ᠣᠪᠣᠭᠠ ᠨᠢ ᠭᠤᠣᠯᠳᠠᠭᠤ ᠠᠭᠤᠯᠠ ᠬᠠᠶᠢᠷᠬᠠᠨ ᠤ ᠣᠷᠣᠢ ᠳᠡᠭᠡᠷᠡ ᠪᠠᠶᠢᠳᠠᠭ ᠪᠣᠯᠬᠤᠷ ᠬᠥᠮᠥᠰ ᠲᠤ ᠳᠥᠭᠦᠮ ᠪᠣᠷᠣᠭᠵᠢᠭᠤᠨ ᠪᠣᠰᠬᠠᠭᠰᠠᠨ ᠶᠠᠭᠤᠮᠠ ᠭᠡᠰᠡᠨ ᠲᠥᠷᠥᠭᠳᠡᠯ ᠥᠭᠳᠡᠭ ᠃ ᠭᠡᠲᠡᠯᠡ ᠬᠠᠷᠢᠨ ᠡᠰᠡᠷᠭᠦ ᠪᠠᠷ ᠣᠪᠣᠭᠠᠨ ᠤ ᠭᠠᠳᠠᠭᠠᠳᠤ ᠲᠥᠷᠬᠦ ᠨᠢ ᠳᠥᠭᠦᠮ ᠪᠣᠷᠣᠭᠵᠢᠭᠤᠨ ᠪᠣᠯᠪᠠᠴᠤ ᠳᠣᠲᠣᠭᠠᠳᠤ ᠲᠥᠷᠬᠦ ᠪᠤᠶᠤ ᠪᠦᠲᠦᠴᠡ ᠪᠠᠶᠢᠷᠢᠰᠢᠯ ᠨᠢ ᠨᠠᠷᠢᠨ ᠪᠤᠳᠤᠯᠢᠶᠠᠨᠲᠠᠢ ᠪᠠᠶᠢᠳᠠᠭ ᠃ ᠣᠪᠣᠭᠠᠨ ᠤ ᠪᠦᠲᠦᠴᠡ ᠶᠢ ᠵᠥᠪ ᠣᠨᠣᠪᠴᠢᠲᠠᠢ ᠣᠶᠢᠯᠠᠭᠠᠬᠤ ᠨᠢ ᠣᠪᠣᠭᠠᠨ ᠤ ᠰᠤᠳᠤᠯᠤᠯ ᠤᠨ ᠰᠠᠭᠤᠷᠢ ᠰᠤᠳᠤᠯᠭᠠᠨ ᠤ ᠨᠢᠭᠡ ᠶᠤᠮ ᠃ ᠳᠣᠣᠷᠠ ᠡᠨᠡ ᠰᠠᠨᠠᠯ ᠢᠶᠠᠨ ᠬᠡᠭᠡᠷᠡ ᠶᠢᠨ ᠰᠢᠨᠵᠢᠯᠡᠭᠡᠨ ᠤ ᠮᠠᠲ᠋ᠧᠷᠢᠶᠠᠯ ᠳᠤ ᠲᠤᠯᠭᠠᠭᠤᠷᠢᠯᠠᠨ ᠵᠠᠳᠠᠯᠬᠤ ᠪᠣᠯᠣᠨᠠ ᠃
ᠨᠢᠭᠡ ᠲᠥᠷᠥᠯᠰᠢᠯ
ᠣᠪᠣᠭᠠ ᠪᠣᠯ ᠦᠨᠡᠨ ᠳᠡᠭᠡᠨ ᠨᠡᠯᠢᠶᠡᠳ ᠪᠤᠳᠤᠯᠢᠶᠠᠨᠲᠠᠢ ᠪᠠᠶᠢᠷᠢᠰᠢᠯ ᠪᠦᠲᠦᠴᠡ ᠪᠦᠬᠦᠢ ᠪᠠᠷᠢᠮᠠᠯ ᠪᠣᠯᠣᠨᠠ ᠃ ᠣᠪᠣᠭᠠᠨ ᠤ ᠣᠷᠣᠨ ᠪᠠᠶᠢᠷᠢ ᠶᠢᠨ ᠪᠠᠶᠢᠷᠢᠰᠢᠯ ᠤᠨ ᠣᠨᠴᠠᠯᠢᠭ ᠢ ᠦᠨᠳᠦᠰᠦᠯᠡᠨ ᠭᠠᠭᠴᠠ ᠣᠪᠣᠭᠠ ᠂ ᠰᠦᠷᠦᠭ ᠣᠪᠣᠭᠠ ᠂ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠭᠡᠵᠤ ᠠᠩᠭᠢᠯᠠᠵᠤ ᠪᠣᠯᠣᠨᠠ ᠃ ᠣᠪᠣᠭᠠᠨ ᠤ ᠪᠦᠲᠦᠴᠡ ᠪᠠᠶᠢᠷᠢᠰᠢᠯ ᠤᠨ ᠲᠤᠬᠠᠢ ᠠᠺᠢᠪᠠ ᠪᠠᠷ ︽ᠭᠠᠭᠴᠠ ᠣᠪᠣᠭᠠ ᠂ ᠨᠢᠭᠡ ᠮᠥᠷ ᠢᠶᠠᠷ ᠡᠩᠨᠡᠷᠡᠭᠦᠯᠦᠨ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠂ ᠲᠣᠭᠤᠨᠣᠯᠵᠢᠨ ᠬᠡᠯᠪᠡᠷᠢᠲᠦ ᠪᠠᠶᠢᠷᠢᠰᠢᠯ ᠲᠠᠢ ᠣᠪᠣᠭᠠ︾ ﹇1﹈ ᠭᠡᠵᠤ ᠭᠤᠷᠪᠠᠨ ᠵᠦᠢᠯ ᠳᠤ ᠠᠩᠭᠢᠯᠠᠨ ᠰᠤᠳᠤᠯᠵᠤ ᠥᠩᠭᠡᠷᠡᠪᠡ ᠃ ᠣᠨᠴᠠᠭᠠᠶᠢᠯᠠᠨ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠪᠣᠯ ᠬᠡᠳᠦ ᠬᠡᠳᠦᠨ ᠭᠠᠭᠴᠠ ᠣᠪᠣᠭᠠ ᠪᠣᠯᠣᠨ ᠰᠦᠷᠦᠭ ᠣᠪᠣᠭᠠ ᠪᠠᠷ ᠪᠦᠷᠢᠯᠳᠦᠭᠰᠡᠨ ᠣᠯᠠᠨ ᠴᠣᠭᠴᠠᠲᠤ ᠣᠪᠣᠭᠠ ᠪᠣᠯᠣᠨᠠ ᠃ ᠡᠶᠢᠮᠦ ᠠᠴᠠ ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠤ ᠨᠠᠷᠢᠨ ᠲᠣᠳᠣᠷᠬᠠᠢ ᠰᠤᠷᠠᠭ ᠵᠠᠩᠭᠢ ᠂ ᠳᠠᠷᠤᠢ ᠨᠡᠷᠡᠶᠢᠳᠦᠯ ᠂ ᠭᠠᠵᠠᠷ ᠤᠨ ᠪᠠᠶᠢᠴᠠ ᠂ ᠪᠠᠶᠢᠷᠢᠰᠢᠯ ᠢ ᠣᠶᠢᠯᠠᠭᠠᠬᠤ ᠶᠠᠪᠤᠳᠠᠯ ᠨᠢ ᠨᠡᠯᠢᠶᠡᠳ ᠬᠦᠴᠢᠷ ᠲᠠᠢ ᠪᠠᠶᠢᠵᠤ ᠲᠤᠬᠠᠢ ᠶᠢᠨ ᠣᠪᠣᠭᠠᠨ ᠤ ᠣᠶᠢᠷᠠ ᠬᠠᠪᠢ ᠪᠠᠷ ᠨᠤᠲᠤᠭᠯᠠᠵᠤ ᠪᠠᠶᠢᠭᠠ ᠠᠷᠠᠳ ᠰᠠᠶ᠋ᠢ ᠡᠶᠢᠮᠦᠷᠬᠦᠦ ᠣᠪᠣᠭᠠᠨ ᠤ ᠲᠤᠬᠠᠢ ᠵᠢᠭᠠᠬᠠᠨ ᠣᠶᠢᠯᠠᠭᠠᠯᠲᠠ ᠲᠠᠢ ᠪᠠᠶᠢᠳᠠᠭ ᠃ ᠭᠡᠲᠡᠯᠡ ᠣᠳᠣ ᠣᠪᠣᠭᠠ ᠶᠢ ᠲᠥᠷᠥᠯᠵᠢᠭᠦᠯᠵᠦ ᠠᠩᠭᠢᠯᠠᠵᠤ ︵Typifying︶ ᠰᠤᠳᠤᠯᠬᠤ ᠨᠢ ᠣᠪᠣᠭᠠᠨ ᠰᠤᠳᠤᠯᠤᠯ ᠤᠨ ᠴᠢᠬᠤᠯᠠ ᠨᠢᠭᠡᠨ ᠠᠭᠤᠯᠭᠠ ᠪᠣᠯᠵᠤ ᠪᠠᠶᠢᠭᠠ ᠶᠤᠮ ᠃
1-1 ᠭᠠᠭᠴᠠ ᠣᠪᠣᠭᠠ
ᠭᠠᠭᠴᠠ ᠣᠪᠣᠭᠠ ︵Independent Oboo︶ ᠭᠡᠳᠡᠭ ᠨᠢ ᠵᠥᠪᠬᠡᠨ ᠨᠢᠭᠡ ᠯᠡ ᠣᠪᠣᠭᠠ ᠪᠠᠷ ᠪᠦᠷᠢᠯᠳᠦᠭᠰᠡᠨ ᠣᠪᠣᠭᠠ ᠶᠢ ᠵᠢᠭᠠᠨᠠ ᠃ ᠡᠶᠢᠮᠦᠷᠬᠦᠦ ᠭᠠᠭᠴᠠ ᠣᠪᠣᠭᠠ ᠪᠣᠯ ᠮᠣᠩᠭᠤᠯ ᠨᠤᠲᠤᠭ ᠲᠤ ᠵᠥᠩᠳᠡᠭᠡᠨ ᠲᠠᠭᠠᠷᠠᠯᠳᠤᠳᠠᠭ ᠃ ᠦᠵᠦᠮᠦᠴᠢᠨ ᠨᠤᠲᠤᠭ ᠲᠤ ᠴᠦ ᠭᠡᠰᠡᠨ ᠡᠶᠢᠮᠦ ᠣᠪᠣᠭᠠ ᠴᠥᠭᠡᠨ ᠪᠤᠰᠤ ᠪᠠᠶᠢᠨᠠ ᠃ ᠮᠢᠨᠤ ᠬᠡᠭᠡᠷᠡ ᠶᠢᠨ ᠰᠢᠨᠵᠢᠯᠡᠭᠡᠨ ᠤ ᠳᠤᠮᠳᠠ ᠲᠠᠭᠠᠷᠠᠯᠳᠤᠭᠰᠠᠨ ᠭᠠᠭᠴᠠ ᠣᠪᠣᠭᠠ ᠨᠤᠭᠤᠳ ᠤᠨ ᠣᠯᠠᠩᠬᠢ ᠨᠢ ᠪᠦᠷ ᠴᠢᠯᠠᠭᠤ ᠪᠠᠷ ᠣᠪᠣᠭᠠᠯᠠᠵᠤ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠨᠤᠭᠤᠳ ᠪᠠᠶᠢᠪᠠ ᠃
1-2 ᠰᠦᠷᠦᠭ ᠣᠪᠣᠭᠠ
ᠰᠦᠷᠦᠭ ᠣᠪᠣᠭᠠ ︵Group Oboo︶ ᠭᠡᠳᠡᠭ ᠨᠢ ᠭᠤᠣᠯ ᠣᠪᠣᠭᠠ ᠪᠣᠯᠣᠨ ᠱᠠᠪᠢ ᠣᠪᠣᠭᠠ ᠪᠠᠷ ᠪᠦᠷᠢᠯᠳᠦᠭᠰᠡᠨ ᠣᠪᠣᠭᠠ ᠶᠢ ᠬᠡᠯᠡᠨᠡ ᠃ ᠰᠦᠷᠦᠭ ᠣᠪᠣᠭᠠᠨ ᠤ ᠣᠨᠴᠠᠯᠢᠭ ᠨᠢ ᠭᠤᠣᠯ ᠣᠪᠣᠭᠠ ᠨᠢ ᠨᠡᠯᠢᠶᠡᠳ ᠶᠡᠭᠡ ᠪᠥᠭᠡᠳ ᠪᠦᠲᠦᠴᠡ ᠬᠡᠯᠪᠡᠷᠢ ᠶᠢᠨ ᠲᠠᠯᠠ ᠪᠠᠷ ᠶᠠᠩᠵᠤ ᠪᠦᠷᠢ ᠶᠢᠨ ᠪᠠᠶᠢᠳᠠᠭ ᠃ ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠪᠣᠯᠣᠨ ᠲᠤᠭᠠ ᠨᠢ ᠴᠦ ᠶᠠᠩᠵᠤ ᠪᠦᠷᠢ ᠶᠢᠨ ᠪᠠᠶᠢᠳᠠᠭ ᠃ ᠬᠦᠰᠦᠨᠦᠭᠲᠦ ﹇18﹈ ᠪᠣᠯ ᠵᠣᠬᠢᠶᠠᠭᠴᠢ ᠶᠢᠨ ᠬᠡᠭᠡᠷᠡ ᠶᠢᠨ ᠰᠢᠨᠵᠢᠯᠡᠭᠡᠨ ᠬᠢᠭᠰᠡᠨ 15 ᠣᠪᠣᠭᠠᠨ ᠤ ᠬᠠᠪᠲᠠᠭᠠᠢ ᠵᠢᠷᠤᠭ ᠪᠣᠯᠣᠨᠠ ᠃ ᠵᠢᠷᠤᠭ ᠲᠠᠬᠢ ᠱᠠᠪᠢ ᠣᠪᠣᠭᠠᠨ ᠤ ᠳᠣᠣᠷᠠ ᠲᠠᠯᠠ ᠶᠢᠨ ᠰᠤᠮᠤᠨ ᠦᠵᠦᠭᠦᠷ ᠨᠢ ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠤᠨ ᠴᠢᠭᠯᠡᠯ ᠢ ᠵᠢᠭᠠᠵᠤ ᠪᠣᠢ ᠃ ︿N﹀ ᠭᠡᠳᠡᠭ ᠨᠢ ︽ᠬᠤᠶᠢᠨᠠ ᠂ ᠬᠤᠶᠢᠰᠢ︾ ᠭᠡᠳᠡᠭ ᠤᠳᠬᠠ ᠪᠦᠬᠦᠢ ︿North﹀ ᠭᠡᠳᠡᠭ ᠠᠩᠭ᠍ᠯᠢ ᠬᠡᠯᠡᠨ ᠤ ᠲᠣᠪᠴᠢᠯᠠᠯ ᠪᠣᠯᠣᠨᠠ ᠃ ︿N﹀ ᠦᠰᠦᠭ ᠤᠨ ᠬᠠᠵᠠᠭᠤ ᠳᠠᠬᠢ ᠰᠤᠮᠤᠨ ᠦᠵᠦᠭᠦᠷ ᠨᠢ ᠬᠤᠶᠢᠰᠢ ᠴᠢᠭᠯᠡᠯ ᠢ ᠵᠢᠭᠠᠨᠠ ᠃ ︿EW﹀ ᠭᠡᠳᠡᠭ ᠨᠢ ︵East West︶ ︽ᠵᠡᠭᠦᠨ ᠪᠠᠷᠠᠭᠤᠨ︾ ᠬᠡᠮᠡᠬᠦ ᠤᠳᠬᠠ ᠪᠦᠬᠦᠢ ᠠᠩᠭ᠍ᠯᠢ ᠬᠡᠯᠡᠨ ᠤ ᠲᠣᠪᠴᠢᠯᠠᠯ ᠪᠣᠯᠣᠨᠠ ᠃ ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠤᠨ ᠴᠢᠭᠯᠡᠯ ᠤᠨ ᠵᠢᠮᠡ ᠶᠣᠰᠣ ᠶᠢ ᠲᠣᠳᠣᠷᠬᠠᠶᠢᠯᠠᠬᠤ ᠶᠢᠨ ᠲᠤᠯᠠᠳᠠ ᠡᠶᠢᠮᠦᠷᠬᠦᠦ ᠲᠣᠪᠴᠢᠯᠠᠭᠰᠠᠨ ᠨᠡᠷᠡ ᠲᠣᠮᠢᠶᠠ ᠶᠢ ᠬᠡᠷᠡᠭᠯᠡᠪᠡ ᠃ ᠳᠣᠣᠷᠠᠬᠢ ᠬᠠᠪᠲᠠᠭᠠᠢ ᠵᠢᠷᠤᠭ ᠠᠴᠠ ᠪᠢᠳᠠ ᠰᠦᠷᠦᠭ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠪᠣᠯᠣᠨ ᠲᠣᠭᠠᠨ ᠤ ᠣᠯᠠᠨ ᠲᠠᠯᠠᠲᠤ ᠴᠢᠨᠠᠷ ᠢ ᠣᠶᠢᠯᠠᠭᠠᠵᠤ ᠪᠣᠯᠣᠨᠠ ᠃ ᠣᠯᠠᠩᠬᠢ ᠰᠦᠷᠦᠭ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠨᠢ ᠲᠡᠭᠰᠢ ᠬᠡᠮᠲᠦ ᠴᠢᠭᠯᠡᠯ ᠢᠶᠠᠷ ᠪᠠᠶᠢᠷᠢᠰᠢᠵᠤ ᠪᠠᠶᠢᠳᠠᠭ ᠨᠢ ᠲᠡᠭᠦᠨ ᠤ ᠨᠡᠶᠢᠲᠡᠯᠢᠭ ᠣᠨᠴᠠᠯᠢᠭ ᠤᠨ ᠨᠢᠭᠡ ᠪᠣᠯᠣᠨᠠ ᠃
1-3 ᠨᠡᠶᠢᠯᠡᠮᠡᠯ ᠣᠪᠣᠭᠠ
ᠨᠡᠶᠢᠯᠡᠮᠡᠯ ᠣᠪᠣᠭᠠ ︵Multiple Oboo︶ ᠭᠡᠳᠡᠭ ᠨᠢ ᠬᠡᠳᠦ ᠬᠡᠳᠦᠨ ᠭᠠᠭᠴᠠ ᠣᠪᠣᠭᠠ ᠪᠤᠶᠤ ᠰᠦᠷᠦᠭ ᠣᠪᠣᠭᠠ ᠪᠠᠷ ᠨᠡᠶᠢᠯᠡᠵᠦ ᠪᠦᠷᠢᠯᠳᠦᠭᠰᠡᠨ ᠣᠪᠣᠭᠠ ᠶᠢ ᠬᠡᠯᠡᠨᠡ ᠃ ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠤ ᠣᠨᠴᠠᠯᠢᠭ ᠨᠢ ᠭᠤᠣᠯ ᠪᠣᠯᠬᠤ ᠨᠢᠭᠡᠨ ᠭᠠᠭᠴᠠ ᠣᠪᠣᠭᠠ ᠪᠤᠶᠤ ᠡᠰᠡᠬᠦᠯᠡ ᠨᠢᠭᠡᠨ ᠰᠦᠷᠦᠭ ᠣᠪᠣᠭᠠ ᠪᠠᠶᠢᠵᠤ ᠲᠡᠭᠦᠨ ᠤ ᠡᠷᠭᠢᠨ ᠲᠣᠭᠤᠷᠢᠨ ᠳᠤ ᠥᠭᠡᠷᠡ ᠪᠠᠰᠠ ᠬᠡᠳᠦ ᠬᠡᠳᠦᠨ ᠭᠠᠭᠴᠠ ᠣᠪᠣᠭᠠ ᠪᠤᠶᠤ ᠰᠦᠷᠦᠭ ᠣᠪᠣᠭᠠ ᠪᠣᠰᠬᠠᠭᠰᠠᠨ ᠪᠠᠶᠢᠵᠤ ᠡᠳᠡᠭᠡᠷ ᠨᠢ ᠨᠡᠶᠢᠯᠡᠭᠡᠳ ᠨᠢᠭᠡᠨ ᠣᠪᠣᠭᠠ ᠶᠢ ᠪᠦᠷᠢᠯᠳᠦᠭᠦᠯᠳᠡᠭ ᠃ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠨᠢ ᠭᠤᠣᠯ ᠪᠣᠯᠬᠤ ᠭᠠᠭᠴᠠ ᠣᠪᠣᠭᠠ ᠪᠤᠶᠤ ᠰᠦᠷᠦᠭ ᠣᠪᠣᠭᠠᠨ ᠤ ᠨᠡᠷᠡ ᠪᠠᠷ ᠨᠡᠷᠡᠯᠡᠭᠳᠡᠳᠡᠭ ᠃ ᠲᠤᠰ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠶᠢ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠣᠶᠢᠷᠠ ᠣᠷᠴᠢᠮ ᠳᠤᠨᠢ ᠪᠠᠶᠢᠭᠠ ᠭᠠᠭᠴᠠ ᠣᠪᠣᠭᠠ ᠪᠤᠶᠤ ᠰᠦᠷᠦᠭ ᠣᠪᠣᠭᠠ ᠶᠢ ᠳᠠᠭᠠᠯᠲᠠ ᠣᠪᠣᠭᠠ ᠭᠡᠵᠤ ᠨᠡᠷᠡᠯᠡᠵᠦ ᠪᠣᠯᠣᠨᠠ ᠃ ᠡᠯᠡ ᠳᠠᠭᠠᠯᠲᠠ ᠣᠪᠣᠭᠠ ᠨᠢ ᠲᠤᠰ ᠲᠤᠰ ᠤᠨ ᠨᠡᠷᠡ ᠲᠠᠢ ᠪᠠᠶᠢᠳᠠᠭ ᠃ ᠦᠵᠦᠮᠦᠴᠢᠨ ᠨᠤᠲᠤᠭ ᠲᠤ ᠡᠶᠢᠮᠦᠷᠬᠦᠦ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠲᠣᠩ ᠣᠯᠠᠨ ᠪᠠᠶᠢᠳᠠᠭ ᠃ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠪᠣᠯ ᠣᠪᠣᠭᠠ ᠨᠤᠭᠤᠳ ᠤᠨ ᠳᠣᠲᠣᠷᠠ ᠨᠡᠯᠢᠶᠡᠳ ᠥᠪᠡᠷᠮᠢᠴᠡ ᠪᠠᠶᠢᠷᠢᠰᠢᠯ ᠲᠠᠢ ᠣᠪᠣᠭᠠ ᠪᠣᠯᠬᠤ ᠶᠤᠮ ᠃ ᠵᠢᠱᠢᠶᠡᠯᠡᠪᠡᠯ ᠂ ᠲᠤᠯᠭᠠ ᠣᠪᠣᠭᠠ ﹇No.23﹈ ᠨᠢ ᠭᠠᠵᠠᠷ ᠣᠪᠣᠭᠠ ᠂ ᠠᠷᠠᠯ ᠤᠨ ᠣᠪᠣᠭᠠ ᠂ ᠱᠠᠷᠢᠯ ᠤᠨ ᠣᠪᠣᠭᠠ ᠵᠡᠷᠭᠡ ᠭᠤᠷᠪᠠᠨ ᠳᠠᠭᠠᠯᠲᠠ ᠣᠪᠣᠭᠠ ᠪᠠᠷ ᠪᠦᠷᠢᠯᠳᠦᠭᠰᠡᠨ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠶᠤᠮ ᠃ ᠡᠶᠢᠮᠦᠷᠬᠦᠦ ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠤ ᠪᠠᠶᠢᠳᠠᠯ ᠢ ᠲᠤᠬᠠᠢ ᠶᠢᠨ ᠨᠤᠲᠤᠭ ᠤᠨ ᠬᠥᠮᠥᠰ ᠪᠤᠶᠤ ᠲᠤᠬᠠᠢ ᠶᠢᠨ ᠣᠪᠣᠭᠠᠨ ᠲᠠᠬᠢᠯᠭᠠ ᠳᠤ ᠣᠷᠣᠯᠴᠠᠳᠠᠭ ᠯᠠᠮᠠ ᠨᠠᠷ ᠮᠡᠳᠡᠵᠦ ᠪᠠᠶᠢᠳᠠᠭ ᠪᠣᠯᠬᠤᠷ ᠲᠤᠬᠠᠢ ᠶᠢᠨ ᠨᠤᠲᠤᠭ ᠤᠨ ᠬᠥᠮᠥᠰ ᠠᠴᠠ ᠠᠰᠠᠭᠤᠨ ᠰᠤᠷᠪᠤᠯᠵᠢᠯᠠᠬᠤ ᠨᠢ ᠴᠢᠬᠤᠯᠠ ᠪᠠᠶᠢᠳᠠᠭ ᠃
ᠵᠡᠭᠦᠯᠲᠡ᠄
﹇1﹈ 秋葉隆 ︵Akiba Takashi︶ 1941 ︵1996︶「鄂博と鄂博祭」『満蒙の民族と宗教』東京᠄大空社 pp.252-264 ︵ᠠᠺᠢᠪᠠ ᠲᠠᠺᠠᠰᠢ ︿ᠣᠪᠣᠭᠠ ᠪᠣᠯᠣᠨ ᠣᠪᠣᠭᠠᠨ ᠲᠠᠬᠢᠯᠭᠠ﹀ ︽ᠮᠠᠨᠵᠤ ᠮᠣᠩᠭᠤᠯ ᠤᠨ ᠵᠠᠩ ᠦᠢᠯᠡ ᠪᠣᠯᠣᠨ ᠰᠢᠲᠦᠯᠭᠡ ᠪᠢᠰᠢᠷᠡᠯ︾︶ p.253-259。
ᠭᠤᠣᠯ ᠣᠪᠣᠭᠠ ︵Large Oboo︶ ᠭᠡᠳᠡᠭ ᠪᠣᠯ ᠰᠦᠷᠦᠭ ᠣᠪᠣᠭᠠᠨ ᠤ ᠭᠤᠣᠯ ᠳᠤ ᠨᠢ ᠪᠠᠶᠢᠷᠢᠰᠢᠵᠤ ᠪᠦᠲᠦᠴᠡ ᠬᠡᠯᠪᠡᠷᠢ ᠶᠢᠨ ᠲᠠᠯᠠ ᠪᠠᠷ ᠬᠠᠮᠤᠭ ᠤᠨ ᠶᠡᠭᠡ ᠣᠪᠣᠭᠠ ᠶᠢ ᠵᠢᠭᠠᠵᠤ ᠪᠠᠶᠢᠳᠠᠭ ︵ᠵᠢᠷᠤᠭ 12︶ ᠃ ︽ᠭᠤᠣᠯ ᠣᠪᠣᠭᠠ ᠶᠢ ᠪᠠᠰᠠ ᠶᠡᠭᠡ ᠣᠪᠣᠭᠠ ᠂ ᠪᠦᠳᠦᠭᠦᠨ ᠣᠪᠣᠭᠠ ᠂ ᠨᠣᠶᠠᠨ ᠣᠪᠣᠭᠠ ᠂ ᠵᠠᠩᠵᠤᠨ ᠣᠪᠣᠭᠠ ᠂ ᠲᠥᠪ ᠣᠪᠣᠭᠠ ᠭᠡᠵᠤ ᠨᠡᠷᠡᠯᠡᠳᠡᠭ︾ ﹇1﹈ ᠃ ᠭᠤᠣᠯ ᠣᠪᠣᠭᠠᠨ ᠤ ᠬᠡᠯᠪᠡᠷᠢ ᠨᠢ ᠪᠥᠭᠡᠷᠡᠩᠬᠡᠢ ᠪᠠᠭᠠᠨᠠ ᠪᠤᠶᠤ ᠱᠣᠷᠣᠯᠵᠢᠨ ᠬᠡᠯᠪᠡᠷᠢ ᠲᠠᠢ ᠪᠠᠶᠢᠳᠠᠭ ᠃ ᠭᠤᠣᠯ ᠣᠪᠣᠭᠠᠨ ᠤ ᠳᠤᠮᠳᠠ ᠨᠢ ᠱᠣᠷᠣᠭᠰᠢᠨ ᠮᠣᠳᠣ ᠶᠢ ᠪᠣᠰᠬᠠᠵᠤ ᠲᠡᠭᠦᠨ ᠤ ᠬᠠᠵᠠᠭᠤ ᠪᠠᠷ ᠨᠢ ᠨᠠᠪᠴᠢ ᠨᠠᠮᠠᠭᠠ ᠲᠠᠢ ᠨᠣᠶᠢᠲᠠᠨ ᠪᠤᠷᠭᠠᠰᠤ ᠶᠢ ᠬᠠᠳᠬᠤᠵᠤ ᠲᠠᠯᠪᠢᠳᠠᠭ ᠃ ᠲᠠᠬᠢᠯᠭᠠ ᠲᠠᠢ ᠣᠪᠣᠭᠠᠨ ᠳᠤ ᠵᠢᠯ ᠪᠦᠷᠢ ᠣᠪᠣᠭᠠ ᠵᠠᠰᠠᠬᠤ ᠦᠶᠡᠰ ᠯᠣᠩᠬᠤ ᠪᠤᠶᠤ ᠵᠢᠵᠢᠭ ᠪᠤᠲᠤᠩ ᠳᠤ ᠰᠦᠮᠡ ᠶᠢᠨ ᠬᠤᠷᠠᠯ ᠢᠶᠠᠷ ᠳᠠᠮᠵᠢᠨ ᠷᠠᠪᠨᠠᠶᠢᠯᠠᠭᠤᠯᠤᠭᠰᠠᠨ ᠤᠰᠤ ᠶᠢ ᠰᠠᠪᠠᠯᠠᠵᠤ ᠱᠣᠷᠣᠭᠰᠢᠨ ᠮᠣᠳᠣᠨ ᠤ ᠳᠣᠣᠷᠠ ᠨᠢ ᠪᠤᠯᠠᠳᠠᠭ ᠃ ᠡᠨᠡ ᠬᠦ ᠤᠰᠤ ᠶᠢ ︽ᠴᠦᠪᠦᠩ ᠤᠰᠤ︾ ᠭᠡᠵᠤ ᠨᠡᠷᠡᠯᠡᠳᠡᠭ ᠃ ᠲᠡᠷᠡ ᠨᠢ ᠣᠪᠣᠭᠠᠨ ᠲᠠᠬᠢᠯᠭᠠ ᠳᠤ ᠬᠡᠷᠡᠭᠯᠡᠳᠡᠭ ᠮᠥᠨ ᠨᠢᠭᠡ ᠵᠦᠢᠯ ᠤᠨ ᠷᠠᠰᠢᠶᠠᠨ ᠤᠰᠤ ︵Holy Water︶ ᠪᠣᠯᠣᠨᠠ ᠃ ᠭᠤᠣᠯ ᠣᠪᠣᠭᠠ ᠶᠢ ᠪᠣᠰᠬᠠᠬᠤ ᠦᠶᠡᠰ ᠨᠡᠯᠢᠶᠡᠳ ᠬᠦᠴᠦ ᠣᠷᠣᠭᠤᠯᠵᠤ ᠪᠣᠰᠬᠠᠭᠰᠠᠨ ᠤ ᠳᠠᠷᠠᠭᠠ ᠶᠠᠩᠵᠤ ᠪᠦᠷᠢ ᠶᠢᠨ ᠤᠳᠬᠠ ᠠᠭᠤᠯᠭᠠ ᠪᠦᠬᠦᠢ ᠵᠠᠰᠠᠯ ᠤᠨ ᠡᠳ᠋ᠯᠡᠯ ᠢᠶᠠᠷ ᠴᠢᠮᠡᠭᠯᠡᠳᠡᠭ ᠃ ᠣᠪᠣᠭᠠᠨ ᠲᠠᠬᠢᠯᠭᠠ ᠨᠢ ᠣᠯᠠᠩᠬᠢ ᠪᠠᠶᠢᠳᠠᠯ ᠳᠤ ᠭᠤᠣᠯ ᠣᠪᠣᠭᠠᠨ ᠤ ᠡᠮᠦᠨᠡ ᠶᠠᠪᠤᠭᠳᠠᠳᠠᠭ ᠃ ᠭᠡᠲᠡᠯᠡ ᠰᠢᠯᠤᠭᠤᠨ ᠬᠥᠬᠡ ᠬᠤᠰᠢᠭᠤᠨ ᠤ ᠦᠬᠡᠷᠴᠢᠨ ᠣᠪᠣᠭᠠ ᠶᠢ ᠬᠤᠶᠢᠰᠢ ᠬᠠᠨᠳᠤᠭᠤᠯᠤᠨ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠪᠣᠯᠬᠤᠷ ᠂ ᠲᠤᠰ ᠣᠪᠣᠭᠠᠨ ᠤ ᠲᠠᠬᠢᠯᠭᠠ ᠨᠢ ᠣᠪᠣᠭᠠᠨ ᠤ ᠪᠠᠨ ᠬᠤᠶᠢᠲᠤ ᠲᠠᠯᠠ ᠳᠤ ᠶᠠᠪᠤᠭᠳᠠᠳᠠᠭ ᠃ ᠡᠨᠡ ᠨᠢ ᠮᠥᠨ ᠴᠦ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠪᠦᠲᠦᠴᠡ ᠶᠢᠨ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠢ ᠬᠠᠷᠠᠭᠤᠯᠵᠤ ᠪᠠᠶᠢᠭᠠ ᠶᠤᠮ ᠃ ᠣᠪᠣᠭᠠᠨ ᠲᠠᠬᠢᠯᠭᠠ ᠶᠢᠨ ᠡᠮᠦᠨᠡ ᠣᠪᠣᠭᠠᠨ ᠳᠠᠭᠠᠭᠠᠮᠠᠯ ᠨᠠᠷ ᠭᠤᠣᠯ ᠣᠪᠣᠭᠠ ᠠᠴᠠ ᠡᠬᠢᠯᠡᠨ ᠱᠠᠪᠢ ᠣᠪᠣᠭᠠ ᠵᠢᠴᠢ ᠳᠠᠭᠠᠯᠲᠠ ᠣᠪᠣᠭᠠ ᠶᠢ ᠵᠣᠬᠢᠬᠤ ᠬᠡᠮᠵᠢᠶᠡ ᠪᠠᠷ ᠵᠠᠰᠠᠨ ᠰᠡᠯᠪᠢᠳᠡᠭ᠃
ᠣᠪᠣᠭᠠᠨ ᠲᠠᠬᠢᠯᠭᠠ ᠶᠢᠨ ᠦᠶᠡᠰ ᠲᠠᠬᠢᠯᠭᠠᠴᠢᠳ ᠠᠴᠠ ᠡᠷᠭᠦᠯ ᠲᠠᠬᠢᠯᠭᠠ ᠶᠢᠨ ᠡᠳ᠋ ᠠᠴᠠ ᠭᠠᠳᠠᠨᠠ ᠣᠪᠣᠭᠠᠨ ᠤ ᠣᠶᠢᠷᠠᠯᠴᠠᠭᠠᠬᠢ ᠵᠢᠵᠢᠭ ᠴᠢᠯᠠᠭᠤ ᠶᠢ ᠠᠪᠴᠤ ᠣᠪᠣᠭᠠᠨ ᠳᠡᠭᠡᠷᠡ ᠡᠷᠭᠦᠳᠡᠭ ᠃ ᠶᠡᠷᠦ ᠨᠢ ᠡᠩ ᠤᠨ ᠦᠶᠡ ᠳᠤ ᠴᠦ ᠭᠡᠰᠡᠨ ᠶᠠᠮᠠᠷ ᠨᠢᠭᠡᠨ ᠤᠴᠢᠷ ᠢᠶᠠᠷ ᠥᠪᠡᠷᠰᠡᠳ ᠤᠨ ᠢᠶᠠᠨ ᠳᠠᠬᠢᠳᠠᠭ ᠣᠪᠣᠭᠠᠨ ᠳᠡᠭᠡᠷᠡ ᠭᠠᠷᠤᠭᠰᠠᠨ ᠬᠥᠮᠥᠰ ᠣᠪᠣᠭᠠᠨ ᠤ ᠣᠶᠢᠷᠠᠯᠴᠠᠭᠠ ᠪᠤᠲᠠᠷᠠᠭᠰᠠᠨ ᠴᠢᠯᠠᠭᠤ ᠶᠢ ᠲᠡᠭᠦᠵᠦ ᠣᠪᠣᠭᠠᠨ ᠳᠡᠭᠡᠷᠡ ᠨᠢ ᠣᠪᠣᠭᠠᠯᠠᠵᠤ ᠲᠠᠯᠪᠢᠳᠠᠭ ᠃ ᠣᠪᠣᠭᠠᠨ ᠲᠠᠬᠢᠯᠭᠠ ᠶᠢ ᠣᠷᠣᠯᠴᠠᠨ ᠠᠵᠢᠭᠯᠠᠭᠰᠠᠨ ᠶᠠᠫᠤᠨ ᠤ ᠵᠠᠩ ᠦᠢᠯᠡ ᠶᠢᠨ ᠰᠤᠳᠤᠯᠤᠭᠠᠴᠢ ᠮᠤᠷᠢᠲ᠋ᠠ ᠪᠠᠷ ︽ᠣᠪᠣᠭᠠᠨ ᠳᠡᠭᠡᠷᠡᠬᠢ ᠴᠢᠯᠠᠭᠤ ᠨᠤᠭᠤᠳ ᠪᠣᠯ ᠣᠪᠣᠭᠠ ᠪᠠᠨ ᠳᠠᠬᠢᠬᠤ ᠪᠠᠷ ᠢᠷᠡᠭᠰᠡᠨ ᠬᠥᠮᠥᠰ ᠤᠨ ᠠᠪᠴᠢᠷᠠᠨ ᠡᠷᠭᠦᠭᠰᠡᠨ ᠴᠢᠯᠠᠭᠤ ᠪᠣᠯᠬᠤ ᠶᠤᠮ︾ ﹇2﹈ ᠭᠡᠵᠤ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠳᠠᠭ ᠃ ᠣᠪᠣᠭᠠ ᠪᠠᠨ ᠳᠠᠬᠢᠬᠤ ᠪᠠᠷ ᠣᠴᠢᠭᠰᠠᠨ ᠬᠥᠮᠥᠰ ᠣᠪᠣᠭᠠᠨ ᠤ ᠣᠶᠢᠷᠠᠯᠴᠠᠭᠠᠬᠢ ᠴᠢᠯᠠᠭᠤ ᠶᠢ ᠠᠪᠴᠤ ᠣᠪᠣᠭᠠᠨ ᠳᠠᠭᠠᠨ ᠡᠷᠭᠦᠳᠡᠭ ᠨᠢ ᠶᠡᠷᠦᠳᠡ ᠶᠢᠨ ᠵᠤᠷᠰᠢᠯ ᠶᠤᠮ ᠃ ᠡᠨᠡ ᠬᠦ ᠬᠥᠳᠡᠯᠭᠡᠭᠡᠨ ᠳᠤ ᠬᠡᠳᠦᠨ ᠵᠦᠢᠯ ᠤᠨ ᠤᠳᠬᠠ ᠠᠭᠤᠯᠭᠠ ᠪᠠᠭᠲᠠᠵᠤ ᠪᠠᠶᠢᠳᠠᠭ ᠃ ᠣᠪᠣᠭᠠᠨ ᠳᠠᠭᠠᠨ ᠴᠢᠯᠠᠭᠤ ᠡᠷᠭᠦᠬᠦ ᠪᠠᠷ ᠳᠠᠮᠵᠢᠭᠤᠯᠵᠤ ᠥᠪᠡᠷ ᠤᠨ ᠬᠦᠰᠡᠭᠰᠡᠨ ᠰᠠᠨᠠᠭᠰᠠᠨ ᠢᠶᠠᠨ ᠣᠪᠣᠭᠠᠨ ᠡᠵᠡᠨ ᠳᠡᠭᠡᠨ ᠳᠠᠭᠠᠳᠬᠠᠵᠤ ᠪᠠᠶᠢᠳᠠᠭ ᠃ ᠮᠥᠨ ᠴᠦ ᠥᠪᠡᠷ ᠤᠨ ᠢᠷᠡᠭᠰᠡᠨ ᠭᠡᠳᠡᠭ ᠢᠶᠠᠨ ᠣᠪᠣᠭᠠᠨ ᠡᠵᠡᠨ ᠳᠡᠭᠡᠨ ᠮᠡᠳᠡᠭᠦᠯᠵᠦ ᠪᠠᠶᠢᠳᠠᠭ ᠃ ᠡᠭᠦᠨ ᠠᠴᠠ ᠪᠣᠯᠵᠤ ᠣᠪᠣᠭᠠ ᠪᠣᠯᠣᠨ ᠣᠪᠣᠭᠠ ᠳᠠᠬᠢᠵᠤ ᠪᠠᠶᠢᠭᠠ ᠬᠥᠮᠥᠨ ᠤ ᠬᠤᠭᠤᠷᠣᠨᠳᠤ ᠰᠦᠰᠦᠭᠯᠡᠬᠦ ᠪᠢᠰᠢᠷᠡᠬᠦ ᠰᠡᠳᠬᠢᠯᠭᠡ ᠡᠭᠦᠰᠳᠡᠭ ᠃ ᠨᠥᠭᠦᠭᠡ ᠲᠠᠯᠠ ᠪᠠᠷ ᠣᠯᠠᠨ ᠬᠥᠮᠥᠨ ᠴᠢᠯᠠᠭᠤ ᠡᠷᠭᠦᠬᠦ ᠠᠴᠠ ᠪᠣᠯᠵᠤ ᠣᠪᠣᠭᠠ ᠨᠢ ᠤᠯᠠᠮ ᠰᠦᠷᠯᠢᠭ ᠶᠡᠬᠡᠮᠰᠦᠭ ᠪᠣᠯᠳᠠᠭ ᠃ ᠣᠪᠣᠭᠠ ᠨᠢ ᠰᠠᠭᠤᠷᠢ ᠳᠡᠭᠲᠡᠷ ᠲᠠᠢ ᠪᠣᠯᠣᠨ ᠬᠤᠪᠢᠷᠠᠭᠰᠠᠨ ᠪᠠᠶᠢᠳᠠᠯ ᠤᠨ ᠲᠤᠬᠠᠢ ᠰᠠᠨᠦ ᠪᠠᠷ ︽ᠤᠤᠯ ᠨᠢ ᠣᠪᠣᠭᠠ ᠪᠣᠯ ᠪᠠᠭᠠ ᠬᠡᠯᠪᠡᠷᠢ ᠶᠢᠨ ᠪᠣᠰᠬᠠᠭᠰᠠᠨ ᠶᠠᠭᠤᠮᠠ ᠲᠡᠳᠦᠢ ᠪᠠᠶᠢᠭᠰᠠᠨ ᠶᠤᠮ ᠃ ᠴᠢᠩ ᠤᠯᠤᠰ ᠠᠴᠠ ᠬᠤᠶᠢᠰᠢ ᠲᠡᠭᠦᠨ ᠤ ᠰᠠᠭᠤᠷᠢᠨ ᠳᠡᠭᠡᠷᠡ ᠨᠢ ᠴᠢᠯᠠᠭᠤ ᠣᠪᠣᠭᠠᠯᠠᠵᠤ ᠰᠠᠭᠤᠷᠢ ᠪᠣᠯᠭᠠᠵᠤ ᠶᠡᠭᠡ ᠳᠤᠮᠳᠠ ᠪᠠᠭᠠ ᠭᠤᠷᠪᠠᠨ ᠳᠡᠭᠲᠡᠷ ᠵᠢᠭᠢᠷᠢᠭᠯᠡᠨ ᠪᠣᠰᠬᠠᠭᠰᠠᠨ ᠠᠴᠠ ᠣᠪᠣᠭᠠ ᠨᠢ ᠪᠥᠭᠡᠷᠡᠩᠬᠡᠢ ᠪᠠᠭᠠᠨᠠ ᠬᠡᠯᠪᠡᠷᠢ ᠲᠠᠢ ᠪᠣᠯᠣᠭᠰᠠᠨ ᠶᠤᠮ︾ ﹇3﹈ ᠭᠡᠵᠤ ᠲᠡᠮᠳᠡᠭᠯᠡᠭᠰᠡᠨ ᠶᠤᠮ ᠃ ᠰᠢᠨᠡ ᠪᠠᠷ ᠵᠠᠰᠠᠨ ᠰᠡᠷᠭᠦᠭᠡᠵᠦ ᠪᠠᠶᠢᠭᠠ ᠣᠪᠣᠭᠠ ᠨᠤᠭᠤᠳ ᠤᠨ ᠣᠯᠠᠩᠬᠢ ᠨᠢ ᠳᠡᠭᠲᠡᠷ ᠲᠠᠢ ᠪᠣᠰᠬᠠᠭᠰᠠᠨ ᠪᠠᠶᠢᠳᠠᠭ ᠃ ︽ᠭᠤᠣᠯ ᠣᠪᠣᠭᠠᠨ ᠤ ᠪᠦᠲᠦᠴᠡ ᠨᠢ ᠭᠤᠣᠯ ᠣᠪᠣᠭᠠ ᠪᠠᠨ ᠪᠥᠭᠡᠷᠡᠩᠬᠡᠢ ᠪᠠᠭᠠᠨᠠ ᠶᠢᠨ ᠬᠡᠯᠪᠡᠷᠢ ᠲᠠᠢ ᠪᠠᠷ ᠴᠢᠯᠠᠭᠤ ᠶᠢ ᠵᠢᠭᠢᠷᠢᠭᠯᠡᠵᠦ ᠬᠤᠶᠠᠷ ᠪᠤᠶᠤ ᠭᠤᠷᠪᠠᠨ ᠳᠠᠪᠬᠤᠷ ᠪᠣᠰᠬᠠᠳᠠᠭ ᠨᠢ ᠶᠡᠷᠦᠳᠡ ᠶᠢᠨ ᠬᠡᠯᠪᠡᠷᠢ ᠶᠤᠮ︾ ﹇4﹈ ᠭᠡᠵᠤ ᠭᠤᠣᠯ ᠣᠪᠣᠭᠠᠨ ᠤ ᠬᠡᠯᠪᠡᠷᠢ ᠶᠢᠨ ᠤᠯᠠᠷᠢᠯ ᠬᠤᠪᠢᠷᠠᠯ ᠤᠨ ᠲᠤᠬᠠᠢ ᠶᠠᠫᠤᠨ ᠤ ᠡᠷᠳᠡᠮᠲᠡᠳ ᠥᠪᠡᠷ ᠤᠨ ᠦᠵᠡᠵᠦ ᠬᠠᠷᠠᠭᠰᠠᠨ ᠢᠶᠠᠨ ᠲᠣᠳᠣᠷᠬᠠᠢ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠳᠠᠭ ᠃
ᠭᠡᠲᠡᠯᠡ ᠣᠪᠣᠭᠠ ᠨᠤᠭᠤᠳ ᠤᠨ ᠪᠦᠲᠦᠴᠡ ᠨᠢ ᠬᠤᠭᠤᠷᠣᠨᠳᠤ ᠪᠠᠨ ᠵᠥᠷᠢᠶᠡ ᠲᠠᠢ ᠪᠠᠶᠢᠳᠠᠭ ᠃ ᠦᠵᠦᠮᠦᠴᠢᠨ ᠨᠤᠲᠤᠭ ᠤᠨ ᠣᠪᠣᠭᠠ ᠨᠤᠭᠤᠳ ᠤᠨ ᠣᠯᠠᠩᠬᠢ ᠶᠢ ᠨᠢ ᠴᠢᠯᠠᠭᠤ ᠪᠠᠷ ᠪᠣᠰᠬᠠᠭᠰᠠᠨ ᠪᠠᠶᠢᠳᠠᠭ ᠃ ᠸᠠᠭᠠᠷ ᠲᠣᠭᠤᠰᠬᠠ ᠪᠠᠷ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠴᠦ ᠪᠠᠰᠠ ᠪᠠᠶᠢᠨᠠ ᠃ ᠰᠢᠨᠡ ᠪᠠᠷ ᠰᠡᠷᠭᠦᠭᠡᠨ ᠵᠠᠰᠠᠭᠰᠠᠨ ᠡᠷᠳᠡᠨᠢ ᠣᠪᠣᠭᠠ ︵ᠰᠢᠯᠢ ᠶᠢᠨ ᠬᠤᠲᠠ︶ ᠪᠣᠯᠣᠨ ᠸᠠᠩᠭᠠᠢ ᠶᠢᠨ ᠣᠪᠣᠭᠠ ︵ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠤ ᠬᠤᠰᠢᠭᠤ ᠣᠪᠣᠭᠠ︶ ᠶᠢ ᠪᠠᠷᠢᠯᠭᠠ ᠶᠢᠨ ᠭᠠᠵᠠᠷ ᠬᠡᠷᠡᠭᠯᠡᠳᠡᠭ ᠳᠥᠷᠪᠡᠯᠵᠢᠨ ᠵᠦᠰᠦᠭᠰᠡᠨ ᠪᠣᠷᠵᠢᠨ ᠴᠢᠯᠠᠭᠤ ᠪᠠᠷ ᠵᠢᠭᠢᠷᠢᠭᠯᠡᠨ ᠪᠣᠰᠬᠠᠭᠰᠠᠨ ᠪᠠᠶᠢᠨᠠ ᠃ ᠡᠨᠡ ᠨᠢ ᠣᠷᠣᠨ ᠨᠤᠲᠤᠭ ᠤᠨ ᠲᠥᠯᠥᠭᠡᠯᠡᠬᠦ ᠴᠢᠨᠠᠷ ᠲᠠᠢ ᠣᠪᠣᠭᠠ ᠶᠢ ᠰᠢᠨᠡ ᠪᠠᠷ ᠰᠡᠷᠭᠦᠭᠡᠨ ᠵᠠᠰᠠᠬᠤ ᠳᠤ ᠠᠯᠪᠠᠨ ᠤ ᠲᠠᠯᠠ ᠠᠴᠠ ᠡᠳ᠋ ᠮᠥᠩᠭᠦ ᠵᠠᠷᠤᠴᠠᠭᠤᠯᠵᠤ ᠬᠦᠨᠳᠦᠳᠬᠡᠨ ᠦᠵᠡᠵᠦ ᠪᠠᠶᠢᠭᠠ ᠶᠢ ᠬᠠᠷᠠᠭᠤᠯᠵᠤ ᠪᠠᠶᠢᠭᠠ ᠶᠤᠮ ᠃
ᠭᠤᠣᠯ ᠣᠪᠣᠭᠠᠨ ᠤ ᠪᠦᠲᠦᠴᠡ ᠶᠢ ᠬᠠᠷᠢᠴᠠᠭᠤᠯᠵᠤ ᠦᠵᠡᠭᠡᠳ ᠳᠣᠣᠷᠠᠬᠢ ᠮᠡᠲᠦ ᠬᠡᠳᠦᠨ ᠣᠨᠴᠠᠯᠢᠭ ᠪᠠᠶᠢᠬᠤ ᠶᠢ ᠣᠶᠢᠯᠠᠭᠠᠵᠤ ᠮᠡᠳᠡᠭᠰᠡᠨ ᠪᠠᠶᠢᠨᠠ ᠃
︵1︶ ᠵᠠᠰᠠᠵᠤ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠴᠢᠯᠠᠭᠤ ᠪᠤᠶᠤ ᠲᠣᠭᠤᠰᠬᠠ ᠶᠢ ᠵᠢᠭᠢᠷᠢᠭᠯᠡᠵᠦ ᠪᠥᠭᠡᠷᠡᠩᠬᠡᠢ ᠪᠠᠭᠠᠨᠠ ᠬᠡᠯᠪᠡᠷᠢᠲᠡᠢ ᠪᠠᠷᠢᠵᠤ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠃ ᠡᠷᠳᠡᠨᠢ ᠣᠪᠣᠭᠠ ᠂ ᠪᠠᠶᠠᠨᠬᠤᠰᠢᠭᠤ ᠣᠪᠣᠭᠠ ᠪᠣᠯ ᠡᠶᠢᠮᠦ ᠬᠡᠯᠪᠡᠷᠢ ᠶᠢᠨ ᠣᠪᠣᠭᠠᠨ ᠳᠤ ᠬᠠᠷᠢᠶᠠᠯᠠᠭᠳᠠᠨᠠ ᠃
︵2︶ ᠵᠦᠰᠦᠵᠦ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠴᠢᠯᠠᠭᠤ ᠪᠤᠶᠤ ᠲᠣᠭᠤᠰᠬᠠ ᠪᠠᠷ ᠬᠡᠷᠡᠮ ᠰᠢᠭ ᠬᠦᠷᠢᠶᠡ ᠪᠠᠷᠢᠵᠤ ᠲᠡᠭᠦᠨ ᠤ ᠳᠣᠲᠣᠷᠠ ᠨᠢ ᠵᠢᠭᠠᠬᠠᠨ ᠱᠣᠪᠣᠶᠢᠭᠰᠠᠨ ᠬᠡᠯᠪᠡᠷᠢ ᠲᠠᠢ ᠪᠢᠴᠢᠬᠠᠨ ᠣᠪᠣᠭᠠ ᠪᠣᠰᠬᠠᠭᠰᠠᠨ ᠂ ᠳᠠᠷᠤᠢ ᠨᠡᠶᠢᠯᠡᠮᠡᠯ ᠬᠡᠯᠪᠡᠷᠢ ᠲᠠᠢ ᠪᠠᠷ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠃ ᠭᠤᠷᠣᠬᠠᠨ ᠬᠠᠨ ᠣᠪᠣᠭᠠ ᠪᠣᠯᠣᠨ ᠲᠤᠯᠭᠠ ᠣᠪᠣᠭᠠ ᠪᠣᠯ ᠡᠶᠢᠮᠦᠷᠬᠦᠦ ᠬᠡᠯᠪᠡᠷᠢ ᠶᠢᠨ ᠣᠪᠣᠭᠠᠨ ᠳᠤ ᠬᠠᠷᠢᠶᠠᠯᠠᠭᠳᠠᠨᠠ ᠃
︵3︶ ᠪᠠᠶᠢᠭᠠᠯᠢ ᠶᠢᠨ ᠴᠢᠯᠠᠭᠤ ᠶᠢ ᠪᠥᠭᠡᠷᠡᠩᠬᠡᠢ ᠪᠠᠭᠠᠨᠠ ᠬᠡᠯᠪᠡᠷᠢ ᠲᠠᠢ ᠪᠠᠷ ᠣᠪᠣᠭᠠᠯᠠᠵᠤ ᠲᠡᠭᠦᠨ ᠤ ᠭᠠᠳᠠᠭᠤᠷ ᠨᠢ ᠰᠢᠪᠠᠷ ᠪᠤᠶᠤ ᠱᠦᠢᠨᠢ ᠪᠠᠷ ᠢᠯᠢᠵᠦ ᠬᠠᠲᠠᠭᠤᠷᠠᠭᠤᠯᠤᠭᠰᠠᠨ ᠤ ᠳᠠᠷᠠᠭᠠ ᠨᠢ ᠳᠠᠬᠢᠨ ᠴᠣᠬᠤᠢ ᠪᠠᠷ ᠴᠣᠬᠤᠶᠢᠳᠠᠵᠤ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠃ ᠠᠳᠤᠭᠤᠨ ᠣᠪᠣᠭᠠ ᠂ ᠬᠠᠯᠠᠭᠠᠶᠢᠲᠤ ᠶᠢᠨ ᠣᠪᠣᠭᠠ ᠪᠣᠯ ᠡᠶᠢᠮᠦᠷᠬᠦᠦ ᠬᠡᠯᠪᠡᠷᠢ ᠶᠢᠨ ᠣᠪᠣᠭᠠᠨ ᠳᠤ ᠬᠠᠷᠢᠶᠠᠯᠠᠭᠳᠠᠨᠠ ᠃
︵4︶ᠪᠠᠶᠢᠭᠠᠯᠢ ᠶᠢᠨ ᠴᠢᠯᠠᠭᠤ ᠶᠢ ᠰᠢᠭᠤᠳ ᠣᠪᠣᠭᠠᠯᠠᠨ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠃ ᠡᠶᠢᠮᠦ ᠬᠡᠯᠪᠡᠷᠢ ᠶᠢᠨ ᠣᠪᠣᠭᠠ ᠬᠠᠮᠤᠭ ᠤᠨ ᠲᠦᠭᠡᠮᠡᠯ ᠬᠠᠷᠠᠭᠳᠠᠨᠠ ᠃
ᠡᠳᠡᠭᠡᠷ ᠦᠵᠡᠭᠳᠡᠯ ᠨᠢ ᠭᠤᠣᠯ ᠣᠪᠣᠭᠠ ᠪᠣᠯ ᠣᠯᠠᠨ ᠵᠦᠢᠯ ᠤᠨ ᠬᠡᠯᠪᠡᠷᠢ ᠲᠠᠢ ᠪᠠᠶᠢᠵᠤ ᠲᠡᠭᠦᠨ ᠳᠤ ᠣᠷᠣᠨ ᠨᠤᠲᠤᠭ ᠤᠨ ᠣᠨᠴᠠᠯᠢᠭ ᠪᠤᠶᠤ ᠣᠪᠣᠭᠠᠨ ᠳᠠᠭᠠᠭᠠᠮᠠᠯ ᠵᠢᠴᠢ ᠣᠪᠣᠭᠠ ᠶᠢ ᠡᠬᠢᠯᠡᠨ ᠪᠣᠰᠬᠠᠬᠤ ᠦᠶᠡᠰ ᠤᠨ ᠲᠤᠬᠠᠢ ᠶᠢᠨ ᠨᠤᠲᠤᠭ ᠣᠷᠣᠨ ᠤ ᠬᠥᠮᠥᠰ ᠤᠨ ᠪᠦᠲᠦᠭᠡᠯᠴᠢ ᠵᠣᠷᠢᠭ ᠰᠠᠨᠠᠭᠠ ᠳᠤᠰᠤᠭᠰᠠᠨ ᠪᠠᠶᠢᠬᠤ ᠶᠢ ᠣᠯᠵᠤ ᠬᠠᠷᠠᠵᠤ ᠪᠣᠯᠣᠨᠠ ᠃
2-1-1 ᠣᠪᠣᠭᠠᠨ ᠤ ᠰᠠᠭᠤᠷᠢ
ᠣᠪᠣᠭᠠᠨ ᠤ ᠰᠠᠭᠤᠷᠢ ︵Pedestal of Oboo︶ ᠭᠡᠳᠡᠭ ᠪᠣᠯ ᠭᠤᠣᠯ ᠣᠪᠣᠭᠠᠨ ᠤ ᠳᠣᠣᠷᠠᠬᠢ ᠲᠣᠭᠤᠷᠢᠭ ᠬᠡᠯᠪᠡᠷᠢ ᠪᠦᠬᠦᠢ ᠰᠠᠭᠤᠳᠠᠯ ᠢ ᠵᠢᠭᠠᠵᠤ ᠪᠠᠶᠢᠭᠠ ᠶᠤᠮ ᠃ ᠣᠪᠣᠭᠠᠨ ᠤ ᠰᠠᠭᠤᠷᠢ ᠣᠯᠠᠩᠬᠢ ᠳᠠᠭᠠᠨ ᠲᠥᠭᠦᠷᠢᠭ ᠬᠡᠯᠪᠡᠷᠢ ᠲᠠᠢ ᠪᠠᠶᠢᠳᠠᠭ ᠃ ᠦᠵᠦᠮᠦᠴᠢᠨ ᠤ ᠣᠯᠠᠩᠬᠢ ᠣᠪᠣᠭᠠ ᠨᠢ ᠴᠢᠯᠠᠭᠤ ᠶᠢ ᠳᠡᠪᠢᠰᠴᠦ ᠲᠡᠭᠰᠢᠯᠡᠭᠰᠡᠨ ᠤ ᠳᠠᠷᠠᠭᠠ ᠳᠡᠭᠡᠷᠡ ᠨᠢ ᠣᠪᠣᠭᠠ ᠪᠠᠨ ᠪᠣᠰᠬᠠᠭᠰᠠᠨ ᠪᠠᠶᠢᠳᠠᠭ ᠃ ᠣᠪᠣᠭᠠ ᠪᠦᠬᠦᠨ ᠤ ᠰᠠᠭᠤᠷᠢ ᠶᠢᠨ ᠲᠠᠯᠠᠪᠠᠢ ᠶᠢᠨ ᠶᠡᠭᠡ ᠪᠠᠭᠠ ᠶᠢᠨ ᠬᠡᠮᠵᠢᠶᠡ ᠨᠢ ᠠᠳᠠᠯᠢ ᠦᠭᠡᠢ ᠪᠠᠶᠢᠳᠠᠭ ᠃ ᠶᠡᠭᠡ ᠰᠢᠭ ᠣᠪᠣᠭᠠᠨ ᠤ ᠰᠠᠭᠤᠷᠢ ᠶᠢᠨ ᠳ᠋ᠢᠶᠠᠮᠧᠲᠷ ᠨᠢ 7-10 m ᠣᠷᠴᠢᠮ ᠪᠠᠶᠢᠵᠤ ᠂ ᠪᠠᠭᠠ ᠰᠢᠭ᠋ ᠣᠪᠣᠭᠠᠨ ᠤ ᠰᠠᠭᠤᠷᠢ ᠶᠢᠨ ᠳ᠋ᠢᠶᠠᠮᠧᠲᠷ ᠨᠢ 3-5m ᠣᠷᠴᠢᠮ ᠪᠠᠶᠢᠳᠠᠭ ᠃ ᠡᠷᠳᠡᠨᠢ ᠣᠪᠣᠭᠠᠨ ᠤ ᠰᠠᠭᠤᠷᠢ ᠶᠢ ᠭᠠᠨᠳᠢᠭ ᠴᠢᠯᠠᠭᠤ ᠪᠠᠷ ᠳᠡᠪᠢᠰᠴᠦ ᠬᠢᠭᠰᠡᠨ ᠪᠠᠶᠢᠪᠠ ᠃ ᠪᠠᠶᠠᠨᠬᠤᠰᠢᠭᠤ ᠣᠪᠣᠭᠠᠨ ᠤ ᠰᠠᠭᠤᠷᠢ ᠶᠢᠨ ᠳ᠋ᠢᠶᠠᠮᠧᠲᠷ ᠨᠢ 5m ᠣᠷᠴᠢᠮ ᠂ ᠥᠨᠳᠥᠷ ᠨᠢ 0.4m ᠣᠷᠴᠢᠮ ᠪᠠᠶᠢᠵᠤ ᠂ ᠴᠢᠯᠠᠭᠤ ᠪᠠᠷ ᠳᠡᠪᠢᠰᠦᠭᠰᠡᠨ ᠤ ᠳᠠᠷᠠᠭᠠ ᠭᠠᠳᠠᠭᠤᠷ ᠨᠢ ᠱᠦᠢᠨᠢ ᠪᠠᠷ ᠢᠯᠢᠭᠰᠡᠨ ᠪᠠᠶᠢᠪᠠ᠃ ᠭᠡᠲᠡᠯᠡ ᠶᠠᠮᠠᠷ ᠴᠦ ᠰᠠᠭᠤᠷᠢ ᠲᠠᠯᠪᠢᠯ ᠦᠭᠡᠢ ᠪᠠᠷ ᠰᠢᠭᠤᠳ ᠭᠠᠵᠠᠷ ᠳᠡᠭᠡᠷᠡ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠴᠦ ᠲᠣᠩ ᠣᠯᠠᠨ ᠪᠠᠶᠢᠳᠠᠭ ᠃ ᠪᠠᠶᠠᠨ ᠣᠪᠣᠭᠠ ᠂ ᠭᠤᠷᠣᠬᠠᠨ ᠬᠠᠨ ᠣᠪᠣᠭᠠ ᠪᠣᠯ ᠡᠶᠢᠮᠦᠷᠬᠦᠦ ᠬᠡᠯᠪᠡᠷᠢ ᠲᠠᠢ ᠪᠠᠷ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠨᠤᠭᠤᠳ ᠪᠣᠯᠬᠤ ᠶᠤᠮ ᠃
ᠮᠢᠨᠤ ᠬᠡᠭᠡᠷᠡ ᠶᠢᠨ ᠰᠢᠨᠵᠢᠯᠡᠭᠡᠨ ᠳᠤ ᠠᠵᠢᠭᠯᠠᠭᠰᠠᠨ ᠣᠪᠣᠭᠠ ᠨᠤᠭᠤᠳ ᠤᠨ ᠰᠠᠭᠤᠷᠢ ᠶᠢᠨ ᠣᠨᠴᠠᠯᠢᠭ ᠢ ᠳᠣᠣᠷᠠᠬᠢ ᠮᠡᠲᠦ ᠭᠤᠷᠪᠠᠨ ᠲᠠᠯᠠ ᠪᠠᠷ ᠬᠤᠷᠢᠶᠠᠩᠭᠤᠶᠢᠯᠠᠵᠤ ᠪᠣᠯᠣᠨᠠ᠄
︵1︶ ᠣᠪᠣᠭᠠᠨ ᠰᠠᠭᠤᠷᠢ ᠪᠠᠷᠢᠬᠤ ᠦᠭᠡᠢ ᠪᠠᠷ ᠰᠢᠭᠤᠳ ᠭᠠᠵᠠᠷ ᠳᠡᠭᠡᠷᠡ ᠣᠪᠣᠭᠠ ᠪᠠᠨ ᠪᠣᠰᠬᠠᠬᠤ ᠃ ᠭᠤᠷᠣᠬᠠᠨ ᠬᠠᠨ ᠣᠪᠣᠭᠠ ᠂ ᠬᠠᠷᠠᠸᠠᠲᠦ ᠶᠢᠨ ᠣᠪᠣᠭᠠ ᠨᠢ ᠡᠶᠢᠮᠦᠷᠬᠦᠦ ᠵᠢᠱᠢᠶᠡᠨ ᠤ ᠣᠪᠣᠭᠠᠨ ᠳᠤ ᠬᠠᠷᠢᠶᠠᠯᠠᠭᠳᠠᠨᠠ ᠃
︵2︶ ᠨᠢᠭᠡ ᠳᠠᠪᠬᠤᠷ ᠰᠠᠭᠤᠷᠢ ᠶᠢᠨ ᠳᠡᠭᠡᠷᠡ ᠣᠪᠣᠭᠠ ᠪᠠᠨ ᠪᠣᠰᠬᠠᠬᠤ ᠃ ᠪᠠᠴᠢ ᠣᠪᠣᠭᠠ ᠂ ᠲᠤᠯᠭᠠ ᠣᠪᠣᠭᠠ ᠨᠢ ᠡᠶᠢᠮᠦᠷᠬᠦᠦ ᠵᠢᠱᠢᠶᠡᠨ ᠤ ᠣᠪᠣᠭᠠᠨ ᠳᠤ ᠬᠠᠷᠢᠶᠠᠯᠠᠭᠳᠠᠨᠠ ᠃
︵︶3 ᠬᠤᠶᠠᠷ ᠳᠠᠪᠬᠤᠷ ᠰᠠᠭᠤᠷᠢ ᠪᠠᠷᠢᠭᠰᠠᠨ ᠤ ᠳᠠᠷᠠᠭᠠ ᠳᠡᠭᠡᠷᠡ ᠨᠢ ᠣᠪᠣᠭᠠ ᠪᠠᠨ ᠪᠣᠰᠬᠠᠬᠤ ᠃ ᠡᠷᠳᠡᠨᠢ ᠣᠪᠣᠭᠠ ᠂ ᠪᠠᠶᠠᠨᠬᠤᠰᠢᠭᠤ ᠣᠪᠣᠭᠠ ᠨᠢ ᠡᠶᠢᠮᠦᠷᠬᠦᠦ ᠵᠢᠱᠢᠶᠡᠨ ᠤ ᠣᠪᠣᠭᠠᠨ ᠳᠤ ᠬᠠᠷᠢᠶᠠᠯᠠᠭᠳᠠᠨᠠ᠃
ᠬᠤᠰᠢᠭᠤ ᠰᠤᠮᠤᠨ ᠤ ᠣᠶᠢᠷᠠᠯᠴᠠᠭᠠ ᠪᠤᠶᠤ ᠬᠡᠪᠴᠢᠶᠡ ᠪᠠᠷ ᠶᠡᠭᠡ ᠣᠪᠣᠭᠠ ᠵᠢᠴᠢ ᠰᠢᠨᠡ ᠪᠠᠷ ᠰᠡᠷᠭᠦᠭᠡᠨ ᠵᠠᠰᠠᠵᠤ ᠪᠠᠶᠢᠭᠠ ᠣᠪᠣᠭᠠᠨ ᠳᠤ ᠨᠢᠭᠡ ᠪᠤᠶᠤ ᠬᠤᠶᠠᠷ ᠳᠠᠪᠬᠤᠷ ᠰᠠᠭᠤᠷᠢ ᠪᠠᠷᠢᠭᠰᠠᠨ ᠤ ᠳᠠᠷᠠᠭᠠ ᠲᠡᠭᠦᠨ ᠤ ᠳᠡᠭᠡᠷᠡ ᠨᠢ ᠣᠪᠣᠭᠠ ᠪᠠᠨ ᠪᠣᠰᠬᠠᠵᠤ ᠪᠠᠶᠢᠬᠤ ᠨᠢ ᠨᠡᠯᠢᠶᠡᠳ ᠬᠠᠷᠠᠭᠳᠠᠵᠤ ᠪᠠᠶᠢᠨᠠ ᠃ ᠭᠡᠲᠡᠯᠡ ᠬᠥᠳᠡᠭᠡ ᠬᠡᠭᠡᠷᠡ ᠪᠤᠶᠤ ᠠᠭᠯᠠᠭ ᠠᠭᠤᠯᠠ ᠶᠢᠨ ᠣᠷᠣᠢ ᠳᠡᠭᠡᠷᠡᠬᠢ ᠣᠪᠣᠭᠠ ᠵᠢᠴᠢ ᠬᠡᠪᠴᠢᠶᠡ ᠪᠠᠷ ᠪᠠᠭᠠ ᠣᠪᠣᠭᠠ ᠶᠢ ᠰᠠᠭᠤᠷᠢ ᠪᠠᠷᠢᠬᠤ ᠦᠭᠡᠢ ᠪᠠᠷ ᠰᠢᠭᠤᠳ ᠭᠠᠵᠠᠷ ᠳᠡᠭᠡᠷᠡ ᠪᠣᠰᠬᠠᠵᠤ ᠪᠠᠶᠢᠬᠤ ᠨᠢ ᠨᠡᠶᠢᠳᠡᠮ ᠤᠨ ᠴᠢᠨᠠᠷ ᠲᠠᠢ ᠰᠢᠭ᠋ ᠪᠠᠶᠢᠨᠠ ᠃ ᠦᠨᠡᠨ ᠳᠡᠭᠡᠨ ᠰᠠᠭᠤᠷᠢ ᠪᠠᠷᠢᠬᠤ ᠦᠭᠡᠢ ᠪᠠᠷ ᠰᠢᠭᠤᠳ ᠭᠠᠵᠠᠷ ᠳᠡᠭᠡᠷᠡ ᠪᠣᠰᠬᠠᠬᠤ ᠨᠢ ᠣᠪᠣᠭᠠ ᠪᠣᠰᠬᠠᠬᠤ ᠶᠢᠨ ᠤᠤᠭᠠᠯ ᠬᠡᠯᠪᠡᠷᠢ ᠪᠠᠶᠢᠵᠤ ᠮᠡᠳᠡᠬᠦ ᠶᠤᠮ ᠃
2-1-2 ᠣᠪᠣᠭᠠᠨ ᠤ ᠬᠡᠯᠪᠡᠷᠢ
