ᠬᠡᠶᠢᠮᠦᠷᠢ᠄ ᠬᠡᠶᠢᠮᠦᠷᠢ ᠪᠣᠯ ᠴᠢᠩᠬᠢᠰ ᠬᠭᠠᠨ ᠤ ᠦᠶᠡ ᠠᠴᠠ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡ ᠰᠦᠯᠳᠡ ᠲᠤᠭ ᠪᠤᠯᠤᠨᠠ᠃ ᠮᠤᠩᠭᠤᠯᠴᠤᠳ ᠤᠨ ᠡᠭᠦᠳᠡᠨ ᠡᠮᠤᠨᠡ ᠭᠠᠭᠴᠠ ᠬᠡᠶᠢᠮᠤᠷᠢ ᠶᠢᠨ ᠪᠠᠭᠠᠨᠠ᠂ ᠬᠤᠤᠰ ᠬᠡᠶᠢᠮᠤᠷᠢ ᠶᠢᠨ ᠪᠠᠭᠠᠨᠠ ᠪᠤᠰᠬᠠᠭᠰᠠᠨ ᠪᠠᠶᠢᠳᠠᠭ ᠃ ᠬᠡᠶᠢᠮᠤᠷᠢ ᠶᠢᠨ ᠪᠠᠭᠠᠨᠠ ᠶᠢᠨ ᠦᠵᠦᠭᠦᠷ ᠲᠤ ᠵᠢᠳᠡ ᠪᠠ ᠨᠤᠮᠤ ᠶᠢ ᠪᠡᠯᠭᠡᠳᠡᠵᠤ ᠬᠢᠭᠰᠡᠨ ᠭᠤᠷᠪᠠᠨ ᠰᠡᠷᠡᠭᠡ ᠲᠠᠢ ᠵᠢᠳᠡ ᠬᠠᠳᠬᠤᠵᠤ ᠪᠠᠶᠢᠬᠤ ᠪᠠ ᠬᠡᠬᠡᠷ ᠮᠤᠷᠢᠨ ᠤ ᠳᠡᠯ ᠢᠶᠠᠷ ᠬᠦᠬᠦᠯ ︵ᠵᠠᠯᠠᠭᠠ︶ ᠬᠢᠵᠤ ᠰᠦᠷ ᠵᠢᠪᠬᠤᠯᠠᠩ ᠲᠠᠢ ᠬᠠᠷᠠᠭᠳᠠᠳᠠᠭ᠃ ᠬᠤᠤᠰ ᠬᠡᠶᠢᠮᠤᠷᠢ ᠶᠢᠨ ᠪᠠᠭᠠᠨᠠ ᠶᠢ ᠳᠡᠭᠡᠰᠦ ᠪᠠᠷ ᠬᠤᠯᠪᠤᠵᠤ᠂ ᠬᠦᠬᠡ᠂ ᠴᠠᠭᠠᠨ᠂ ᠤᠯᠠᠭᠠᠨ᠂ ᠰᠢᠷᠠ᠂ ᠨᠤᠭᠤᠭᠠᠨ ᠳᠠᠪᠤᠨ ᠦᠩᠭᠡ ᠶᠢᠨ ᠯᠦᠩᠵᠢᠳ ᠡᠯᠭᠦᠳᠡᠭ᠃ ᠪᠠᠰᠠ ᠴᠭᠠᠨ᠂ ᠬᠦᠬᠡ ᠦᠩᠭᠡ ᠶᠢᠨ ᠬᠡᠶᠢᠮᠤᠷᠢ ᠶᠢᠨ ᠲᠤᠭ ᠡᠯᠭᠦᠳᠡᠭ᠃ ᠯᠦᠩᠵᠢᠳ ᠪᠠ ᠬᠡᠶᠢᠮᠤᠷᠢ ᠶᠢᠨ ᠲᠤᠭ ᠳᠡᠭᠡᠷᠡ ᠲᠡᠭᠷᠢ ᠶᠢᠨ ᠬᠦᠯᠦᠭ ︵ᠬᠡᠢ ᠮᠤᠷᠢ︶ ᠤᠨ ᠪᠠᠷ ᠢ ᠳᠠᠷᠤᠳᠠᠭ᠃ ᠲᠡᠭᠷᠢ ᠶᠢᠨ ᠬᠦᠯᠦᠭ ᠤᠨ ᠪᠠᠷ ᠤᠷᠳᠤ ᠤᠳᠠᠭᠠᠨ ᠳᠡᠤᠬᠡᠨ ᠶᠠᠪᠤᠴᠠ ᠳᠤ ᠨᠡᠩ ᠪᠠᠶᠠᠯᠢᠭ ᠠᠭᠤᠯᠭᠠ ᠲᠠᠢ ᠪᠤᠯᠵᠡᠢ᠃ ᠵᠢᠱᠢᠶᠡᠯᠡᠪᠡᠯ᠄ ᠲᠡᠭᠷᠢ ᠶᠢᠨ ᠬᠦᠯᠦᠭ ᠤᠨ ᠲᠦᠷᠪᠡᠨ ᠦᠨᠴᠦᠭ ᠲᠤ ᠯᠤᠤ ᠭᠠᠷᠦᠳᠢ᠂ ᠪᠠᠷᠰ᠂ ᠠᠷᠰᠯᠠᠨ ᠰᠡᠶᠢᠯᠦᠭᠰᠡᠨ ᠳᠠᠪᠤᠨ ᠬᠦᠴᠦᠳᠡᠨ ᠤ ᠪᠠᠷ᠂ ︽ᠳᠠᠪᠤᠨ ᠬᠦᠴᠦᠳᠡᠨ︾᠂ ︽ᠠᠷᠪᠠᠨ ᠬᠤᠶᠠᠷ ᠵᠢᠯ︾᠂ ︽ᠲᠤᠯᠤᠭᠠᠨ ᠡᠷᠳᠡᠨᠢ︾᠂ ︽ᠨᠠᠢᠮᠠᠨ ᠭᠦᠯᠢᠯ︾᠂ ︽ᠶᠢᠰᠤᠨ ᠮᠡᠩᠭᠡ︾᠂ ︽ᠬᠤᠷᠢᠨ ᠨᠠᠢᠮᠠᠨ ᠨᠠᠭᠴᠠᠳᠠᠷ︾ ᠢ ᠬᠠᠮᠳᠤᠷᠠᠭᠤᠯᠤᠨ ᠰᠡᠶᠢᠯᠦᠭᠰᠡᠨ ᠶᠡᠭᠡ ᠪᠠᠷ ᠵᠡᠷᠭᠡ ᠪᠤᠢ ᠪᠤᠯᠵᠡᠢ᠃
ᠲᠤᠯᠢ᠄ ᠬᠦᠷᠡᠯ ᠲᠤᠯᠢ᠂ ᠭᠠᠤᠯᠢᠨ ᠲᠤᠯᠢ ᠶᠢ ᠮᠤᠩᠭᠤᠯᠴᠤᠳ ᠨᠢᠭᠡ ᠵᠦᠢᠯ ᠤᠨ ᠰᠢᠳᠦᠭᠡᠨ ᠢᠶᠠᠷ ᠦᠵᠡᠵᠤ᠂ ᠬᠠᠨᠠ ᠶᠢᠨ ᠲᠤᠯᠤᠭᠠᠢ ᠳᠤ ᠡᠯᠭᠦᠭᠦ ᠪᠤᠶᠤ ᠳᠠᠯᠠᠯᠭᠠᠨ ᠰᠤᠮᠤᠨ ᠳᠤ ᠡᠯᠭᠦᠵᠤ ᠪᠠᠶᠢᠳᠠᠭ᠃
