦᠨ ᠢ ᠰᠤᠯᠠᠷᠠᠭᠤᠯᠵᠤ ᠂ ᠮᠤᠩᠭᠤᠯ ᠤᠨ ᠤᠮᠤᠭ ᠰᠦᠯᠳᠡ ᠶᠢ ᠳᠠᠷᠤᠭᠰᠠᠨ ᠭᠡᠳᠡᠭ ᠃ ᠡᠭᠦᠨ ᠠᠴᠠ ᠦᠵᠡᠭᠰᠡᠨ ᠴᠦ ︽ᠠᠯᠳᠠᠨ ᠪᠢᠴᠢᠭ︾ ᠤᠯᠠᠨᠳᠠ ᠬᠤᠪᠢᠷᠠᠵᠤ ᠪᠠᠶᠢᠭᠰᠠᠨ ᠪᠠᠶᠢᠨᠠ ᠃
ᠠᠷᠵᠡᠢ ᠠᠭᠤᠢ ᠠᠴᠠ ᠤᠯᠤᠭᠰᠠᠨ ᠳᠠᠮᠳᠤᠭ ᠳᠠᠰᠤᠷᠬᠠᠢ ᠶᠢᠨ ᠠᠭᠤᠯᠭᠠ ᠨᠢ ᠤᠳᠤ ᠶᠢᠨ ᠰᠢᠨᠡ ᠪᠠᠷ ᠠᠷᠢᠭᠤᠳᠬᠠᠨ ᠳᠤᠩᠭᠠᠭᠰᠠᠨ ᠴᠢᠩᠬᠢᠰ ᠬᠠᠭᠠᠨ ᠤ ︽ᠠᠯᠳᠠᠨ ᠪᠢᠴᠢᠭ︾ ᠤᠨ ᠠᠯᠢ ᠨᠢᠭᠡᠨ ᠵᠦᠢᠯ ᠲᠠᠢ ᠨᠢ ᠦᠰᠦᠭ ᠳᠠᠷᠠᠭᠠᠯᠠᠨ ᠠᠳᠠᠯᠢ ᠪᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠤᠯᠪᠠᠴᠤ ︽ᠡᠵᠡᠨ ᠬᠠᠳᠤᠳ︾ ᠂ ︽᠁ ᠦᠢᠯᠡᠰ ᠠᠴᠠ ᠵᠠᠶᠢᠯᠠᠭᠤᠯᠤᠨ ᠡᠨᠡᠷᠢᠨ ᠰᠤᠶᠤᠷᠬᠠ︾ ᠂ ︽ᠡᠷᠬᠡᠳᠤ︾ ᠂ ︽ᠲᠠ ᠪᠦᠭᠦᠳᠡ ᠲᠤᠷ ᠮᠦᠷᠭᠦᠮᠦ︾ ᠂ ︽ᠡᠵᠡᠳ︾ ᠂ ︽ᠡᠰᠢ︾ ᠂ ︽ᠮᠠᠭᠳᠠᠨ ᠳᠠᠬᠢᠯ ᠪᠠᠯᠡᠳᠦᠭᠰᠡᠨ︾ ᠬᠡᠬᠦ ᠮᠡᠳᠤ ᠦᠭᠡᠰ ᠠᠴᠠ ᠳᠡᠭᠦᠨ ᠤ ᠦᠴᠢᠭ ᠳᠠᠭᠠᠳᠬᠠᠯ ᠤᠨ ᠪᠢᠴᠢᠭ ᠮᠦᠨ ᠪᠤᠯᠬᠤ ᠶᠢ ᠮᠡᠳᠡᠬᠦ ᠪᠦᠭᠡᠳ ︽ᠡᠵᠡᠨ ᠬᠠᠳᠤᠳ ᠭᠦᠪᠡᠭᠦᠳ︾ ᠬᠡᠬᠦ ᠦᠭᠡᠨ ᠠᠴᠠ ᠨᠢ ᠮᠤᠩᠭᠤᠯ ᠤᠨ ᠳᠡᠭᠡᠳᠤᠰ ᠬᠠᠭᠠᠳ ᠲᠤ ᠵᠤᠷᠢᠭᠤᠯᠤᠭᠰᠠᠨ ᠦᠴᠢᠭ ᠳᠠᠭᠠᠳᠬᠠᠯ ᠮᠦᠨ ᠪᠤᠯᠬᠤ ᠶᠢ ᠮᠡᠳᠡᠵᠤ ᠪᠤᠯᠤᠨᠠ ᠃ ᠡᠶᠢᠮᠤ ᠠᠴᠠ ᠡᠨᠡ ᠬᠦ ᠳᠠᠮᠳᠤᠭ ᠪᠤᠯ ︽ᠠᠯᠳᠠᠨ ᠪᠢᠴᠢᠭ︾ ᠤᠨ ᠳᠠᠰᠦᠷᠬᠠᠢ ᠪᠠᠶᠢᠬᠤ ᠶᠤᠰᠤᠳᠡᠢ ᠃