ᠣᠪᠣᠭᠠᠨ ᠤ ᠬᠡᠯᠪᠡᠷᠢ ︵External Form of Oboo︶ ᠭᠡᠳᠡᠭ ᠨᠢ ᠶᠡᠭᠡ ᠣᠪᠣᠭᠠ ᠪᠤᠶᠤ ᠭᠤᠣᠯ ᠣᠪᠣᠭᠠᠨ ᠤ ᠭᠠᠳᠠᠷ ᠬᠡᠯᠪᠡᠷᠢ ᠳᠦᠷᠰᠦ ᠶᠢ ᠵᠢᠭᠠᠵᠤ ᠪᠣᠢ ᠃ ᠭᠤᠣᠯ ᠣᠪᠣᠭᠠ ᠶᠢ ᠪᠣᠰᠬᠠᠭᠰᠠᠨ ᠬᠡᠯᠪᠡᠷᠢ ᠶᠢᠨ ᠪᠠᠶᠢᠳᠠᠯ ᠢ ᠦᠨᠳᠦᠰᠦᠯᠡᠵᠦ ᠪᠥᠭᠡᠷᠡᠩᠬᠡᠢ ᠪᠠᠭᠠᠨᠠ ᠶᠢᠨ ᠬᠡᠯᠪᠡᠷᠢ ᠲᠠᠢ ᠣᠪᠣᠭᠠ ᠂ ᠬᠦᠷᠢᠶᠡ ᠬᠡᠯᠪᠡᠷᠢ ᠲᠠᠢ ᠣᠪᠣᠭᠠ ᠂ ᠱᠣᠷᠣᠯᠵᠢᠨ ᠪᠠᠭᠠᠨᠠ ᠬᠡᠯᠪᠡᠷᠢ ᠲᠠᠢ ᠣᠪᠣᠭᠠ ᠭᠡᠵᠤ ᠠᠩᠭᠢᠯᠠᠵᠤ ᠪᠣᠯᠣᠨᠠ ᠃ ᠪᠥᠭᠡᠷᠡᠩᠬᠡᠢ ᠪᠠᠭᠠᠨᠠ ᠶᠢᠨ ᠬᠡᠯᠪᠡᠷᠢ ᠲᠠᠢ ᠣᠪᠣᠭᠠ ᠭᠡᠳᠡᠭ ᠨᠢ ᠣᠪᠣᠭᠠᠨ ᠤ ᠶᠡᠭᠡ ᠪᠡᠶᠡ ᠶᠢ ᠪᠥᠭᠡᠷᠡᠩᠬᠡᠢ ᠪᠠᠭᠠᠨᠠ ᠬᠡᠯᠪᠡᠷᠢ ᠲᠠᠢ ᠪᠠᠷᠢᠵᠤ ᠪᠣᠰᠬᠠᠭᠰᠠᠨ ᠢ ᠵᠢᠭᠠᠵᠤ ᠪᠠᠶᠢᠨᠠ ᠃ ᠬᠦᠷᠢᠶᠡ ᠬᠡᠯᠪᠡᠷᠢ ᠲᠠᠢ ᠣᠪᠣᠭᠠ ᠭᠡᠳᠡᠭ ᠨᠢ ᠣᠪᠣᠭᠠᠨ ᠤ ᠶᠡᠭᠡ ᠪᠡᠶᠡ ᠶᠢ ᠴᠢᠯᠠᠭᠤ ᠪᠤᠶᠤ ᠲᠣᠭᠤᠰᠬᠠ ᠪᠠᠷ ᠲᠥᠭᠦᠷᠢᠭ ᠬᠦᠷᠢᠶᠡ ᠬᠡᠯᠪᠡᠷᠢ ᠲᠠᠢ ᠪᠠᠷ ᠪᠠᠷᠢᠵᠤ ᠪᠣᠰᠬᠠᠭᠰᠠᠨ ᠢ ᠵᠢᠭᠠᠵᠤ ᠪᠠᠶᠢᠨᠠ ᠃ ᠱᠣᠷᠣᠯᠵᠢᠨ ᠪᠠᠭᠠᠨᠠ ᠬᠡᠯᠪᠡᠷᠢ ᠲᠠᠢ ᠣᠪᠣᠭᠠ ᠭᠡᠳᠡᠭ ᠨᠢ ᠴᠢᠯᠠᠭᠤ ᠪᠤᠶᠤ ᠮᠣᠳᠣ ᠶᠢ ᠭᠠᠵᠠᠷ ᠳᠡᠭᠡᠷᠡ ᠣᠪᠣᠭᠠᠯᠠᠵᠤ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠶᠢ ᠵᠢᠭᠠᠵᠤ ᠪᠠᠶᠢᠨᠠ ᠃ ᠡᠶᠢᠮᠦᠷᠬᠦᠦ ᠬᠡᠯᠪᠡᠷᠢ ᠶᠢᠨ ᠣᠪᠣᠭᠠ ᠮᠣᠩᠭᠤᠯ ᠨᠤᠲᠤᠭ ᠲᠤ ᠬᠠᠮᠤᠭ ᠤᠨ ᠲᠦᠭᠡᠮᠡᠯ ᠪᠠᠶᠢᠳᠠᠭ ᠃
ᠪᠠᠶᠠᠨ ᠬᠤᠰᠢᠭᠤ ᠣᠪᠣᠭᠠᠨ ᠤ ᠰᠠᠭᠤᠷᠢ ᠶᠢᠨ ᠳ᠋ᠢᠶᠠᠮᠧᠲᠷ ᠨᠢ 5m ᠣᠷᠴᠢᠮ ᠂ ᠥᠨᠳᠥᠷ ᠨᠢ 1.5m ᠣᠷᠴᠢᠮ᠂ ᠭᠠᠳᠠᠷ ᠬᠠᠨᠠ ᠶᠢ ᠨᠢ ᠲᠣᠭᠤᠰᠬᠠ ᠪᠠᠷ ᠪᠠᠷᠢᠵᠤ ᠪᠣᠰᠬᠠᠭᠰᠠᠨ ᠪᠥᠭᠡᠷᠡᠩᠬᠡᠢ ᠪᠠᠭᠠᠨᠠ ᠶᠢᠨ ᠬᠡᠯᠪᠡᠷᠢ ᠲᠠᠢ ᠣᠪᠣᠭᠠ ᠶᠤᠮ ᠃ ᠲᠣᠭᠤᠰᠬᠠᠨ ᠬᠠᠨᠠ ᠶᠢᠨ ᠳᠣᠲᠣᠷᠠ ᠨᠢ ᠴᠢᠯᠠᠭᠤ ᠪᠤᠶᠤ ᠡᠪᠡᠰᠦᠨ ᠤ ᠦᠨᠳᠦᠰᠦ ᠲᠠᠢ ᠨᠣᠶᠢᠲᠠᠨ ᠬᠥᠷᠥᠰᠥ ᠶᠢ ᠬᠢᠭᠰᠡᠨ ᠪᠠᠶᠢᠨᠠ ᠃ ᠡᠨᠡ ᠨᠢ ᠣᠪᠣᠭᠠᠨ ᠳᠡᠭᠡᠷᠡ ᠡᠪᠡᠰᠦ ᠤᠷᠭᠤᠬᠤ ᠡᠰᠡᠬᠦᠯᠡ ᠣᠪᠣᠭᠠᠨ ᠪᠤᠷᠭᠠᠰᠤ ᠨᠢ ᠦᠨᠳᠦᠰᠦ ᠬᠠᠳᠬᠤᠨ ᠤᠷᠭᠤᠬᠤ ᠶᠢ ᠠᠬᠢᠭᠤᠯᠬᠤ ᠦᠢᠯᠡᠳᠦᠯ ᠲᠠᠢ ᠶᠤᠮ ᠭᠡᠵᠤ ᠲᠤᠰ ᠣᠪᠣᠭᠠᠨ ᠤ 2004 ᠣᠨ ᠤ ᠣᠪᠣᠭᠠᠨ ᠳᠠᠭᠠᠭᠠᠮᠠᠯ ᠤᠨ ᠨᠢᠭᠡ ᠨᠢ ᠲᠠᠶᠢᠯᠪᠤᠷᠢᠯᠠᠵᠤ ᠪᠠᠶᠢᠪᠠ ᠃ ᠠᠳᠤᠭᠤᠨ ᠣᠪᠣᠭᠠ ᠪᠣᠯ ᠰᠠᠭᠤᠷᠢ ᠶᠢᠨ ᠳ᠋ᠢᠶᠠᠮᠧᠲᠷ ᠨᠢ 3m ᠣᠷᠴᠢᠮ ᠂ ᠥᠨᠳᠥᠷ ᠨᠢ 0.6m ᠣᠷᠴᠢᠮ ᠤᠨ ᠰᠠᠭᠤᠳᠠᠯ ᠳᠡᠭᠡᠷᠡ ᠳ᠋ᠢᠶᠠᠮᠧᠲᠷ ᠨᠢ 1.5m ᠣᠷᠴᠢᠮ ᠂ ᠥᠨᠳᠥᠷ ᠨᠢ 1.2m ᠣᠷᠴᠢᠮ ᠤᠨ ᠴᠢᠯᠠᠭᠤ ᠪᠠᠷ ᠵᠢᠭᠢᠷᠢᠭᠯᠡᠨ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠶᠤᠮ᠃ ᠣᠪᠣᠭᠠᠨ ᠤ ᠭᠠᠳᠠᠷ ᠲᠠᠯᠠ ᠶᠢ ᠰᠢᠪᠠᠷ ᠢᠶᠠᠷ ᠢᠯᠢᠵᠦ ᠳᠠᠬᠢᠨ ᠲᠡᠭᠦᠨ ᠤ ᠭᠠᠳᠠᠭᠤᠷ ᠨᠢ ᠴᠣᠬᠤᠢ ᠪᠠᠷ ᠳᠥᠭᠦᠮᠬᠡᠨ ᠴᠣᠬᠤᠶᠢᠳᠠᠨ ᠵᠠᠰᠠᠭᠰᠠᠨ ᠪᠠᠶᠢᠪᠠ ᠃ ᠠᠳᠤᠭᠤᠨ ᠣᠪᠣᠭᠠ ᠮᠡᠲᠦ ᠶᠢᠨ ᠴᠢᠯᠠᠭᠤ ᠪᠠᠷ ᠵᠢᠭᠢᠷᠢᠭᠯᠡᠨ ᠪᠣᠰᠬᠠᠭᠰᠠᠨ ᠣᠪᠣᠭᠠᠨ ᠤ ᠭᠠᠳᠠᠷ ᠲᠠᠯᠠ ᠶᠢ ᠰᠢᠪᠠᠷ ᠢᠶᠠᠷ ᠢᠯᠢᠵᠦ ᠲᠠᠬᠢᠨ ᠴᠣᠬᠤᠢ ᠪᠠᠷ ᠴᠣᠬᠤᠶᠢᠳᠠᠵᠤ ᠴᠠᠶᠢᠷᠠᠭᠤᠯᠤᠭᠰᠠᠨ ᠣᠪᠣᠭᠠ ᠦᠵᠦᠮᠦᠴᠢᠨ ᠳᠤ ᠨᠡᠯᠢᠶᠡᠨ ᠣᠯᠠᠨ ᠪᠠᠶᠢᠳᠠᠭ ᠃ ᠡᠨᠡ ᠨᠢ ᠦᠵᠦᠮᠦᠴᠢᠨ ᠤ ᠣᠪᠣᠭᠠᠨ ᠤ ᠭᠠᠳᠠᠷ ᠲᠠᠯᠠ ᠶᠢᠨ ᠦᠵᠡᠮᠵᠢ ᠶᠢᠨ ᠪᠠᠰᠠ ᠨᠢᠭᠡᠨ ᠣᠨᠴᠠᠯᠢᠭ ᠢ ᠬᠠᠷᠠᠭᠤᠯᠵᠤ ᠪᠠᠶᠢᠬᠤ ᠶᠤᠮ ᠃ ᠢᠩᠭᠢᠵᠦ ᠵᠠᠰᠠᠭᠰᠠᠨ ᠣᠪᠣᠭᠠ ᠬᠤᠯᠠ ᠠᠴᠠ ᠴᠠᠶᠢᠷᠠᠵᠤ ᠬᠠᠷᠠᠭᠳᠠᠳᠠᠭ ᠪᠥᠭᠡᠳ ᠣᠪᠣᠭᠠ ᠲᠠᠬᠢᠭᠰᠠᠳ ᠲᠤ ᠴᠡᠪᠡᠷ ᠶᠡᠬᠡᠮᠰᠦᠭ ᠠᠭᠤᠷ ᠠᠮᠢᠰᠬᠤᠯ ᠥᠭᠳᠡᠭ ᠶᠤᠮ ᠃
ᠭᠤᠷᠣᠬᠠᠨ ᠬᠠᠨ ᠣᠪᠣᠭᠠ ᠪᠣᠯ ᠨᠡᠯᠢᠶᠡᠳ ᠥᠪᠡᠷᠮᠢᠴᠡ ᠪᠦᠲᠦᠴᠡ ᠲᠠᠢ ᠣᠪᠣᠭᠠ ᠶᠤᠮ ᠃ ᠤᠷᠲᠤ ᠳᠥᠷᠪᠡᠯᠵᠢᠨ ᠵᠦᠰᠦᠭᠰᠡᠨ ᠴᠢᠯᠠᠭᠤ ᠪᠠᠷ ᠬᠦᠷᠢᠶᠡ ᠬᠡᠯᠪᠡᠷᠢ ᠲᠠᠢ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠶᠤᠮ ᠃ ᠣᠪᠣᠭᠠᠨ ᠤ ᠰᠠᠭᠤᠷᠢ ᠶᠢᠨ ᠳ᠋ᠢᠶᠠᠮᠧᠲᠷ ᠨᠢ 4 m ᠣᠷᠴᠢᠮ ᠂ ᠥᠨᠳᠥᠷ ᠨᠢ 1.2m ᠣᠷᠴᠢᠮ ᠪᠠᠶᠢᠵᠤ ᠬᠡᠷᠡᠮ ᠤᠨ ᠳᠣᠲᠣᠷᠠ ᠨᠢ ᠤᠷᠲᠤ ᠳᠥᠷᠪᠡᠯᠵᠢᠨ ᠴᠢᠯᠠᠭᠤ ᠪᠠᠷ ᠳᠥᠭᠦᠮᠬᠡᠨ ᠢᠨᠳᠡᠷ ᠵᠡᠷᠭᠡᠯᠡᠵᠦ ᠲᠡᠭᠦᠨ ᠤ ᠳᠡᠭᠡᠷᠡ ᠨᠢ ᠣᠪᠣᠭᠠ ᠲᠠᠬᠢᠬᠤ ᠪᠠᠷ ᠢᠷᠡᠭᠰᠡᠨ ᠬᠥᠮᠥᠰ ᠯᠣᠩᠬᠤ ᠲᠠᠢ ᠠᠷᠢᠬᠢ ᠂ ᠬᠤᠷᠤᠳ ᠴᠠᠭᠠᠨ ᠢᠳᠡᠭᠡᠨ ᠤ ᠵᠦᠢᠯ ᠵᠡᠷᠭᠡ ᠡᠷᠭᠦᠯ ᠤᠨ ᠪᠣᠳᠠᠰ ᠢᠶᠠᠨ ᠶᠠᠭᠰᠢᠷᠠᠲᠠᠯᠠ ᠲᠠᠯᠪᠢᠭᠰᠠᠨ ᠪᠠᠶᠢᠪᠠ ᠃ ᠣᠪᠣᠭᠠ ᠳᠠᠬᠢᠬᠤ ᠪᠠᠷ ᠢᠷᠡᠭᠰᠡᠨ ᠬᠥᠮᠥᠰ ᠲᠡᠷᠡ ᠬᠦ ᠡᠭᠦᠳᠡ ᠪᠠᠷ ᠨᠢ ᠣᠷᠣᠵᠤ ᠭᠠᠷᠳᠠᠭ ᠪᠠᠶᠢᠨᠠ ᠃ ᠣᠪᠣᠭᠠᠨ ᠤ ᠭᠤᠣᠯ ᠳᠤ ᠨᠢ ᠱᠣᠷᠤᠭᠰᠢᠨ ᠮᠣᠳᠣ ᠵᠢᠴᠢ ᠣᠪᠣᠭᠠᠨ ᠪᠤᠷᠭᠠᠰᠤ ᠦᠭᠡᠢ ᠪᠠᠶᠢᠪᠠ ᠃ ᠬᠠᠷᠢᠨ ᠬᠠᠨᠠ ᠶᠢᠨ ᠵᠡᠭᠦᠨ ᠪᠠᠷᠠᠭᠤᠨ ᠬᠤᠶᠢᠲᠤ ᠭᠤᠷᠪᠠᠨ ᠲᠠᠯᠠ ᠳᠤ ᠨᠢ ᠲᠤᠰ ᠲᠤᠰ ᠱᠣᠷᠤᠭᠰᠢᠨ ᠮᠣᠳᠣ ᠪᠣᠰᠬᠠᠭᠰᠠᠨ ᠪᠠᠶᠢᠪᠠ ᠃ ᠣᠪᠣᠭᠠᠨ ᠤ ᠡᠮᠦᠨᠡ ᠲᠠᠯᠠ ᠳᠤ ᠨᠢ ᠬᠤᠶᠠᠷ ᠬᠡᠰᠡᠭ ᠵᠦᠰᠦᠮᠡᠯ ᠴᠢᠯᠠᠭᠤ ᠪᠠᠷ ᠲᠠᠬᠢᠯᠭᠠ ᠶᠢᠨ ᠰᠢᠷᠡᠭᠡ ᠵᠣᠬᠢᠶᠠᠭᠰᠠᠨ ᠪᠠᠶᠢᠪᠠ ᠃ ᠡᠶᠢᠮᠦ ᠪᠣᠯᠬᠤᠷ ᠭᠤᠷᠣᠬᠠᠨ ᠬᠠᠨ ᠣᠪᠣᠭᠠ ᠪᠣᠯ ᠭᠤᠷᠪᠠᠨ ᠱᠣᠷᠤᠭᠰᠢᠨ ᠮᠣᠳᠣ ᠲᠠᠢ ᠦᠵᠦᠮᠦᠴᠢᠨ ᠨᠤᠲᠤᠭ ᠲᠤ ᠬᠠᠮᠤᠭ ᠤᠨ ᠰᠣᠨᠢᠨ ᠪᠦᠲᠦᠴᠡ ᠲᠠᠢ ᠣᠪᠣᠭᠠ ᠪᠠᠶᠢᠭᠰᠠᠨ ᠶᠤᠮ ᠃ ᠲᠤᠯᠭᠠ ᠣᠪᠣᠭᠠ ᠴᠦ ᠭᠤᠷᠣᠬᠠᠨ ᠬᠠᠨ ᠣᠪᠣᠭᠠ ᠲᠠᠢ ᠠᠳᠠᠯᠢᠪᠲᠤᠷ ᠪᠦᠲᠦᠴᠡ ᠲᠠᠢ ᠲᠣᠭᠤᠰᠬᠠ ᠪᠠᠷ ᠪᠠᠷᠢᠭᠰᠠᠨ ᠣᠪᠣᠭᠠ ᠪᠠᠶᠢᠪᠠ ᠃ ᠲᠣᠭᠤᠰᠬᠠᠨ ᠬᠠᠨᠠ ᠶᠢᠨ ᠳᠣᠲᠣᠷᠠ ᠨᠢ ᠱᠦᠢᠨᠢ ᠪᠠᠷ ᠪᠢᠴᠢᠬᠠᠨ ᠱᠣᠪᠣᠭᠤᠷ ᠣᠪᠣᠭᠠ ᠪᠣᠰᠬᠠᠭᠰᠠᠨ ᠪᠠᠶᠢᠨᠠ ᠃ ᠣᠪᠣᠭᠠᠨ ᠤ ᠭᠤᠣᠯ ᠳᠤ ᠨᠢ ᠱᠣᠷᠤᠭᠰᠢᠨ ᠮᠣᠳᠣ ᠶᠢ ᠪᠣᠰᠬᠠᠵᠤ ᠲᠡᠭᠦᠨ ᠤ ᠬᠠᠵᠠᠭᠤ ᠪᠠᠷ ᠨᠢ ᠪᠤᠷᠭᠠᠰᠤ ᠬᠠᠳᠬᠤᠭᠰᠠᠨ ᠪᠠᠶᠢᠪᠠ ᠃ ᠣᠪᠣᠭᠠᠨ ᠤ ᠡᠮᠦᠨᠡ ᠲᠠᠯᠠ ᠳᠤ ᠨᠢ ᠡᠭᠦᠳᠡ ᠰᠢᠭ ᠵᠠᠢ ᠲᠠᠢ ᠪᠠᠶᠢᠵᠤ ᠲᠡᠨᠳᠡ ᠨᠢ ᠮᠥᠨ ᠲᠡᠭᠰᠢᠬᠡᠨ ᠴᠢᠯᠠᠭᠤ ᠪᠠᠷ ᠰᠢᠷᠡᠭᠡ ᠪᠠᠷᠢᠵᠤ ᠣᠪᠣᠭᠠ ᠪᠠᠨ ᠲᠠᠬᠢᠭᠰᠠᠳ ᠲᠡᠭᠦᠨ ᠳᠡᠭᠡᠷᠡ ᠨᠢ ᠶᠠᠩᠵᠤ ᠪᠦᠷᠢ ᠶᠢᠨ ᠡᠷᠭᠦᠯ ᠤᠨ ᠪᠣᠳᠠᠰ ᠢᠶᠠᠨ ᠲᠠᠯᠪᠢᠭᠰᠠᠨ ᠪᠠᠶᠢᠪᠠ᠃
ᠦᠵᠦᠮᠦᠴᠢᠨ ᠳᠤ ᠪᠠᠶᠢᠭᠠᠯᠢ ᠶᠢᠨ ᠴᠢᠯᠠᠭᠤ ᠶᠢ ᠱᠣᠪᠣᠶᠢᠯᠭᠠᠨ ᠣᠪᠣᠭᠠᠯᠠᠵᠤ ᠪᠣᠰᠬᠠᠭᠰᠠᠨ ᠱᠣᠷᠣᠯᠵᠢᠨ ᠪᠠᠭᠠᠨᠠ ᠬᠡᠯᠪᠡᠷᠢ ᠲᠠᠢ ᠣᠪᠣᠭᠠ ᠶᠡᠭᠡ ᠣᠯᠠᠨ ᠪᠠᠶᠢᠳᠠᠭ ᠃ ᠲᠠᠬᠢᠯᠭᠠ ᠶᠢᠨ ᠬᠡᠪᠴᠢᠶᠡ ᠪᠠᠷ ᠪᠠᠭᠠ ᠣᠪᠣᠭᠠ ᠵᠢᠴᠢ ᠣᠯᠠᠩᠬᠢ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠶᠢ ᠡᠶᠢᠮᠦᠷᠬᠦᠦ ᠬᠡᠯᠪᠡᠷᠢ ᠪᠠᠷ ᠪᠣᠰᠬᠠᠭᠰᠠᠨ ᠪᠠᠶᠢᠳᠠᠭ ᠃
ᠣᠪᠣᠭᠠᠨ ᠤ ᠶᠡᠭᠡ ᠪᠠᠭᠠ ᠪᠣᠯᠣᠨ ᠬᠡᠯᠪᠡᠷᠢ ᠨᠢ ᠬᠤᠭᠤᠷᠣᠨᠳᠤ ᠪᠠᠨ ᠠᠳᠠᠯᠢ ᠦᠭᠡᠢ ᠪᠠᠶᠢᠳᠠᠭ ᠃ ᠮᠣᠩᠭᠤᠯ ᠤᠯᠤᠰ ᠤᠨ ᠲᠥᠪ ᠨᠣᠮ ᠤᠨ ᠰᠠᠩ ᠳᠤ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠶᠢᠭᠠ ︽ᠣᠪᠣᠭᠠᠨ ᠤ ᠡᠭᠦᠳᠬᠦ ᠵᠠᠩ ᠦᠢᠯᠡ ᠰᠡᠯᠲᠡ ᠣᠷᠣᠰᠢᠪᠠ︾ ᠭᠡᠳᠡᠭ ᠪᠢᠴᠢᠮᠡᠯ ᠰᠤᠳᠤᠷ ᠲᠤ᠄ ︽ᠣᠪᠣᠭᠠ ᠪᠣᠰᠬᠠᠬᠤ ᠦᠶᠡ ᠳᠤ / ᠡᠩ ᠤᠷᠲᠤ ᠨᠢ ᠠᠷᠪᠠᠨ ᠨᠠᠢᠮᠠᠨ/ ᠬᠠᠨᠠᠲᠤ ᠭᠡᠷ ᠤᠨ ᠲᠡᠳᠦᠢ ᠲᠥᠭᠦᠷᠢᠭᠯᠡᠵᠦ / ᠴᠢᠯᠠᠭᠤ ᠪᠠᠷ ᠪᠣᠰᠬᠠᠵᠤ ᠳᠠᠭᠤᠰᠬᠠᠨᠠ︾ ᠭᠡᠵᠤ ︵ᠲᠤᠰ ᠪᠦᠯᠦᠭ ᠤᠨ ᠲᠠᠪᠤᠳᠤᠭᠠᠷ ᠬᠡᠰᠡᠭ ᠲᠤ ᠯᠠᠪᠯᠠ︶ ᠂ ᠪᠣᠰᠬᠠᠭᠰᠠᠨ ᠣᠪᠣᠭᠠᠨ ᠤ ᠶᠡᠭᠡ ᠪᠠᠭᠠ ᠪᠣᠯᠣᠨ ᠬᠡᠯᠪᠡᠷᠢ ᠶᠢ ᠠᠷᠪᠠᠨ ᠨᠠᠢᠮᠠᠨ ᠬᠠᠨᠠᠲᠤ ᠭᠡᠷ ᠤᠨ ᠬᠡᠮᠵᠢᠶᠡ ᠪᠠᠷ ᠵᠦᠢᠷᠯᠡᠭᠰᠡᠨ ᠪᠠᠶᠢᠨᠠ ᠃ ᠵᠣᠬᠢᠶᠠᠭᠴᠢ ᠶᠢᠨ ᠬᠡᠭᠡᠷᠡ ᠶᠢᠨ ᠰᠢᠨᠵᠢᠯᠡᠭᠡᠨ ᠳᠤ ᠣᠶᠢᠯᠠᠭᠠᠭᠰᠠᠨ ᠢ ᠦᠨᠳᠦᠰᠦᠯᠡᠪᠡᠯ ᠂ ᠣᠯᠠᠩᠬᠢ ᠣᠪᠣᠭᠠᠨ ᠤ ᠶᠡᠭᠡ ᠪᠠᠭᠠ ᠨᠢ ᠠᠷᠪᠠᠨ ᠬᠠᠨᠠᠲᠤ ᠭᠡᠷ ᠤᠨ ᠬᠢᠷᠢ ᠲᠣᠮᠣ ᠪᠠᠶᠢᠪᠠ ᠃ ᠶᠠᠷᠢᠶᠠᠨ ᠦᠭᠡᠢ ᠡᠭᠦᠨ ᠠᠴᠠ ᠪᠠᠭᠠ ᠣᠪᠣᠭᠠ ᠪᠠᠰᠠ ᠲᠣᠩ ᠣᠯᠠᠨ ᠲᠠᠭᠠᠷᠠᠯᠳᠤᠭᠰᠠᠨ ᠶᠤᠮ ᠃ ᠮᠣᠩᠭᠤᠯ ᠭᠠᠵᠠᠷ ᠤᠨ ᠣᠪᠣᠭᠠ ᠨᠢ ᠮᠣᠩᠭᠤᠯ ᠭᠡᠷ ᠤᠨ ᠬᠡᠯᠪᠡᠷᠢ ᠲᠠᠢ ᠪᠠᠶᠢᠳᠠᠭ ᠨᠢ ᠨᠡᠶᠢᠲᠡ ᠶᠢᠨ ᠵᠤᠷᠰᠢᠯ ᠶᠤᠮ ᠃
ᠣᠪᠣᠭᠠᠨ ᠤ ᠬᠡᠯᠪᠡᠷᠢ ᠪᠦᠲᠦᠴᠡ ᠨᠢ ᠬᠠᠷᠢᠯᠴᠠᠨ ᠠᠳᠠᠯᠢ ᠦᠭᠡᠢ ᠪᠠᠶᠢᠳᠠᠭ ᠃ ᠣᠪᠣᠭᠠᠨ ᠤ ᠬᠡᠯᠪᠡᠷᠢ ᠶᠢ ᠨᠠᠷᠢᠨ ᠠᠩᠭᠢᠯᠠᠵᠤ ᠲᠡᠭᠦᠨ ᠤ ᠵᠢᠮᠡ ᠶᠣᠰᠣ ᠵᠢᠴᠢ ᠣᠨᠴᠠᠯᠢᠭ ᠢ ᠲᠣᠳᠣᠷᠬᠠᠢ ᠣᠶᠢᠯᠠᠭᠠᠬᠤ ᠶᠠᠪᠤᠳᠠᠯ ᠪᠣᠯ ᠣᠪᠣᠭᠠᠨ ᠰᠤᠳᠤᠯᠤᠯ ᠤᠨ ᠪᠠᠰᠠ ᠨᠢᠭᠡᠨ ᠴᠢᠬᠤᠯᠠ ᠠᠵᠢᠯ ᠪᠣᠯᠣᠨᠠ ᠃ ᠢᠩᠭᠢᠬᠦ ᠳᠤ ᠲᠤᠬᠠᠢ ᠶᠢᠨ ᠣᠪᠣᠭᠠᠨ ᠤ ᠳᠡᠷᠭᠡᠳᠡ ᠣᠴᠢᠵᠤ ᠠᠵᠢᠭᠯᠠᠵᠤ ᠰᠢᠨᠵᠢᠯᠡᠵᠦ ᠣᠶᠢᠯᠠᠭᠠᠬᠤ ᠶᠠᠪᠤᠳᠠᠯ ᠶᠠᠭᠤᠨ ᠤ ᠡᠮᠦᠨᠡ ᠱᠠᠭᠠᠷᠳᠠᠭᠳᠠᠬᠤ ᠨᠢ ᠶᠠᠷᠢᠶᠠᠨ ᠦᠭᠡᠢ ᠶᠤᠮ ᠃
ᠱᠠᠪᠢ ᠣᠪᠣᠭᠠ ︵Small Oboo︶ ᠭᠡᠳᠡᠭ ᠪᠣᠯ ᠰᠦᠷᠦᠭ ᠣᠪᠣᠭᠠᠨ ᠤ ᠭᠤᠣᠯ ᠣᠪᠣᠭᠠᠨ ᠤ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠯᠠ ᠪᠤᠶᠤ ᠡᠰᠡᠬᠦᠯᠡ ᠬᠤᠶᠢᠨᠠ ᠡᠮᠦᠨᠡ ᠲᠠᠯᠠ ᠳᠤ ᠨᠢ ᠪᠣᠰᠬᠠᠭᠰᠠᠨ ᠡᠳᠦᠢ ᠲᠡᠳᠦᠢ ᠵᠢᠭᠠᠬᠠᠨ ᠣᠪᠣᠭᠠ ᠶᠢ ᠵᠢᠭᠠᠳᠠᠭ ᠃ ᠡᠳᠡᠭᠡᠷ ᠣᠪᠣᠭᠠ ᠶᠢ ᠱᠠᠪᠢ ᠣᠪᠣᠭᠠ ᠭᠡᠳᠡᠭ ᠃ ︽ᠪᠠᠭᠠ ᠣᠪᠣᠭᠠ ᠶᠢ ᠱᠠᠪᠢ ᠣᠪᠣᠭᠠ᠂ ᠭᠤᠴᠤᠭ ᠣᠪᠣᠭᠠ ᠂ ᠬᠠᠷᠠᠭᠤᠯ ᠣᠪᠣᠭᠠ ᠂ ᠬᠤᠶᠠᠭ ᠣᠪᠣᠭᠠ ᠂ ᠰᠦᠪᠡᠭᠡ ᠣᠪᠣᠭᠠ ᠂ ᠰᠠᠬᠢᠭᠤᠰᠤ ᠣᠪᠣᠭᠠ ᠂ ᠳᠠᠭᠠᠯᠲᠠ ᠣᠪᠣᠭᠠ ᠭᠡᠳᠡᠭ︾ ﹇5﹈ ᠃ ᠱᠠᠪᠢ ᠣᠪᠣᠭᠠᠨ ᠤ ᠬᠤᠭᠤᠷᠣᠨᠳᠤᠬᠢ ᠵᠠᠢ ᠪᠠ ᠬᠡᠯᠪᠡᠷᠢ ᠨᠢ ᠦᠨᠳᠦᠰᠦᠨ ᠳᠡᠭᠡᠨ ᠠᠳᠠᠯᠢᠪᠲᠤᠷ ᠪᠠᠶᠢᠳᠠᠭ ᠃ ᠭᠡᠲᠡᠯᠡ ᠶᠡᠭᠡ ᠪᠠᠭᠠ ᠶᠢᠨ ᠬᠡᠮᠵᠢᠶᠡ ᠨᠢ ᠵᠠᠷᠢᠮ ᠳᠠᠭᠠᠨ ᠠᠳᠠᠯᠢ ᠦᠭᠡᠢ ᠣᠪᠣᠭᠠ ᠪᠠᠰᠠ ᠪᠠᠶᠢᠳᠠᠭ ᠃ ᠱᠠᠪᠢ ᠣᠪᠣᠭᠠ ᠨᠢ ᠭᠤᠣᠯ ᠣᠪᠣᠭᠠᠨ ᠠᠴᠠ ᠪᠠᠨ ᠪᠠᠭᠠ ᠪᠠᠶᠢᠵᠤ ᠪᠦᠲᠦᠴᠡ ᠨᠢ ᠴᠦ ᠳᠥᠭᠦᠮᠬᠡᠨ ᠪᠠᠶᠢᠳᠠᠭ ᠃ ᠣᠪᠣᠭᠠᠨ ᠤ ᠪᠦᠲᠦᠴᠡ ᠶᠢᠨ ᠣᠨᠴᠠᠯᠢᠭ ᠠᠴᠠ ᠪᠣᠯᠵᠤ ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠪᠣᠯᠣᠨ ᠲᠤᠭᠠ ᠨᠢ ᠬᠠᠷᠢᠯᠴᠠᠨ ᠠᠳᠠᠯᠢ ᠦᠭᠡᠢ ᠪᠠᠶᠢᠳᠠᠭ ︵ᠬᠦᠰᠦᠨᠦᠭᠲᠦ 17 ᠂ 18 ᠶᠢ ᠯᠠᠪᠯᠠ︶ ᠃ ᠵᠢᠱᠢᠶᠡᠯᠡᠪᠡᠯ ᠰᠢᠯᠢ ᠶᠢᠨ ᠬᠤᠲᠠ ᠳᠤ ᠪᠠᠶᠢᠭᠠ ᠡᠷᠳᠡᠨᠢ ᠣᠪᠣᠭᠠᠨ ᠳᠤ 12 ᠱᠠᠪᠢ ᠣᠪᠣᠭᠠ ᠲᠠᠢ ᠪᠠᠶᠢᠵᠤ ᠡᠳᠡᠭᠡᠷ ᠱᠠᠪᠢ ᠣᠪᠣᠭᠠ ᠨᠢ ᠭᠤᠣᠯ ᠣᠪᠣᠭᠠᠨ ᠤ ᠪᠠᠨ ᠵᠡᠭᠦᠨ ᠪᠠᠷᠠᠭᠤᠨ ᠬᠤᠶᠠᠷ ᠲᠠᠯᠠ ᠳᠤ ᠲᠡᠭᠰᠢ ᠬᠡᠮ ᠲᠠᠢ ᠪᠠᠷ ᠪᠠᠶᠢᠷᠢᠯᠠᠭᠰᠠᠨ ᠪᠠᠶᠢᠳᠠᠭ ᠃ ᠭᠡᠲᠡᠯᠡ ᠶᠡᠭᠡ ᠪᠠᠭᠠ ᠨᠢ ᠠᠳᠠᠯᠢ ᠦᠭᠡᠢ ᠪᠠᠶᠢᠪᠠ ᠃ ᠭᠤᠣᠯ ᠣᠪᠣᠭᠠ ᠲᠠᠢ ᠣᠶᠢᠷᠠᠬᠠᠨ ᠣᠪᠣᠭᠠ ᠨᠢ ᠶᠡᠭᠡ ᠪᠠᠶᠢᠵᠤ ᠬᠤᠯᠠᠳᠬᠤ ᠲᠤᠲᠤᠮ ᠪᠠᠭᠠ ᠪᠣᠯᠳᠠᠭ ᠃ ᠡᠨᠡ ᠨᠢ ᠡᠷᠳᠡᠨᠢ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠᠨ ᠤ ᠪᠠᠰᠠ ᠨᠢᠭᠡᠨ ᠣᠨᠴᠠᠯᠢᠭ ᠶᠤᠮ ︵ᠵᠢᠷᠤᠭ 13︶ ᠃ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠤ ᠸᠠᠩ ᠤᠨ ᠰᠦᠮᠡ ᠶᠢᠨ ᠣᠪᠣᠭᠠ ᠪᠣᠯᠣᠨ ᠸᠠᠩᠭᠠᠢ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠨᠢ ᠴᠦ ᠡᠶᠢᠮᠦᠷᠬᠦᠦ ᠣᠨᠴᠠᠯᠢᠭ ᠲᠠᠢ ᠶᠤᠮ ᠃ ᠣᠯᠠᠩᠬᠢ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠨᠢ ᠱᠣᠷᠣᠯᠵᠢᠨ ᠬᠡᠯᠪᠡᠷᠢ ᠲᠠᠢ ᠪᠠᠶᠢᠳᠠᠭ ︵ᠵᠢᠷᠤᠭ 14 ᠂ 15︶ ᠃ ᠭᠡᠲᠡᠯᠡ ᠪᠠᠶᠠᠨ ᠬᠤᠰᠢᠭᠤ ᠣᠪᠣᠭᠠ ᠪᠣᠯᠣᠨ ᠡᠷᠬᠡᠲᠦ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠨᠢ ᠳᠥᠷᠪᠡᠯᠵᠢᠨ ᠬᠡᠯᠪᠡᠷᠢ ᠲᠠᠢ ᠪᠠᠶᠢᠪᠠ ︵ᠵᠢᠷᠤᠭ 16︶ ᠃ ᠡᠶᠢᠮᠦᠷᠬᠦᠦ ᠳᠥᠷᠪᠡᠯᠵᠢᠨ ᠬᠡᠯᠪᠡᠷᠢ ᠲᠠᠢ ᠱᠠᠪᠢ ᠣᠪᠣᠭᠠ ᠲᠣᠩ ᠴᠥᠭᠡᠬᠡᠨ ᠲᠣᠬᠢᠶᠠᠯᠳᠤᠨᠠ ᠃
2-2-1 ᠪᠠᠶᠢᠷᠢᠰᠢᠯ
ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ︵Arrangement of Smal Oboo︶ ᠭᠡᠳᠡᠭ ᠨᠢ ᠰᠦᠷᠦᠭ ᠣᠪᠣᠭᠠ ᠪᠤᠶᠤ ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠨᠤᠭᠤᠳ ᠤᠨ ᠪᠠᠶᠢᠷᠢᠰᠢᠵᠤ ᠪᠠᠶᠢᠬᠤ ᠴᠢᠭᠯᠡᠯ ᠤᠨ ᠣᠨᠴᠠᠯᠢᠭ ᠰᠢᠨᠵᠢ ᠶᠢ ᠵᠢᠭᠠᠵᠤ ᠪᠣᠢ ᠃ ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠴᠢᠭᠯᠡᠯ ᠢ ᠣᠶᠢᠯᠠᠭᠠᠬᠤ ᠨᠢ ᠣᠪᠣᠭᠠᠨ ᠰᠤᠳᠤᠯᠤᠯ ᠤᠨ ᠦᠨᠳᠦᠰᠦᠨ ᠠᠯᠬᠤᠮ ᠤᠨ ᠨᠢᠭᠡ ᠪᠣᠯᠣᠨᠠ ᠃ ᠰᠦᠷᠦᠭ ᠣᠪᠣᠭᠠ ᠪᠣᠯᠣᠨ ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠤ ᠡᠯᠡ ᠱᠠᠪᠢ ᠣᠪᠣᠭᠠᠨ ᠤ ᠵᠠᠷᠢᠮ ᠨᠢ ᠠᠳᠠᠯᠢᠬᠠᠨ ᠴᠢᠭᠯᠡᠯ ᠢᠶᠠᠷ ᠪᠠᠶᠢᠷᠢᠰᠢᠵᠤ ᠵᠠᠷᠢᠮ ᠨᠢ ᠠᠳᠠᠯᠢ ᠪᠤᠰᠤ ᠴᠢᠭᠯᠡᠯ ᠢᠶᠠᠷ ᠪᠠᠶᠢᠷᠢᠰᠢᠵᠤ ᠪᠠᠶᠢᠳᠠᠭ ᠃ ᠡᠶᠢᠮᠦ ᠠᠴᠠ ᠣᠪᠣᠭᠠ ᠨᠤᠭᠤᠳ ᠤᠨ ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠴᠢᠭᠯᠡᠯ ᠢ ᠣᠶᠢᠯᠠᠭᠠᠵᠤ ᠲᠡᠭᠦᠨ ᠤ ᠣᠨᠴᠠᠯᠢᠭ ᠰᠢᠨᠵᠢ ᠪᠠ ᠵᠢᠮᠡ ᠶᠣᠰᠣ ᠶᠢ ᠲᠣᠳᠣᠷᠬᠠᠶᠢᠯᠠᠬᠤ ᠶᠠᠪᠤᠳᠠᠯ ᠪᠣᠯ ᠣᠪᠣᠭᠠᠨ ᠤ ᠰᠤᠳᠤᠯᠤᠯ ᠳᠤ ᠳᠤᠲᠠᠭᠳᠠᠵᠤ ᠪᠣᠯᠣᠰᠢ ᠦᠭᠡᠢ ᠴᠢᠬᠤᠯᠠ ᠠᠭᠤᠯᠭᠠ ᠪᠣᠯᠬᠤ ᠶᠤᠮ ᠃ ᠣᠳᠣ ᠪᠣᠯᠲᠠᠯᠠᠬᠢ ᠣᠪᠣᠭᠠᠨ ᠤ ᠰᠤᠳᠤᠯᠭᠠᠨ ᠳᠤ ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠴᠠ ᠪᠠᠶᠢᠷᠢᠰᠢᠯ ᠲᠠᠷᠬᠠᠯᠲᠠ ᠴᠢᠭᠯᠡᠯ ᠤᠨ ᠲᠤᠬᠠᠢ ᠰᠤᠳᠤᠯᠤᠯ ᠦᠨᠳᠦᠰᠦᠨ ᠳᠡᠭᠡᠨ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠠᠶᠢᠨᠠ ᠃ ᠪᠢ ᠬᠡᠭᠡᠷᠡ ᠶᠢᠨ ᠰᠢᠨᠵᠢᠯᠡᠭᠡᠨ ᠤ ᠳᠤᠮᠳᠠ ᠪᠠᠨ 15 ᠰᠦᠷᠦᠭ ᠣᠪᠣᠭᠠ ᠂ 11 ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠤ ᠬᠠᠪᠲᠠᠭᠠᠢ ᠶᠢᠨ ᠵᠢᠷᠤᠭ ᠢ ᠵᠢᠷᠤᠬᠤ ᠪᠠᠷ ᠳᠠᠮᠵᠢᠵᠤ ᠲᠡᠳᠡᠭᠡᠷ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠᠨ ᠤ ᠲᠠᠷᠬᠠᠯᠲᠠ ᠪᠠᠶᠢᠷᠢᠰᠢᠯ ᠴᠢᠭᠯᠡᠯ ᠢ ᠣᠶᠢᠯᠠᠭᠠᠬᠤ ᠪᠠᠷ ᠴᠢᠷᠮᠠᠶᠢᠭᠰᠠᠨ ᠶᠤᠮ ᠃ ᠡᠳᠡᠭᠡᠷ 11 ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠳᠤ ᠰᠦᠷᠦᠭ ᠣᠪᠣᠭᠠ 16 ᠪᠠᠶᠢᠭᠰᠠᠨ ᠶᠤᠮ ᠃ ᠢᠩᠭᠢᠭᠡᠳ 31 ᠰᠦᠷᠦᠭ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠲᠠᠷᠬᠠᠯᠲᠠ ᠴᠢᠭᠯᠡᠯ ᠳᠤ ᠪᠠᠶᠢᠴᠠᠭᠠᠯᠲᠠ ᠬᠢᠪᠡ ᠃ ᠪᠠᠶᠢᠴᠠᠭᠠᠯᠲᠠ ᠶᠢᠨ ᠳ᠋ᠦᠩ ᠢᠶᠠᠨ ᠬᠦᠰᠦᠨᠦᠭᠲᠦ ﹇20,21﹈ ᠳᠤ ᠵᠠᠳᠠᠯᠤᠨ ᠡᠮᠬᠢᠳᠬᠡᠪᠡ ᠃
ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠤᠨ ᠴᠢᠭᠯᠡᠯ ᠠᠴᠠ ᠭᠠᠭᠴᠠ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠂ ᠬᠤᠶᠠᠷ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠂ ᠭᠤᠷᠪᠠᠨ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠂ ᠳᠥᠷᠪᠡᠨ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠂ ᠲᠣᠭᠤᠷᠢᠭ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠭᠡᠵᠤ ᠲᠠᠪᠤᠨ ᠵᠦᠢᠯ ᠳᠤ ᠠᠩᠭᠢᠯᠠᠵᠤ ᠪᠣᠯᠣᠨᠠ ᠃
ᠭᠠᠭᠴᠠ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠭᠡᠳᠡᠭ ᠨᠢ ᠱᠠᠪᠢ ᠣᠪᠣᠭᠠ ᠶᠢ ᠭᠤᠣᠯ ᠣᠪᠣᠭᠠᠨ ᠤ ᠨᠢᠭᠡᠨ ᠲᠠᠯᠠ ᠳᠤ ᠵᠢᠭᠳᠡᠷᠡᠭᠦᠯᠦᠨ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠶᠢ ᠬᠡᠯᠡᠨᠡ ᠃ ᠡᠶᠢᠮᠦᠷᠬᠦᠦ ᠭᠠᠭᠴᠠ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠᠨ ᠳᠤ ᠂ ᠲᠡᠭᠦᠨ ᠤ ᠱᠠᠪᠢ ᠣᠪᠣᠭᠠ ᠶᠢ ᠭᠤᠣᠯ ᠣᠪᠣᠭᠠᠨ ᠤ ᠬᠢᠨᠢ ᠨᠠᠢᠮᠠᠨ ᠲᠠᠯᠠ ᠶᠢᠨ ᠠᠯᠢ ᠨᠢᠭᠡ ᠴᠢᠭᠯᠡᠯ ᠳᠤ ᠨᠢ ᠲᠤᠰ ᠲᠤᠰ ᠪᠠᠶᠢᠷᠢᠰᠢᠭᠤᠯᠵᠤ ᠪᠣᠰᠬᠠᠵᠤ ᠪᠣᠯᠬᠤ ᠪᠣᠯᠣᠮᠵᠢ ᠲᠠᠢ ᠪᠣᠯᠬᠤᠷ ᠨᠠᠢᠮᠠᠨ ᠵᠦᠢᠯ ᠤᠨ ᠴᠢᠭᠯᠡᠯ ᠤᠨ ᠪᠠᠶᠢᠷᠢᠰᠢᠯ ᠤᠨ ᠬᠡᠯᠪᠡᠷᠢ ᠪᠠᠶᠢᠳᠠᠭ ᠶᠤᠮ ᠃ ᠡᠳᠡᠭᠡᠷ ᠨᠠᠢᠮᠠᠨ ᠵᠦᠢᠯ ᠤᠨ ᠴᠢᠭᠯᠡᠯ ᠤᠨ ᠬᠡᠯᠪᠡᠷᠢ ᠨᠢ ᠳᠠᠷᠤᠢ ᠂ ᠵᠡᠭᠦᠨᠰᠢ ᠴᠢᠭᠯᠡᠯ ︵E ᠴᠢᠭᠯᠡᠯ︶ ᠂ ᠪᠠᠷᠠᠭᠤᠨᠰᠢ ᠴᠢᠭᠯᠡᠯ ︵W ᠴᠢᠭᠯᠡᠯ︶ ᠂ ᠡᠮᠦᠨᠡᠰᠢ ᠴᠢᠭᠯᠡᠯ ︵S ᠴᠢᠭᠯᠡᠯ︶ ᠂ ᠬᠤᠶᠢᠰᠢ ᠴᠢᠭᠯᠡᠯ ︵N ᠴᠢᠭᠯᠡᠯ︶ ᠂ ᠵᠡᠭᠦᠨ ᠡᠮᠦᠨᠡᠰᠢ ᠴᠢᠭᠯᠡᠯ ︵SE ᠴᠢᠭᠯᠡᠯ︶ ᠂ ᠵᠡᠭᠦᠨ ᠬᠤᠶᠢᠰᠢ ᠴᠢᠭᠯᠡᠯ ︵NE ᠴᠢᠭᠯᠡᠯ︶ ᠂ ᠪᠠᠷᠠᠭᠤᠨ ᠬᠤᠶᠢᠰᠢ ᠴᠢᠭᠯᠡᠯ ︵NW ᠴᠢᠭᠯᠡᠯ︶ ᠂ ᠪᠠᠷᠠᠭᠤᠨ ᠡᠮᠦᠨᠡᠰᠢ ᠴᠢᠭᠯᠡᠯ ︵SW ᠴᠢᠭᠯᠡᠯ︶ ᠪᠣᠯᠣᠨᠠ ᠃ ᠵᠢᠱᠢᠶᠡᠯᠡᠪᠡᠯ ᠬᠠᠷᠠᠸᠠᠲᠦ ᠣᠪᠣᠭᠠ ᠪᠣᠯ ᠲᠡᠭᠦᠨ ᠤ ᠱᠠᠪᠢ ᠣᠪᠣᠭᠠ ᠶᠢ ᠭᠤᠣᠯ ᠣᠪᠣᠭᠠᠨ ᠤ ᠪᠠᠷᠠᠭᠤᠨ ᠬᠤᠶᠢᠨᠠ ᠵᠦᠭ ︵NW ᠴᠢᠭᠯᠡᠯ︶ ᠲᠤ ᠨᠢ ᠨᠢᠭᠡᠨ ᠮᠥᠷ ᠢᠶᠠᠷ ᠰᠤᠪᠤᠷᠠᠭᠤᠯᠤᠨ ᠪᠣᠰᠬᠠᠭᠰᠠᠨ ᠭᠠᠭᠴᠠ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ 13 ᠣᠪᠣᠭᠠ ᠪᠣᠯᠣᠨᠠ ︵ᠬᠦᠰᠦᠨᠦᠭᠲᠦ 18-No.12︶ ᠃ ᠡᠭᠦᠨ ᠠᠴᠠ ᠭᠠᠳᠠᠨᠠ ᠂ ᠪᠠᠶᠠᠨ ᠬᠤᠰᠢᠭᠤ ᠣᠪᠣᠭᠠᠨ ᠤ ᠳᠠᠭᠠᠯᠲᠠ ᠣᠪᠣᠭᠠ ᠪᠣᠯᠬᠤ ᠬᠡᠦᠬᠡᠳ ᠣᠪᠣᠭᠠ ︵ᠬᠦᠰᠦᠨᠦᠭᠲᠦ 19-No.22-c ᠂ SE ᠴᠢᠭᠯᠡᠯ︶ ᠂ ᠤᠯᠠᠭᠠᠨ ᠤᠲᠠᠢ ᠣᠪᠣᠭᠠᠨ ᠤ ᠳᠠᠭᠠᠯᠲᠠ ᠣᠪᠣᠭᠠ ᠪᠣᠯᠬᠤ ᠬᠡᠦᠬᠡᠳ ᠣᠪᠣᠭᠠ ︵ᠬᠦᠰᠦᠨᠦᠭᠲᠦ 19-No.26-b ᠂ NW ᠴᠢᠭᠯᠡᠯ︶ ᠪᠣᠯ ᠴᠥᠮ ᠭᠠᠭᠴᠠ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠪᠣᠯᠣᠨᠠ ᠃
ᠬᠤᠶᠠᠷ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠭᠡᠳᠡᠭ ᠨᠢ ᠱᠠᠪᠢ ᠣᠪᠣᠭᠠ ᠶᠢ ᠭᠤᠣᠯ ᠣᠪᠣᠭᠠᠨ ᠤ ᠬᠢᠨᠢ ᠬᠤᠶᠠᠷ ᠲᠠᠯᠠ ᠳᠤ ᠨᠢ ᠲᠣᠭᠲᠠᠭᠰᠠᠨ ᠵᠠᠷᠴᠢᠮ ᠢᠶᠠᠷ ᠪᠠᠶᠢᠷᠢᠰᠢᠭᠤᠯᠤᠨ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠶᠢ ᠵᠢᠭᠠᠵᠤ ᠪᠠᠶᠢᠭᠠ ᠶᠤᠮ ᠃ ᠡᠶᠢᠮᠦᠷᠬᠦᠦ ᠬᠤᠶᠠᠷ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠨᠢ ᠭᠤᠣᠯᠳᠠᠭᠤ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠴᠢᠭᠯᠡᠯ ︵EW ᠴᠢᠭᠯᠡᠯ︶ ᠂ ᠡᠮᠦᠨᠡ ᠬᠤᠶᠢᠰᠢ ᠴᠢᠭᠯᠡᠯ ︵SN ᠴᠢᠭᠯᠡᠯ︶ ᠂ ᠵᠡᠭᠦᠨ ᠡᠮᠦᠨᠡ ᠪᠠᠷᠠᠭᠤᠨ ᠬᠤᠶᠢᠰᠢ ᠴᠢᠭᠯᠡᠯ ︵SE +EW ᠴᠢᠭᠯᠡᠯ︶ ᠂ ᠪᠠᠷᠠᠭᠤᠨ ᠡᠮᠦᠨᠡ ᠵᠡᠭᠦᠨ ᠬᠤᠶᠢᠰᠢ ᠴᠢᠭᠯᠡᠯ ︵SW+ NE ᠴᠢᠭᠯᠡᠯ︶ ᠭᠡᠬᠦ ᠳᠥᠷᠪᠡᠨ ᠴᠢᠭᠯᠡᠯ ᠤᠨ ᠬᠡᠯᠪᠡᠷᠢ ᠪᠠᠷ ᠪᠠᠶᠢᠷᠢᠰᠢᠵᠤ ᠪᠠᠶᠢᠳᠠᠭ ᠃ ᠡᠶᠢᠮᠦ ᠬᠡᠯᠪᠡᠷᠢ ᠶᠢᠨ ᠬᠤᠶᠠᠷ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠬᠠᠮᠤᠭ ᠲᠦᠭᠡᠮᠡᠯ ᠲᠣᠬᠢᠶᠠᠯᠳᠤᠬᠤ ᠪᠣᠯᠬᠤᠷ ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠤᠨ ᠦᠨᠳᠦᠰᠦᠨ ᠬᠡᠯᠪᠡᠷᠢ ᠭᠡᠵᠤ ᠦᠵᠡᠵᠦ ᠪᠣᠯᠬᠤ ᠶᠤᠮ ᠃ ᠬᠤᠶᠠᠷ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠᠨ ᠤ ᠳᠣᠲᠣᠷᠠ ᠬᠠᠮᠤᠭ ᠣᠯᠠᠨ ᠲᠣᠬᠢᠶᠠᠯᠳᠤᠬᠤ ᠨᠢ ᠱᠠᠪᠢ ᠣᠪᠣᠭᠠ ᠶᠢ ᠭᠤᠣᠯ ᠣᠪᠣᠭᠠᠨ ᠤ ᠬᠢᠨᠢ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠯᠠ ᠳᠤ ᠨᠢ ᠪᠠᠶᠢᠷᠢᠰᠢᠭᠤᠯᠤᠭᠰᠠᠨ ᠳᠠᠷᠤᠢ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠴᠢᠭᠯᠡᠯᠲᠦ ᠣᠪᠣᠭᠠ ᠪᠣᠯᠬᠤ ᠶᠤᠮ ᠃ ᠮᠢᠨᠤ ᠪᠠᠶᠢᠴᠠᠭᠠᠯᠲᠠ ᠬᠢᠭᠰᠡᠨ 31 ᠰᠦᠷᠦᠭ ᠣᠪᠣᠭᠠᠨ ᠤ ᠳᠣᠲᠣᠷᠠ 16 ᠰᠦᠷᠦᠭ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠨᠢ ᠡᠶᠢᠮᠦᠷᠬᠦᠦ ᠬᠤᠶᠠᠷ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠪᠠᠶᠢᠵᠤ ᠂ 52% ᠢ ᠡᠵᠡᠯᠡᠵᠦ ᠪᠠᠶᠢᠪᠠ ᠃ ᠬᠤᠶᠠᠷ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠᠨ ᠤ ᠲᠠᠷᠬᠠᠯᠲᠠ ᠶᠢᠨ ᠪᠠᠰᠠ ᠨᠢᠭᠡᠨ ᠣᠨᠴᠠᠯᠢᠭ ᠨᠢ ᠬᠤᠶᠠᠷ ᠲᠠᠯᠠ ᠶᠢᠨ ᠱᠠᠪᠢ ᠣᠪᠣᠭᠠᠨ ᠤ ᠲᠤᠭᠠ ᠶᠢ ᠲᠡᠩᠴᠡᠭᠦᠦ ᠪᠣᠰᠬᠠᠬᠤ᠂ ᠳᠠᠷᠤᠢ ᠲᠡᠭᠰᠢ ᠬᠡᠮᠲᠦ ᠪᠠᠶᠢᠷᠢᠰᠢᠯ ᠪᠣᠯᠬᠤ ᠶᠤᠮ ᠃ ᠳᠡᠭᠡᠷᠡᠬᠢ ᠬᠤᠶᠠᠷ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ 16 ᠰᠦᠷᠦᠭ ᠣᠪᠣᠭᠠᠨ ᠤ ᠳᠣᠲᠣᠷᠠ 15 ᠰᠦᠷᠦᠭ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠶᠢ ᠨᠢ ᠲᠡᠭᠰᠢ ᠬᠡᠮᠲᠦ ᠬᠡᠯᠪᠡᠷᠢ ᠲᠠᠢ ᠪᠠᠷ ᠪᠣᠰᠬᠠᠭᠰᠠᠨ ᠢ ᠦᠵᠡᠬᠦ ᠳᠤ ᠂ ᠬᠤᠶᠠᠷ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠶᠢ ᠣᠯᠠᠩᠬᠢ ᠳᠠᠭᠠᠨ ᠲᠡᠭᠰᠢ ᠬᠡᠮᠲᠡᠢ ᠪᠠᠷ ᠪᠣᠰᠬᠠᠳᠠᠭ ᠨᠢ ᠲᠣᠳᠣᠷᠬᠠᠢ ᠪᠠᠶᠢᠨᠠ ᠃
ᠭᠤᠷᠪᠠᠨ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠭᠡᠳᠡᠭ ᠨᠢ ᠨᠢᠭᠡᠨ ᠰᠦᠷᠦᠭ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠶᠢ ᠭᠤᠣᠯ ᠣᠪᠣᠭᠠᠨ ᠤ ᠭᠤᠷᠪᠠᠨ ᠲᠠᠯᠠ ᠳᠤ ᠨᠢ ᠲᠣᠭᠲᠠᠭᠰᠠᠨ ᠴᠢᠭᠯᠡᠯ ᠢᠶᠠᠷ ᠪᠠᠶᠢᠷᠢᠰᠢᠭᠤᠯᠤᠨ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠶᠢ ᠵᠢᠭᠠᠵᠤ ᠪᠠᠶᠢᠭᠠ ᠶᠤᠮ ᠃ ᠡᠶᠢᠮᠦᠷᠬᠦᠦ ᠭᠤᠷᠪᠠᠨ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠶᠢ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠬᠤᠶᠢᠰᠢ ᠂ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠵᠡᠭᠦᠨ ᠬᠤᠶᠢᠰᠢ ᠂ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠪᠠᠷᠠᠭᠤᠨ ᠬᠤᠶᠢᠰᠢ ᠂ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠡᠮᠦᠨᠡᠰᠢ ᠂ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠵᠡᠭᠦᠨ ᠡᠮᠦᠨᠡᠰᠢ ᠂ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠪᠠᠷᠠᠭᠤᠨ ᠡᠮᠦᠨᠡᠰᠢ ᠵᠡᠷᠭᠡ 16 ᠵᠦᠢᠯ ᠤᠨ ᠬᠡᠯᠪᠡᠷᠢ ᠳᠤ ᠪᠠᠶᠢᠷᠢᠰᠢᠭᠤᠯᠵᠤ ᠪᠣᠯᠬᠤ ᠪᠣᠯᠣᠮᠵᠢ ᠲᠠᠢ ᠪᠠᠶᠢᠳᠠᠭ ᠃ ᠵᠢᠱᠢᠶᠡᠯᠡᠪᠡᠯ ᠂ ᠭᠤᠷᠣᠬᠠᠨ ᠬᠠᠨ ᠣᠪᠣᠭᠠ ︵No.11︶᠂ ᠡᠷᠬᠡᠲᠦ ᠣᠪᠣᠭᠠ ︵No.14︶ ᠂ ᠰᠠᠭᠯᠠᠢ ᠣᠪᠣᠭᠠ ︵No.16︶ ᠂ ᠪᠠᠶᠠᠨ ᠬᠤᠰᠢᠭᠤ ᠣᠪᠣᠭᠠ ︵No.22︶ ᠂ ᠲᠠᠷᠭᠤᠨ ᠣᠪᠣᠭᠠ ︵No.24-b︶ ᠵᠡᠷᠭᠡ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠶᠢ ᠭᠤᠷᠪᠠᠨ ᠴᠢᠭᠯᠡᠯ ᠢᠶᠠᠷ ᠪᠠᠶᠢᠷᠢᠰᠢᠭᠤᠯᠤᠨ ᠪᠣᠰᠬᠠᠭᠰᠠᠨ ᠪᠠᠶᠢᠳᠠᠭ ᠃