ᠬᠦᠩᠭᠠᠷᠸᠠ᠄ ᠬᠦᠩᠭᠠᠷᠸᠠ ᠪᠤᠯ ᠪᠤᠷᠬᠠᠨ ᠤ ᠬᠦᠷᠦᠭ᠂ ᠪᠤᠷᠬᠠᠨ ᠤ ᠱᠤᠭᠤᠮᠠᠯ ᠪᠠ ᠳᠠᠬᠢᠯᠭᠠ ᠶᠢᠨ ᠡᠳ᠋ᠯᠡᠯ ᠢ ᠬᠠᠳᠠᠭᠠᠯᠬᠤ ᠬᠤᠷᠭᠤ ᠪᠤᠯᠤᠨᠠ᠃ ᠮᠤᠩᠭᠤᠯᠴᠤᠳ ᠰᠢᠷᠠ ᠶᠢᠨ ᠱᠠᠰᠢᠨ ᠢ ᠶᠡᠬᠡᠪᠡᠷ ᠰᠢᠳᠤᠵᠤ ᠪᠠᠶᠢᠭᠰᠠᠨ ᠦᠶᠡ ᠳᠤ ᠠᠶᠢᠯ ᠡᠷᠤᠬᠡ ᠪᠤᠯᠭᠠᠨ ᠭᠡᠷ ᠤᠨ ᠢᠶᠠᠨ ᠮᠤᠬᠤᠷ ᠲᠤ ᠳᠤᠰᠬᠠᠢ ᠰᠢᠷᠡᠭᠡ ᠪᠤᠶᠤ ᠬᠤᠷᠭᠤ ᠶᠢᠨ ᠳᠡᠭᠡᠷᠡ ᠬᠦᠩᠭᠠᠷᠸᠠ ᠪᠠᠨ ᠳᠠᠯᠪᠢᠵᠤ᠂ ᠡᠮᠤᠨᠡ ᠨᠢ ᠵᠤᠯᠠ ᠡᠷᠭᠦᠨ ᠳᠠᠬᠢᠯ ᠳᠠᠯᠪᠢᠳᠠᠭ ᠪᠠᠶᠢᠵᠡᠢ᠃
ᠳᠠᠯᠠᠯᠭᠠᠨ ᠱᠠᠩ ᠪᠠ ᠳᠠᠯᠠᠯᠭᠠᠨ ᠰᠤᠮᠤ᠄ ᠳᠠᠯᠠᠯᠭᠠᠨ ᠱᠠᠩ ᠭᠡᠳᠡᠭ ᠪᠤᠯ ᠢᠷᠤᠭᠠᠷ ᠨᠢ ᠪᠠᠭᠠ ᠱᠠᠳᠤᠯᠵᠢᠨ ᠬᠡᠯᠪᠡᠷᠢᠳᠤ ᠲᠦᠷᠪᠡᠯᠵᠢᠨ ᠬᠠᠶᠢᠷᠴᠠᠭ ᠶᠤᠮ᠃ ᠳᠡᠭᠦᠨ ᠤ ᠳᠤᠳᠤᠷᠠ ᠳᠠᠪᠤᠨ ᠳᠠᠷᠢᠶᠠᠨ ᠤ ᠦᠷᠡ᠂ ᠳᠠᠪᠤᠨ ᠳᠠᠮᠰᠤᠭ ᠢᠳᠡᠭᠡᠨ ᠢ ᠬᠢᠵᠤ᠂ ︽ᠱᠠᠩ ᠳᠠᠷᠤᠨᠠ︾ ᠭᠡᠵᠤ ᠬᠦᠩᠭᠠᠷᠸᠠ ᠶᠢᠨ ᠬᠠᠵᠠᠭᠤ ᠳᠤ ᠳᠠᠯᠪᠢᠳᠠᠭ᠃ ᠳᠠᠯᠠᠯᠭᠠᠨ ᠱᠠᠩ ᠪᠤᠯ ᠡᠷᠳᠡᠨᠢᠰ ᠬᠤᠷᠢᠶᠠᠬᠤ ᠰᠠᠩ ᠤᠨ ᠪᠡᠯᠭᠡᠳᠡᠯ ᠶᠤᠮ᠃ ᠳᠠᠯᠠᠯᠭᠠᠨ ᠱᠠᠩ ᠤᠨ ᠬᠠᠶᠢᠷᠴᠠᠭ ᠢ ᠤᠯᠠᠭᠠᠨ ᠪᠤᠶᠤ ᠰᠢᠷᠠ ᠦᠩᠭᠡ ᠪᠠᠷ ᠪᠤᠳᠤᠵᠤ᠂ ᠳᠠᠯᠠ ᠪᠦᠷᠢ ᠳᠤᠨᠢ ᠨᠤᠷᠪᠤ ᠡᠷᠳᠡᠨᠢ᠂ ᠪᠤᠮᠪᠠ᠂ ᠳᠤᠩ ᠯᠠᠪᠠᠢ᠂ ᠦᠯᠵᠡᠢ ᠵᠠᠩᠭᠢᠶᠠ ᠵᠡᠷᠭᠡ ᠶᠢᠨ ᠪᠡᠯᠭᠡᠳᠤ ᠵᠢᠷᠤᠭ ᠵᠢᠷᠤᠭᠰᠠᠨ ᠪᠠᠶᠢᠳᠠᠭ᠃ ᠳᠠᠯᠠᠯᠭᠠᠨ ᠱᠠᠩ ᠤᠨ ᠬᠠᠶᠢᠷᠴᠠᠭ ᠤᠨ ᠳᠠᠭᠯᠠᠭᠠ ᠶᠢᠨ ᠨᠢᠭᠡ ᠦᠨᠴᠦᠭ ᠲᠤᠨᠢ ᠵᠢᠵᠢᠭ ᠨᠦᠬᠡ ᠲᠠᠢ ᠪᠠᠶᠢᠵᠤ᠂ ᠳᠠᠯᠠᠯᠭᠠᠨ ᠰᠤᠮᠤ ᠶᠢ ᠬᠠᠳᠬᠤᠵᠤ ᠪᠠᠶᠢᠳᠠᠭ᠃
ᠳᠠᠯᠠᠯᠭᠠᠨ ᠰᠤᠮᠤ ᠭᠡᠳᠡᠭ ᠪᠤᠯ50 ᠰᠡᠨᠲ᠋ᠢᠮᠧᠲᠷ ᠬᠢᠷᠢᠳᠡᠢ ᠤᠷᠳᠤ ᠦᠶᠡᠳᠤ ᠬᠤᠯᠤᠰᠤ ᠪᠠᠷ ᠡᠰᠢ ᠪᠤᠯᠭᠠᠵᠤ᠂ ᠳᠤᠤᠷᠠᠳᠤ ᠦᠵᠦᠭᠦᠷ ᠲᠤᠨᠢ ᠵᠠᠪᠠ ᠰᠢᠭᠠᠵᠤ᠂ ᠳᠡᠭᠡᠳᠤ ᠦᠵᠦᠭᠦᠷ ᠤᠨ ᠬᠤᠶᠠᠷ ᠳᠠᠯᠠ ᠳᠤᠨᠢ ᠰᠢᠪᠠᠭᠤᠨ ᠤ ᠦᠳᠦ ᠨᠠᠭᠠᠵᠤ᠂ ᠦᠵᠦᠭᠦᠷ ᠲᠤᠨᠢ ᠪᠦᠭᠡᠷᠡᠩᠬᠡᠢ ᠬᠦᠪᠦᠩ ᠨᠠᠭᠠᠯᠳᠤᠭᠤᠯᠳᠠᠭ᠃ ᠦᠳᠦᠨ ᠤ ᠳᠤᠤᠷᠠᠳᠤ ᠢᠷᠮᠡᠭ ᠲᠤ ᠳᠠᠪᠤᠨ ᠦᠩᠭᠡ ᠶᠢᠨ ᠭᠬᠢᠪ ᠳᠤᠷᠳᠤᠩ ᠪᠠ ᠬᠠᠳᠠᠭ ᠤᠶᠠᠵᠤ᠂ ᠵᠢᠵᠢᠭ ᠭᠠᠤᠯᠢᠨ ᠲᠤᠯᠢ ᠵᠠᠭᠦᠵᠤ ᠪᠠᠶᠢᠳᠠᠭ᠃ ᠠᠯᠢᠪᠠ ᠳᠠᠬᠢᠯᠭᠠ᠂ ᠶᠤᠰᠤᠯᠠᠯ ᠳᠡᠭᠡᠷᠡ ᠪᠤᠶᠠᠨ ᠭᠡᠰᠢᠭ ᠬᠤᠷᠤᠶᠢᠯᠠᠬᠤ ᠦᠶᠡ ᠳᠤ ᠳᠠᠯᠠᠯᠭᠠᠨ ᠤ ᠰᠤᠮᠤ ᠪᠠᠷ ᠳᠠᠯᠠᠯᠳᠠᠭ᠃