1991 ᠤᠨ ᠤ10 ᠳ᠋ᠤᠭᠠᠷ ᠰᠠᠷᠠ ᠳᠤ ᠦᠪᠦᠷ ᠮᠤᠩᠭᠤᠯ ᠤᠨ ᠨᠡᠶᠢᠬᠡᠮ ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠬᠦᠷᠢᠶᠡᠯᠡᠩ ᠂ ᠦᠪᠦᠷ ᠮᠤᠩᠭᠤᠯ ᠤᠨ ᠪᠠᠭᠰᠢ ᠵᠢᠨᠶᠡᠭᠡ ᠰᠤᠷᠭᠠᠭᠤᠯᠢ ᠂ ᠦᠪᠦᠷ ᠮᠤᠩᠭᠤᠯ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠂ ᠲᠦᠪ ᠤᠨ ᠦᠨᠳᠦᠰᠦᠳᠡᠨ ᠤ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠠᠷᠵᠡᠢ ᠠᠭᠤᠢ ᠶᠢᠨ ᠰᠤᠶᠤᠯ ᠤᠨ ᠬᠠᠮᠳᠤᠷᠠᠭᠰᠠᠨ ᠰᠤᠳᠤᠯᠬᠤ ᠳᠤᠭᠤᠶᠢᠯᠠᠩ ᠤᠨ ᠬᠢᠨ ᠠᠷᠵᠡᠢ ᠠᠭᠤᠢ ᠳᠤ ᠪᠠᠶᠢᠴᠠᠭᠠᠯᠳᠠ ᠬᠢᠬᠦ ᠦᠶᠡ ᠳᠤ ᠪᠠᠰᠠ ᠨᠢᠭᠡᠨ ᠬᠠᠭᠤᠳᠠᠰᠤ ︽ᠪᠤᠭᠳᠠ ᠴᠢᠩᠬᠢᠰ ᠬᠠᠭᠠᠨ ᠤ ᠴᠢᠳᠢᠭ ᠤᠷᠤᠰᠢᠪᠠ︾ ᠭᠡᠰᠡᠨ ᠨᠤᠮ ᠤᠨ ᠨᠢᠭᠤᠷ ᠤᠨ ᠨᠢᠭᠡᠨ ᠬᠠᠭᠤᠳᠠᠰᠤᠨ ᠤ ᠲᠦᠯᠡᠭᠳᠡᠭᠰᠡᠨ ᠳᠠᠮᠳᠤᠭ ᠢ ᠤᠯᠤᠭᠰᠠᠨ ᠶᠤᠮ ᠃ ᠡᠨᠡ ᠨᠢ ᠠᠷᠵᠡᠢ ᠠᠭᠤᠢ ᠳᠤ ᠮᠤᠩᠭᠤᠯ ᠤᠨ ᠳᠡᠤᠬᠡᠨ ᠰᠤᠷᠪᠤᠯᠵᠢ ᠪᠢᠴᠢᠭ ᠤᠳ ᠢ ᠬᠠᠳᠠᠭᠠᠯᠠᠵᠤ ᠪᠠᠶᠢᠭᠰᠠᠨ ᠢ ᠭᠡᠷᠡᠴᠢᠯᠡᠵᠤ ᠪᠠᠶᠢᠨᠠ ᠃ ᠤᠷᠳᠤᠰ ᠤᠨ ᠮᠠᠰᠢ ᠠᠷᠪᠢᠨ ᠳᠡᠤᠬᠡᠨ ᠮᠠᠲ᠋ᠧᠷᠢᠶᠠᠯ ᠢ ᠦᠨᠳᠦᠰᠦᠯᠡᠪᠡᠯ ᠂ ᠴᠢᠩᠬᠢᠰ ᠬᠠᠭᠠᠨ ᠤ ᠳᠠᠬᠢᠯᠭᠠ ᠶᠢᠨ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠪᠠ ᠳᠤᠯᠤᠢ ᠡᠵᠡᠨ ᠰᠢᠳᠦᠭᠡᠨ ᠤ ᠴᠤᠮᠴᠤᠭ ᠤᠷᠳᠤᠨ ᠂ ᠠᠯᠠᠭ ᠰᠦᠯᠳᠡ ᠶᠢᠨ ᠬᠤᠷᠤᠭᠠ ᠂ ᠪᠦᠬᠡ ᠪᠡᠯᠭᠦᠳᠡᠢ ᠶᠢᠨ ᠴᠤᠮᠴᠤᠭ ᠤᠷᠳᠤᠨ ᠵᠡᠷᠭᠡ ᠴᠢᠩᠬᠢᠰ ᠬᠠᠭᠠᠨ ᠵᠢᠴᠢ ᠳᠡᠭᠦᠨ ᠤ ᠤᠳᠤᠮ ᠤᠭᠰᠠᠭᠠ ᠲᠠᠢ ᠬᠤᠯᠪᠤᠭᠳᠠᠭᠰᠠᠨ ᠳᠠᠬᠢᠯᠭᠠ ᠶᠢᠨ ᠭᠠᠵᠠᠷ ᠤᠳ ᠲᠤ ᠪᠦᠷ ︽ᠮᠤᠩᠭᠤᠯ ᠤᠨ ᠨᠢᠭᠤᠴᠠ ᠳᠤᠪᠴᠢᠶᠠᠨ︾ ᠂ ︽ᠴᠠᠭᠠᠨ ᠳᠡᠤᠬᠡ︾ ᠂ ︽ᠰᠢᠷᠠ ᠳᠡᠤᠬᠡ︾ ᠂ ︽ᠬᠠᠳ ᠤᠨ ᠦᠨᠳᠦᠰᠦᠨ ᠡᠷᠳᠡᠨᠢ ᠶᠢᠨ ᠳᠤᠪᠴᠢ︾ ᠂ ︽ᠴᠢᠩᠬᠢᠰ ᠬᠠᠭᠠᠨ ᠤ ᠴᠢᠳᠢᠭ︾ ᠵᠡᠷᠭᠡ ᠮᠤᠩᠭᠤᠯ ᠤᠨ ᠳᠡᠤᠬᠡᠨ ᠨᠤᠮ ᠪᠢᠴᠢᠭ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠶᠢᠭᠰᠠᠨ ᠶᠠᠪᠤᠳᠠᠯ ᠨᠢ ᠠᠷᠵᠡᠢ ᠠᠭᠤᠢ ᠪᠤᠯ ᠴᠢᠩᠬᠢᠰ ᠬᠠᠭᠠᠨ ᠤ ᠳᠠᠬᠢᠯᠭᠠ ᠶᠢᠨ ᠭᠠᠵᠠᠷ ᠪᠠᠶᠢᠭᠰᠠᠨ ᠢ ᠳᠠᠬᠢᠨᠳᠠ ᠭᠡᠷᠡᠴᠢᠯᠡᠵᠡᠢ ᠃