ᠳᠥᠷᠪᠡᠨ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠭᠡᠳᠡᠭ ᠨᠢ ᠨᠢᠭᠡᠨ ᠰᠦᠷᠦᠭ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠶᠢ ᠭᠤᠣᠯ ᠣᠪᠣᠭᠠᠨ ᠤ ᠳᠥᠷᠪᠡᠨ ᠲᠠᠯᠠ ᠳᠤ ᠨᠢ ᠲᠣᠭᠲᠠᠭᠰᠠᠨ ᠴᠢᠭᠯᠡᠯ ᠢᠶᠠᠷ ᠪᠠᠶᠢᠷᠢᠰᠢᠭᠤᠯᠤᠨ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠶᠢ ᠵᠢᠭᠠᠵᠤ ᠪᠠᠶᠢᠭᠠ ᠶᠤᠮ ᠃ ᠡᠶᠢᠮᠦᠷᠬᠦᠦ ᠳᠥᠷᠪᠡᠨ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠶᠢ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠡᠮᠦᠨᠡᠰᠢ ᠬᠤᠶᠢᠰᠢ ᠴᠢᠭᠯᠡᠯ ︵EW+ SN︶ ᠂ ᠵᠡᠭᠦᠨ ᠡᠮᠦᠨᠡ ᠪᠠᠷᠠᠭᠤᠨ ᠬᠤᠶᠢᠰᠢ ᠂ ᠪᠠᠷᠠᠭᠤᠨ ᠡᠮᠦᠨᠡ ᠵᠡᠭᠦᠨ ᠬᠤᠶᠢᠰᠢ ᠴᠢᠭᠯᠡᠯ ︵SENW+ SWNE︶ ᠮᠡᠲᠦ ᠶᠢᠨ 22 ᠵᠦᠢᠯ ᠤᠨ ᠬᠡᠯᠪᠡᠷᠢ ᠪᠠᠷ ᠪᠠᠶᠢᠷᠢᠰᠢᠭᠤᠯᠵᠤ ᠪᠣᠯᠬᠤ ᠶᠤᠮ ᠃ ᠵᠣᠬᠢᠶᠠᠭᠴᠢ ᠶᠢᠨ ᠬᠡᠭᠡᠷᠡ ᠶᠢᠨ ᠰᠢᠨᠵᠢᠯᠡᠭᠡᠨ ᠬᠢᠭᠰᠡᠨ ᠪᠠᠭᠰᠢ ᠶᠢᠨ ᠣᠪᠣᠭᠠ ︵No.15︶ ᠂ ᠪᠠᠶᠠᠨ ᠡᠷᠬᠡᠲᠦ ᠣᠪᠣᠭᠠ ︵No.18︶ ᠂ ᠬᠤᠩᠭᠤᠷ ᠣᠪᠣᠭᠠ ︵No.21︶ ᠂ ᠤᠯᠠᠭᠠᠨ ᠤᠲᠠᠢ ᠣᠪᠣᠭᠠ ︵No.26︶ ᠂ ᠠᠳᠤᠭᠤᠨ ᠣᠪᠣᠭᠠ ︵No.29︶ ᠪᠣᠯ ᠱᠠᠪᠢ ᠣᠪᠣᠭᠠ ᠶᠢ ᠨᠢ ᠳᠥᠷᠪᠡᠨ ᠴᠢᠭᠯᠡᠯ ᠢᠶᠠᠷ ᠪᠠᠶᠢᠷᠢᠰᠢᠭᠤᠯᠤᠭᠰᠠᠨ ᠳᠥᠷᠪᠡᠨ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠪᠣᠯᠬᠤ ᠶᠤᠮ ᠃ ᠣᠨᠴᠠᠭᠠᠶᠢᠯᠠᠨ ᠤᠯᠠᠭᠠᠨ ᠤᠲᠠᠢ ᠣᠪᠣᠭᠠ ᠪᠣᠯᠣᠨ ᠠᠳᠤᠭᠤᠨ ᠣᠪᠣᠭᠠ ᠪᠣᠯ ᠱᠠᠪᠢ ᠣᠪᠣᠭᠠ ᠶᠢ ᠨᠢ ᠵᠢᠰᠢᠭᠦᠦ ᠪᠠᠷ ᠪᠠᠶᠢᠷᠢᠯᠠᠭᠤᠯᠤᠨ ᠪᠣᠰᠬᠠᠭᠰᠠᠨ ᠳᠠᠷᠤᠢ ᠵᠢᠰᠢᠭᠦᠦ ᠳᠥᠷᠪᠡᠨ ᠴᠢᠭᠯᠡᠯᠲᠦ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠪᠣᠯᠬᠤᠷ ᠥᠪᠡᠷᠮᠢᠴᠡ ᠪᠠᠶᠢᠷᠢᠰᠢᠯ ᠲᠠᠢ ᠣᠪᠣᠭᠠ ᠪᠣᠯᠣᠨᠠ ᠃
ᠲᠣᠭᠤᠷᠢᠭ ᠪᠠᠶᠢᠷᠢᠰᠢᠯᠲᠦ ᠣᠪᠣᠭᠠ ᠭᠡᠳᠡᠭ ᠨᠢ ᠨᠢᠭᠡᠨ ᠰᠦᠷᠦᠭ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠶᠢ ᠭᠤᠣᠯ ᠣᠪᠣᠭᠠ ᠶᠢ ᠨᠢ ᠲᠣᠭᠤᠷᠢᠭᠤᠯᠤᠨ ᠪᠠᠶᠢᠷᠢᠰᠢᠭᠤᠯᠤᠭᠰᠠᠨ ᠣᠪᠣᠭᠠ ᠶᠢ ᠵᠢᠭᠠᠵᠤ ᠪᠠᠶᠢᠬᠤ ᠶᠤᠮ ᠃ ᠱᠠᠪᠢ ᠣᠪᠣᠭᠠ ᠶᠢ ᠨᠢ ᠢᠩᠭᠢᠵᠦ ᠪᠠᠶᠢᠷᠢᠰᠢᠭᠤᠯᠤᠭᠰᠠᠨ ᠣᠪᠣᠭᠠ ᠲᠣᠩ ᠬᠤᠪᠣᠷ ᠲᠣᠬᠢᠶᠠᠯᠳᠤᠨᠠ ᠃ ᠵᠢᠱᠢᠶᠡᠯᠡᠪᠡᠯ ᠪᠠᠶᠠᠨ ᠴᠠᠭᠠᠨ ᠣᠪᠣᠭᠠᠨ ᠤ ᠳᠠᠭᠠᠯᠲᠠ ᠣᠪᠣᠭᠠ ᠪᠣᠯᠬᠤ ᠡᠪᠦᠭᠡᠨ ᠣᠪᠣᠭᠠᠨ ᠤ 11 ᠱᠠᠪᠢ ᠣᠪᠣᠭᠠ ᠶᠢ ᠭᠤᠣᠯ ᠣᠪᠣᠭᠠ ᠶᠢ ᠨᠢ ᠲᠣᠭᠤᠷᠢᠭᠤᠯᠤᠨ ᠪᠣᠰᠬᠠᠵᠤ ᠪᠠᠶᠢᠷᠢᠰᠢᠭᠤᠯᠤᠭᠰᠠᠨ ᠶᠤᠮ ᠃ ᠲᠤᠰ ᠨᠣᠮ ᠳᠤ C ︵Circle ᠲᠣᠭᠤᠷᠢᠭ ᠭᠡᠳᠡᠭ ᠤᠳᠬᠠ ᠪᠦᠬᠦᠢ ᠠᠩᠭ᠍ᠯᠢ ᠦᠭᠡᠨ ᠤ ᠲᠣᠪᠴᠢᠯᠠᠯ︶ ᠬᠡᠯᠪᠡᠷᠢ ᠶᠢᠨ ᠴᠢᠭᠯᠡᠯ ᠬᠡᠮᠡᠨ ᠨᠡᠷᠡᠯᠡᠪᠡ ᠃
ᠡᠭᠦᠨ ᠠᠴᠠ ᠦᠵᠡᠪᠡᠯ ᠰᠦᠷᠦᠭ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠶᠢ ᠲᠣᠭᠲᠠᠭᠰᠠᠨ ᠨᠢᠭᠡᠨ ᠴᠢᠭᠯᠡᠯ ᠢᠶᠠᠷ ᠪᠠᠶᠢᠷᠢᠰᠢᠭᠤᠯᠵᠤ ᠪᠣᠰᠬᠠᠳᠠᠭ ᠪᠥᠭᠡᠳ ᠲᠡᠭᠦᠨ ᠳᠤ ᠲᠣᠭᠲᠠᠭᠰᠠᠨ ᠵᠢᠷᠤᠮ ᠭᠤᠷᠢᠮ ᠪᠠᠶᠢᠳᠠᠭ ᠭᠡᠳᠡᠭ ᠢ ᠳᠡᠭᠡᠷᠡᠬᠢ ᠵᠠᠳᠠᠯᠤᠭᠰᠠᠨ ᠵᠢᠱᠢᠶᠡ ᠨᠦᠭᠦᠳ ᠠᠴᠠ ᠣᠶᠢᠯᠠᠭᠠᠵᠤ ᠪᠣᠯᠣᠨᠠ ᠃
2-2-2 ᠲᠤᠭᠠ
ᠱᠠᠪᠢ ᠣᠪᠣᠭᠠᠨ ᠤ ᠲᠤᠭᠠ ︵Number of Smal Oboo︶ ᠭᠡᠳᠡᠭ ᠨᠢ ᠨᠢᠭᠡᠨ ᠰᠦᠷᠦᠭ ᠣᠪᠣᠭᠠ ᠪᠤᠶᠤ ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠳᠠᠬᠢ ᠱᠠᠪᠢ ᠣᠪᠣᠭᠠᠨ ᠤ ᠶᠡᠷᠦᠩᠬᠡᠢ ᠲᠤᠭᠠ ᠶᠢ ᠵᠢᠭᠠᠵᠤ ᠪᠣᠢ ᠃ ᠣᠳᠣ ᠪᠣᠯᠲᠠᠯᠠ ᠣᠯᠠᠩᠬᠢ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠂ ᠱᠠᠪᠢ ᠣᠪᠣᠭᠠᠨ ᠤ ᠲᠤᠭᠠ ᠪᠣᠯᠣᠨ ᠲᠡᠭᠦᠨ ᠤ ᠤᠳᠬᠠ ᠦᠢᠯᠡᠳᠦᠯ ᠤᠨ ᠲᠤᠬᠠᠢ ᠬᠠᠩᠭᠠᠮᠵᠢᠲᠠᠢ ᠲᠠᠶᠢᠯᠪᠤᠷᠢ ᠬᠠᠷᠠᠬᠠᠨ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠠᠶᠢᠭᠰᠠᠭᠠᠷ ᠪᠠᠶᠢᠨᠠ ᠃ ᠱᠠᠪᠢ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠪᠠ ᠲᠤᠭᠠ ᠨᠢ ᠣᠪᠣᠭᠠᠨ ᠤ ᠰᠢᠨᠵᠢ ᠴᠢᠨᠠᠷ ᠤᠨ ᠠᠳᠠᠯᠢ ᠦᠭᠡᠢ ᠠᠴᠠ ᠪᠣᠯᠵᠤ ᠠᠳᠠᠯᠢ ᠪᠤᠰᠤ ᠪᠠᠶᠢᠳᠠᠭ ᠃ ᠣᠪᠣᠭᠠᠨ ᠤ ᠲᠣᠭᠠᠨ ᠤ ᠲᠤᠬᠠᠢ ᠡᠸ᠋ᠭᠠᠮᠢ ︵1937︶ ᠂ ᠠᠺᠢᠪᠠ ︵1941︶ ᠂ ᠶᠠᠨᠠᠭᠢᠳᠠ ᠂ ᠬᠤᠷᠢ ︵1948︶ ᠂ ᠭᠤᠲ᠋ᠦ ︵1956︶ ᠂ ᠤᠤᠽᠦ᠋ᠺᠠ ︵1984︶ ᠂ ᠮᠤᠷᠢᠲ᠋ᠠ ︵1984︶ ᠂ ᠰᠠᠨᠦ ︵1988︶ ᠂ ᠽᠦᠵᠢ ︵1994︶ ᠨᠠᠷ ᠮᠣᠩᠭᠤᠯ ᠨᠤᠲᠤᠭ ᠢᠶᠠᠷ ᠨᠡᠯᠢᠶᠡᠳ ᠲᠦᠭᠡᠮᠡᠯ ᠪᠠᠶᠢᠷᠢᠰᠢᠯ ᠲᠠᠢ ᠬᠠᠷᠠᠭᠳᠠᠳᠠᠭ ᠭᠤᠣᠯᠳᠠᠭᠤ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠᠨ ᠤ ᠲᠤᠬᠠᠢ ᠪᠠᠶᠢᠴᠠᠭᠠᠯᠲᠠ ᠰᠤᠳᠤᠯᠤᠯ ᠬᠢᠵᠦ ᠥᠪᠡᠷ ᠤᠨ ᠦᠵᠡᠯᠲᠡ ᠲᠠᠨᠢᠯᠲᠠ ᠪᠠᠨ ᠳᠤᠷᠠᠳᠤᠭᠰᠠᠨ ᠪᠠᠶᠢᠳᠠᠭ ᠃ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠᠨ ᠤ ᠲᠤᠬᠠᠢ ᠠᠺᠢᠪᠠ ᠪᠠᠷ ︽① ᠳᠠᠶᠢᠨ ᠤ ᠰᠠᠬᠢᠭᠤᠰᠤ ︵dgra lha︶ ᠂② ᠡᠳ᠋ ᠤᠨ ᠰᠠᠬᠢᠭᠤᠰᠤ ︵nor︶ ᠂③ ᠰᠠᠯᠬᠢᠨ ᠤ ᠰᠠᠬᠢᠭᠤᠰᠤ ︵rhun︶᠂④ ᠪᠣᠷᠣᠭᠠᠨ ᠤ ᠰᠠᠬᠢᠭᠤᠰᠤ ︵char︶ ᠂⑤ ᠠᠶᠤᠩᠭᠠ ᠶᠢᠨ ᠰᠠᠬᠢᠭᠤᠰᠤ ︵kha︶ ᠂⑥ ᠠᠳᠤᠭᠤᠨ ᠤ ᠰᠠᠬᠢᠭᠤᠰᠤ ︵rta︶ ᠂⑦ ᠦᠬᠡᠷ ᠤᠨ ᠰᠠᠬᠢᠭᠤᠰᠤ ︵glan︶ ᠂⑧ ᠬᠤᠨᠢᠨ ᠤ ᠰᠠᠬᠢᠭᠤᠰᠤ ︵lug︶ ᠂⑨ ᠢᠮᠠᠭᠠᠨ ᠤ ᠰᠠᠬᠢᠭᠤᠰᠤ ︵ra︶ ᠂⑩ ᠲᠡᠮᠡᠭᠡᠨ ᠤ ᠰᠠᠬᠢᠭᠤᠰᠤ ︵rna-mon︶ ᠂⑪ ᠭᠠᠵᠠᠷ ᠤᠨ ᠰᠠᠬᠢᠭᠤᠰᠤ ︵shin︶ ᠂⑫ ᠴᠡᠷᠢᠭ ᠤᠨ ᠰᠠᠬᠢᠭᠤᠰᠤ ︵dmag︶ ᠂⑬ᠳᠠᠶᠢᠴᠢᠨ ᠲᠡᠭᠷᠢ ᠶᠢᠨ ᠰᠠᠬᠢᠭᠤᠰᠤ ︵hthabs︶ ᠶᠢ ᠲᠤᠰ ᠲᠤᠰ ᠲᠥᠯᠥᠭᠡᠯᠡᠳᠡᠭ︾ ﹇6﹈ ᠭᠡᠰᠡᠨ ᠰᠣᠨᠢᠷᠬᠠᠯ ᠲᠠᠢ ᠲᠠᠶᠢᠯᠪᠤᠷᠢ ᠶᠢ ᠳᠤᠷᠠᠳᠤᠭᠰᠠᠨ ᠪᠠᠶᠢᠨᠠ ᠃ ᠠᠺᠢᠪᠠ ᠶᠢᠨ ᠡᠨᠡ ᠬᠦ ᠦᠵᠡᠯᠲᠡ ᠶᠢᠨ ᠲᠤᠬᠠᠢ ᠭᠤᠲ᠋ᠦ ᠪᠠᠷ ︽ᠳᠡᠭᠡᠷᠡᠬᠢ ᠠᠷᠪᠠᠨ ᠭᠤᠷᠪᠠᠨ ᠰᠠᠬᠢᠭᠤᠯᠰᠤᠨ ᠤ ᠨᠡᠷᠡ ᠶᠢ ᠦᠵᠡᠪᠡᠯ ᠬᠤᠭᠤᠷᠣᠨᠳᠤ ᠪᠠᠨ ᠬᠤᠳᠬᠤᠯᠳᠤᠵᠤ ᠪᠠᠶᠢᠬᠤ ᠰᠢᠭ᠋ ᠰᠠᠨᠠᠭᠳᠠᠬᠤ ᠪᠣᠯᠪᠠᠴᠤ ᠨᠠᠷᠢᠨ ᠲᠤᠩᠭᠠᠵᠤ ᠦᠵᠡᠪᠡᠯ ᠡᠳ᠋ ᠤᠨ ᠰᠠᠬᠢᠭᠤᠯᠰᠤᠨ ᠪᠣᠯᠣᠨ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠰᠠᠬᠢᠭᠤᠯᠰᠤᠨ ᠂ ᠪᠠᠶᠢᠭᠠᠯᠢ ᠶᠢᠨ ᠦᠵᠡᠭᠳᠡᠯ ᠤᠨ ᠰᠠᠬᠢᠭᠤᠯᠰᠤᠨ ᠂ ᠴᠡᠷᠢᠭ ᠳᠠᠶᠢᠨ ᠤ ᠰᠠᠬᠢᠭᠤᠯᠰᠤᠨ ᠵᠡᠷᠭᠡ ᠳᠥᠷᠪᠡᠨ ᠵᠦᠢᠯ ᠳᠤ ᠠᠩᠭᠢᠯᠠᠵᠤ ᠪᠣᠯᠬᠤ ᠪᠥᠭᠡᠳ ᠲᠡᠷᠡ ᠨᠢ ᠲᠤᠰ ᠲᠤᠰ ᠵᠢᠷᠭᠤᠭᠠᠨ ᠣᠪᠣᠭᠠ ᠂ ᠭᠤᠷᠪᠠᠨ ᠣᠪᠣᠭᠠ ᠂ ᠭᠤᠷᠪᠠᠨ ᠣᠪᠣᠭᠠ ᠶᠢ ᠲᠥᠯᠥᠭᠡᠯᠡᠭᠰᠡᠨ ᠪᠠᠶᠢᠵᠤ ᠦᠯᠡᠳᠡᠭᠰᠡᠨ ᠨᠢᠭᠡ ᠨᠢ ᠭᠠᠵᠠᠷ ᠤᠨ ᠰᠠᠬᠢᠭᠤᠯᠰᠤᠨ ᠪᠣᠯᠬᠤᠷ ᠲᠡᠷᠡ ᠨᠢ ᠪᠠᠷᠤᠭ ᠭᠤᠣᠯ ᠣᠪᠣᠭᠠ ᠶᠢ ᠵᠢᠭᠠᠵᠤ ᠪᠠᠶᠢᠬᠤ ᠶᠤᠮ᠃ ᠪᠤᠰᠤᠳ ᠠᠷᠪᠠᠨ ᠬᠤᠶᠠᠷ ᠣᠪᠣᠭᠠ ᠨᠢ ᠭᠠᠵᠠᠷ ᠨᠤᠲᠤᠭ ᠲᠤ ᠨᠥᠯᠥᠭᠡ ᠦᠵᠡᠭᠦᠯᠳᠡᠭ ᠪᠠᠶᠢᠭᠠᠯᠢ ᠶᠢᠨ ᠬᠦᠴᠦᠨ ᠂ ᠭᠠᠵᠠᠷ ᠨᠤᠲᠤᠭ ᠳᠡᠭᠡᠷᠡ ᠦᠷᠡᠵᠢᠨ ᠲᠥᠯᠵᠢᠳᠡᠭ ᠮᠠᠯ ᠬᠥᠷᠥᠩᠭᠡ ᠪᠣᠯᠣᠨ ᠨᠤᠲᠤᠭ ᠢ ᠬᠠᠮᠠᠭᠠᠯᠠᠳᠠᠭ ᠡᠵᠡᠳ ᠰᠠᠬᠢᠭᠤᠯᠰᠤᠨ ᠤ ᠬᠤᠪᠢ ᠪᠠᠷ ᠲᠠᠨᠢᠯᠲᠠ ᠣᠶᠢᠯᠠᠭᠠᠯᠲᠠ ᠶᠢᠨ ᠲᠠᠯᠠ ᠪᠠᠷ ᠨᠢᠭᠡᠳᠴᠦ ᠪᠠᠶᠢᠨᠠ ᠭᠡᠵᠤ ᠦᠵᠡᠵᠦ ᠪᠣᠯᠣᠨᠠ︾ ﹇7﹈ ᠭᠡᠵᠦ ᠲᠠᠶᠢᠯᠪᠤᠷᠢᠯᠠᠪᠠ ᠃
ᠣᠪᠣᠭᠠ ᠨᠤᠭᠤᠳ ᠤᠨ ᠱᠠᠪᠢ ᠣᠪᠣᠭᠠᠨ ᠤ ᠲᠤᠭᠠ ᠨᠢ ᠬᠠᠷᠢᠯᠴᠠᠨ ᠠᠳᠠᠯᠢ ᠦᠭᠡᠢ ᠪᠠᠶᠢᠳᠠᠭ ᠃ ᠱᠠᠪᠢ ᠣᠪᠣᠭᠠ ᠶᠢ ᠴᠣᠬᠤᠮ ᠶᠠᠭᠤᠨ ᠤ ᠲᠥᠯᠥᠭᠡ ᠶᠠᠮᠠᠷ ᠤᠳᠬᠠ ᠠᠭᠤᠯᠭᠠ ᠂ ᠶᠠᠮᠠᠷ ᠵᠣᠷᠢᠯᠭᠠ ᠲᠠᠢ ᠪᠠᠷ ᠪᠣᠰᠬᠠᠭᠰᠠᠨ ᠲᠤᠬᠠᠢ ᠲᠣᠳᠣᠷᠬᠠᠢ ᠲᠠᠶᠢᠯᠪᠤᠷᠢ ᠬᠠᠷᠠᠬᠠᠨ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠠᠶᠢᠭᠰᠠᠭᠠᠷ ᠪᠠᠶᠢᠨᠠ ᠃ ᠰᠢᠯᠢ ᠶᠢᠨ ᠬᠤᠲᠠ ᠶᠢᠨ ᠡᠷᠳᠡᠨᠢ ᠣᠪᠣᠭᠠ ᠪᠣᠯ ᠤᠤᠯ ᠤᠨ ᠵᠡᠭᠦᠨ ᠠᠪᠠᠭ᠋ᠠᠨᠠᠷ ᠤᠨ ᠬᠤᠰᠢᠭᠤ ᠣᠪᠣᠭᠠ ᠪᠣᠯᠬᠤ ᠮᠥᠷᠲᠡᠭᠡᠨ ᠪᠠᠨᠳᠢᠳᠠ ᠭᠡᠭᠡᠨ ᠰᠦᠮᠡ ᠶᠢᠨ ᠣᠪᠣᠭᠠ ᠪᠣᠯᠬᠤ ᠶᠤᠮ ᠃ ᠡᠷᠳᠡᠨᠢ ᠣᠪᠣᠭᠠᠨ ᠤ ᠵᠡᠭᠦᠨ ᠪᠠᠷᠠᠭᠤᠨ ᠬᠤᠶᠠᠷ ᠲᠠᠯᠠ ᠳᠤ ᠵᠢᠷᠭᠤᠭᠠ ᠵᠢᠷᠭᠤᠭᠠ ᠨᠡᠶᠢᠲᠡ ᠠᠷᠪᠠᠨ ᠬᠤᠶᠠᠷ ᠱᠠᠪᠢ ᠣᠪᠣᠭᠠ ᠪᠠᠶᠢᠳᠠᠭ ᠃ ᠭᠤᠣᠯ ᠣᠪᠣᠭᠠ ᠪᠣᠯᠣᠨ ᠱᠠᠪᠢ ᠣᠪᠣᠭᠠᠨ ᠤ ᠲᠤᠬᠠᠢ ᠭᠡᠪᠡᠯ ︽ᠭᠤᠣᠯ ᠣᠪᠣᠭᠠ ᠨᠢ ᠬᠤᠰᠢᠭᠤ ᠪᠠᠨ ᠲᠥᠯᠥᠭᠡᠯᠡᠵᠦ ᠪᠤᠰᠤᠳ ᠱᠠᠪᠢ ᠣᠪᠣᠭᠠ ᠨᠢ ᠤᠤᠯ ᠤᠨ ᠵᠡᠭᠦᠨ ᠠᠪᠠᠭ᠋ᠠᠨᠠᠷ ᠤᠨ ᠬᠤᠰᠢᠭᠤᠨ ᠤ ᠠᠷᠪᠠᠨ ᠬᠤᠶᠠᠷ ᠰᠤᠮᠤ ᠶᠢ ᠲᠥᠯᠥᠭᠡᠯᠡᠵᠦ ᠪᠠᠶᠢᠳᠠᠭ ᠭᠡᠳᠡᠭ ᠃ ᠲᠡᠷᠡ ᠨᠢ ᠵᠡᠭᠦᠨ ᠲᠠᠯᠠ ᠠᠴᠠ ᠪᠠᠨ ᠡᠬᠢᠯᠡᠨ ᠲᠤᠰ ᠲᠤᠰ① ᠪᠠᠭᠠ ᠭᠤᠣᠯ ᠰᠤᠮᠤᠨ ᠤ ᠣᠪᠣᠭᠠ ᠂② ᠶᠡᠭᠡ ᠭᠤᠣᠯ ᠰᠤᠮᠤᠨ ᠤ ᠣᠪᠣᠭᠠ ᠂ ③ᠪᠠᠶᠠᠨ ᠬᠦᠷᠢᠶᠡ ᠪᠠᠷᠠᠭᠤᠨ ᠰᠤᠮᠤᠨ ᠤ ᠣᠪᠣᠭᠠ ᠂ ④ᠪᠠᠶᠠᠨ ᠬᠦᠷᠢᠶᠡ ᠵᠡᠭᠦᠨ ᠰᠤᠮᠤᠨ ᠤ ᠣᠪᠣᠭᠠ ᠂⑤ ᠶᠠᠷᠢᠨᠠᠢ ᠵᠢᠰᠠ ᠶᠢᠨ ᠣᠪᠣᠭᠠ ᠂⑥ ᠭᠡᠭᠡᠨ ᠰᠠᠩ ᠤᠨ ᠣᠪᠣᠭᠠ ᠂⑦ ᠭᠤᠣᠯ ᠬᠤᠰᠢᠭᠤ ᠣᠪᠣᠭᠠ ᠂⑧ ᠴᠣᠶᠢᠷ ᠵᠢᠰᠠ ᠶᠢᠨ ᠣᠪᠣᠭᠠ ᠂⑨ ᠬᠤᠸᠠᠭᠤᠳ ᠪᠠᠷᠠᠭᠤᠨ ᠰᠤᠮᠤᠨ ᠤ ᠣᠪᠣᠭᠠ ᠂⑩ ᠬᠤᠸᠠᠭᠤᠳ ᠵᠡᠭᠦᠨ ᠰᠤᠮᠤᠨ ᠤ ᠣᠪᠣᠭᠠ ᠂⑪ ᠠᠷᠤᠭᠤᠯ ᠰᠤᠮᠤᠨ ᠤ ᠣᠪᠣᠭᠠ ᠂ ⑫ᠲᠠᠶᠢᠵᠢ ᠨᠠᠷ ᠰᠤᠮᠤᠨ ᠤ ᠣᠪᠣᠭᠠ᠂⑬ ᠴᠣᠬᠤᠷ ᠰᠤᠮᠤᠨ ᠤ ᠣᠪᠣᠭᠠ ᠪᠣᠯᠣᠨᠠ ᠃ ᠡᠷᠳᠡᠨᠢ ᠣᠪᠣᠭᠠ ᠶᠢ ᠤᠤᠯ ᠨᠢ ᠵᠢᠰᠠ ᠪᠠ ᠰᠤᠮᠤᠨ ᠠᠴᠠ ᠬᠠᠮᠢᠶᠠᠷᠴᠤ ᠰᠡᠯᠪᠢᠨ ᠵᠠᠰᠠᠵᠤ ᠳᠠᠬᠢᠳᠠᠭ ᠪᠠᠶᠢᠨᠠ ᠃ ᠡᠷᠳᠡᠨᠢ ᠣᠪᠣᠭᠠ ᠨᠢ ᠬᠤᠰᠢᠭᠤ ᠣᠪᠣᠭᠠ ᠪᠣᠯᠣᠭᠠᠳ ᠬᠤᠶᠠᠷ ᠵᠠᠭᠤ ᠭᠠᠷᠤᠢ ᠵᠢᠯ ᠪᠣᠯᠵᠤ ᠪᠠᠶᠢᠨᠠ︾ ﹇8﹈ ᠭᠡᠵᠤ ᠲᠡᠮᠳᠡᠭᠯᠡᠵᠦ ᠪᠠᠶᠢᠨᠠ ᠃ ᠡᠷᠳᠡᠨᠢ ᠣᠪᠣᠭᠠ ᠶᠢᠨ ᠵᠢᠱᠢᠶᠡ ᠠᠴᠠ ᠦᠵᠡᠪᠡᠯ ᠱᠠᠪᠢ ᠣᠪᠣᠭᠠ ᠨᠢ ᠣᠷᠣᠨ ᠨᠤᠲᠤᠭ ᠤᠨ ᠬᠠᠮᠲᠤᠯᠢᠭ ᠢᠶᠠᠨ ᠲᠥᠯᠥᠭᠡᠯᠡᠭᠰᠡᠨ ᠵᠣᠷᠢᠯᠭᠠ ᠲᠠᠢ ᠪᠠᠶᠢᠬᠤ ᠨᠢ ᠲᠣᠳᠣᠷᠬᠠᠢ ᠪᠠᠶᠢᠨᠠ ᠃ ︽ᠣᠪᠣᠭᠠᠨ ᠤ ᠲᠤᠭᠠ ᠨᠢ ᠬᠠᠮᠲᠤᠯᠢᠭ ᠤᠨ ᠪᠠᠶᠢᠭᠤᠯᠤᠮᠵᠢ ᠶᠢᠨ ᠲᠤᠭᠠ ᠲᠠᠢ ᠲᠡᠩᠴᠡᠭᠦᠦ ᠪᠠᠶᠢᠳᠠᠭ ᠲᠣᠬᠢᠶᠠᠯᠳᠤᠯ ᠪᠣᠢ︾ ﹇9﹈ ᠃ ︽ᠦᠦᠰᠢᠨᠴᠤᠳ ᠤᠨ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠ ᠪᠣᠯ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭ ᠠᠶᠢᠮᠠᠭ ᠬᠠᠷᠢᠶᠠ ᠪᠠᠷ ᠲᠤᠭ ᠰᠦᠯᠳᠡ ᠪᠠᠨ ᠳᠠᠬᠢᠵᠤ ᠪᠠᠶᠢᠬᠤ ᠰᠢᠤᠬᠠᠨ ᠪᠠᠶᠢᠳᠠᠭ︾ ﹇10﹈ ᠃ ᠳᠡᠭᠡᠷᠡᠬᠢ ᠥᠭᠦᠯᠡᠮᠵᠢ ᠨᠦᠭᠦᠳ ᠠᠴᠠ ᠦᠵᠡᠪᠡᠯ ᠱᠠᠪᠢ ᠣᠪᠣᠭᠠᠨ ᠤ ᠲᠤᠭᠠ ᠨᠢ ᠰᠤᠮᠤ ᠭᠠᠴᠠᠭᠠ ᠪᠤᠶᠤ ᠲᠤᠬᠠᠢ ᠶᠢᠨ ᠣᠪᠣᠭᠠ ᠶᠢ ᠲᠠᠬᠢᠳᠠᠭ ᠣᠪᠣᠭ ᠠᠶᠢᠮᠠᠭ ᠢ ᠲᠥᠯᠥᠭᠡᠯᠡᠵᠦ ᠪᠠᠶᠢᠳᠠᠭ ᠨᠢ ᠱᠠᠪᠢ ᠣᠪᠣᠭᠠᠨ ᠤ ᠤᠳᠬᠠ ᠠᠭᠤᠯᠭᠠ ᠶᠢᠨ ᠨᠢᠭᠡ ᠭᠡᠵᠤ ᠣᠶᠢᠯᠠᠭᠠᠵᠤ ᠪᠣᠯᠬᠤ ᠶᠤᠮ ᠃ ᠡᠨᠡ ᠨᠢ ᠡᠷᠲᠡᠨ ᠤ ᠦᠶᠡ ᠳᠤ ᠣᠪᠣᠭᠠ ᠶᠢ ᠣᠪᠣᠭ ᠠᠶᠢᠮᠠᠭ ᠢᠶᠠᠷ ᠳᠠᠬᠢᠵᠤ ᠪᠠᠶᠢᠭᠰᠠᠨ ᠲᠠᠢ ᠬᠤᠯᠪᠣᠭᠠ ᠲᠠᠢ ᠪᠠᠶᠢᠵᠤ ᠮᠡᠳᠡᠬᠦ ᠪᠥᠭᠡᠳ ᠣᠪᠣᠭᠠᠨ ᠤ ᠡᠭᠦᠷᠭᠡᠴᠢᠯᠠᠯ ᠪᠠ ᠴᠢᠳᠠᠮᠵᠢ ᠶᠢ ᠴᠢᠨᠠᠭᠰᠢᠳᠠ ᠰᠦᠪᠡᠭᠴᠢᠯᠡᠬᠦ ᠳᠤ ᠲᠤᠰᠠᠯᠠᠮᠵᠢ ᠪᠣᠯᠬᠤ ᠶᠤᠮ ᠃
ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠᠨ ᠤ ᠲᠤᠬᠠᠢ ᠮᠣᠩᠭᠤᠯᠴᠢ ᠡᠷᠳᠡᠮᠲᠡᠳ ᠲᠤ ᠭᠡᠰᠡᠨ ᠶᠠᠩᠵᠤ ᠪᠦᠷᠢ ᠶᠢᠨ ᠲᠠᠶᠢᠯᠪᠤᠷᠢ ᠬᠢᠵᠦ ᠢᠷᠡᠭᠰᠡᠨ ᠶᠤᠮ ᠃ ᠡᠭᠦᠨ ᠳᠤ ᠠᠷᠪᠠᠨ ᠭᠤᠷᠪᠠᠨ ᠲᠡᠭᠷᠢ ᠪᠣᠯᠣᠨ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠ ᠶᠢ ᠬᠠᠷᠢᠴᠠᠭᠤᠯᠵᠤ ᠦᠵᠡᠳᠡᠭ ᠥᠭᠦᠯᠡᠮᠵᠢ ᠨᠢ ᠨᠡᠯᠢᠶᠡᠳ ᠰᠣᠨᠢᠷᠬᠠᠯ ᠲᠠᠢ ᠶᠤᠮ ᠃ ᠠᠷᠪᠠᠨ ᠭᠤᠷᠪᠠᠨ ᠲᠡᠭᠷᠢ ᠶᠢᠨ ᠲᠤᠬᠠᠢ ᠯ᠊ ᠂ ᠬᠤᠷᠴᠠᠪᠠᠭᠠᠲᠤᠷ ᠠᠴᠠ ︽ᠮᠣᠩᠭᠤᠯᠴᠤᠳ ᠡᠷᠲᠡᠨ ᠠᠴᠠ ᠠᠪᠤᠭᠠᠳ ᠠᠷᠪᠠᠨ ᠭᠤᠷᠪᠠᠨ ᠲᠡᠭᠷᠢ ᠶᠢ ᠳᠠᠬᠢᠳᠠᠭ ᠤᠯᠠᠮᠵᠢᠯᠠᠯ ᠲᠠᠢ ᠶᠤᠮ ᠃ ᠡᠶᠢᠮᠦ ᠠᠴᠠ ᠠᠵᠤ ᠠᠮᠢᠳᠤᠷᠠᠯ ᠂ ᠠᠩ ᠬᠤᠮᠣᠷᠭᠠ ᠂ ᠠᠶᠠᠨ ᠳᠠᠶᠢᠨ ᠤ ᠠᠯᠢ ᠪᠦᠬᠦᠨ ᠳᠤ ᠠᠷᠪᠠᠨ ᠭᠤᠷᠪᠠᠨ ᠲᠡᠭᠷᠢ ᠢᠪᠡᠭᠡᠪᠡᠯ ᠶᠠᠭᠤ ᠴᠦ ᠭᠡᠳ ᠳᠡᠶᠢᠯᠳᠡᠭ ᠦᠭᠡᠢ ᠶᠤᠮ ᠭᠡᠨᠡ ᠃ ᠡᠨᠡ ᠠᠷᠪᠠᠨ ᠭᠤᠷᠪᠠᠨ ᠲᠡᠭᠷᠢ ᠪᠣᠯ ᠳᠥᠷᠪᠡᠨ ᠵᠦᠭ ᠨᠠᠢᠮᠠᠨ ᠵᠣᠪᠬᠢᠰ ᠲᠤ ᠨᠠᠢᠮᠠᠨ ᠲᠡᠭᠷᠢ ᠰᠠᠭᠠᠲᠠᠵᠤ ᠪᠣᠢ ᠂ ᠳᠡᠭᠡᠷᠡ ᠨᠢ ᠨᠢᠭᠡ ᠂ ᠳᠣᠣᠷᠠ ᠨᠢ ᠨᠢᠭᠡ ᠨᠡᠶᠢᠯᠡᠭᠡᠳ ᠠᠷᠪᠠᠨ ᠵᠦᠭ ᠤᠨ ᠲᠡᠭᠷᠢ ᠪᠣᠯᠳᠠᠭ ᠃ ᠴᠠᠭ ᠤᠨ ᠲᠠᠯᠠ ᠪᠠᠷ ᠥᠩᠭᠡᠷᠡᠭᠰᠡᠨ ᠂ ᠣᠳᠣ ᠂ ᠢᠷᠡᠭᠡᠳᠦᠢ ᠭᠤᠷᠪᠠᠨ ᠴᠠᠭ ᠢ ᠡᠵᠡᠯᠡᠵᠦ ᠪᠠᠶᠢᠳᠠᠭ ᠭᠤᠷᠪᠠᠨ ᠲᠡᠭᠷᠢ ᠪᠣᠢ ᠂ ᠨᠡᠶᠢᠯᠡᠭᠡᠳ ᠠᠷᠪᠠᠨ ᠭᠤᠷᠪᠠᠨ ᠲᠡᠭᠷᠢ ᠪᠣᠯᠣᠨᠠ︾ ﹇11﹈ ᠭᠡᠵᠤ ᠲᠠᠶᠢᠯᠪᠤᠷᠢᠯᠠᠭᠰᠠᠨ ᠪᠠᠶᠢᠨᠠ ᠃ ᠯ᠊ ᠂ ᠬᠤᠷᠴᠠᠪᠠᠭᠠᠲᠤᠷ ᠤᠨ ᠳᠡᠭᠡᠷᠡᠬᠢ ᠲᠠᠶᠢᠯᠤᠮᠵᠢ ᠪᠣᠯ ᠣᠷᠳᠣᠰ ᠨᠤᠲᠤᠭ ᠢᠶᠠᠷ ᠬᠡᠭᠡᠷᠡ ᠶᠢᠨ ᠰᠢᠨᠵᠢᠯᠡᠭᠡᠨ ᠬᠢᠬᠦ ᠳᠤᠮᠳᠠ ᠪᠠᠨ ᠨᠠᠰᠤᠲᠠᠨ ᠪᠤᠭᠤᠷᠤᠯᠴᠤᠳ ᠢ ᠰᠤᠷᠪᠤᠯᠵᠢᠯᠠᠭᠰᠠᠨ ᠰᠤᠷᠪᠤᠯᠵᠢᠯᠠᠭᠠ ᠪᠣᠯᠣᠨ ᠮᠣᠩᠭᠤᠯ ᠤᠨ ᠪᠥᠭᠡ ᠮᠥᠷᠭᠦᠯ ᠤᠨ ᠲᠡᠭᠷᠢ ᠲᠠᠬᠢᠯᠭᠠ ᠲᠠᠢ ᠤᠶᠠᠯᠳᠤᠭᠤᠯᠤᠨ ᠲᠠᠶᠢᠯᠪᠤᠷᠢᠯᠠᠭᠰᠠᠨ ᠦᠵᠡᠯᠲᠡ ᠪᠣᠯᠬᠤᠷ ᠠᠷᠪᠠᠨ ᠭᠤᠷᠪᠠᠨ ᠲᠡᠭᠷᠢ ᠪᠣᠯᠣᠨ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠᠨ ᠤ ᠬᠠᠷᠢᠴᠠᠭᠠ ᠶᠢ ᠣᠶᠢᠯᠠᠭᠠᠬᠤ ᠳᠤ ᠯᠠᠪᠯᠠᠯᠲᠠ ᠪᠣᠯᠬᠤ ᠶᠤᠮ ᠃ ᠡᠨᠡ ᠲᠠᠯᠠ ᠪᠠᠷ ᠮᠣᠩᠭᠤᠯ ᠤᠯᠤᠰ ᠤᠨ ᠤᠭᠰᠠᠭᠠᠲᠠᠨ ᠤ ᠰᠤᠳᠤᠯᠤᠭᠠᠴᠢ ᠰ᠊ ᠂ ᠳᠤᠯᠮᠠ ᠪᠠᠷ ︽ᠳᠠᠷᠬᠠᠳ ᠪᠥᠭᠡ ᠨᠠᠷ ᠤᠨ ᠦᠵᠡᠯ ᠢᠶᠠᠷ ᠪᠣᠯ ︿ᠣᠪᠣᠭᠠ﹀ ᠭᠡᠳᠡᠭ ᠨᠢ ᠬᠠᠶᠢᠷᠬᠠᠨ ᠂ ᠣᠩᠭᠤᠳ ᠤᠨ ᠳᠠᠮᠵᠢᠯᠭᠠ ᠂ ᠭᠦᠶᠦᠴᠡ ᠂ ᠪᠠᠭᠤᠳᠠᠭ ᠭᠠᠵᠠᠷ ᠨᠢ ᠡᠷᠭᠢᠵᠦ ᠲᠣᠭᠤᠷᠢᠳᠠᠭ ︿ᠲᠡᠭᠷᠢ ᠯᠤᠤᠰ ᠤᠨ ᠣᠷᠣᠮᠵᠢ﹀ ᠪᠣᠯᠳᠠᠭ ᠃ ᠴᠢᠩᠭᠢᠪᠡᠯ ᠡᠨᠡ ︿ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠ﹀ ᠨᠢ ᠲᠡᠭᠷᠢ ᠯᠤᠤᠰ ᠤᠨ ᠠᠷᠪᠠᠨ ᠭᠤᠷᠪᠠᠨ ᠣᠷᠣᠮᠵᠢ ᠭᠡᠰᠡᠨ ᠦᠭᠡ ᠃ ᠡᠶᠢᠮᠦ ᠳᠤ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠ ᠪᠣᠰᠬᠠᠬᠤ ᠂ ᠠᠷᠪᠠᠨ ᠭᠤᠷᠪᠠᠨ ᠰᠠᠩ ᠲᠠᠯᠪᠢᠬᠤ ᠵᠡᠷᠭᠡ ᠨᠢ ᠡᠷᠲᠡᠨ ᠤ ᠳᠣᠮᠤᠭ ᠵᠦᠢ ᠂ ᠪᠥᠭᠡ ᠮᠥᠷᠭᠦᠯ ᠤᠨ ᠠᠲᠠᠭᠠ ᠲᠡᠭᠷᠢ ᠶᠢ ᠰᠢᠲᠦᠬᠦ ᠶᠣᠰᠣ ᠲᠠᠢ ᠶᠠᠭᠤᠲᠠᠢ ᠴᠦ ᠭᠡᠰᠡᠨ ᠲᠣᠭᠠᠨ ᠤ ᠪᠡᠯᠭᠡᠳᠡᠯ ᠤᠨ ᠬᠤᠪᠢ ᠳᠤ ᠤᠯᠪᠠᠭᠠ ᠨᠢᠭᠡᠲᠡᠢ ᠬᠡᠮᠡᠨ ᠬᠡᠯᠡᠮᠡᠷ ᠪᠠᠶᠢᠨᠠ ᠃ ᠲᠣᠭᠠᠨ ᠤ ᠪᠡᠯᠭᠡᠳᠡᠯ ᠤᠨ ᠬᠤᠪᠢ ᠳᠤ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠ ︵ᠶᠠᠨᠳᠠᠷ︶ ᠭᠡᠳᠡᠭ ᠪᠣᠯ ᠳᠡᠭᠡᠳᠦ ᠂ ᠳᠤᠮᠳᠠ ᠂ ᠳᠣᠣᠷᠠᠳᠤ ᠭᠤᠷᠪᠠᠨ ᠶᠢᠷᠲᠢᠨᠴᠦ ᠶᠢᠨ ᠬᠤᠣᠰᠯᠠᠮᠠᠯ ᠵᠠᠭᠪᠤᠷ ᠪᠥᠭᠡᠳ ᠲᠣᠭᠠᠨ ᠤ ᠪᠡᠯᠭᠡᠳᠡᠯ ᠤᠨ ᠴᠣᠭᠴᠠᠯᠠᠪᠤᠷᠢ ᠶᠢᠨ ᠭᠠᠵᠠᠷ ᠳᠡᠯᠡᠬᠡᠢ ᠳᠡᠭᠡᠷᠡᠬᠢ ᠪᠡᠶᠡᠲᠡᠢ ᠪᠣᠳᠠᠲᠠᠢ ᠲᠥᠯᠥᠭᠡᠯᠡᠯ ᠳᠦᠷᠰᠦ ᠮᠥᠨ︾ ﹇12﹈ ᠭᠡᠵᠤ ᠂ ᠠᠷᠪᠠᠨ ᠭᠤᠷᠪᠠᠨ ᠲᠡᠭᠷᠢ ᠂ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠ ᠶᠢ ᠪᠡᠯᠭᠡᠳᠡᠯ ᠵᠦᠢ ᠶᠢᠨ ᠡᠭᠦᠳᠡᠨ ᠠᠴᠠ ᠲᠠᠶᠢᠯᠪᠤᠷᠢᠯᠠᠭᠰᠠᠨ ᠪᠠᠶᠢᠨᠠ ᠃ ᠰ᠊ ᠂ ᠳᠤᠯᠮᠠ ᠶᠢᠨ ᠳᠤᠷᠠᠳᠤᠭᠰᠠᠨ ︽ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠ ᠪᠣᠯ ᠲᠡᠭᠷᠢ ᠯᠤᠤᠰ ᠤᠨ ᠠᠷᠪᠠᠨ ᠭᠤᠷᠪᠠᠨ ᠣᠷᠣᠮᠵᠢ︾ ᠭᠡᠰᠡᠨ ᠲᠠᠶᠢᠯᠪᠤᠷᠢ ᠨᠢ ᠣᠪᠣᠭᠠᠨ ᠤ ᠮᠥᠨ ᠴᠢᠨᠠᠷ ᠡᠭᠦᠷᠭᠡ ᠵᠣᠷᠢᠯᠭᠠ ᠶᠢ ᠰᠤᠳᠤᠯᠬᠤ ᠳᠤ ᠯᠠᠪᠯᠠᠭᠤᠰᠢᠲᠠᠢ ᠦᠵᠡᠯᠲᠡ ᠪᠣᠯᠬᠤ ᠨᠢ ᠳᠠᠮᠵᠢᠭ ᠦᠭᠡᠢ ᠶᠤᠮ ᠃ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠᠨ ᠤ ᠳᠣᠮᠤᠭ ᠲᠤᠤᠯᠢᠰ ᠲᠠᠬᠢ ᠥᠭᠦᠯᠡᠮᠵᠢ ᠶᠢᠨ ᠲᠤᠬᠠᠢ ᠰ᠊ ᠂ ᠳᠤᠯᠮᠠ ᠪᠠᠷ ︽ᠲᠤᠤᠯᠢᠰ ᠤᠨ ᠪᠠᠭᠠᠲᠤᠷ ᠤᠳ ᠠᠯᠤᠰ ᠬᠤᠯᠠ ᠶᠢᠨ ᠠᠶᠠᠨ ᠳᠤ ᠮᠣᠷᠳᠠᠬᠤ ᠦᠶᠡᠰ ᠬᠠᠷᠠᠭᠤᠯ ᠬᠠᠷᠠᠬᠤ ᠠᠭᠤᠯᠠᠨ ᠳᠡᠭᠡᠷᠡ ᠪᠠᠨ ᠭᠠᠷᠴᠤ ︿ᠠᠭᠢ ᠠᠷᠴᠠ ᠰᠢᠲᠠᠭᠠᠵᠤ ᠂ ᠠᠷᠪᠠᠨ ᠭᠤᠷᠪᠠᠨ ᠰᠠᠩ ᠢᠶᠠᠨ ᠲᠠᠯᠪᠢᠳᠠᠭ﹀ ᠃ ᠡᠨᠡ ᠶᠢᠷᠲᠢᠨᠴᠦ ᠶᠢᠨ ᠭᠤᠷᠪᠠᠨ ᠣᠷᠣᠨ ᠤ ᠡᠵᠡᠳ ᠢ ᠳᠠᠬᠢᠵᠤ ᠭᠤᠷᠢᠯ ᠬᠦᠰᠡᠯ ᠢᠶᠠᠨ ᠪᠦᠲᠦᠭᠡᠬᠦ ᠶᠢᠨ ᠲᠤᠯᠠᠳᠠ ᠠᠷᠴᠠᠲᠦ ᠬᠠᠩᠭᠠᠢ ᠠᠭᠤᠯᠠᠨ ᠤ ᠣᠷᠣᠢ ᠳᠤ ᠠᠯᠲᠠᠨ ᠮᠥᠩᠭᠦᠨ ᠰᠤᠪᠤᠷᠭᠠ ᠪᠣᠰᠬᠠᠵᠤ ᠂ ᠠᠷᠪᠠᠨ ᠭᠤᠷᠪᠠᠨ ᠶᠠᠨᠲᠠᠷ ᠪᠠᠷᠢᠵᠤ ᠂ ᠠᠷᠪᠠᠨ ᠭᠤᠷᠪᠠᠨ ᠰᠠᠩ ᠢᠶᠠᠨ ᠲᠠᠯᠪᠢᠬᠤ ᠤᠴᠢᠷᠲᠠᠢ ᠶᠤᠮ ᠪᠠᠶᠢᠨᠠ ᠃ ᠪᠦᠷ ᠲᠣᠪᠴᠢᠯᠠᠨ ᠬᠡᠯᠡᠪᠡᠯ ︿ᠠᠷᠪᠠᠨ ᠭᠤᠷᠪᠠ﹀ ᠭᠡᠳᠡᠭ ᠨᠢ ᠶᠢᠷᠲᠢᠨᠴᠦ ᠶᠢᠨ ᠡᠵᠡᠳ ᠢ ᠪᠠᠶᠠᠰᠬᠠᠬᠤ ᠠᠷᠢᠭᠤᠨ ᠳᠠᠬᠢᠯ ᠤᠨ ᠪᠡᠯᠭᠡᠳᠡᠯ ᠶᠤᠮ ᠪᠠᠶᠢᠨᠠ︾ ﹇13﹈ ᠭᠡᠵᠤ ᠲᠠᠶᠢᠯᠪᠤᠷᠢ ᠬᠢᠭᠰᠡᠨ ᠪᠠᠶᠢᠨᠠ ᠃
ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠ ᠪᠣᠯ ᠮᠣᠩᠭᠤᠯ ᠨᠤᠲᠤᠭ ᠲᠤ ᠣᠳᠣᠨ ᠮᠡᠲᠦ ᠲᠦᠭᠡᠭᠰᠡᠨ ᠣᠯᠠᠨ ᠣᠪᠣᠭᠠᠨ ᠤ ᠪᠦᠲᠦᠴᠡ ᠶᠢᠨ ᠳᠣᠲᠣᠷᠠᠬᠢ ᠨᠢᠭᠡᠨ ᠵᠦᠢᠯ ᠤᠨ ᠬᠡᠯᠪᠡᠷᠢ ᠶᠤᠮ ᠃ ᠮᠣᠩᠭᠤᠯ ᠨᠤᠲᠤᠭ ᠲᠤ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠ ᠠᠴᠠ ᠭᠠᠳᠠᠨᠠ ᠡᠳᠦᠢ ᠲᠡᠳᠦᠢ ᠲᠤᠭᠠ ᠪᠠᠷ ᠪᠦᠷᠢᠯᠳᠦᠭᠰᠡᠨ ᠶᠠᠩᠵᠤ ᠪᠦᠷᠢ ᠶᠢᠨ ᠣᠪᠣᠭᠠ ᠪᠠᠶᠢᠳᠠᠭ ᠃ ᠣᠪᠣᠭᠠᠨ ᠤ ᠲᠤᠭᠠ ᠶᠢ ᠨᠠᠷᠢᠨ ᠡᠮᠬᠢᠳᠬᠡᠵᠦ ᠬᠠᠷᠢᠴᠠᠭᠤᠯᠤᠨ ᠰᠤᠳᠤᠯᠵᠤ ᠠᠷᠠᠳ ᠤᠨ ᠤᠯᠠᠮᠵᠢᠯᠠᠯᠲᠤ ᠮᠡᠳᠡᠯᠭᠡ᠂ ᠣᠪᠣᠭᠠᠨ ᠳᠣᠮᠤᠭ ᠤᠨ ᠤᠯᠠᠮᠵᠢᠯᠠᠯ ᠵᠡᠷᠭᠡ ᠶᠠᠩᠵᠤ ᠪᠦᠷᠢ ᠶᠢᠨ ᠤᠤᠭᠠᠯ ᠰᠣᠶᠣᠯ ᠤᠨ ᠮᠡᠳᠡᠯᠭᠡ ᠶᠢᠨ ᠰᠠᠭᠤᠷᠢᠨ ᠳᠡᠭᠡᠷᠡ ᠲᠡᠭᠦᠨ ᠤ ᠵᠢᠮᠡ ᠶᠣᠰᠣ ᠪᠠ ᠤᠴᠢᠷ ᠤᠳᠬᠠ ᠶᠢ ᠣᠶᠢᠯᠠᠭᠠᠵᠤ ᠲᠠᠶᠢᠯᠪᠤᠷᠢᠯᠠᠬᠤ ᠶᠠᠪᠤᠳᠠᠯ ᠪᠣᠯ ᠣᠪᠣᠭᠠᠨ ᠰᠤᠳᠤᠯᠤᠯ ᠤᠨ ᠴᠢᠬᠤᠯᠠ ᠨᠢᠭᠡᠨ ᠠᠵᠢᠯᠯᠠᠭᠠ ᠪᠣᠯᠬᠤ ᠶᠤᠮ ᠃ ᠲᠣᠭᠠᠨ ᠤ ᠪᠡᠯᠭᠡᠳᠡᠯ ︵Numeral Symbolism︶ ᠪᠣᠯ ᠮᠣᠩᠭᠤᠯᠴᠤᠳ ᠤᠨ ᠪᠡᠯᠭᠡᠳᠡᠯ ᠤᠨ ᠰᠣᠶᠣᠯ ᠤᠨ ᠴᠢᠬᠤᠯᠠ ᠠᠭᠤᠯᠭᠠ ᠶᠢᠨ ᠨᠢᠭᠡ ᠶᠤᠮ ᠃ ᠱᠠᠪᠢ ᠣᠪᠣᠭᠠᠨ ᠤ ᠲᠤᠭᠠ ᠨᠢ ᠮᠣᠩᠭᠤᠯᠴᠤᠳ ᠤᠨ ᠲᠣᠭᠠᠨ ᠤ ᠪᠡᠯᠭᠡᠳᠡᠯ ᠤᠨ ᠰᠣᠶᠣᠯ ᠯᠤᠭᠠ ᠰᠢᠭᠤᠳ ᠬᠠᠷᠢᠴᠠᠭᠠ ᠦᠭᠡᠢ ᠰᠢᠭ ᠰᠠᠨᠠᠭᠳᠠᠬᠤ ᠪᠣᠯᠪᠠᠴᠤ ᠦᠨᠡᠨᠳᠡᠭᠡᠨ ᠪᠠᠶᠢᠭᠠᠯᠢ ᠶᠢᠨ ᠡᠵᠡᠳ ᠰᠠᠬᠢᠭᠤᠰᠤ ᠶᠢᠨ ᠪᠡᠯᠭᠡᠳᠡᠯ ᠤᠨ ᠬᠤᠪᠢ ᠪᠠᠷ ᠵᠣᠬᠢᠬᠤ ᠬᠠᠷᠢᠴᠠᠭᠠ ᠲᠠᠢ ᠶᠤᠮ ᠃ ᠱᠠᠪᠢ ᠣᠪᠣᠭᠠᠨ ᠤ ᠲᠤᠭᠠ ᠨᠢ ᠤᠮᠠᠷᠠᠲᠤ ᠶᠢᠨ ᠡᠷᠲᠡᠨ ᠤ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠤᠨ ᠡᠵᠡᠳ ᠰᠠᠬᠢᠭᠤᠰᠤ ᠰᠦᠨᠡᠰᠦ ᠰᠦᠯᠲᠠᠷ ᠤᠨ ᠲᠠᠬᠢᠯᠭᠠ ᠯᠤᠭᠠ ᠬᠤᠯᠪᠣᠭᠠ ᠲᠠᠢ ᠶᠤᠮ ᠃ ᠵᠢᠱᠢᠶᠡᠯᠡᠪᠡᠯ ᠂ 554 ᠣᠨ ᠳᠤ ᠵᠣᠬᠢᠶᠠᠭᠳᠠᠭᠰᠠᠨ ︽ᠸᠧᠢ ᠱᠤ᠋ ᠪᠢᠴᠢᠭ︾ ᠤᠨ ︿ᠳᠠᠪᠠᠭᠠᠴᠢ ᠶᠢᠨ ᠲᠠᠬᠢᠯᠭᠠ ᠶᠢᠨ ᠪᠦᠯᠦᠭ﹀ ᠲᠤ ︽ᠡᠵᠡᠨ ᠬᠠᠭᠠᠨ ᠲᠡᠭᠷᠢ ᠲᠠᠬᠢᠵᠤ ᠂ ᠠᠭᠤᠯᠠ ᠶᠢᠨ ᠰᠠᠪᠳᠠᠭ ᠲᠤᠷ ᠳᠠᠭᠠᠳᠬᠠᠬᠤᠢ ᠳᠤᠷ ᠥᠷᠥᠰᠢᠶᠡᠯ ᠢᠪᠡᠭᠡᠯ ᠢᠯᠡᠷᠬᠡᠢ ᠪᠣᠯᠣᠮᠤᠢ ᠃ ︵ᠲᠣᠪᠴᠢᠯᠠᠯ︶ ᠲᠠᠶᠢᠽᠦ ᠶᠢᠨ ᠥᠭᠡᠷᠡ ᠨᠢᠭᠡᠨ ᠣᠩᠭᠤᠨ ᠢ ᠣᠷᠳᠣᠨ ᠤ ᠳᠣᠲᠣᠷᠠ ᠪᠣᠰᠬᠠᠵᠤ ᠵᠢᠯ ᠳᠤᠷ ᠳᠥᠷᠪᠡ ᠤᠳᠠᠭᠠ ᠂ ᠦᠬᠡᠷ ᠂ ᠠᠳᠤᠭᠤ ᠂ ᠬᠤᠨᠢ ᠪᠠᠷ ᠲᠠᠬᠢᠯᠭᠠ ᠦᠢᠯᠡᠳᠬᠦ ᠪᠦᠯᠦᠭᠡ ᠃ ᠪᠠᠰᠠ ᠨᠠᠷᠠᠨ ᠰᠠᠬᠢᠭᠤᠰᠤ ᠶᠢ ᠲᠠᠬᠢᠮᠤᠢ ᠃ ᠡᠭᠦᠨ ᠠᠴᠠ ᠭᠠᠳᠠᠨᠠ 28 ᠱᠠᠪᠢ ᠣᠩᠭᠤᠨ ᠢ ᠮᠥᠨ ᠣᠷᠳᠣᠨ ᠳᠣᠲᠣᠷᠠ ᠪᠣᠰᠬᠠᠵᠤ ᠂ ᠵᠢᠯ ᠳᠤ 1 ᠤᠳᠠᠭᠠ ᠲᠣᠰᠪᠤᠷᠢ ᠶᠢ 1 ᠲᠣᠯᠣᠭᠠᠢ ᠬᠤᠨᠢ ᠪᠠᠷ ᠲᠠᠬᠢᠮᠤᠢ︾ ︵ᠬᠦᠰᠦᠨᠦᠭᠲᠦ ﹇3﹈ ᠂ ᠵᠡᠭᠦᠯᠲᠡ ﹇23﹈ ᠶᠢ ᠯᠠᠪᠯᠠ︶ ᠭᠡᠵᠤ ᠲᠡᠮᠳᠡᠭᠯᠡᠵᠦ ᠪᠠᠶᠢᠬᠤ ᠠᠴᠠ ᠦᠵᠡᠪᠡᠯ ᠂ ᠡᠷᠲᠡᠨ ᠤ ᠦᠶᠡᠰ ᠤᠮᠠᠷᠠᠲᠤ ᠶᠢᠨ ᠡᠷᠲᠡᠨ ᠤ ᠬᠠᠭᠠᠳ ᠲᠣᠳᠣᠷᠬᠠᠢ ᠡᠵᠡᠳ ᠰᠠᠬᠢᠭᠤᠰᠤ ᠶᠢ ᠲᠠᠬᠢᠬᠤ ᠵᠣᠷᠢᠯᠭᠠ ᠠᠴᠠ ᠲᠣᠳᠣᠷᠬᠠᠢ ᠲᠣᠭᠠᠨ ᠤ ᠣᠩᠭᠤᠳ ᠪᠣᠰᠬᠠᠵᠤ ᠳᠠᠬᠢᠵᠤ ᠲᠠᠪᠢᠭᠯᠠᠵᠤ ᠪᠠᠶᠢᠭᠰᠠᠨ ᠨᠢ ᠲᠣᠳᠣᠷᠬᠠᠢ ᠪᠠᠶᠢᠨᠠ ᠃
ᠱᠠᠪᠢ ᠣᠪᠣᠭᠠ ᠶᠢ ᠨᠢ ᠲᠡᠭᠰᠢ ᠲᠤᠭᠠ ᠪᠠᠷ ᠪᠣᠰᠬᠠᠭᠰᠠᠨ ᠣᠪᠣᠭᠠ 24 ᠪᠠᠶᠢᠵᠤ ᠂ ᠰᠣᠨᠳᠣᠭᠤᠢ ᠲᠤᠭᠠ ᠪᠠᠷ ᠪᠣᠰᠬᠠᠭᠰᠠᠨ ᠣᠪᠣᠭᠠ 7 ᠪᠠᠶᠢᠨᠠ ᠃ ᠡᠯᠡ ᠰᠦᠷᠦᠭ ᠣᠪᠣᠭᠠᠨ ᠤ ᠱᠠᠪᠢ ᠣᠪᠣᠭᠠ ᠶᠢ ᠬᠠᠷᠢᠴᠠᠭᠤᠯᠬᠤ ᠶᠠᠪᠤᠴᠠ ᠳᠤᠮᠳᠠ ᠳᠣᠣᠷᠠᠬᠢ ᠮᠡᠲᠦ ᠣᠨᠴᠠᠯᠢᠭ ᠤᠳ ᠬᠠᠷᠠᠭᠳᠠᠨᠠ ᠃ ᠳᠠᠷᠤᠢ ᠂ 1 ᠱᠠᠪᠢ ᠣᠪᠣᠭᠠ ᠲᠠᠢ ᠣᠪᠣᠭᠠ 3 ᠂ 6 ᠱᠠᠪᠢ ᠣᠪᠣᠭᠠ ᠲᠠᠢ ᠣᠪᠣᠭᠠ 3 ᠂ 8 ᠱᠠᠪᠢ ᠣᠪᠣᠭᠠ ᠲᠠᠢ ᠣᠪᠣᠭᠠ 2 ᠂ 9 ᠱᠠᠪᠢ ᠣᠪᠣᠭᠠ ᠲᠠᠢ ᠣᠪᠣᠭᠠ 1 ᠂ 10 ᠱᠠᠪᠢ ᠣᠪᠣᠭᠠ ᠲᠠᠢ ᠣᠪᠣᠭᠠ 3 ᠂ 12 ᠱᠠᠪᠢ ᠣᠪᠣᠭᠠ ᠲᠠᠢ ᠣᠪᠣᠭᠠ 13 ᠂ 14 ᠱᠠᠪᠢ ᠣᠪᠣᠭᠠ ᠲᠠᠢ ᠣᠪᠣᠭᠠ 2 ᠂ 17 ᠱᠠᠪᠢ ᠣᠪᠣᠭᠠ ᠲᠠᠢ ᠣᠪᠣᠭᠠ 1 ᠂ 28 ᠱᠠᠪᠢ ᠣᠪᠣᠭᠠ ᠲᠠᠢ ᠣᠪᠣᠭᠠ 1 ᠂ 30 ᠱᠠᠪᠢ ᠣᠪᠣᠭᠠ ᠲᠠᠢ ᠣᠪᠣᠭᠠ 1 ᠂ 31 ᠱᠠᠪᠢ ᠣᠪᠣᠭᠠ ᠲᠠᠢ ᠣᠪᠣᠭᠠ 1 ᠂ 48 ᠱᠠᠪᠢ ᠣᠪᠣᠭᠠ ᠲᠠᠢ ᠣᠪᠣᠭᠠ 1 ᠂ 52 ᠱᠠᠪᠢ ᠣᠪᠣᠭᠠ ᠲᠠᠢ ᠣᠪᠣᠭᠠ 1 ᠪᠠᠶᠢᠪᠠ ᠃
ᠡᠳᠡᠭᠡᠷ ᠣᠪᠣᠭᠠ ᠨᠤᠭᠤᠳ ᠤᠨ ᠳᠣᠲᠣᠷᠠ ᠱᠠᠪᠢ ᠣᠪᠣᠭᠠ ᠪᠣᠯᠣᠨ ᠭᠤᠣᠯ ᠣᠪᠣᠭᠠ ᠨᠢ ᠨᠡᠶᠢᠯᠡᠭᠡᠳ ᠠᠷᠪᠠᠨ ᠭᠤᠷᠪᠠ ᠪᠣᠯᠬᠤ ᠣᠪᠣᠭᠠ ᠳᠠᠷᠤᠢ ︽ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠ︾ ᠨᠢ ᠳᠡᠭᠡᠷᠡᠬᠢ 31 ᠰᠦᠷᠦᠭ ᠣᠪᠣᠭᠠᠨ ᠤ ᠳᠣᠲᠣᠷᠠ 10 ᠪᠠᠶᠢᠵᠤ ᠬᠠᠮᠤᠭ ᠤᠨ ᠣᠯᠠᠨ ᠬᠠᠷᠢᠴᠠᠯ ︵32%︶ ᠢ ᠡᠵᠡᠯᠡᠵᠦ ᠪᠠᠶᠢᠪᠠ ᠃ ᠳᠡᠭᠡᠷᠡᠬᠢ ᠵᠠᠳᠠᠯᠤᠯᠲᠠ ᠠᠴᠠ ᠪᠢᠳᠠ ᠮᠣᠩᠭᠤᠯ ᠨᠤᠲᠤᠭ ᠤᠨ ᠣᠪᠣᠭᠠ ᠨᠢ ᠶᠠᠩᠵᠤ ᠪᠦᠷᠢ ᠶᠢᠨ ᠲᠤᠭᠠ ᠪᠠᠷ ᠪᠦᠷᠢᠯᠳᠦᠵᠦ ᠪᠠᠶᠢᠳᠠᠭ ᠢ ᠣᠶᠢᠯᠠᠭᠠᠵᠤ ᠪᠣᠯᠣᠨᠠ ᠃ ᠣᠪᠣᠭᠠᠨ ᠤ ᠲᠤᠭᠠ ᠪᠣᠯ ᠨᠢᠭᠡᠨ ᠣᠪᠣᠭᠠᠨ ᠤ ᠪᠦᠲᠦᠴᠡ ᠪᠠ ᠰᠢᠨᠵᠢ ᠴᠢᠨᠠᠷ ᠢ ᠣᠶᠢᠯᠠᠭᠠᠬᠤ ᠶᠢᠨ ᠬᠠᠮᠤᠭ ᠤᠨ ᠦᠨᠳᠦᠰᠦᠨ ᠡᠯᠧᠮᠧᠨ᠋ᠲ ᠪᠣᠯᠣᠨᠠ ᠃ ᠱᠠᠪᠢ ᠣᠪᠣᠭᠠᠨ ᠤ ᠲᠤᠭᠠ ᠨᠢ ᠲᠣᠳᠣᠷᠬᠠᠢ ᠦᠭᠡᠢ ᠂ ᠳᠠᠷᠤᠢ ᠣᠪᠣᠭᠠᠨ ᠤ ᠨᠠᠭᠠᠲᠤ ᠵᠠᠬᠠ ᠶᠢᠨ ᠪᠦᠲᠦᠴᠡ ᠶᠢ ᠳᠤᠷᠠᠳᠬᠤ ᠦᠭᠡᠢ ᠣᠪᠣᠭᠠᠨ ᠰᠤᠳᠤᠯᠤᠯ ᠪᠣᠯ ᠶᠠᠮᠠᠷ ᠴᠦ ᠤᠳᠬᠠ ᠠᠭᠤᠯᠭᠠ ᠦᠭᠡᠢ ᠰᠤᠳᠤᠯᠭᠠᠨ ᠶᠤᠮ ᠃ ᠡᠯᠡ ᠱᠠᠪᠢ ᠣᠪᠣᠭᠠ ᠶᠢ ᠶᠠᠮᠠᠷ ᠵᠣᠷᠢᠯᠭᠠ ᠲᠠᠢ ᠪᠠᠷ ᠪᠣᠰᠬᠠᠵᠤ ᠲᠡᠷᠡ ᠨᠢ ᠶᠠᠭᠤ ᠶᠢ ᠲᠥᠯᠥᠭᠡᠯᠡᠵᠦ ᠪᠠᠶᠢᠬᠤ ᠵᠡᠷᠭᠡ ᠦᠨᠳᠦᠰᠦᠨ ᠰᠤᠳᠤᠯᠭᠠᠨ ᠢ ᠴᠢᠨᠠᠭᠰᠢᠳᠠ ᠭᠦᠨᠵᠡᠭᠡᠶᠢᠷᠡᠭᠦᠯᠦᠨ ᠬᠢᠬᠦ ᠴᠢᠬᠤᠯᠠ ᠲᠠᠢ ᠪᠠᠶᠢᠨᠠ ᠃
2-3 ᠳᠠᠭᠠᠯᠲᠠ ᠣᠪᠣᠭᠠ