ᠳᠠᠯᠠᠯᠭᠠᠨ ᠰᠠᠭᠤᠯᠠᠭᠠ ᠪᠠ ᠴᠠᠪᠳᠠᠭᠤᠷ᠄ ᠳᠠᠯᠠᠯᠭᠠᠨ ᠰᠠᠭᠤᠯᠠᠭᠠ ᠪᠤᠯ ᠳᠠᠯᠠᠯᠭᠠ ᠳᠠᠯᠠᠯᠬᠤ᠂ ᠦᠷᠭᠦᠯᠵᠢ ᠶᠢᠨ ᠰᠡᠷᠵᠢᠮ ᠡᠷᠭᠦᠭᠦ ᠳᠤ ᠬᠡᠷᠡᠭᠯᠡᠳᠡᠭ ᠰᠠᠭᠤᠯᠠᠭᠠ ᠪᠤᠯᠤᠨᠠ᠃ ᠤᠯᠠᠩᠬᠢ ᠳᠠᠭᠠᠨ ᠵᠡᠰ ᠭᠠᠤᠯᠢᠨ ᠰᠠᠭᠤᠯᠠᠭᠠ ᠪᠡᠶᠢᠵᠤ᠂ ᠡᠯᠳᠡᠪ ᠲᠤᠵᠢᠩ ᠬᠡ ᠪᠠᠷ ᠤᠷᠠᠯᠠᠳᠠᠭ᠃ ᠳᠠᠯᠠᠯᠭᠠᠨ ᠰᠠᠭᠤᠯᠠᠭᠠ ᠳᠠᠭᠯᠠᠭᠠ ᠲᠠᠢ ᠪᠦᠬᠡᠳ ᠰᠠᠨᠵᠢᠨ ᠠᠴᠠ ᠨᠢ ᠰᠠᠮᠪᠠᠢ ᠬᠠᠳᠠᠭ ᠤᠭᠤᠰᠤᠷᠯᠠᠨ ᠴᠢᠮᠡᠳᠡᠭ᠃
ᠳᠠᠯᠠᠯᠭᠠᠨ ᠰᠠᠭᠤᠯᠠᠭᠠ ᠳᠤ ᠰᠡᠷᠵᠢᠮ ᠢᠶᠠᠨ ᠬᠢᠵᠤ ᠳᠤᠰᠬᠠᠢ ᠰᠠᠴᠤᠯᠭᠠ ᠶᠢᠨ ᠴᠠᠪᠳᠠᠭᠤᠷ ᠢᠶᠠᠷ ᠲᠡᠭᠷᠢ ᠭᠠᠵᠠᠷ ᠲᠤ ᠰᠠᠴᠤᠯᠭᠠ ᠡᠷᠭᠦᠳᠡᠭ᠃ ᠴᠠᠪᠳᠠᠭᠤᠷ ᠨᠢ ᠶᠢᠰᠤᠨ ᠵᠢᠵᠢᠭ ᠬᠤᠩᠬᠤᠷ ᠲᠠᠢ ᠲᠦᠷᠪᠡᠯᠵᠢᠨ ᠮᠤᠳᠤᠨ ᠰᠢᠨᠠᠭᠠ ᠪᠤᠯᠤᠨᠠ᠃ ᠳᠠᠷᠦᠢ ᠡᠨᠡ ᠴᠠᠪᠳᠠᠭᠤᠷ ᠢᠶᠠᠷ ᠶᠢᠰᠦᠨᠳᠡ ᠰᠠᠴᠤᠪᠠᠯ ᠶᠢᠰᠤ ᠶᠢᠰᠤ ᠨᠠᠶᠠᠨ ᠨᠢᠭᠡ ᠶᠢᠨ ᠲᠤᠭᠠ ᠶᠢ ᠭᠦᠢᠴᠡᠳᠬᠡᠳᠡᠭ᠃