︽ᠡᠷᠳᠡᠨᠢ ᠳᠤᠨᠤᠮᠠᠯ ᠨᠡᠷᠡᠳᠤ ᠰᠤᠳᠤᠷ ᠤᠷᠤᠰᠢᠪᠠ︾ ᠬᠡᠬᠦ ᠰᠤᠷᠪᠤᠯᠵᠢ ᠪᠢᠴᠢᠭ ᠲᠤ ᠬᠦᠨᠪᠢᠯᠢᠭᠳᠤ ᠮᠡᠷᠭᠡᠨ ᠵᠢᠨᠦᠩ ︽ᠮᠠᠭᠠᠳ ᠢᠶᠠᠷ ᠡᠵᠡᠨ ᠤ ᠴᠠᠭᠠᠨ ᠭᠡᠷ ᠵᠢᠯᠤᠬᠠᠳᠤᠬᠠᠳ ᠮᠠᠰᠢ ᠤᠷᠳᠤᠰ ᠲᠦᠮᠡᠨ ᠢ ᠲᠦᠪᠯᠡᠨ ᠰᠠᠬᠤᠵᠤᠬᠤᠢ︾ ᠭᠡᠵᠡᠢ ᠃ ᠡᠨᠡ ᠨᠢ ᠂ ᠮᠢᠩ ᠤᠯᠤᠰ ᠤᠮᠠᠷᠠᠳᠤ ᠶᠤᠸᠠᠨ ᠤᠯᠤᠰ ᠤᠨ ᠦᠶᠡ ᠳᠤ ᠴᠢᠩᠬᠢᠰ ᠬᠠᠭᠠᠨ ᠤ ᠴᠠᠭᠠᠨ ᠤᠷᠳᠤ ᠤᠷᠳᠤᠰ ᠨᠤᠳᠤᠭ ᠲᠤ ᠪᠠᠶᠢᠭᠰᠠᠨ ᠳᠤᠬᠠᠢ ᠳᠡᠮᠳᠡᠭᠯᠡᠯ ᠪᠤᠯᠤᠨᠠ ᠃ ᠭᠡᠪᠡᠴᠤ ᠤᠷᠳᠤᠰ ᠨᠤᠳᠤᠭ ᠲᠤ ᠪᠠᠶᠢᠭᠰᠠᠨ ᠳᠤᠬᠠᠢ ᠳᠡᠮᠳᠡᠭᠯᠡᠯ ᠬᠠᠷᠠᠭᠳᠠᠳᠠᠭ ᠦᠭᠡᠢ ᠃ ᠬᠡᠵᠢᠶᠡ ᠬᠤᠶᠢᠨᠠ ᠤᠮᠠᠷᠠᠳᠤ ᠶᠤᠸᠠᠨ ᠤᠯᠤᠰ ᠮᠦᠬᠦᠵᠤ᠂ ᠤᠷᠳᠤᠰ ᠤᠨ ᠡᠷᠢᠨᠴᠢᠨ ᠵᠢᠨᠦᠩ ᠮᠠᠨᠵᠤ ᠶᠢ ᠳᠠᠭᠠᠵᠤ ᠂ ᠮᠠᠨᠵᠤ ᠬᠠᠭᠠᠨ ᠠᠴᠠ ᠳᠡᠭᠦᠨ ᠤ ᠵᠢᠨᠦᠩ ᠴᠤᠯᠠ ᠶᠢ ᠳᠠᠬᠢᠨ ᠰᠡᠷᠭᠦᠭᠡᠭᠰᠡᠨ ᠤ ᠳᠠᠷᠠᠭᠠ ᠡᠵᠡᠨ ᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢ ᠤᠳᠤ ᠶᠢᠨ ᠳᠠᠯᠠᠳ ᠬᠤᠰᠢᠭᠤᠨ ᠤ ᠬᠢᠵᠠᠭᠠᠷ ᠳᠤᠳᠤᠷᠠᠬᠢ ︽ᠸᠠᠩ ᠤᠨ ᠭᠤᠤᠯ ᠤᠨ ᠵᠤᠤ︾ ᠶᠢᠨ ᠳᠡᠷᠭᠡᠳᠡ ᠰᠢᠯᠵᠢᠭᠦᠯᠦᠨ ᠠᠪᠴᠢᠷᠠᠵᠡᠢ ᠃ ᠡᠭᠦᠨ ᠠᠴᠠ ᠡᠮᠤᠨᠡ ᠴᠤᠬᠤᠮ ᠬᠠᠮᠢᠭᠠ ᠳᠠᠬᠢᠵᠤ ᠪᠠᠶᠢᠭᠰᠠᠨ ᠳᠤᠬᠠᠢ ᠶᠡᠷᠦᠨᠢ ᠬᠠᠷᠢᠭᠤᠯᠳᠠ ᠦᠭᠡᠢ, ᠶᠤᠮ ᠃ ᠳᠡᠭᠡᠷᠡᠬᠢ ᠮᠠᠲ᠋ᠧᠷᠢᠶᠠᠯ ᠤᠳ ᠴᠢᠩ ᠤᠯᠤᠰ ᠠᠴᠠ ᠡᠮᠦᠨᠡᠬᠢ ᠨᠡᠯᠢᠶᠡᠳ ᠤᠷᠳᠤ ᠳᠡᠤᠬᠡᠨ ᠬᠤᠭᠤᠴᠠᠭᠠᠨ ᠳᠤ ᠂ ᠳᠠᠷᠦᠢ ᠮᠢᠩ ᠤᠯᠤᠰ ᠤᠮᠠᠷᠠᠳᠤ ᠶᠤᠸᠠᠨ ᠤᠯᠤᠰ ᠤᠨ ᠦᠶᠡ ᠳᠤ ᠴᠢᠩᠬᠢᠰ ᠬᠠᠭᠠᠨ ᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢ ᠠᠷᠪᠠᠰ ᠤᠨ ᠠᠭᠤᠯᠠᠨ ᠳᠤ ᠰᠠᠬᠢᠨ ᠬᠠᠮᠠᠭᠠᠯᠠᠵᠤ ᠂ ᠬᠦᠨᠳᠦᠳᠭᠡᠨ ᠳᠠᠬᠢᠵᠤ ᠪᠠᠶᠢᠭᠰᠠᠨ ᠳᠤᠬᠠᠢ ᠤᠯᠠᠨ ᠳᠠᠯᠠ ᠶᠢᠨ ᠭᠡᠷᠡᠴᠢ ᠪᠤᠯᠵᠤ ᠂ ᠴᠢᠩᠬᠢᠰ ᠬᠠᠭᠠᠨ ᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤ ᠶᠢᠨ ᠳᠠᠬᠢᠭᠳᠠᠵᠤ ᠪᠠᠶᠢᠭᠰᠠᠨ ᠪᠤᠳᠠᠳᠤ ᠭᠠᠵᠠᠷ ᠳᠤᠳᠤᠷᠬᠠᠢ ᠦᠭᠡᠢ ᠪᠠᠶᠢᠭᠰᠠᠨ ᠬᠤᠭᠤᠰᠤᠨ ᠵᠠᠢ ᠶᠢ ᠨᠦᠬᠦᠪᠦᠷᠢᠯᠡᠵᠡᠢ ᠃
ᠴᠢ᠊ ᠂ ᠰᠡᠴᠡᠨ ᠤ ᠭᠤᠤᠯᠯᠠᠨ ᠨᠠᠶᠢᠷᠠᠭᠤᠯᠤᠭᠰᠠᠨ︽ᠠᠷᠵᠡᠢ ᠠᠭᠤᠢ ᠶᠢᠨ ᠤᠯᠠᠨ ᠤᠯᠤᠰ ᠤᠨ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠰᠤᠳᠤᠯᠤᠨ ᠶᠠᠴᠢᠯᠴᠠᠬᠤ ᠬᠤᠷᠠᠯ ᠤᠨ ᠦᠭᠦᠯᠡᠯ ᠤᠨ ᠳᠡᠭᠦᠪᠦᠷᠢ︾ ︵2008 ᠤᠨ︶ ᠠᠴᠠ ᠰᠡᠶᠢᠷᠡᠭᠦᠯᠪᠡ ᠃