ᠳᠠᠭᠠᠯᠲᠠ ᠣᠪᠣᠭᠠ ︵Subordination Oboo︶ ᠭᠡᠳᠡᠭ ᠪᠣᠯ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠶᠢ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠭᠠᠭᠴᠠ ᠣᠪᠣᠭᠠ ᠪᠤᠶᠤ ᠰᠦᠷᠦᠭ ᠣᠪᠣᠭᠠ ᠶᠢ ᠵᠢᠭᠠᠵᠤ ᠪᠠᠶᠢᠭᠠ ᠶᠤᠮ ᠃ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠨᠢ ᠭᠤᠣᠯ ᠪᠣᠯᠬᠤ ᠰᠦᠷᠦᠭ ᠣᠪᠣᠭᠠ ᠪᠤᠶᠤ ᠭᠠᠭᠴᠠ ᠣᠪᠣᠭᠠᠨ ᠤ ᠨᠡᠷᠡ ᠪᠠᠷ ᠳᠠᠭᠤᠳᠠᠭᠳᠠᠳᠠᠭ ᠃ ᠭᠡᠲᠡᠯᠡ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠶᠢ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠡᠯᠡ ᠳᠠᠭᠠᠯᠲᠠ ᠣᠪᠣᠭᠠ ᠨᠢ ᠴᠦ ᠥᠪᠡᠷ ᠥᠪᠡᠷ ᠤᠨ ᠨᠡᠷᠡᠶᠢᠳᠦᠯ ᠲᠠᠢ ᠪᠠᠶᠢᠳᠠᠭ ᠃ ᠡᠶᠢᠮᠦ ᠠᠴᠠ ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠤ ᠭᠤᠣᠯ ᠪᠣᠯᠬᠤ ᠰᠦᠷᠦᠭ ᠣᠪᠣᠭᠠ ᠪᠤᠶᠤ ᠭᠠᠭᠴᠠ ᠣᠪᠣᠭᠠ ᠶᠢ ᠨᠢ ᠤᠤᠯ ᠣᠪᠣᠭᠠ ᠭᠡᠵᠤ ᠦᠵᠡᠵᠦ ᠪᠣᠯᠬᠤ ᠶᠤᠮ ᠃ ᠬᠤᠵᠢᠮ ᠨᠢ ᠶᠠᠮᠠᠷ ᠨᠢᠭᠡᠨ ᠰᠢᠯᠲᠠᠭᠠᠨ ᠪᠤᠶᠤ ᠬᠡᠷᠡᠭ ᠶᠠᠪᠤᠳᠠᠯ ᠠᠴᠠ ᠪᠣᠯᠵᠤ ᠲᠡᠭᠦᠨ ᠤ ᠣᠶᠢᠷᠠ ᠣᠷᠴᠢᠮ ᠢᠶᠠᠷ ᠨᠢ ᠳᠠᠭᠠᠯᠲᠠ ᠪᠣᠯᠬᠤ ᠥᠭᠡᠷᠡ ᠣᠪᠣᠭᠠ ᠶᠢ ᠪᠣᠰᠬᠠᠭᠰᠠᠨ ᠪᠠᠶᠢᠵᠤ ᠮᠡᠳᠡᠬᠦ ᠶᠤᠮ ᠃ ᠭᠡᠲᠡᠯᠡ ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠤ ᠲᠤᠬᠠᠢ ᠰᠤᠳᠤᠯᠤᠯ ᠪᠤᠶᠤ ᠮᠡᠳᠡᠭᠡ ᠵᠠᠩᠭᠢ ᠬᠠᠷᠠᠬᠠᠨ ᠬᠤᠪᠣᠷ ᠪᠠᠶᠢᠭᠰᠠᠭᠠᠷ ᠪᠠᠶᠢᠨᠠ ᠃
2-3-1 ᠨᠡᠷᠡᠶᠢᠳᠦᠯ
ᠳᠠᠭᠠᠯᠲᠠ ᠣᠪᠣᠭᠠᠨ ᠤ ᠨᠡᠷᠡᠶᠢᠳᠦᠯ ︵Name of Subordination Oboo︶ ᠭᠡᠳᠡᠭ ᠨᠢ ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠳᠠᠬᠢ ᠡᠯᠡ ᠳᠠᠭᠠᠯᠲᠠ ᠣᠪᠣᠭᠠᠨ ᠤ ᠨᠡᠷᠡᠶᠢᠳᠦᠯ ᠢ ᠵᠢᠭᠠᠵᠤ ᠪᠣᠢ ᠃ ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠤ ᠭᠠᠵᠠᠷ ᠵᠦᠢ ᠶᠢᠨ ᠪᠠᠶᠢᠷᠢᠰᠢᠯ ᠵᠢᠴᠢ ᠪᠦᠲᠦᠴᠡ ᠶᠢᠨ ᠣᠨᠴᠠᠯᠢᠭ ᠠᠴᠠ ᠪᠣᠯᠵᠤ ᠳᠠᠭᠠᠯᠲᠠ ᠣᠪᠣᠭᠠᠨ ᠤ ᠨᠡᠷᠡᠶᠢᠳᠦᠯ ᠪᠦᠲᠦᠴᠡ ᠪᠠ ᠲᠠᠷᠬᠠᠯᠲᠠ ᠪᠠᠶᠢᠷᠢᠰᠢᠯ ᠨᠢ ᠴᠦ ᠠᠳᠠᠯᠢ ᠪᠤᠰᠤ ᠪᠠᠶᠢᠳᠠᠭ ᠃ ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠤ ᠡᠯᠡ ᠳᠠᠭᠠᠯᠲᠠ ᠣᠪᠣᠭᠠᠨ ᠤ ᠨᠡᠷᠡᠶᠢᠳᠦᠯ ᠂ ᠲᠠᠷᠬᠠᠯᠲᠠ ᠶᠢᠨ ᠪᠠᠶᠢᠷᠢᠰᠢᠯ ᠂ ᠪᠠᠶᠢᠷᠢᠰᠢᠵᠤ ᠪᠠᠶᠢᠭᠠ ᠭᠠᠵᠠᠷ ᠤᠨ ᠪᠠᠶᠢᠴᠠ ᠶᠢ ᠣᠶᠢᠯᠠᠭᠠᠬᠤ ᠨᠢ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠶᠢ ᠰᠤᠳᠤᠯᠬᠤ ᠶᠢᠨ ᠦᠨᠳᠦᠰᠦᠨ ᠠᠯᠬᠤᠮ ᠤᠨ ᠨᠢᠭᠡ ᠶᠤᠮ ᠃ ᠣᠨᠴᠠᠭᠠᠶᠢᠯᠠᠨ ᠳᠠᠭᠠᠯᠲᠠ ᠣᠪᠣᠭᠠᠨ ᠤ ᠨᠡᠷᠡᠶᠢᠳᠦᠯ ᠤᠨ ᠲᠤᠬᠠᠢ ᠠᠳᠠᠯᠢᠬᠠᠨ ᠨᠢᠭᠡᠨ ᠣᠷᠣᠨ ᠨᠤᠲᠤᠭ ᠤᠨ ᠳᠤᠮᠳᠠ ᠴᠦ ᠠᠳᠠᠯᠢ ᠪᠤᠰᠤ ᠨᠡᠷᠡᠶᠢᠳᠦᠯ ᠢᠶᠠᠷ ᠨᠡᠷᠡᠯᠡᠭᠳᠡᠵᠦ ᠪᠠᠶᠢᠳᠠᠭ ᠃ ᠡᠶᠢᠮᠦ ᠪᠣᠯᠬᠤᠷ ᠳᠠᠭᠠᠯᠲᠠ ᠣᠪᠣᠭᠠᠨ ᠤ ᠨᠡᠷᠡᠶᠢᠳᠦᠯ ᠢ ᠣᠶᠢᠯᠠᠭᠠᠵᠤ ᠲᠡᠮᠳᠡᠭᠯᠡᠬᠦ ᠳᠤ ᠨᠡᠯᠢᠶᠡᠳ ᠬᠦᠴᠢᠷ ᠪᠠᠶᠢᠳᠠᠭ ᠃ ᠪᠢ 11 ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠳᠤ ᠬᠡᠭᠡᠷᠡ ᠶᠢᠨ ᠰᠢᠨᠵᠢᠯᠡᠭᠡᠨ ᠬᠢᠭᠰᠡᠨ ᠶᠤᠮ ᠃ ᠬᠡᠭᠡᠷᠡ ᠶᠢᠨ ᠰᠢᠨᠵᠢᠯᠡᠭᠡᠨ ᠳᠡᠭᠡᠨ ᠬᠤᠷᠠᠮᠳᠤᠭᠤᠯᠤᠭᠰᠠᠨ ᠮᠠᠲ᠋ᠧᠷᠢᠶᠠᠯ ᠢᠶᠠᠨ ᠵᠠᠳᠠᠯᠬᠤ ᠪᠠᠷ ᠳᠠᠮᠵᠢᠵᠤ ᠂ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠶᠢ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠡᠯᠡ ᠳᠠᠭᠠᠯᠲᠠ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠂ ᠪᠦᠲᠦᠴᠡ ᠨᠢ ᠵᠣᠬᠢᠬᠤ ᠬᠡᠮᠵᠢᠶᠡᠨ ᠤ ᠵᠢᠷᠤᠮ ᠵᠤᠷᠰᠢᠯ ᠲᠠᠢ ᠪᠠᠶᠢᠳᠠᠭ ᠢ ᠣᠶᠢᠯᠠᠭᠠᠵᠤ ᠮᠡᠳᠡᠭᠰᠡᠨ ᠶᠤᠮ ᠃
ᠳᠠᠭᠠᠯᠲᠠ ᠣᠪᠣᠭᠠᠨ ᠳᠤ ︽ᠬᠡᠦᠬᠡᠳ ᠤᠨ ᠣᠪᠣᠭᠠ︾ ᠂ ︽ᠡᠵᠢ ᠣᠪᠣᠭᠠ︾ ᠂ ︽ᠬᠤᠨᠢᠴᠢᠨ ᠣᠪᠣᠭᠠ︾ ᠂ ︽ᠪᠥᠭᠡ ᠶᠢᠨ ᠣᠪᠣᠭᠠ︾ ᠂ ︽ᠵᠠᠬᠢᠷᠤᠭᠴᠢ ᠶᠢᠨ ᠣᠪᠣᠭᠠ︾ ᠂ ︽ᠲᠠᠶᠢᠵᠢ ᠶᠢᠨ ᠣᠪᠣᠭᠠ︾ ᠵᠡᠷᠭᠡ ᠬᠥᠮᠥᠨ ᠲᠠᠢ ᠬᠤᠯᠪᠣᠭᠳᠠᠭᠰᠠᠨ ᠵᠢᠴᠢ ︽ᠭᠡᠭᠡᠨ ᠣᠪᠣᠭᠠ︾ ᠂ ︽ᠪᠠᠭᠰᠢ ᠶᠢᠨ ᠣᠪᠣᠭᠠ︾ ᠂ ︽ᠱᠠᠷᠢᠯ ᠤᠨ ᠣᠪᠣᠭᠠ︾ ᠵᠡᠷᠭᠡ ᠱᠠᠰᠢᠨ ᠯᠠᠮᠠ ᠲᠠᠢ ᠬᠤᠯᠪᠣᠭᠳᠠᠭᠰᠠᠨ ᠨᠡᠷᠡ ᠲᠠᠢ ᠳᠠᠭᠠᠯᠲᠠ ᠣᠪᠣᠭᠠ ᠂ ︽ᠠᠷᠠᠯ ᠤᠨ ᠣᠪᠣᠭᠠ︾ ᠵᠡᠷᠭᠡ ᠡᠳ᠋ ᠬᠡᠷᠡᠭᠰᠡᠯ ᠲᠠᠢ ᠬᠤᠯᠪᠣᠭᠳᠠᠭᠰᠠᠨ ᠨᠡᠷᠡ ᠲᠠᠢ ᠳᠠᠭᠠᠯᠲᠠ ᠣᠪᠣᠭᠠ ᠵᠢᠴᠢ ︽ᠬᠡᠶᠢᠮᠣᠷᠢ ᠶᠢᠨ ᠣᠪᠣᠭᠠ︾ ᠂ ︽ᠬᠠᠶᠢᠷᠬᠠᠨ ᠣᠪᠣᠭᠠ︾ ᠂ ︽ᠲᠠᠷᠭᠤᠨ ᠣᠪᠣᠭᠠ︾ ᠵᠡᠷᠭᠡ ᠬᠡᠶᠢᠰᠪᠦᠷᠢ ᠨᠡᠷᠡ ᠂ ᠪᠡᠯᠭᠡᠳᠡᠯ ᠨᠡᠷᠡ ᠪᠤᠶᠤ ᠠᠭᠤᠯᠠ ᠤᠰᠤ ᠲᠠᠢ ᠬᠤᠯᠪᠣᠭᠳᠠᠭᠰᠠᠨ ᠨᠡᠷᠡ ᠲᠠᠢ ᠳᠠᠭᠠᠯᠲᠠ ᠣᠪᠣᠭᠠ ᠪᠠᠶᠢᠳᠠᠭ ᠃
ᠶᠠᠭᠤᠨ ᠤ ᠡᠮᠦᠨᠡ ︽ᠬᠡᠦᠬᠡᠳ ᠤᠨ ᠣᠪᠣᠭᠠ︾ ᠭᠡᠰᠡᠨ ᠨᠡᠷᠡ ᠲᠠᠢ ᠳᠠᠭᠠᠯᠲᠠ ᠣᠪᠣᠭᠠ ᠨᠡᠯᠢᠶᠡᠳ ᠬᠠᠷᠠᠭᠳᠠᠨᠠ ᠃ ᠬᠡᠦᠬᠡᠳ ᠤᠨ ᠣᠪᠣᠭᠠ ᠪᠣᠰᠬᠠᠳᠠᠭ ᠵᠠᠩ ᠦᠢᠯᠡ ᠶᠢᠨ ᠵᠣᠷᠢᠯᠭᠠ ᠶᠢᠨ ᠲᠤᠬᠠᠢ ᠸ᠊ ᠂ ᠰᠠᠶᠢᠨᠴᠣᠭᠲᠤ ᠠᠴᠠ ︽ᠵᠠᠷᠢᠮ ᠨᠤᠲᠤᠭ ᠲᠤ ᠬᠡᠦᠬᠡᠳ ᠤᠨ ᠣᠪᠣᠭᠠ ᠭᠡᠵᠤ ᠪᠠᠶᠢᠳᠠᠭ ᠃ ᠬᠡᠦᠬᠡᠳ ᠤᠨ ᠣᠪᠣᠭᠠ ᠨᠢ ᠬᠡᠦᠬᠡᠳ ᠤᠨ ᠡᠷᠡᠭᠦᠯ ᠮᠡᠨᠳᠦ ᠶᠢ ᠢᠪᠡᠭᠡᠵᠦ ᠬᠡᠦᠬᠡᠳ ᠤᠨ ᠬᠦᠰᠡᠯ ᠲᠠᠢ ᠬᠥᠮᠥᠨ ᠳᠤ ᠦᠷᠡ ᠶᠢᠨ ᠬᠤᠲᠤᠭ ᠰᠣᠶᠣᠷᠬᠠᠳᠠᠭ ᠭᠡᠵᠤ ᠣᠶᠢᠯᠠᠭᠠᠭᠳᠠᠨᠠ ᠃ ᠬᠡᠦᠬᠡᠳ ᠤᠨ ᠣᠪᠣᠭᠠᠨ ᠤ ᠵᠢᠩᠬᠢᠨᠢ ᠢᠷᠡᠯᠲᠡ ᠨᠢ ᠶᠠᠭᠤ ᠪᠣᠢ ᠭᠡᠪᠡᠯ ᠠᠮᠢ ᠶᠢᠨ ᠰᠢᠲᠦᠯᠭᠡ ᠲᠠᠢ ᠬᠥᠮᠥᠰ ᠲᠥᠷᠥᠵᠦ ᠬᠥᠩᠭᠡᠵᠢᠬᠦ ᠶᠢ ᠠᠮᠢ ᠶᠢᠨ ᠦᠷᠭᠦᠯᠵᠢᠯᠡᠯ ᠭᠡᠵᠤ ᠦᠵᠡᠳᠡᠭ ᠮᠥᠷᠲᠡᠭᠡᠨ ᠬᠠᠮᠲᠤ ᠶᠢᠨ ᠠᠮᠢ ᠠᠴᠠ ᠦᠷᠡ ᠶᠢᠨ ᠬᠤᠲᠤᠭ ᠠᠪᠤᠭᠰᠠᠨ ᠢᠶᠠᠷ ᠵᠢᠷᠮᠦᠰᠦᠯᠡᠨᠡ ᠭᠡᠵᠤ ᠦᠵᠡᠳᠡᠭ ᠪᠠᠶᠢᠵᠠᠢ ᠃ ᠬᠠᠮᠲᠤ ᠶᠢᠨ ᠠᠮᠢ ᠶᠢᠨ ᠦᠷᠡ ᠶᠢᠨ ᠬᠤᠲᠤᠭ ᠥᠭᠬᠦ ᠴᠢᠳᠠᠯ ᠨᠢ ᠴᠢᠬᠤᠯᠠᠴᠢᠯᠠᠭᠳᠠᠵᠤ ᠪᠦᠷ ᠰᠡᠭᠦᠯ ᠳᠡᠭᠡᠨ ᠂ ᠦᠷᠡ ᠶᠢᠨ ᠬᠤᠲᠤᠭ ᠥᠭᠬᠦ ᠲᠤᠰᠬᠠᠢ ᠴᠢᠳᠠᠪᠤᠷᠢ ᠪᠦᠬᠦᠢ ᠰᠢᠲᠦᠭᠡᠨ ᠪᠣᠢ ᠪᠣᠯᠣᠭᠰᠠᠨ ᠤ ᠨᠢᠭᠡ ᠨᠢ ᠬᠡᠦᠬᠡᠳ ᠤᠨ ᠣᠪᠣᠭᠠ ᠶᠤᠮ ᠃ ᠲᠡᠶᠢᠨᠬᠦ ᠬᠡᠦᠬᠡᠳ ᠤᠨ ᠣᠪᠣᠭᠠᠨ ᠠᠴᠠ ᠣᠨᠳᠣᠣ ᠠᠯᠢ ᠴᠦ ᠣᠪᠣᠭᠠ ᠪᠦᠬᠦᠨ ᠦᠷᠡ ᠶᠢᠨ ᠬᠤᠲᠤᠭ ᠥᠭᠴᠦ ᠴᠢᠳᠠᠨᠠ ᠭᠡᠬᠦ ᠢᠲᠡᠭᠡᠯ ᠥᠷᠭᠡᠨ ᠳᠡᠯᠭᠡᠷ ᠪᠠᠶᠢᠵᠠᠢ︾ ﹇14﹈ ᠭᠡᠵᠤ ᠬᠡᠦᠬᠡᠳ ᠤᠨ ᠣᠪᠣᠭᠠᠨ ᠤ ᠪᠣᠢ ᠪᠣᠯᠣᠭᠰᠠᠨ ᠰᠢᠯᠲᠠᠭᠠᠨ ᠤ ᠲᠤᠬᠠᠢ ᠨᠡᠯᠢᠶᠡᠳ ᠳᠡᠯᠭᠡᠷᠡᠩᠭᠦᠢ ᠲᠣᠭᠠᠴᠢᠭᠰᠠᠨ ᠪᠠᠶᠢᠨᠠ ᠃ ᠡᠨᠡ ᠲᠤᠬᠠᠢ ᠰᠠᠶᠢᠨᠵᠢᠷᠭᠠᠯ ᠠᠴᠠ ︽ᠬᠡᠦᠬᠡᠳ ᠤᠨ ᠢᠶᠠᠨ ᠠᠮᠢ ᠨᠠᠰᠤ ᠥᠯᠵᠡᠢ ᠬᠤᠲᠤᠭ ᠢ ᠳᠠᠭᠠᠳᠬᠠᠭᠰᠠᠨ ᠪᠤᠶᠤ ᠦᠷᠡ ᠬᠡᠦᠬᠡᠳ ᠦᠭᠡᠢ ᠪᠠᠶᠢᠭᠠᠳ ᠡᠷᠭᠦᠯ ᠮᠥᠷᠭᠦᠯ ᠬᠢᠵᠦ ᠬᠡᠦᠬᠡᠳ ᠲᠠᠢ ᠪᠣᠯᠣᠭᠰᠠᠨ ᠢᠶᠠᠨ ᠪᠡᠯᠭᠡᠯᠡᠵᠦ ᠭᠠᠵᠠᠷ ᠤᠰᠤ ᠪᠠᠨ ᠲᠠᠬᠢᠭᠰᠠᠨ ᠣᠪᠣᠭᠠ ᠶᠢ ᠬᠡᠦᠬᠡᠳ ᠤᠨ ᠣᠪᠣᠭᠠ ᠭᠡᠨᠡ ᠃ ᠵᠠᠷᠢᠮ ᠨᠤᠲᠤᠭ ᠲᠠᠬᠢ ᠬᠡᠦᠬᠡᠳ ᠤᠨ ᠣᠪᠣᠭᠠ ᠨᠢ ᠠᠭᠤᠢ ᠬᠠᠳᠠ ᠶᠢᠨ ᠳᠡᠷᠭᠡᠳᠡ ᠣᠯᠠᠨ ᠵᠠᠮ ᠤᠨ ᠠᠭᠤᠯᠵᠠᠷ ᠤᠨ ᠬᠠᠵᠠᠭᠤ ᠳᠤ ᠪᠣᠰᠬᠠᠭᠰᠠᠨ ᠪᠠᠶᠢᠳᠠᠭ︾ ﹇15﹈ ᠭᠡᠵᠤ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠨᠠ ᠃ ᠠᠳᠠᠯᠢᠬᠠᠨ ᠵᠠᠩᠰᠢᠯ ᠮᠣᠩᠭᠤᠯ ᠤᠯᠤᠰ ᠲᠤ ᠪᠠᠰᠠ ᠪᠠᠶᠢᠳᠠᠭ ᠃ ︽ᠲᠠᠬᠢᠯᠭᠠᠲᠤ ᠠᠭᠤᠯᠠ ᠣᠪᠣᠭᠠᠨ ᠠᠴᠠ ᠦᠷᠡ ᠭᠤᠶᠤᠬᠤ ᠶᠣᠰᠣ ᠴᠦ ᠪᠠᠰᠠ ᠲᠦᠭᠡᠮᠡᠯ ᠦᠵᠡᠭᠳᠡᠯ ᠪᠠᠶᠢᠪᠠ ᠃ ᠬᠠᠯᠬᠠ ᠭᠤᠣᠯ ᠤᠨ ᠣᠷᠴᠢᠮ ᠢᠶᠠᠷ ᠨᠤᠲᠦᠭ᠌ᠯᠠᠭᠰᠠᠳ ᠸᠠᠩ ᠤᠨ ᠴᠠᠭᠠᠨ ᠠᠭᠤᠯᠠ ᠭᠡᠭᠴᠢ ᠠᠴᠠ ᠦᠷᠡ ᠭᠤᠶᠤᠵᠤ ᠡᠨᠡ ᠠᠭᠤᠯᠠᠨ ᠳᠡᠭᠡᠷᠡ ︿ᠬᠡᠦᠬᠡᠳ ᠤᠨ ᠣᠪᠣᠭᠠ﹀ ᠬᠡᠮᠡᠬᠦ ᠡᠷᠭᠦᠯ ᠮᠥᠷᠭᠦᠯ ᠦᠢᠯᠡᠳᠬᠦ ᠲᠤᠰᠬᠠᠢ ᠣᠪᠣᠭᠠ ᠶᠢ ᠬᠦᠷᠲᠡᠯᠡ ᠪᠣᠰᠬᠠᠭᠰᠠᠨ ᠮᠡᠳᠡᠭᠡ ᠪᠣᠢ︾ ﹇16﹈ ᠵᠡᠷᠭᠡ ᠲᠡᠮᠳᠡᠭᠯᠡᠯ ᠠᠴᠠ ᠦᠵᠡᠪᠡᠯ ᠂ ᠬᠡᠦᠬᠡᠳ ᠤᠨ ᠣᠪᠣᠭᠠ ᠭᠡᠳᠡᠭ ᠨᠢ ᠦᠷᠡ ᠬᠡᠦᠬᠡᠳ ᠲᠠᠢ ᠪᠣᠯᠬᠤ ᠶᠢ ᠬᠦᠰᠡᠨ ᠮᠥᠷᠥᠭᠡᠳᠦᠭᠰᠡᠨ ᠵᠣᠷᠢᠭᠤᠯᠤᠯᠲᠠ ᠲᠠᠢ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠪᠣᠯᠬᠤ ᠨᠢ ᠲᠣᠳᠣᠷᠬᠠᠢ ᠪᠠᠶᠢᠨᠠ ᠃ ᠭᠡᠲᠡᠯᠡ ᠦᠵᠦᠮᠦᠴᠢᠨ ᠨᠤᠲᠤᠭ ᠲᠠᠬᠢ ᠬᠡᠦᠬᠡᠳ ᠤᠨ ᠣᠪᠣᠭᠠ ᠨᠢ ᠶᠠᠮᠠᠷ ᠨᠢᠭᠡᠨ ᠲᠣᠮᠣ ᠣᠪᠣᠭᠠᠨ ᠤ ᠳᠠᠭᠠᠯᠲᠠ ᠣᠪᠣᠭᠠᠨ ᠤ ᠬᠡᠯᠪᠡᠷᠢ ᠪᠠᠷ ᠪᠣᠰᠬᠠᠨ ᠲᠠᠬᠢᠵᠤ ᠪᠠᠶᠢᠭᠠ ᠪᠥᠭᠡᠳ ᠠᠭᠤᠯᠠ ᠪᠤᠶᠤ ᠲᠠᠯᠠ ᠳᠡᠭᠡᠷᠡ ᠳᠠᠩ ᠭᠠᠭᠴᠠ ᠬᠡᠦᠬᠡᠳ ᠤᠨ ᠣᠪᠣᠭᠠ ᠭᠡᠰᠡᠨ ᠨᠡᠷᠡ ᠪᠦᠬᠦᠢ ᠣᠪᠣᠭᠠ ᠨᠠᠳᠠ ᠬᠠᠷᠠᠬᠠᠨ ᠲᠠᠭᠠᠷᠠᠯᠳᠤᠭᠰᠠᠨ ᠦᠭᠡᠢ ᠶᠤᠮ ᠃ ᠶᠠᠷᠢᠶᠠᠨ ᠦᠭᠡᠢ ᠡᠷᠲᠡᠨ ᠤ ᠦᠶᠡ ᠳᠤ ᠮᠣᠩᠭᠤᠯ ᠣᠷᠣᠨ ᠳᠤ ᠡᠮ ᠡᠮᠨᠡᠯᠭᠡ ᠶᠢᠨ ᠣᠷᠴᠢᠨ ᠲᠣᠭᠤᠷᠢᠨ ᠳᠣᠷᠣᠢ ᠪᠠᠶᠢᠭᠰᠠᠨ ᠪᠣᠯᠬᠤᠷ ᠤᠯᠠᠭᠠᠨ ᠨᠢᠯᠬᠠ ᠪᠤᠶᠤ ᠵᠢᠭᠠᠯ ᠬᠡᠦᠬᠡᠳ ᠤᠨ ᠬᠤᠷᠣᠭᠳᠠᠬᠤ ᠨᠣᠷᠮᠠ ᠥᠨᠳᠥᠷ ᠪᠠᠶᠢᠭᠰᠠᠨ ᠶᠤᠮ ᠃ ᠮᠥᠨ ᠴᠦ ᠬᠡᠦᠬᠡᠳ ᠬᠦᠰᠡᠭᠡᠳ ᠣᠯᠬᠤ ᠦᠭᠡᠢ ᠪᠤᠶᠤ ᠬᠡᠦᠬᠡᠳ ᠲᠣᠭᠲᠠᠬᠤ ᠦᠭᠡᠢ ᠠᠶᠢᠯ ᠴᠦ ᠣᠯᠠᠨ ᠪᠠᠶᠢᠭᠰᠠᠨ ᠶᠤᠮ ᠃ ᠡᠶᠢᠮᠦ ᠪᠣᠯᠬᠤᠷ ᠬᠡᠦᠬᠡᠳ ᠬᠦᠰᠡᠵᠦ ᠪᠠᠶᠢᠭᠠ ᠠᠶᠢᠯ ᠪᠤᠶᠤ ᠬᠡᠦᠬᠡᠳ ᠲᠣᠭᠲᠠᠳᠠᠭ ᠦᠭᠡᠢ ᠠᠶᠢᠯ ᠨᠢ ᠶᠠᠮᠠᠷ ᠨᠢᠭᠡᠨ ᠣᠪᠣᠭᠠᠨ ᠤ ᠣᠶᠢᠷᠠ ᠣᠶᠢᠷᠠᠯᠴᠠᠭᠠ ᠣᠪᠣᠭᠠ ᠪᠣᠰᠬᠠᠵᠤ ᠲᠡᠭᠦᠨ ᠢ ᠪᠠᠨ ᠬᠡᠦᠬᠡᠳ ᠤᠨ ᠣᠪᠣᠭᠠ ᠬᠡᠮᠡᠨ ᠨᠡᠷᠡᠯᠡᠵᠦ ᠲᠡᠷᠡ ᠬᠦ ᠲᠣᠮᠣ ᠣᠪᠣᠭᠠᠨ ᠤ ᠲᠠᠬᠢᠯᠭᠠ ᠶᠢᠨ ᠦᠶᠡᠰ ᠣᠪᠣᠭᠠ ᠪᠠᠨ ᠲᠠᠬᠢᠳᠠᠭ ᠪᠣᠯᠣᠮᠵᠢ ᠲᠠᠢ ᠪᠠᠶᠢᠭᠰᠠᠨ ᠭᠡᠵᠤ ᠦᠵᠡᠵᠦ ᠪᠣᠯᠬᠤ ᠶᠤᠮ ᠃ ︽ᠣᠪᠣᠭ ᠠᠶᠢᠮᠠᠭ ᠤᠨ ᠵᠠᠶᠠᠭᠠ ᠲᠠᠪᠢᠯᠠᠩ ᠤᠨ ᠦᠨᠳᠦᠰᠦ ᠪᠣᠯ ᠬᠠᠮᠤᠭ ᠤᠨ ᠤᠷᠢᠳᠠᠪᠠᠷ ᠬᠠᠮᠲᠤ ᠶᠢᠨ ᠨᠢᠭᠡᠨ ᠨᠤᠲᠤᠭ ᠳᠡᠭᠡᠷᠡ ᠠᠮᠢᠳᠤᠷᠠᠵᠤ ᠪᠠᠶᠢᠳᠠᠭ ︿ᠨᠤᠲᠤᠭ ᠤᠨ ᠵᠠᠶᠠᠭᠠ﹀ ᠪᠣᠯᠬᠤ ᠶᠤᠮ︾ ﹇17﹈ ᠃ ᠬᠡᠦᠬᠡᠳ ᠤᠨ ᠣᠪᠣᠭᠠ ᠪᠣᠯ ︽ᠨᠤᠲᠤᠭ ᠤᠨ ᠵᠠᠶᠠᠭᠠ︾ ᠪᠠᠨ ᠬᠦᠨᠳᠦᠳᠬᠡᠨ ᠳᠡᠭᠡᠳᠦᠯᠡᠬᠦ ᠭᠡᠰᠡᠨ ᠪᠣᠳᠣᠯ ᠰᠡᠳᠬᠢᠯ ᠤᠨ ᠬᠦᠴᠦᠨ ᠵᠦᠢᠯ ᠤᠨ ᠡᠯᠧᠮᠧᠨ᠋ᠲ ᠠᠭᠤᠯᠤᠭᠳᠠᠵᠤ ᠪᠠᠶᠢᠵᠤ ᠮᠡᠳᠡᠬᠦ ᠶᠤᠮ ᠃ ᠬᠡᠦᠬᠡᠳ ᠵᠠᠶᠠᠭᠠᠬᠤ ᠦᠭᠡᠢ ᠪᠤᠶᠤ ᠬᠡᠦᠬᠡᠳ ᠲᠣᠭᠲᠠᠬᠤ ᠦᠭᠡᠢ ᠪᠣᠯᠣᠭᠰᠠᠭᠠᠷ ᠠᠶᠢᠯ ᠭᠡᠷ ᠣᠪᠣᠭ ᠠᠶᠢᠮᠠᠭ ᠤᠨ ᠣᠷᠣᠰᠢᠯ ᠲᠣᠭᠲᠠᠨᠢᠯ ᠳᠤ ᠰᠦᠷᠳᠡᠭᠦᠯᠦᠯ ᠪᠣᠯᠬᠤ ᠨᠢ ᠶᠠᠷᠢᠶᠠᠨ ᠦᠭᠡᠢ ᠶᠤᠮ ᠃ ᠣᠪᠣᠭᠠ ᠪᠣᠰᠬᠠᠵᠤ ᠲᠠᠶᠢᠯᠭᠠ ᠲᠠᠬᠢᠯᠭᠠ ᠦᠢᠯᠡᠳᠴᠦ ᠳᠠᠭᠠᠳᠬᠠᠵᠤ ᠨᠠᠮᠠᠨᠴᠢᠯᠠᠬᠤ ᠨᠢ ᠶᠠᠷᠢᠶᠠᠨ ᠦᠭᠡᠢ ᠪᠥᠭᠡ ᠮᠥᠷᠭᠦᠯ ᠤᠨ ᠥᠩᠭᠡ ᠪᠣᠳᠤᠭ ᠤᠨ ᠠᠶᠠᠰ ᠠᠭᠤᠯᠤᠭᠳᠠᠵᠤ ᠪᠠᠶᠢᠬᠤ ᠶᠤᠮ ᠃ ᠡᠶᠢᠮᠦ ᠪᠣᠯᠬᠤᠷ ︽ᠬᠡᠦᠬᠡᠳ ᠤᠨ ᠣᠪᠣᠭᠠ︾ ᠂ ︽ᠡᠵᠢ ᠣᠪᠣᠭᠠ︾ ᠂ ︽ᠠᠪᠤ ᠣᠪᠣᠭᠠ︾ ᠭᠡᠳᠡᠭ ᠪᠣᠯ ᠲᠥᠷᠥᠵᠦ ᠬᠥᠩᠭᠡᠵᠢᠬᠦ ᠂ ᠥᠰᠬᠡᠨ ᠪᠣᠶᠢᠵᠢᠭᠤᠯᠬᠤ ᠭᠡᠳᠡᠭ ᠬᠥᠮᠥᠨ ᠤ ᠠᠮᠢᠳᠤᠷᠠᠯ ᠤᠨ ᠶᠠᠪᠤᠴᠠ ᠳᠤᠮᠳᠠᠬᠢ ᠬᠠᠮᠤᠭ ᠡᠩ ᠤᠨ ᠪᠥᠭᠡᠳ ᠡᠩ ᠤᠨ ᠪᠤᠰᠤ ᠡᠨᠡ ᠬᠦ ᠠᠵᠢᠯᠯᠠᠭᠠ ᠪᠠᠨ ᠨᠤᠲᠤᠭ ᠤᠰᠤᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠤᠨ ᠬᠡᠰᠢᠭ ᠪᠤᠶᠠᠨ ᠤ ᠢᠪᠡᠭᠡᠯ ᠵᠢᠴᠢ ᠬᠠᠮᠠᠭᠠᠯᠠᠯ ᠤᠨ ᠳᠣᠣᠷᠠ ᠦᠷᠭᠦᠯᠵᠢᠯᠡᠭᠦᠯᠬᠦ ᠭᠡᠰᠡᠨ ᠰᠠᠨᠠᠭᠠ ᠨᠢ ᠪᠡᠶᠡᠯᠡᠯ ᠢᠶᠠᠨ ᠣᠯᠵᠤ ᠪᠠᠶᠢᠭᠠ ᠶᠠᠪᠤᠳᠠᠯ ᠪᠣᠯᠬᠤ ᠶᠤᠮ ᠃ ᠡᠨᠡ ᠨᠢ ᠮᠥᠨ ᠴᠦ ᠮᠣᠩᠭᠤᠯᠴᠤᠳ ᠤᠨ ᠨᠡᠭᠦᠳᠡᠯ ᠠᠮᠢᠳᠤᠷᠠᠯ ᠨᠢ ᠠᠮᠢ ᠨᠠᠰᠤᠨ ᠤ ᠦᠵᠡᠭᠳᠡᠬᠦ ᠦᠷᠭᠦᠯᠵᠢᠯᠡᠬᠦ ᠶᠢ ᠳᠡᠭᠡᠳᠦᠯᠡᠳᠡᠭ ᠰᠣᠶᠣᠯ ᠤᠨ ᠤᠤᠭᠠᠯ ᠬᠥᠷᠥᠰᠥ ᠲᠠᠢ ᠪᠠᠶᠢᠭᠰᠠᠨ ᠢ ᠤᠯᠠᠮ ᠨᠢᠭᠡ ᠠᠯᠬᠤᠮ ᠲᠣᠳᠣᠷᠠᠭᠤᠯᠤᠭᠰᠠᠨ ᠶᠠᠪᠤᠳᠠᠯ ᠪᠣᠯᠬᠤ ᠶᠤᠮ ᠃
ᠮᠣᠩᠭᠤᠯ ᠤᠯᠤᠰ ᠤᠨ ᠲᠥᠪ ᠨᠣᠮ ᠤᠨ ᠰᠠᠩ ᠳᠤ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠶᠢᠭᠠ ︽ᠣᠪᠣᠭᠠᠨ ᠤ ᠡᠭᠦᠳᠬᠦ ᠵᠠᠩ ᠦᠢᠯᠡ ᠰᠡᠯᠲᠡ ᠣᠷᠣᠰᠢᠪᠠ︾ ᠭᠡᠳᠡᠭ ᠰᠤᠳᠤᠷ ᠲᠤ᠄