ᠳᠠᠯᠠᠯᠭᠠᠨ ᠠᠶᠠᠭᠠ᠄ ᠳᠠᠯᠠᠯᠭᠠᠨ ᠠᠶᠠᠭᠠ ᠭᠡᠳᠡᠭ ᠪᠤᠯ ᠳᠠᠯᠠᠯᠭᠠ ᠶᠢᠨ ᠢᠳᠡᠭᠡᠨ ᠢ ᠬᠢᠵᠤ ᠳᠠᠯᠪᠢᠬᠤ ᠲᠤᠮᠤ ᠮᠤᠳᠤᠨ ᠠᠶᠠᠭᠠ ᠪᠤᠯᠤᠨᠠ᠃ ᠳᠠᠯᠠᠯᠭᠠ ᠳᠠᠯᠠᠯᠬᠤ᠂ ᠭᠠᠯ ᠳᠠᠬᠢᠬᠤ ᠵᠡᠷᠭᠡ ᠳᠠᠬᠢᠯᠭᠠ ᠶᠤᠰᠤᠠᠯᠠᠯ ᠳᠡᠭᠡᠷᠡ ᠳᠠᠪᠤᠨ ᠲᠠᠮᠰᠤᠭ ᠢᠳᠡᠭᠡᠨ ᠪᠤᠶᠤ ᠭᠠᠯ ᠤᠨ ᠪᠤᠳᠠᠭᠠ ᠪᠠᠨ ᠬᠢᠵᠤ ᠪᠤᠶᠠᠨ ᠭᠡᠰᠢᠭ ᠢᠶᠠᠨ ᠬᠤᠷᠦᠶᠢᠯᠠᠨ ᠳᠠᠯᠠᠯᠳᠠᠭ᠃
ᠪᠤᠷᠤ ᠦᠨᠳᠤᠷ᠄ ᠪᠤᠷᠤ ᠦᠨᠳᠦᠷ ᠭᠡᠳᠡᠭ ᠪᠤᠯ ᠮᠦᠨᠴᠤ ᠰᠠᠴᠤᠯᠭᠠ ᠶᠢᠨ ᠰᠠᠭᠤᠯᠠᠭᠠ ᠪᠤᠯᠤᠨᠠ᠃ ᠮᠤᠩᠭᠤᠯᠴᠤᠳ ᠵᠤᠯᠠᠭ ᠬᠢᠵᠤ ᠭᠡᠬᠦᠦ ᠰᠠᠭᠠᠬᠤ ᠦᠶᠡ ᠳᠤ ᠰᠠᠶ᠋ᠢ ᠤᠨᠠᠭᠠᠨ ᠵᠡᠯᠡᠨ ᠳᠡᠭᠡᠷᠡ ᠠᠪᠠᠴᠢᠵᠤ ᠭᠡᠭᠦᠦ ᠶᠢᠨ ᠰᠦᠨ ᠤ ᠳᠡᠭᠡᠵᠢ ᠶᠢ ᠠᠪᠴᠤ᠂ ᠲᠡᠭᠷᠢ ᠭᠠᠵᠠᠷ ᠲᠤ ᠰᠠᠴᠤᠯᠭᠠ ᠬᠢᠵᠤ ᠳᠠᠯᠠᠯᠭᠠ ᠠᠪᠳᠠᠭ᠃ ᠪᠤᠷᠤ ᠦᠨᠳᠦᠷ ᠢ ᠭᠤᠤᠯᠳᠠᠭᠤ ᠬᠦᠷᠡᠩ ᠽᠠᠨᠳᠠᠨ᠂ ᠰᠢᠨᠳᠠᠨ᠂ ᠬᠤᠰᠢ ᠵᠡᠷᠭᠡ ᠮᠤᠳᠤᠨ ᠬᠠᠪᠢᠰᠤᠨ ᠳᠤ ᠪᠦᠰᠡᠯᠡᠭᠦᠷ ᠤᠷᠤᠭᠤᠯᠤᠨ ᠰᠢᠭᠠᠵᠤ ᠬᠢᠳᠡᠭ᠃ ᠪᠤᠷᠤ ᠦᠨᠳᠦᠷ ᠶᠢ ᠬᠦᠨᠳᠦᠳᠬᠡᠨ ᠬᠡᠷᠡᠭᠯᠡᠬᠦ ᠵᠠᠩᠰᠢᠯ ᠴᠢᠩᠬᠢᠰ ᠬᠠᠭᠠᠨ ᠤ ᠦᠶᠡ ᠠᠴᠠ ᠤᠯᠠᠮᠵᠢᠯᠠᠭᠳᠠᠵᠤ ᠢᠷᠡᠭᠰᠡᠨ ᠶᠤᠮ᠃