︽ᠣᠪᠣᠭᠠ ᠪᠣᠰᠬᠠᠨ ᠲᠠᠬᠢᠭᠰᠠᠨ ᠤ ᠠᠴᠢ ᠪᠣᠯ
ᠡᠨᠡ ᠲᠥᠷᠥᠯ ᠳᠤ ᠠᠮᠢ ᠨᠠᠰᠤᠨ ᠤ ᠵᠡᠳᠬᠡᠷ ᠠᠷᠢᠯᠬᠤ ᠂
ᠬᠦᠪᠡᠭᠦᠨ ᠠᠴᠢᠷ ᠦᠷᠡ ᠶᠢᠨ ᠦᠨᠳᠦᠰᠦ ᠨᠠᠮᠠᠭᠠ ᠳᠡᠯᠭᠡᠷᠡᠬᠦ ᠂
ᠠᠲᠠᠯ ᠠᠮᠢᠳᠤᠷᠠᠯ ᠠᠳᠤᠭᠤ ᠮᠠᠯ ᠡᠳ᠋ ᠲᠠᠸᠠᠷ ᠲᠡᠷᠢᠭᠦᠲᠠᠨ ᠠᠷᠪᠢᠳᠬᠤ
ᠥᠯᠥ ᠪᠣᠯᠬᠤ ᠮᠠᠭᠤ ᠢᠷᠸᠠ ᠠᠷᠢᠯᠬᠤ ᠂
ᠥᠯᠵᠡᠢ ᠪᠤᠰᠦ
ᠪᠤᠰᠤᠳ ᠤᠨ ᠬᠥᠨᠥᠭᠡᠯ ᠠᠴᠠ ᠬᠡᠯᠲᠦᠷᠢᠬᠦ ᠂
ᠭᠤᠷᠪᠠᠨ ᠵᠠᠭᠤᠨ ᠵᠢᠷᠠᠨ ᠠᠳᠠ ᠂
ᠳᠥᠷᠪᠡᠨ ᠵᠠᠭᠤᠨ ᠳᠥᠷᠪᠡᠨ ᠡᠪᠳᠴᠢᠨ ᠤ
ᠭᠡᠨᠡᠳᠲᠡ ᠤᠴᠠᠷᠠᠬᠤ ᠮᠢᠩᠭᠠᠨ ᠨᠠᠶᠠᠨ ᠳᠤᠳᠬᠠᠷ ᠲᠡᠷᠢᠭᠦᠲᠡᠨ ᠢ
ᠥᠯᠳᠡᠨ ᠠᠷᠢᠯᠭᠠᠭᠠᠳ
ᠥᠯᠵᠡᠢ ᠬᠤᠳᠤᠭ ᠣᠷᠣᠰᠢᠬᠤ
ᠬᠠᠲᠠᠭᠤ ᠳᠣᠭᠰᠢᠨ ᠶᠡᠭᠡ ᠭᠠᠵᠠᠷ ᠤᠨ ᠡᠵᠡᠨ ᠪᠠᠶᠠᠰᠤᠭᠰᠠᠨ ᠢᠶᠠᠷ
ᠡᠴᠤᠰ ᠤᠨ ᠲᠥᠷᠥᠯ ᠶᠡᠭᠡ ᠢᠵᠠᠭᠤᠷ ᠣᠪᠣᠭ ᠢ ᠣᠯᠣᠨᠠ︾ ᠭᠡᠵᠤ ︵ᠲᠤᠰ ᠪᠦᠯᠦᠭ ᠤᠨ ᠲᠠᠪᠤᠳᠤᠭᠠᠷ ᠬᠡᠰᠡᠭ ᠲᠤ ᠯᠠᠪᠯᠠ︶ ᠂ ᠣᠪᠣᠭᠠ ᠪᠣᠰᠬᠠᠨ ᠳᠠᠬᠢᠬᠤ ᠨᠢ ᠦᠷᠡ ᠠᠴᠢ ᠳᠡᠯᠭᠡᠷᠡᠵᠦ ᠦᠨᠳᠦᠰᠦ ᠨᠠᠮᠠᠭᠠ ᠪᠠᠳᠠᠷᠠᠬᠤ ᠶᠢ ᠣᠨᠴᠠᠯᠠᠨ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠨᠠ ᠃
ᠲᠤᠯᠭᠠ ᠣᠪᠣᠭᠠᠨ ᠤ ᠨᠢᠭᠡᠨ ᠳᠠᠭᠠᠯᠲᠠ ᠣᠪᠣᠭᠠ ᠪᠣᠯᠬᠤ ︽ᠱᠠᠷᠢᠯ ᠤᠨ ᠣᠪᠣᠭᠠ︾ ᠭᠡᠵᠤ ᠪᠠᠶᠢᠨᠠ ᠃ ᠡᠨᠡ ᠨᠢ ᠲᠤᠬᠠᠢ ᠶᠢᠨ ᠨᠤᠲᠤᠭ ᠲᠤ ᠠᠮᠢᠳᠤᠷᠠᠵᠤ ᠪᠠᠶᠢᠭᠰᠠᠨ ᠨᠢᠭᠡᠨ ᠭᠡᠭᠡᠨ ᠢ ᠬᠠᠶᠢᠯᠤᠭᠰᠠᠨ ᠭᠠᠵᠠᠷ ᠳᠡᠭᠡᠷᠡ ᠨᠢ ᠴᠢᠯᠠᠭᠤ ᠪᠠᠷ ᠣᠪᠣᠭᠠᠯᠠᠵᠤ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠶᠤᠮ ᠭᠡᠵᠤ ᠲᠤᠬᠠᠢ ᠶᠢᠨ ᠨᠤᠲᠤᠭ ᠤᠨ ᠨᠠᠰᠤᠲᠠᠳ ᠬᠠᠭᠤᠴᠢᠯᠠᠵᠤ ᠪᠠᠶᠢᠭᠰᠠᠨ ᠶᠤᠮ ᠃ ᠡᠨᠡ ᠮᠡᠲᠦ ᠪᠠᠷ ︽ᠭᠡᠭᠡᠨ ᠣᠪᠣᠭᠠ︾ ᠂ ︽ᠪᠠᠭᠰᠢ ᠶᠢᠨ ᠣᠪᠣᠭᠠ︾ ᠭᠡᠳᠡᠭ ᠨᠡᠷᠡ ᠪᠦᠬᠦᠢ ᠳᠠᠭᠠᠯᠲᠠ ᠣᠪᠣᠭᠠ ᠨᠤᠭᠤᠳ ᠪᠣᠯ ᠯᠠᠮᠠ ᠭᠡᠭᠡᠨ ᠨᠠᠷ ᠤᠨ ᠮᠡᠨᠳᠦᠯᠡᠭᠰᠡᠨ ᠭᠠᠵᠠᠷ ᠪᠤᠶᠤ ᠡᠰᠡᠬᠦᠯᠡ ᠲᠠᠭᠠᠯᠠᠯ ᠪᠣᠯᠣᠭᠰᠠᠨ ᠭᠠᠵᠠᠷ ᠨᠢ ᠪᠣᠰᠬᠠᠳᠠᠭ ᠪᠠᠶᠢᠨᠠ ᠃ ᠡᠰᠡᠬᠦᠯᠡ ᠭᠡᠭᠡᠨ ᠬᠤᠪᠢᠯᠭᠠᠳ ᠤᠨ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠶᠢᠬᠤ ᠳᠠᠭᠠᠨ ᠪᠣᠰᠬᠠᠭᠰᠠᠨ ᠣᠪᠣᠭᠠ ᠪᠤᠶᠤ ᠶᠠᠮᠠᠷ ᠨᠢᠭᠡᠨ ᠳᠤᠷᠠᠰᠬᠠᠯ ᠲᠠᠢ ᠦᠢᠯᠡ ᠠᠵᠢᠯᠯᠠᠭᠠ ᠬᠢᠭᠰᠡᠨ ᠭᠠᠵᠠᠷ ᠨᠢ ᠣᠪᠣᠭᠠ ᠪᠣᠰᠬᠠᠵᠤ ᠳᠠᠬᠢᠳᠠᠭ ᠪᠠᠶᠢᠨᠠ ᠃ ᠲᠤᠯᠭᠠ ᠣᠪᠣᠭᠠᠨ ᠤ ᠵᠡᠭᠦᠨ ᠲᠠᠯᠠ ᠶᠢᠨ ᠮᠠᠩᠬᠠᠨ ᠳᠣᠲᠣᠷᠠ ︽ᠠᠷᠠᠯ ᠤᠨ ᠣᠪᠣᠭᠠ︾ ᠭᠡᠳᠡᠭ ᠨᠡᠷᠡ ᠪᠦᠬᠦᠢ ᠪᠠᠰᠠ ᠨᠢᠭᠡᠨ ᠳᠠᠭᠠᠯᠲᠠ ᠣᠪᠣᠭᠠ ᠪᠠᠶᠢᠳᠠᠭ ᠃ ᠤᠤᠯ ᠨᠢ ᠲᠡᠷᠡ ᠮᠠᠩᠬᠠ ᠪᠠᠷ ᠪᠢᠲᠡᠭᠦᠦ ᠬᠠᠷᠠ ᠰᠢᠭᠤᠢ ᠲᠠᠢ ᠪᠠᠶᠢᠵᠤ ᠮᠣᠳᠣᠨ ᠲᠡᠷᠭᠡᠨ ᠤ ᠠᠷᠠᠯ ᠬᠢᠮᠡᠷ ᠣᠯᠠᠨ ᠮᠣᠳᠣ ᠪᠠᠶᠢᠯᠠ ᠭᠡᠵᠤ ᠲᠤᠬᠠᠢ ᠶᠢᠨ ᠨᠤᠲᠤᠭ ᠤᠨ ᠪᠤᠭᠤᠷᠤᠯᠴᠤᠳ ᠬᠠᠭᠤᠴᠢᠯᠠᠵᠤ ᠪᠠᠶᠢᠪᠠ ᠃ ᠡᠶᠢᠮᠦ ᠠᠴᠠ ᠠᠷᠠᠯ ᠤᠨ ᠮᠣᠳᠣ ᠥᠭᠴᠦ ᠠᠶᠠᠨ ᠨᠡᠭᠦᠳᠡᠯ ᠳᠤ ᠲᠠᠭᠠᠲᠠᠢ ᠶᠠᠪᠤᠭᠤᠯᠳᠠᠭ ᠣᠢ ᠰᠢᠭᠤᠢ ᠶᠢᠨ ᠡᠵᠡᠳ ᠰᠠᠪᠳᠠᠭ ᠢ ᠪᠠᠶᠠᠰᠬᠠᠬᠤ ᠵᠣᠷᠢᠯᠭᠠ ᠪᠠᠷ ᠲᠤᠬᠠᠢ ᠶᠢᠨ ᠣᠪᠣᠭᠠ ᠶᠢ ᠪᠣᠰᠬᠠᠵᠤ ᠢᠩᠭᠢᠵᠦ ᠨᠡᠷᠡᠶᠢᠳᠦᠭᠰᠡᠨ ᠪᠠᠶᠢᠵᠤ ᠪᠣᠯᠬᠤ ᠶᠤᠮ ᠃
2-3-2 ᠪᠠᠶᠢᠷᠢᠰᠢᠯ
ᠳᠠᠭᠠᠯᠲᠠ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ︵Arrangement of Subordination Oboo︶ ᠭᠡᠳᠡᠭ ᠨᠢ ᠨᠢᠭᠡᠨ ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠳᠠᠬᠢ ᠳᠠᠭᠠᠯᠲᠠ ᠣᠪᠣᠭᠠ ᠨᠢ ᠭᠤᠣᠯ ᠪᠣᠯᠬᠤ ᠰᠦᠷᠦᠭ ᠣᠪᠣᠭᠠᠨ ᠤ ᠪᠠᠨ ᠠᠯᠢ ᠲᠠᠯᠠ ᠳᠤ ᠨᠢ ᠪᠠᠶᠢᠷᠢᠰᠢᠵᠤ ᠪᠠᠶᠢᠬᠤ ᠶᠢ ᠵᠢᠭᠠᠵᠤ ᠪᠣᠢ ᠃
ᠳᠠᠭᠠᠯᠲᠠ ᠣᠪᠣᠭᠠ ᠶᠢ ᠪᠣᠰᠬᠠᠭᠰᠠᠨ ᠵᠣᠷᠢᠯᠭᠠ ᠂ ᠲᠡᠭᠦᠨ ᠤ ᠡᠭᠦᠷᠭᠡ ᠵᠢᠴᠢ ᠤᠳᠬᠠ ᠠᠭᠤᠯᠭᠠ ᠶᠢᠨ ᠲᠤᠬᠠᠢ ᠦᠰᠦᠭ ᠪᠢᠴᠢᠭ ᠤᠨ ᠮᠠᠲ᠋ᠧᠷᠢᠶᠠᠯ ᠢ ᠬᠡᠯᠡᠬᠦ ᠦᠭᠡᠢ ᠠᠮᠠᠨ ᠮᠠᠲ᠋ᠧᠷᠢᠶᠠᠯ ᠴᠦ ᠲᠤᠶᠢᠯ ᠤᠨ ᠬᠤᠮᠰᠠ ᠪᠣᠯᠬᠤᠷ ᠲᠡᠭᠦᠨ ᠤ ᠪᠦᠬᠦᠶᠢᠯᠡ ᠴᠣᠭᠴᠠ ᠶᠢᠨ ᠲᠤᠬᠠᠢ ᠬᠠᠷᠠᠬᠠᠨ ᠵᠠᠳᠠᠯᠵᠤ ᠲᠠᠶᠢᠯᠪᠤᠷᠢᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠶᠢᠭᠰᠠᠭᠠᠷ ᠪᠠᠶᠢᠨᠠ ᠃
ᠭᠠᠳᠠᠷ ᠪᠦᠲᠦᠴᠡ ᠶᠢᠨ ᠪᠠᠶᠢᠳᠠᠯ ᠠᠴᠠ ᠨᠢ ᠬᠠᠷᠠᠬᠤ ᠳᠤ ᠣᠯᠠᠩᠬᠢ ᠨᠡᠶᠢᠯᠡᠮᠡᠯ ᠣᠪᠣᠭᠠᠨ ᠤ ᠳᠠᠭᠠᠯᠲᠠ ᠣᠪᠣᠭᠠ ᠶᠢ ᠪᠠᠶᠢᠭᠠᠯᠢ ᠶᠢᠨ ᠴᠢᠯᠠᠭᠤ ᠶᠢ ᠣᠪᠣᠭᠠᠯᠠᠬᠤ ᠬᠡᠯᠪᠡᠷᠢ ᠪᠠᠷ ᠲᠣᠩ ᠳᠥᠭᠦᠮᠬᠡᠨ ᠪᠣᠰᠬᠠᠭᠰᠠᠨ ᠶᠤᠮ᠃ ᠡᠭᠦᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ ᠳᠠᠭᠠᠯᠲᠠ ᠣᠪᠣᠭᠠᠨ ᠤ ᠲᠠᠬᠢᠯᠭᠠ ᠨᠢ ᠴᠦ ᠲᠣᠩ ᠳᠥᠭᠦᠮᠬᠡᠨ ᠶᠠᠪᠤᠭᠳᠠᠳᠠᠭ ᠪᠠᠶᠢᠪᠠ ᠃ ᠵᠢᠱᠢᠶᠡᠯᠡᠪᠡᠯ ᠂ ᠪᠠᠶᠠᠨᠴᠠᠭᠠᠨ ᠣᠪᠣᠭᠠᠨ ᠲᠠᠬᠢᠯᠭᠠ ᠶᠢᠨ ᠦᠶᠡᠰ ᠭᠤᠣᠯ ᠣᠪᠣᠭᠠ ᠪᠣᠯᠬᠤ ᠪᠠᠶᠠᠨᠴᠠᠭᠠᠨ ᠣᠪᠣᠭᠠᠨ ᠲᠠᠬᠢᠯᠭᠠ ᠨᠢ ᠡᠷᠭᠦᠯ ᠪᠠᠷᠢᠴᠠ ᠶᠡᠭᠡ ᠲᠠᠢ ᠨᠣᠮ ᠭᠦᠷᠢᠮ ᠲᠠᠢ ᠶᠠᠪᠤᠭᠳᠠᠭᠰᠠᠨ ᠪᠠᠶᠢᠬᠤ ᠳᠤ ᠲᠡᠭᠦᠨ ᠤ ᠬᠠᠵᠠᠭᠤ ᠳᠠᠬᠢ ᠬᠤᠶᠠᠷ ᠳᠠᠭᠠᠯᠲᠠ ᠣᠪᠣᠭᠠᠨ ᠤ ᠡᠮᠦᠨᠡ ᠲᠠᠬᠢᠯᠭᠠ ᠶᠢᠨ ᠡᠷᠭᠦᠯ ᠪᠠ ᠨᠣᠮ ᠭᠦᠷᠢᠮ ᠤᠩᠰᠢᠬᠤ ᠶᠣᠰᠣᠯᠠᠯ ᠶᠠᠪᠤᠭᠳᠠᠭᠤᠯᠤᠭᠰᠠᠨ ᠦᠭᠡᠢ ᠪᠠᠶᠢᠪᠠ ᠃ ᠭᠡᠲᠡᠯᠡ ᠣᠪᠣᠭᠠ ᠪᠠᠨ ᠳᠠᠬᠢᠬᠤ ᠪᠠᠷ ᠢᠷᠡᠭᠰᠡᠨ ᠬᠥᠮᠥᠰ ᠥᠪᠡᠷ ᠤᠨ ᠪᠡᠯᠡᠳᠬᠡᠵᠦ ᠠᠪᠴᠢᠷᠠᠭᠰᠠᠨ ᠲᠠᠬᠢᠯ ᠤᠨ ᠡᠳ᠋ ᠂ ᠬᠤᠷᠤᠳ ᠴᠠᠭᠠᠨ ᠢᠳᠡᠭᠡ ᠪᠠ ᠠᠷᠢᠬᠢ ᠳᠠᠷᠠᠰᠤ ᠪᠠᠨ ᠭᠤᠣᠯ ᠣᠪᠣᠭᠠ ᠪᠠ ᠳᠠᠭᠠᠯᠲᠠ ᠣᠪᠣᠭᠠ ᠪᠦᠬᠦᠨ ᠳᠤ ᠡᠷᠭᠦᠵᠦ ᠣᠪᠣᠭᠠ ᠪᠠᠨ ᠨᠢᠭᠡ ᠯᠡ ᠠᠳᠠᠯᠢ ᠨᠢᠭᠡᠨ ᠰᠡᠳᠬᠢᠯ ᠢᠶᠠᠷ ᠳᠠᠬᠢᠵᠤ ᠪᠠᠶᠢᠪᠠ ᠃ ᠡᠭᠦᠨ ᠠᠴᠠ ᠦᠵᠡᠪᠡᠯ ᠳᠠᠭᠠᠯᠲᠠ ᠣᠪᠣᠭᠠ ᠶᠢ ᠲᠤᠬᠠᠢ ᠶᠢᠨ ᠨᠤᠲᠤᠭ ᠤᠨ ᠬᠥᠮᠥᠰ ᠶᠠᠮᠠᠷ ᠨᠢᠭᠡᠨ ᠬᠡᠷᠡᠭ ᠵᠣᠷᠢᠯᠭᠠ ᠪᠠᠷ ᠪᠣᠰᠬᠠᠨ ᠲᠠᠬᠢᠭᠰᠠᠨ ᠣᠪᠣᠭᠠ ᠪᠣᠯᠣᠨᠠ ᠃ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠂ ᠳᠠᠭᠠᠯᠲᠠ ᠣᠪᠣᠭᠠ ᠭᠡᠳᠡᠭ ᠨᠢ ᠣᠪᠣᠭᠠᠨ ᠰᠤᠳᠤᠯᠤᠯ ᠳᠤ ᠠᠪᠴᠤ ᠬᠡᠯᠡᠪᠡᠯ ᠨᠡᠯᠢᠶᠡᠳ ᠪᠤᠳᠤᠯᠢᠶᠠᠨ ᠲᠠᠢ ᠤᠬᠠᠭᠳᠠᠬᠤᠨ ᠪᠣᠯᠣᠨᠠ ᠃ ᠴᠣᠬᠤᠮ ᠶᠠᠮᠠᠷ ᠣᠪᠣᠭᠠ ᠶᠢ ᠨᠡᠶᠢᠯᠡᠮᠡᠯ ᠣᠪᠣᠭᠠ ᠭᠡᠵᠤ ᠂ ᠶᠠᠮᠠᠷ ᠣᠪᠣᠭᠠ ᠶᠢ ᠳᠠᠭᠠᠯᠲᠠ ᠣᠪᠣᠭᠠ ᠭᠡᠵᠤ ᠣᠶᠢᠯᠠᠭᠠᠬᠤ ᠳᠤ ᠪᠠᠶᠢᠨᠠ ᠃ ᠭᠡᠲᠡᠯᠡ ᠣᠷᠣᠨ ᠨᠤᠲᠤᠭ ᠲᠤ ᠡᠶᠢᠮᠦᠷᠬᠦᠦ ᠬᠡᠯᠡᠯᠭᠡ ᠨᠡᠷᠡᠶᠢᠳᠦᠯ ᠦᠭᠡᠢ ᠪᠠᠶᠢᠨᠠ ᠃ ᠵᠣᠬᠢᠶᠠᠭᠴᠢ ᠬᠡᠭᠡᠷᠡ ᠶᠢᠨ ᠰᠢᠨᠵᠢᠯᠡᠭᠡᠨ ᠤ ᠳᠤᠮᠳᠠ ᠣᠯᠠᠨ ᠣᠪᠣᠭᠠᠨ ᠤ ᠬᠠᠪᠲᠠᠭᠠᠢ ᠵᠢᠷᠤᠭ ᠢ ᠵᠢᠷᠤᠬᠤ ᠳᠤᠮᠳᠠ ᠂ ᠲᠡᠳᠡᠭᠡᠷ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠯ ᠪᠠᠶᠢᠴᠠ ᠶᠢᠨ ᠰᠢᠨᠵᠢ ᠴᠢᠨᠠᠷ ᠪᠣᠯᠣᠨ ᠲᠠᠬᠢᠯᠭᠠ ᠶᠢᠨ ᠪᠠᠶᠢᠳᠠᠯ ᠢ ᠦᠨᠳᠦᠰᠦᠯᠡᠵᠦ ᠡᠶᠢᠮᠦᠷᠬᠦᠦ ᠤᠬᠠᠭᠳᠠᠬᠤᠨ ᠢ ᠬᠡᠷᠡᠭᠯᠡᠭᠰᠡᠨ ᠶᠤᠮ ᠃ ᠡᠶᠢᠮᠦ ᠠᠴᠠ ᠡᠨᠡ ᠬᠦ ᠤᠬᠠᠭᠳᠠᠬᠤᠨ ᠢ ᠴᠢᠨᠠᠭᠰᠢᠳᠠ ᠨᠢᠭᠲᠠᠯᠠᠨ ᠪᠣᠯᠪᠠᠰᠤᠷᠠᠭᠤᠯᠬᠤ ᠴᠢᠬᠤᠯᠠ ᠲᠠᠢ ᠪᠠᠶᠢᠨᠠ ᠃ ᠡᠨᠡ ᠨᠢ ᠮᠥᠨ ᠴᠦ ᠮᠣᠩᠭᠤᠯ ᠨᠤᠲᠤᠭ ᠤᠨ ᠣᠪᠣᠭᠠ ᠨᠤᠭᠤᠳ ᠤᠨ ᠪᠠᠶᠢᠷᠢᠰᠢᠯ ᠪᠦᠲᠦᠴᠡ ᠶᠢᠨ ᠣᠯᠠᠨ ᠳᠠᠪᠬᠤᠷᠭᠠᠲᠤ ᠰᠢᠨᠵᠢ ᠴᠢᠨᠠᠷ ᠪᠣᠯᠣᠨ ᠪᠡᠷᠬᠡ ᠪᠤᠳᠤᠯᠢᠶᠠᠨᠲᠤ ᠮᠥᠨ ᠴᠢᠨᠠᠷ ᠢ ᠬᠠᠷᠠᠭᠤᠯᠵᠤ ᠪᠠᠶᠢᠭᠠ ᠶᠤᠮ ᠃ ᠣᠪᠣᠭᠠᠨ ᠰᠤᠳᠤᠯᠤᠯ ᠳᠤ ᠬᠥᠩᠭᠡᠨ ᠬᠠᠭᠤᠳᠠᠮ ᠬᠠᠨᠳᠤᠪᠠᠯ ᠡᠳᠡᠭᠡᠷ ᠠᠰᠠᠭᠤᠳᠠᠯ ᠤᠳ ᠴᠥᠮ ᠤᠮᠳᠤᠭᠠᠶᠢᠯᠠᠭᠳᠠᠬᠤ ᠪᠣᠯᠣᠨᠠ ᠃
ᠵᠡᠭᠦᠯᠲᠡ᠄
﹇1﹈ ﹇5﹈ ﹇15﹈ ᠰᠠᠶᠢᠨᠵᠢᠷᠭᠠᠯ 2001 ︽ᠮᠣᠩᠭᠤᠯ ᠲᠠᠬᠢᠯᠭᠠ︾ ᠪᠡᠭᠡᠵᠢᠩ᠄ ᠦᠨᠳᠦᠰᠦᠲᠡᠨ ᠤ ᠬᠡᠪᠯᠡᠯ ᠤᠨ ᠬᠤᠷᠢᠶᠠ ᠂ p.434, p.434, p.429 ᠃
﹇2﹈ 森田勇造 ︵Morita Yuzo︶ 1986『チンギス・ハンの末裔たち 騎馬民族・モンゴル族踏査行』東京᠄講談社 ︵ᠮᠤᠷᠢᠲᠨ ᠶᠦᠽᠤ ︽ᠴᠢᠩᠭᠢᠰ ᠬᠠᠭᠠᠨ ᠤ ᠬᠤᠶᠢᠴᠢᠰ ᠮᠣᠷᠢᠨ ᠨᠢᠷᠤᠭᠤᠨ ᠳᠡᠭᠡᠷᠡᠬᠢ ᠦᠨᠳᠦᠰᠦᠲᠡᠨ ᠂ ᠮᠣᠩᠭᠤᠯ ᠳᠤ ᠬᠢᠭᠰᠡᠨ ᠪᠠᠶᠢᠴᠠᠭᠠᠯᠲᠠ︾︶ p.58。
﹇3﹈ 佐野賢治 ︵Sano Kenji︶ 1988「十三塚と十三オボ」『日本民俗の伝統と創造』東京᠄弘文堂 ︵ᠰᠠᠨᠤ ᠺᠧᠨᠵᠢ ︿ᠠᠷᠪᠠᠨ ᠭᠤᠷᠪᠠᠨ ᠣᠩᠭᠤᠨ ᠪᠣᠯᠣᠨ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠ﹀ ︽ᠶᠠᠫᠤᠨ ᠤ ᠵᠠᠩ ᠦᠢᠯᠡ ᠶᠢᠨ ᠤᠯᠠᠮᠵᠢᠯᠠᠯ ᠪᠣᠯᠣᠨ ᠴᠣᠭᠴᠠᠯᠠᠯ︾︶ p.289。
﹇4﹈ 大塚和義 ︵Otsuka Katsuyoshi︶ 1984「中国・内モンゴル自治区モンゴル族のオボ祭りと牧畜」『えとのす』新日本教育図書株式会社 Vol.23 ︵ᠤᠤᠽᠦ᠋ᠺᠠ ᠺᠠᠽᠦ᠋ᠶᠣᠰᠢ ︿ᠥᠪᠥᠷ ᠮᠣᠩᠭᠤᠯᠴᠤᠳ ᠤᠨ ᠣᠪᠣᠭᠠᠨ ᠲᠠᠬᠢᠯᠭᠠ ᠪᠣᠯᠣᠨ ᠮᠠᠯ ᠠᠵᠤ ᠠᠬᠤᠢ﹀ ︽ᠵᠠᠩ ᠦᠢᠯᠡ ᠰᠤᠳᠤᠯᠤᠯ︾ 23 ᠳ᠋ᠤᠭᠠᠷ ᠪᠣᠳᠢ︶ p.22。
﹇6﹈ 秋葉隆 ︵Akiba Takashi︶ 1941 ︵1996︶「鄂博と鄂博祭」『満蒙の民族と宗教』東京᠄大空社 pp.252-264 ︵ᠠᠺᠢᠪᠠ ᠲᠠᠺᠠᠰᠢ ︿ᠣᠪᠣᠭᠠ ᠪᠣᠯᠣᠨ ᠣᠪᠣᠭᠠᠨ ᠲᠠᠬᠢᠯᠭᠠ﹀ ︽ᠮᠠᠨᠵᠤ ᠮᠣᠩᠭᠤᠯ ᠤᠨ ᠵᠠᠩ ᠦᠢᠯᠡ ᠪᠣᠯᠣᠨ ᠰᠢᠲᠦᠯᠭᠡ ᠪᠢᠰᠢᠷᠡᠯ︾︶ p.257。
﹇7﹈ 後藤富男 ︵Goto Tomio︶ 1956「モンゴル族におけるオボの崇拝―その文化における諸機能」『民族学研究』 Vol.19 ︵3-4︶ ︵ᠭᠤᠲ᠋ᠤ ᠲᠤᠮᠢᠤ᠋ ︿ᠮᠣᠩᠭᠤᠯᠴᠤᠳ ᠤᠨ ᠣᠪᠣᠭᠠᠨ ᠲᠠᠬᠢᠯᠭᠠ — ᠲᠡᠭᠦᠨ ᠤ ᠰᠣᠶᠣᠯ ᠤᠨ ᠴᠢᠳᠠᠮᠵᠢ﹀ ︽ᠤᠭᠰᠠᠭᠠᠲᠠᠨ ᠰᠤᠳᠤᠯᠤᠯ︾ 19 ᠳ᠋ᠦ᠋ᠭᠡᠷ ᠪᠣᠳᠢ ᠂ 3-4 ᠳ᠋ᠦ᠋ᠭᠡᠷ ᠬᠤᠭᠤᠴᠠᠭᠠ︶ pp.59-60。
﹇8﹈ ᠵᠠᠮᠪᠠᠯ ᠂ ᠤᠯᠠᠭᠠᠨᠴᠡᠴᠡᠭ ᠂ ᠡᠦ ᠮᠧᠢ ᠬᠤᠸᠠ 1997 ︽ᠰᠢᠯᠢ ᠶᠢᠨ ᠬᠤᠲᠠ ᠶᠢᠨ ᠰᠣᠶᠣᠯ ᠲᠡᠦᠬᠡᠨ ᠮᠠᠲ᠋ᠧᠷᠢᠶᠠᠯ︾ ︵ᠬᠤᠶᠠᠳᠤᠭᠠᠷ ᠡᠮᠬᠢᠳᠬᠡᠯ︶ ︵ᠳᠣᠲᠣᠭᠠᠳᠤ ᠮᠠᠲ᠋ᠧᠷᠢᠶᠠᠯ︶ ᠂ pp.73-74᠃
﹇9﹈ ﹇14﹈ ᠸ᠊ ᠂ ᠰᠠᠶᠢᠨᠴᠣᠭᠲᠤ 1998 ︽ᠠᠮᠢ ᠶᠢᠨ ᠰᠢᠲᠦᠯᠭᠡ︾ ︵ᠳᠡᠭᠡᠳᠦ︶ ᠬᠥᠬᠡᠬᠤᠲᠠ᠄ ᠥᠪᠥᠷ ᠮᠣᠩᠭᠤᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠ ᠂ p.422, pp.443-444 ᠃
﹇10﹈ ᠰᠠᠶᠢᠨᠵᠢᠷᠭᠠᠯ ᠂ ᠱᠠᠷᠠᠯᠳᠠᠢ 1983 ︽ᠠᠯᠲᠠᠨ ᠣᠷᠳᠣᠨ ᠤ ᠲᠠᠶᠢᠯᠭᠠ︾ ᠪᠡᠭᠡᠵᠢᠩ᠄ ᠦᠨᠳᠦᠰᠦᠲᠡᠨ ᠤ ᠬᠡᠪᠯᠡᠯ ᠤᠨ ᠬᠤᠷᠢᠶᠠ ᠂ p.344 ᠃
﹇11﹈ ᠯ᠊ ᠂ ᠬᠤᠷᠴᠠᠪᠠᠭᠠᠲᠤᠷ ᠂ ᠴ᠊ ᠂ ᠦᠵᠦᠮᠡ 1990 ︽ᠬᠠᠳᠠᠬᠢᠨ ᠠᠷᠪᠠᠨ ᠭᠤᠷᠪᠠᠨ ᠠᠲᠠᠭᠠ ᠲᠡᠭᠷᠢ ᠶᠢᠨ ᠲᠠᠶᠢᠯᠭᠠ︾ ᠬᠠᠶᠢᠯᠠᠷ᠄ ᠥᠪᠥᠷ ᠮᠣᠩᠭᠤᠯ ᠤᠨ ᠰᠣᠶᠣᠯ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠ ᠂ p.33 ᠃
﹇12﹈ ﹇13﹈ ᠰ᠊ ᠂ ᠳᠤᠯᠮᠠ 2001 ︽ᠮᠣᠩᠭᠤᠯ ᠪᠡᠯᠭᠡᠳᠡᠯ ᠵᠦᠢ︾ ︵ᠲᠡᠷᠢᠭᠦᠨ︶ ᠬᠥᠬᠡᠬᠤᠲᠠ᠄ ᠥᠪᠥᠷ ᠮᠣᠩᠭᠤᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠ ᠂ p.196, pp.192-194 ᠃
﹇16﹈ ᠰ᠊ ᠂ ᠪᠠᠳᠮᠠᠬᠠᠲᠤᠨ ᠂ ᠭ᠊ ᠂ ᠴᠡᠷᠡᠩᠬᠠᠨᠳᠠ ︵ᠨᠠᠷ ᠨᠠᠶᠢᠷᠠᠭᠤᠯᠪᠠ︶ 1990 ︽ᠪᠦᠭᠦᠳᠡ ᠨᠠᠶᠢᠷᠠᠮᠳᠠᠬᠤ ᠮᠣᠩᠭᠤᠯ ᠠᠷᠠᠳ ᠤᠯᠤᠰ ᠤᠨ ᠤᠭᠰᠠᠭᠠᠲᠠᠨ ᠤ ᠵᠦᠢ I︾ ᠬᠥᠬᠡᠬᠤᠲᠠ᠄ ᠥᠪᠥᠷ ᠮᠣᠩᠭᠤᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠ ᠂ p.839 ᠃
﹇17﹈ 宮家準 ︵Miyake Hitoshi︶ 1989 ︵1995︶『宗教民族学』東京᠄東京大学出版会 ︵ᠮᠢᠶᠠᠺᠧ ᠾᠢᠲ᠋ᠤᠰᠢ ︽ᠱᠠᠰᠢᠨ ᠤ ᠤᠭᠰᠠᠭᠠᠲᠠᠨ ᠰᠤᠳᠤᠯᠤᠯ︾︶ p.319。
ᠣᠪᠣᠭᠠ ᠰᠦᠯᠵᠢᠶᠡ ᠡᠴᠡ ᠬᠠᠩᠭ᠋ᠠᠵᠠᠢ᠃